ཕྱི་ལོ་ ༢༠༢༡ ཟླ་ ༣ ཚེས་ ༤ རེས་གཟའ་ཕུར་བུ།༄༅། །འདི་གར་ཀུལླུ་མ་ནཱ་ལི་བོད་མིའི་གཞིས་ཆགས་ཀྱི་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། དཔལ་ལྡན་བཀའ་ཤག་ནས་ཕྱི་ལོ་  ༢༠༢༠ ཟླ་ ༧ ཚེས་ ༠༡ ནས་ ༢༠༢༡ ཟླ་ ༦ ཚེས་ ༣༠ བར་ལོ་གཅིག་རིང་སྤྱི་ནོར་༸གོང་ས་༸སྐྱབས་མགོན་ཆོན་པོ་མཆོག་ལ་བཀའ་དྲིན་རྗེས་དྲན་གྱི་ལོ་སྲུང་བརྩི་ཞུ་རྒྱུའི་ལས་གཞི་འདྲ་མིན་ཁོངས་༸རྒྱལ་བའི་ཐུགས་བསྐྱེད་དམ་བཅའ་བཞིའི་ནང་ནས་གཉིས་པ་སྟེ་འཛམ་གླིང་ནང་གི་ཆོས་ལུགས་ཕན་ཚུན་གུས་བརྩི་ལྡན་པའི་ཐོག་མཐུན་འབྲེལ་གོང་མཐོར་བརྒྱུད་འཇིག་རྟེན་གྱི་སྐྱེ་འགྲོ་ཡོངས་ལ་བདེ་སྐྱིད་བསྐྲུན་རྒྱུའི་ཐབས་ལམ་བཟང་ཤོས་གཅིག་ཏུ་གཟིགས་ཏེ་འདས་པའི་ལོ་ངོ་ ༦༠ ལྷག་རིང་ཡུལ་གྲུ་གང་དུ་ཕེབས་ཀྱང་འཛམ་གླིང་ནང་རིས་སུ་མ་ཆད་པའི་ཆོས་ལུགས་ཁག་ཚང་མ་ཐུགས་མཐུན་ཁྲིམས་གཙང་གི་ཐོག་ནས་ཕན་ཚུན་གྱི་གནས་ཚུལ་ཤེས་རྟོགས་བྱས་པ་ཡིན་ན། ཞི་མཐུན་མཉམ་གནས་ཡོང་རྒྱུའི་སྐོར་བཀའ་སློབ་གྲངས་ལས་འདས་པ་ཕེབས་པ་བཞིན། འདི་ནས་ཆོས་ལུགས་མཐུན་འབྲེལ་གྱིས་ལས་གཞི་འདི་༸རྒྱལ་བའི་བཀའ་དྲིན་རྗེས་དྲན་དང་འབྲེལ་བའི་ལས་དོན་གལ་ཆེ་ཤོས་ཤིག་ཆགས་ཡོད།ཕྱི་ལོ་ ༢༠༢༡ ཟླ་ ༠༣ ཚེས་ ༠༣ རེས་གཟའ་ལྷག་པ་ལྷག་དཀར་ཉིན་ཀུ་ལླུ་མ་ནཱ་ལི་བོད་མིའི་གཞིས་སྒར་ས་གནས་སུ་ཆོས་ལུགས་མཐུན་འབྲེལ་གྱི་མཛད་སྒོར་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག་དང་། ལོ་ཆེན་མཁན་ཚབ་རིན་པོ་ཆེ་མཆོག དེ་བཞིན་མ་ནཱ་ལི་རྟེན་གཞི་བྱས་པའི་ཆོས་ལུགས་གཞན་ཁག་གི་མཆོད་དཔོན། ཡི་ཤུའི་མཆོད་དཔོན་ (Rev. Naresh Lall ji)  ཁ་ཆེའི་མཆོད་དཔོན་  (Imam Molana Sajit ji)  ཧིན་དྷུའི་མཆོད་དཔོན་ (Pandit Mahima Nautiyal ji)   སིཀ་མཆོད་དཔོན་ (Sardar Bhagtishwar Singh ji) བཅས་ས་གནས་སུ་ཕེབས་ཡོད་མ་ཟད་ས་གནས་ཡུལ་མིའི་བརྒྱ་དཔོན་དང་བོད་དོན་རྒྱབ་སྐྱོར་ཚོགས་པའི་ཚོགས་མི་བཅས་ཕེབས་ཡོད།ས་གནས་འགོ་འཛིན་ཐུབ་བསྟན་ཆོས་འཕེལ་ལགས་ཀྱིས་འཚམས་འདྲི་དང་སྦྲགས་ངོ་སྤྲོད་གསུང་བཤད་གནང་སྟེ་མཛད་སྒོ་དབུ་འཛུགས་ཞུས། དེ་ནས་རིམ་བཞིན་ཆོས་ལུགས་ཁག་གི་མཆོད་དཔོན་རྣམས་ནས་འཛམ་གླིང་ཞི་བདེ་དང་ཆོས་ལུགས་མཐུན་འབྲེལ་སྐོར་གསུང་བཤད་གནང༌གྲུབ་མཚམས་ཆོས་ལུགས་ཁག་གི་མཆོད་དཔོན་རྣམས་ལ་ལེགས་སྐྱེས་ཕྱག་རྟགས་ཕུལ་ཡོད་པ་དང་། དྭགས་པོ་བཤད་སྒྲུབ་གླིང་དགོན་པ་ནས་སྐུ་མགྲོན་དང་མཛད་སྒོར་ཕེབས་པ་ཡོངས་ལ་ཉིན་གུང་གསོལ་ཚིགས་མཐུན་འགྱུར་གནང་བར་ཐུགས་རྗེ་ཆེ་ཞུས་གནང་ཡོད།

མཐར་ས་གནས་འཐུས་ཚོགས་ཀྱི་ཚོགས་གཙོ་བསྟན་འཛིན་ཐོགས་མེད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད།