ཕྱི་ལོ་ ༢༠༢༡ ཟླ་ ༣ ཚེས་ ༡༣ རེས་གཟའ་སྤེན་པ།

༄༅། །བོད་མིའི་རང་དབང་སྒེར་ལངས་བྱས་ནས་མི་ལོ་ ༦༢ འཁོར་བའི་གསུམ་བཅུའི་དུས་དྲན་དང་འབྲེལ། བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་དང་ཨ་རིའི་གྲོས་ཚོགས་ནང་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་དང་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ངོ་སྤྲོད་གནང་མཁན་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་བསྒྲགས་གཏམ་ཞིག་སྤེལ་བའི་ནང་འཁོད་དོན། རྒྱ་ནག་གཞུང་གིས་ལོ་དྲུག་ཅུ་རིང་གཞིས་བཞུགས་བོད་མིར་མནར་གཅོད་ཚད་མེད་དང་གདུག་རྩུབ་ཆེན་པོས་ཆོས་དད་རང་དབང་དང་ཐུན་མིན་རིག་གཞུང་རྩ་གཏོར་དང་རྒྱུན་འཛིན་བྱེད་རྒྱུའི་ཐོབ་ཐང་འཕྲོག་བཞིན་ཡོད་ནའང་། ད་དུང་བོད་མི་ཕོ་མོ་རྒན་གཞོན་གྱིས་གཞི་རྒྱ་ཆེ་བའི་འགྲོ་བ་མིའི་ཐོབ་ཐང་དང་། རང་དབང་ཐོག་ཆོས་དད་རང་དབང་དང་ཐུན་མིན་རིག་གཞུང་ལ་སོགས་རྒྱུན་འཛིན་དང་སྲུང་སྐྱོབ་ཆེད་འཐབ་རྩོད་བྱེད་པའི་ཐོག་རྒྱ་ནག་གཞུང་གི་བཙན་འཛུལ་ལ་ཞི་རྒོལ་གནང་གི་ཡོད། ད་ཆ་ཕྱི་མི་བོད་ནང་འགྲོ་རྒྱུར་དམ་བསྒྲགས་ཤུགས་ཆེན་པོ་ཡོད། དེར་བརྟེན་རྒྱ་ནག་གཞུང་གིས་རྒྱལ་སྤྱིའི་ཁྲོད་གཞི་རྒྱ་ཆེ་བའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་ཁོར་ཡུག་གཏོར་བཤིག་ཇེ་ཆེར་གཏོང་བཞིན་ཡོད་པའི་གནས་ཚུལ་རྣམས་སྦས་གསང་བྱེད་ཀྱི་ཡོད་པ་གསལ་པོ་རེད། 

ད་ཆ་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་དབང་འོག་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༥ འཁོར་གྱི་ཡོད། རྒྱ་ནག་གཞུང་གིས་མི་ལོ་ཧྲི་ ༢༥ རིང་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ནང་མི་དང་བཅས་པའི་གཞི་རྩའི་འགྲོ་བ་མིའི་ཐོབ་ཐང་ལ་མུ་མཐུད་བརྩི་མེད་རྡོག་རོལ་བཏང་དང་གཏོང་བཞིན་ཡོད། འཛམ་གླིང་ནང་བཙོན་པ་ལོ་ཆུང་ཤོས་དང་དུས་ཡུན་རིང་ཤོས་སྡོོད་མཁན་ཞིག་ཆགས་ཀྱི་ཡོད། རྒྱ་ནག་གཞུང་གིས་༸རྒྱལ་བའི་ཡང་སྲིད་ངོས་འཛིན་བྱེད་རྒྱུའི་བདག་དབང་དེ་རྒྱ་ནག་གཞུང་ལ་ཡོད་སྐོར་ཤོད་བཞིན་ཡོད་པ་དེས་རྒྱ་གཞུང་གིས་བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་ཡོད་པ་གསལ་པོ་རེད།  རྒྱ་ནག་གཞུང་གིས་བོད་བརྒྱུད་ནང་བསྟན་རྩ་གཏོར་དང་བོད་མི་རྒྱ་མི་སྒྱུར་རྒྱུ། བོད་སྐད་རྒྱ་སྐད། བོད་མིའི་ངོ་བོ་རྣམས་རྩ་མེད་བཟོ་རྒྱུའི་སྲིད་བྱུས་ངན་པ་བཏིང་པའི་ཐོག་བྱ་སྤྱོད་ངན་པ་ཁག་ལག་བསྟར་བྱེད་ཀྱི་ཡོད།

