ཕྱི་ལོ་ ༢༠༢༡ ཟླ་ ༢ ཚེས་ ༡༣ རེས་གཟའ་སྤེན་པ།

༄༅། །ཨ་རིའི་ཕྱི་སྲིད་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀིན་ (Antony Blinken) མཆོག་གིས་འཛམ་གླིང་ཕྱོགས་གང་ས་ནས་བོད་ཀྱི་ལོ་གསར་སྲུང་བརྩི་ཞུ་མཁན་ཡོངས་དང་། ལྷག་པར་ཧི་མ་ལ་ཡ་ཁུལ་གྱི་མི་རིགས་རྣམས་ལ་བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་གནང་འདུག

དེ་ཡང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀིན་མཆོག་གིས་འཚམས་འདྲི་གནང་དོན། ཧི་མ་ལ་ཡ་ཁུལ་དང་འཛམ་གླིང་གི་ཕྱོགས་གང་ས་ནས་བོད་ཀྱི་ལོ་གསར་སྲུང་བརྩི་ཞུ་མཁན་ཡོངས་ལ་ངས་ཨ་རིའི་ཚབ་ཞུས་ཏེ་སྤྲོ་སེམས་འཁོལ་བའི་ངང་འཚམས་འདྲི་ཞུ་རྒྱུ་ཡིན། བོད་ཀྱི་རིག་གཞུང་ལོ་ངོ་ཉིས་སྟོང་ལྷག་རིང་འཕེལ་རྒྱས་བྱུང་བའི་ལོ་རྒྱུས་ཡོད།

ཨ་རིའི་སྲིད་འཛིན་སྐུ་ཞབས་ཇོ་བཱཡི་ཌེན་མཆོག་གི་འཛིན་སྐྱོང་གི་ངོས་ནས་བོད་ཀྱི་ཆོས་དང་། རིག་གཞུང་། སྐད་ཡིག་བཅས་བདག་གཅེས་དང་སྲུང་སྐྱོབ་བྱེད་རྒྱུའི་ཆོད་སེམས་བརྟན་པོ་ཡོད། བོད་ཀྱི་རིག་གཞུང་ཕྱུག་པོ་དེ་བོད་ནང་ཙམ་མ་ཟད་དེང་སང་འཛམ་གླིང་གི་ས་ཕྱོགས་གང་ས་ནས་སྲུང་བརྩི་ཞུ་བཞིན་ཡོད། ཁྱེད་ཚོའི་རིག་གཞུང་ཕྱུག་པོ་དེས་བྱམས་བརྩེ་དང་། སྙིང་རྗེ། དྲང་བདེན། བཟོད་བསྲན། བཟོད་སྒོམ། ཞི་བདེ་བཅས་མཚོན་གྱི་ཡོད།

ང་ཚོའི་ངོས་ནས་རིག་གཞུང་ཕྱུག་པོ་དེ་དག་ཁྱེད་རང་ཚོ་དང་ལྷན་ལོ་གསར་སྐབས་དང་དུས་ཆེན་གཞན་གྱི་སྐབས་སུ་སྲུང་བརྩི་ཞུ་རྒྱུའི་འདོད་འདུན་ཡོད། ཅེས་འཚམས་འདྲི་གནང་འདུག་པ་བཅས།།