ཕྱི་ལོ་ ༢༠༢༡ ཟླ་ ༣ ཚེས་ ༤ རེས་གཟའ་ཕུར་བུ།
༄༅། །བོད་མི་ཆབ་སྲིད་བཙོན་པ་གངས་བུ་རིག་རྒྱས་ཉི་མ་ལགས་རྒྱ་གཞུང་གི་བཙོན་ཁང་ནང་ལོ་དགུའི་རིང་བཙོན་འཇུག་རྗེས་ཕྱི་ལོ་ ༢༠༢༡ ཟླ་ ༢ ཚེས་ ༢༥ ཉིན་གློད་བཀྲོལ་བཏང་འདུག
གངས་བུ་རིག་རྒྱས་ཉི་མ་ལགས་ནི་དཀར་མཛེས་ཁུལ་བྲག་མགོ་རྫོང་གཙང་སྟོད་ཡུལ་ཚོ་གཙང་སྟོད་སྡེ་པ་ནས་ཡིན་ཞིང་རང་ལོ་ ༣༠ ཙམ་ཡིན་འདུག་པ་དང་། དེ་སྔ་བཙོན་འཇུག་མ་བྱས་སྔོན་རྫོང་གི་ཆུ་གློག་དང་འབྲེལ་བའི་ལས་ཁུངས་ཤིག་གི་ནང་ལས་ཀ་བྱས་ཡོད་འདུག
དེ་ཡང་ཕྱི་ལོ ༢༠༡༢ ལོའི་བོད་ཀྱི་ལོ་གསར་སྐབས་བྲག་མགོ་དང་གསེར་རྟ་ཁུལ་གྱི་བོད་མིས་རྒྱ་ནག་གི་བཙན་གནོན་ལ་ཞི་བའི་ངོ་རྒོལ་གྱི་སྐད་འབོད་གནང་སྐབས་གངས་བུ་རིག་རྒྱས་ཉི་མ་ལགས་དང་བྲག་མགོ་དགོན་པའི་དགེ་འདུན་པ་བཀྲ་ཤིས་དར་རྒྱས་ལགས་དང་རྣམ་རྒྱལ་ལགས་སོགས་བོད་མི་བཅུ་ཙམ་སྤྱི་ཚོགས་ལ་གཏོར་བརླག་དང་། མི་རིགས་ཁ་བྲལ་གཏོང་ཐབས་བྱས་པའི་ཉེས་མིང་འོག་འཛིན་བཟུང་བྱས་ཏེ་ཁོང་ལ་མི་ལོ་བཅུའི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་གི་རོགས་པ་ཚོར་ལོ་བཅུ་གཉིས་ནས་བཅུ་བཞི་བར་གྱི་བཙོན་འཇུག་ཁྲིམས་ཐག་བཅད་ཡོད།
གངས་བུ་རིག་རྒྱས་ཉི་མ་ལགས་བཙོན་ཁང་དུ་ཡོད་སྐབས་ཁོང་དང་བཙོན་གྲོགས་གཞན་པ་ཚོར་ཉེན་རྟོག་པ་དང་བཙོན་སྲུང་བས་མནར་གཅོད་བཏང་བར་ངོ་རྒོལ་ལན་མང་བྱས་པར་བརྟེན་ཐེངས་དུ་མར་ནག་བཙོན་ཏུ་ཡུན་རིང་བཅུག་པའི་རྐྱེན་གྱིས་མིག་གསལ་པོ་མི་མཐོང་བ་དང་མགོ་ན་བ། སེམས་ཁམས་མི་བདེ་བར་གྱུར་པ། དེ་བཞིན་གློ་བ་དང་སྒལ་ཚིགས་སོགས་ནད་པར་གྱུར་ནས་ལུས་སེམས་གཉིས་ལ་རྒྱུན་ལྡན་མིན་པའི་ནད་གཞི་མང་པོ་ཕོག་ཡོད་འདུག
