ཕྱི་ལོ་༢༠༢༡ ཟླ་ ༣ ཚེས་ ༡༣ རེས་གཟའ་སྤེན་པ།༄༅། །ཕྱི་ལོ་ ༢༠༢༡ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ པའི་ཉིན་མོར་ཁེ་ན་ཌའི་ཕྱོགས་འགལ་རྙིང་ཞེན་ཆབ་སྲིད་ཚོགས་པའི་དབུ་ཁྲིད་ཨེ་རིན་ཨོ་ཊོལ་ (Erin O’Toole) མཆོག་གིས་བསྒྲགས་གཏམ་ཞིག་སྤེལ་བའི་ནང་འཁོད་དོན། དེ་རིང་ནི་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༢ རེད། དེ་རིང་གི་ཉིན་མོ་འདིར་ཕྱི་ལོ་ ༡༩༥༩ ལོར་བོད་མི་རྣམས་ཀྱིས་བོད་ནང་ཡོད་པའི་རྒྱ་ནག་དམར་ཤོག་གཞུང་ལ་རང་དབང་སྒེར་ལངས་ཀྱིས་ངོ་རྒོལ་བྱས་པ་དེ་དྲན་གསོ་བྱེད་ཀྱི་ཡོད། བོད་མི་དཔའ་བོ་དམའ་མོ་ཚོས་བོད་ཀྱི་རྩ་དོན་སླད་རང་སྲོག་བློས་བཏང་གནང་མཁན་རྣམས་ཀྱིས་གཙོས་ཁོང་ཚོའི་ནང་མི་ཡོངས་ལ་ངས་གུས་འདུད་དང་གསོལ་བ་སྨོན་ལམ་འདེབས་རྒྱུ་ཡིན། རྙིང་ཞེན་ཆབ་སྲིད་ཚོགས་པའི་འགོ་ཁྲིད་ཅིག་ཡིན་པའི་ཆ་ནས་ངས་ཆོས་དད་རང་དབང་ཧ་ཅང་གཙིགས་ཆེར་འཛིན་གྱི་ཡོད།

ང་ཚོ་ངེས་པར་གཉའ་གནོན་དང་འགྲོ་བ་མིའི་ཐོབ་ཐང་གི་དཀའ་ངལ་མྱོང་བཞིན་པ་རྣམས་ཀྱི་རྒྱབ་ཏུ་ལང་དགོས། རྙིང་ཞེན་ཆབ་སྲིད་ཚོགས་པའི་ངོས་ནས་རྒྱ་ནག་ལ་ཆོས་ཉམས་ལེན་བྱེད་མཁན་བོད་མི་དང་། ཡི་ཤུ། རྩ་རླུང་སྒོམ་སྒྲུབ་པ་རྣམས་ལ་དྲག་གནོན་བྱེད་བཞིན་པ་མཚམས་འཇོག་དང་། དེ་བཞིན་ཡུ་གུར་མི་རིགས་རྩ་གཏོར་དུ་གཏོང་བཞིན་པ་མཚམས་འཇོག་བྱེད་དགོས་པའི་འབོད་སྐུལ་གནང་ཡོད།

རྒྱལ་སྤྱིའི་སྟེང་ཆོས་དད་རང་དབང་ལ་ཉེན་ཁ་ཆེ་རུ་འགྲོ་བཞིན་པའི་སྐབས་ཁེ་ན་ཌའི་ངོས་ནས་ངེས་པར་ཆོས་དད་རང་དབང་ཆེད་དུ་ལས་འགུལ་སྤེལ་མཁན་རྣམས་ཀྱི་རྒྱབ་ཏུ་ལང་དགོས། ཕྱི་ལོ་ ༢༠༡༢ ལོར་རྙིང་ཞེན་ཆབ་སྲིད་ཚོགས་པ་གཞུང་འཛིན་ཡིན་པའི་སྐབས་ཆོས་དད་རང་དབང་གི་ལས་ཁུངས་ཤིག་བཙུགས་ཡོད། ལས་ཁུངས་དེས་རྒྱལ་སྤྱིའི་ཆོས་དད་རང་དབང་སྲུང་སྐྱོབ་དང་ཁེ་ན་ཌའི་བཟོད་བསྲན་དང་སྣ་མང་རིང་ལུགས་ཀྱི་རིན་ཐང་གོང་མཐོར་གཏོང་རྒྱུའི་འབད་བརྩོན་ཆེན་པོ་གནང་ཡོད།

བོད་མི་ཚོས་མིང་དོན་མཚུངས་པའི་རང་སྐྱོང་དང་། འགྲོ་བ་མིའི་ཐོབ་ཐང་། དྲང་བདེན་བཅས་ཐོབ་ཐབས་སུ་འདས་པའི་ལོ་ངོ་ ༦༢ རིང་གཞན་ལ་སྡང་སེམས་མེད་པར་འཚེ་མེད་ཞི་བའི་འཐབ་རྩོད་གནང་ཡོད། འདི་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་རྣམས་ཀྱི་བློ་བརྟན་འགྱུར་མེད་ཡིན་པའི་དཔང་རྟགས་གལ་ཆེན་ཞིག་ཡིན། ང་ཚོས་བོད་མི་རྣམས་ལ་རྒྱབ་སྐྱོར་བྱེད་ཀྱི་ཡོད། ཅེས་བསྒྲགས་གཏམ་སྤེལ།།