ཕྱི་ལོ་ ༢༠༢༡ ཟླ་ ༣ ཚེས་ ༡ རེས་གཟའ་ཟླ་བ།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་ཟུང་འབྲེལ་གྱིས་གོ་སྒྲིག་གནང་བའི་རང་རིགས་མཐོ་སློབ་ཐོན་པའི་སློབ་ཕྲུག་གྲངས་ ༢༡ ལ་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐེངས་བདུན་པ་དེ་བཞིན་ཕྱི་ལོ་ ༢༠༢༠ ལོའི་ཟླ་ ༡༠ ཚེས་ ༡ ཉིན་དབུ་འཛུགས་བསྐྱངས་སྟེ་ཕྱི་ལོ་ ༢༠༢༡ ཟླ་ ༢ ཚེས་ ༢༨ ཉིན་མཇུག་སྡོམ་མཛད་སྒོ་བསྐྱངས་ཡོད།
དེ་ཡང་མཇུག་སྡོམ་མཛད་སྒོར་སྐུ་མགྲོན་གཙོ་བོར་རྒྱུད་སྨད་མཁན་རིིན་པོ་ཆེ་རྗེ་བཙུན་བསྟན་འཛིན་བཟང་པོ་མཆོག་དང་། སྐུ་མགྲོན་གཙོ་གྲས་ཕྱོགས་བཞུགས་བོད་མི་མང་སྤྱི་འཐུས་མི་འགྱུར་རྡོ་རྗེ་མཆོག ཚེ་རིང་གཡུ་སྒྲོན་མཆོག དེ་བཞིན་ཆོས་རིག་ལས་ཁུངས་ཀྱི་སྐུ་ཚབ་དང་ས་གནས་འགོ་འཛིན་གཅིག་ལྕོགས་ཐུབ་བསྟན་ཚེ་རིང་ལགས་སོགས་ཕེབས་ཡོད། སྐབས་དེར་སྐུ་མགྲོན་རྣམ་པས་ཟབ་ཁྲིད་འདིས་གཞོན་སྐྱེས་རྣམས་ལ་བོད་ཀྱི་རྩ་ཆེའི་ཆོས་དང་རིག་གཞུང་གི་གོ་རྟོགས་སྤེལ་རྒྱུར་ཕན་ཐོགས་ངེས་ཅན་ཡོད་པའི་སྐོར་ཞལ་གཅིག་གྲག་གིས་གསུངས་ཡོད་པ་མ་ཟད། སྐུ་མགྲོན་རྣམས་ཀྱིས་ཡིག་རྒྱུགས་སྐབས་རྩེ་མོར་སོན་པའི་སློབ་མ་རྣམས་ལ་བྱ་དགའ་གསོལ་རས་དང་། སློབ་ཕྲུག་བྱིངས་ལ་བསླབ་པ་ཐར་སོན་ཌིབ་ལོ་མ་(Diploma) ཕྱག་ཁྱེར་གནང་། དེ་རྗེས་སློབ་ཕྲུག་གསུམ་ནས་ཀྱང་ཟབ་ཁྲིད་དུ་མཉམ་ཞུགས་སྐབས་ཀྱི་མཐོང་ཚུལ་དང་མྱོང་ཚོར་སྤེལ་སྐབས། ཟབ་ཁྲིད་འདིི་བཞིན་ཁ་ཡོད་ལག་ཡོད་ཀྱི་ཕན་རླབས་ཆེན་པོ་བྱུང་ཡོད་སྐོར་གསུངས་སོང་བ་དང་། མཇུག་ཏུ་སློབ་མ་རྣམས་ནས་རིག་གཞུང་འཁྲབ་སྟོན་གྱིས་མཐའ་བརྒྱན་པར་བྱས་ཏེ་ཐེངས་འདིའི་ཟབ་ཁྲིད་སྦྱོར་དངོས་རྗེས་གསུམ་ལེགས་གྲུབ་ངང་མཇུག་སྒྲིལ་ཡོད།། 
