ཕྱི་ལོ་ ༢༠༢༡ ཟླ་ ༢ ཚེས་ ༡༦ རེས་གཟའ་མིག་དམར། 

༄༅། །ཕྱི་ལོ་ ༢༠༢༡ ཟླ་ ༢ ཚེས་ ༡༣ རེས་གཟའ་སྤེན་པ་ཉིན་ཨ་རིའི་ཕྱི་སྲིད་ལྷན་ཁང་ནས་དྲ་ཐོག་བརྒྱུད་བོད་ཀྱི་ལོ་གསར་སྲུང་བརྩིའི་མཛད་སྒོ་གཟབ་རྒྱས་ཞིག་གོ་སྒྲིག་གནང་ཡོད།
དེ་ཡང་མཛད་སྒོའི་ཐོག་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀིན་ (Antony Blinken) མཆོག་གིས་འཛམ་གླིང་ཕྱོགས་གང་ས་ནས་བོད་ཀྱི་ལོ་གསར་སྲུང་བརྩི་ཞུ་མཁན་ཡོངས་དང་། ལྷག་པར་ཧི་མ་ལ་ཡ་ཁུལ་གྱི་མི་རིགས་རྣམས་ལ་བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་གནང་བའི་བརྙན་ཐུང་ཞིག་གཟིགས་འབུལ་ཞུས།

སྐབས་དེར་ཨ་རིའི་ཕྱི་སྲིད་དྲུང་གཞོན་ལས་ཚབ་སྐུ་ཞབས་ (Dan Smith) ལགས་དང་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་ལས་དོན་ཚན་པའི་དྲུང་ཆེ་ལས་རོགས་ཀྱི་ལས་ཚབ་ (Lisa Peterson) ལགས། རྒྱལ་སྤྱི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་རི་ཆ་ཌི་གྷེར་ (Richard Gere) ལགས་ཀྱིས་གཙོས་གནད་ཡོད་མི་སྣ་ཁག་གཅིག་མཉམ་ཞུགས་གནང་ཡོད།
སྐབས་དེར་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རི་གཞུང་ནས་ད་བར་བོད་དོན་དང་བོད་མིར་རྒྱབ་སྐྱོར་གཡོ་བ་མེད་པ་གནང་བཞིན་པར་ཐུགས་རྗེ་ཆེ་ཞེས་དང་། རྒྱ་ནག་གཞུང་གིས་ད་དུང་ཡིན་ནའང་གཞིས་བཞུགས་བོད་མིར་གདུག་རྩུབ་མནར་གཅོད་གཏོང་བཞིན་ཡོད་སྐོར་སོགས་དང་། གཞན་ཡང་ཁོང་གིས་ཏོག་དབྱིབས་གཉན་རིམས་ཀྱི་ཛ་དྲག་དུས་སྐབས་སུ་ཨ་རིར་གནས་སྡོད་བོད་མི་རྣམས་ནས་ལས་དོན་ཧུར་ཐག་གནང་བར་ཡི་རང་བསྔགས་བརྗོད་གནང་།

སྤྱིར་ཨ་རིའི་ཕྱི་སྲིད་ལྷན་ཁང་གིས་འདས་པའི་ལོ་ཤས་ནང་ལོ་ལྟར་བོད་ཀྱི་ལོ་གསར་སྲུང་བརྩི་དང་འབྲེལ་མཛད་སྒོ་ཞིག་ཚོགས་ཀྱི་ཡོད་ཀྱང་། འདི་ལོར་ཏོག་དབྱིབས་གཉན་རིམས་ཀྱི་རྐྱེན་པས་ལོ་གསར་གྱི་མཛད་སྒོ་དེ་བཞིན་དྲ་ལམ་བརྒྱུད་སྲུང་བརྩི་གནང་སྟེ་ཐད་ཀར་རྒྱང་སྲིང་གནང་བར་མང་ཚོགས་ཕོན་ཆེ་མཉམ་ཞུགས་གནང་ཡོད་པ་བཅས། །

མཛད་སྒོར་མཉམ་ཞུགས་གནང་མཁན་གྱི་མཚན་གཞུང་གཤམ་གསལ།

Dan Smith
Lisa Peterson
Kara McDonald
Sung Kim
Dean Thompson,
Laura Stone
Nancy Izzo Jackson
Richard Albright
Richard Gere
Gare Smith
Mollie Rodriguez
Bhuchung Tsering