གངས་བུ་རིག་རྒྱས་ཉི་མ་ལགས་བཙོན་བཀྲོལ་ཐོབ་ནས་རང་ཁྱིམ་དུ་འབྱོར་སྐབས་ཁྱིམ་མི་ནང་ཁུལ་བཤད་པའི་སྐད་ཆ་ཡིག་ཐོག་ཏུ་ཕབ་པའི་ནང་། འདིར་ཕེབས་པའི་ཤ་ཉེ་རིང་རྣམས་དང་། རིགས་དང་ཚོར་བ། འདུ་ཤེས་དང་ལས་དབང་གཅིག་པའི་སྤུན་གྲོགས་རྣམ་པ། ཁྱེད་ཅག་ཡུན་རིང་པོར་སེམས་ཁུར་དང་འོ་བརྒྱལ་ལ་གཏད་སོང་། ང་རིག་རྒྱས་ཉི་མ་དེ་རིང་བཙོན་གྲོལ་བྱུང་བ་དང་སླར་ཕ་ཡུལ་གངས་ལྗོངས་ཀྱི་པང་ཁུག་འདི་ནས་ཁྱེད་ཅག་དང་མཇལ་ཐུབ་པའི་བསྐལ་བ་བྱུང་བར་སེམས་གཏིང་ནས་དགའ་བཞིན་ཡོད་བཀའ་དྲིན་ཆེ། མ་གཞི་ང་ཡིན་ན། རང་དབང་དང་འདྲ་མཉམ། བདེན་པ་དང་ཐོབ་ཐང་རྩོད་ས་ནས། རྒྱ་ནག་པོས་མ་ཉེས་ཁ་གཡོག་གིས་ཉེས་མེད་ཉེས་འགེལ་བྱས་ཏེ་མི་ལོ་བཅུའི་རིང་ལ་མི་ལུས་ཀྱི་རང་དབང་ཡོད་ཚད་འཕྲོག་ཏེ་མནར་གཅོད་ཚད་མེད་མྱངས་བ་ནི་ཤི་ཡང་བརྗེད་དུ་མེད་པས་ན་ཟུག་དྲག་པོ་ཞིག་ཏུ་གྱུར་ཡོད།
མནར་གཅོད་ཀྱི་མི་ལོ་དགུ་ཡང་ཐུང་ཐུང་ཞིག་ག་ལ་ཡིན། ང་དེ་རིང་སྔོན་མའི་ན་གཞོན་དེ་ཡང་མིན་ལ་ངའི་དྲན་པ་ཡང་དེ་འདྲའི་གསལ་པོ་ཞིག་མ་རེད་དེ། ངས་ཁྱེད་ཚོར་ཞུ་ཆོག་ཆོག་ཅིག་ལ་ང་རང་སྔར་བཞིན་འགན་ཁུར་ཡོད་པའི་བོད་མི་ཞིག་ཡིན་པ་གཏན་ནས་བརྗེད་མེད། ད་རུང་མ་ཤི་དམྱལ་བར་ལན་མང་འཁྱམས་དགོས་ཀྱང་། གཏན་ནས་བརྗེད་ཀྱང་མི་སྲིད་ལ། ཁྱེད་ཚོས་ཀྱང་རང་ཉིད་བོད་མི་ཞིག་ཡིན་པ་དུས་ནམ་ཡང་སེམས་ནས་བོར་མི་ཉན།
རང་རང་གི་དཔའ་སྤོབས་མ་ཞུམ། ནང་ཁུལ་ལ་མཐུན་སྒྲིལ་བྱོས། ལྷག་ཏུ་རང་གི་སྐད་ཡིག་དང་ཆོས་ལུགས་ལ་སློབ་སྦྱོང་བྱོས། ང་ཚོ་ཚང་མ་རྨོངས་གཉིད་ལས་སད་དགོས། མནར་གཅོད་ལས་གྲོལ་དགོས། སྐད་ཆ་འདི་དག་ནི་ང་དེ་རིང་གསོན་པོ་ཡིན་པའི་རྟགས་དང་། ཡུན་རིང་ཡིད་ལ་བཅངས་པའི་སེམས་གཏམ་དམར་དམར་ཡིན་པས་ཚང་མས་ཐུགས་ལ་འཛིན་པར་ཞུ། ཞེས་འཁོད་ཡོད། །