ཨ་རིའི་གྲོས་ཚོགས་ནས་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་དང་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ངོ་སྤྲོད་ཀྱིས་ད་ཆ་ཁྲིམས་སུ་གཏན་འབེབས་གནང་ཟིན་ཡོད། འོན་ཀྱང་ཨ་རིའི་སྲིད་འཛིན་ཇོ་བྷཡེ་ཌན་སྲིད་གཞུང་གི་ཁྲིམས་དེ་དག་ལག་བསྟར་ཡོང་ཆེད་ང་ཚོར་འགན་ཡོད་པའི་ཐོག་འབད་བརྩོན་བྱེད་དགོས། ཨ་རིའི་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་ཡོང་བར་ང་ཚོའི་རེ་བ་བྱེད་ཀྱི་ཡོད།

བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་དེའི་བརྒྱུད་ལས་དོན་སྤྱི་དང་། ལྷག་པར་གཞུང་འབྲེལ་བཀའ་ཁྱབ་འོག་རྒྱལ་ཁབ་མཉམ་སྡེབ་ཀྱིས་བོད་ཀྱི་ཁོར་ཡུག་དང་ཆུ་མཛོད་ཐོག་སྲུང་སྐྱོབ་བྱེད་ཐུབ།

གལ་ཏེ་རྒྱ་ནག་གཞུང་གི་འགོ་ཁྲིད་དམ་ལས་བྱེད་སུ་འདྲ་ཞིག་གིས་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱས་ཚེ་ཨ་རིའི་སྲིད་གཞུང་ནས་ངེས་པར་ (Global Magnitsky Act )ཞེས་པའི་ཁྲིམས་ནང་ཚུད་པའི་བཀའ་ཆད་གང་གཏོང་དགོས་པ་སོགས་གསལ་པོ་བཟོ་དགོས། ཇི་སྲིད་བོད་ནང་ཨ་རིའི་ཚོང་འབྲེལ་དོན་གཅོད་ལས་ཁུངས་མ་བཙུགས་པར་དེ་སྲིད་ཨ་རིའི་ནང་རྒྱ་ནག་གི་ཚོང་འབྲེལ་དོན་གཅོད་ལས་ཁུངས་བཙུགས་མི་ཆོག

མཐར་ཛ་དྲག་གི་གནས་སྟངས་བཟང་དུ་འགྲོ་བའི་ཐོག་འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་བསྐྱར་དུ་ཨ་རིར་ཆིབས་སྒྱུར་གྱིས་ཨ་རིའི་སྲིད་འཛིན་གསར་པ་ཇོ་བྷཡེ་ཌན་མཆོག་དང་སྲིད་འཛིན་གཞོན་པ་ཀ་མ་ལཱ་ཧཻ་རིས་མཆོག་མཇལ་འཕྲད་ཡོང་བ་རེ་བ་ཞུ་གི་ཡོད།

གསུམ་བཅུའི་དུས་དྲན་གྱི་ཉིན་མོ་དེར་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞི་བདེ་དང་བྱམས་སྙིང་རྗེ་སོགས་ཀྱི་སྐོར་བཀའ་སློབ་ལམ་སྟོན་སྩལ་བ་གཞིར་བཟུང་ང་ཚོས་བོད་ཀྱི་བདེན་པའི་འཐབ་རྩོད་ཐོག་མུ་མཐུད་ཤར་བསྐྱོད་བྱེད་དགོས་ཀྱི་ཡོད། ང་ཚོའི་དུས་དང་རྣམ་པ་ཀུན་དུ་བོད་མི་དང་བོད་མིའི་བདེན་པའི་འཐབ་རྩོད་ཡང་ནས་ཡང་དུ་དྲན་དགོས། ཨ་རིས་གཞི་རྒྱ་ཆེ་བའི་འགྲོ་བ་མིའི་ཐོབ་ཐང་ལ་གལ་གནད་དང་བརྩི་སྲུང་བྱེད་ཀྱི་ཡོད་པ་མ་ཟད།  སྡུག་སྦྱོང་མནར་གཅོད་མྱོང་བཞིན་པ་སོགས་སྐྱེ་བོའམ་མང་ཚོགས་དེ་དག་ལ་རྒྱབ་སྐྱོར་ཤུགས་ཆེ་ཡོད། ངས་བོད་མིའི་བདེན་པའི་འཐབ་རྩོད་ལ་རྒྱབ་སྐྱོར་སྔར་ལས་ལྷག་མུ་མཐུད་བྱེད་རྒྱུ་ཡིན་པར་སྤོབས་པ་ཆེན་པོ་ཡོད། ཅེས་འཁོད་ཡོད། །