ཕྱི་ལོ་ ༢༠༢༡ ཟླ་ ༢ ཚེས་ ༡༨ རེས་གཟའ་ཕུར་བུ།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༡ ཟླ་ ༢ ཚེས་ ༡༧ ཉིན་བརྙན་འཕྲིན་བརྒྱུད་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་ཨ་རི་བོད་ཁང་ (TIBET HOUSE US) གི་བོད་ཀྱི་ལོ་གསར་རོལ་དབྱངས་དགོང་ཚོགས་ཐེངས་ ༣༤ པའི་མཛད་སྒོར་བཀའ་སློབ་སྩལ་དོན། ང་ཚོ་བཙན་བྱོལ་བ་ཆགས་པའི་སྐབས་རྒྱ་གར་ལ་བཙན་བྱོལ་དུ་སླེབས་པ་དང་། ཕྱོགས་གཅིག་ནས་ཐབས་སྐྱོ་པོ་རེད། འོན་ཀྱང་ཕྱོགས་གཞན་ཞིག་ནས་བལྟས་པ་ཡིན་ན། ང་ཚོར་བོད་ཀྱི་རིག་གཞུང་དང་སྲོལ་རྒྱུན་འཛམ་གླིང་ཡོངས་ལ་སྟོན་རྒྱུའི་གོ་སྐབས་གསར་པ་ཞིག་བྱུང་བ་རེད། དེ་དང་ཆབས་ཅིག་ཏུ་ཨ་རི་བ་སྐུ་ཞབས་བྷོབ་ཐར་མན་ (Bob Thurman) ལགས་ཚུད་པའི་ཨ་རི་བ་དང་ཕྱི་རྒྱལ་བ་ཚོས་བོད་ཀྱི་རིག་གཞུང་དང་སྲོལ་རྒྱུན་ལ་ཡིད་དབང་འཕྲོག་པ་རེད།
དེ་སྔ་སྐུ་ཞབས་བྷོབ་ཐར་མན་ལགས་རྡ་སར་ཕེབས་མྱོང་ཡོད་པ་མ་ཟད། བོད་བརྒྱུད་ནང་བསྟན་དང་རིག་གཞུང་ལ་དངོས་གནས་དྲང་གནས་དོ་སྣང་གནང་མཁན་ཞིག་ཡིན། སྐབས་དེ་དུས་བྷོབ་ཐར་མན་ལགས་ཀྱིས་གྲྭ་པ་ནང་བཞིན་གྱོན་ཆས་གྱོན་གནང་གི་རེད། རིམ་པས་བྷོབ་ཐར་མན་ལགས་ཀྱིས་ཨ་རིའི་ནིའུ་ཡོག་གི་གྲོང་ཁྱེར་ནང་ཨ་རི་བོད་ཁང་འཛུགས་སྐྲུན་གནང་ཡོད། དེ་ནི་ཧ་ཅང་ཡག་པོ་རེད། བོད་ཀྱི་རིག་གཞུང་བོད་མིའི་ཁྲོད་བདག་གཅེས་གནང་བ་ཙམ་མ་ཟད། འཛམ་གླིང་ཡོངས་ལ་བསྟན་ཡོད།
དཔེར་ན་ཨ་རི་བོད་ཁང་ལྟ་བུ་ཧ་ཅང་བེད་སྤྱོད་ཆེན་པོ་ཡོད། ཚོགས་པ་དེ་དག་གིས་བོད་ཀྱི་རིག་གཞུང་དང་། བོད་མིའི་ཡུལ་སྲོལ་གོམས་གཤིས། བོད་ཀྱི་ནང་པའི་རིག་གཞུང་ངོ་མ་ཇི་ཡིན་སྐོར་གསལ་པོ་བྱས་ནས་འགྲེལ་བཤད་བརྒྱག་པར་ཕན་ཐོགས་ཆེན་པོ་འབྱུང་གི་ཡོད། བོད་ཀྱི་རིག་གཞུང་ནི་དཔལ་ནཱ་ལནྡྲའི་རིག་གཞུང་ཆགས་ཡོད། སྐུ་ཞབས་བྷོབ་ཐར་མན་ལགས་ཀྱིས་བོད་ཀྱི་ནང་པའི་རིག་གཞུང་སྐོར་སྦྱངས་མྱོང་ཡོད་སྟབས་མཁྱེན་གྱི་ཡོད། སངས་རྒྱས་པའི་ཆོས་དང་ལྷག་པར་དཔལ་ནཱ་ལེནྡྲའི་ཆོས་བརྒྱུད་ནི་གཙོ་བོ་ཚད་མ་རིག་པའི་ལམ་ནས་དཔྱད་པ་བྱས་ནས་གཞི་ལམ་འབྲས་གསུམ་གྱི་གནས་ཚུལ་གཏན་ལ་འབེབས་བཞིན་ཡོད།
དེ་སྔ་མི་ཚོས་བོད་ཀྱི་ཆོས་བརྒྱུད་དེ་དག་བླ་མའི་ཆོས་ལུགས་རེད་ཅེས་འགྲེལ་བཤད་བརྒྱབ་ཡོད། དེང་སང་མི་མང་པོས་བོད་ཀྱི་ནང་པ་སངས་རྒྱས་པའི་ཆོས་བརྒྱུད་དེ་དག་དཔལ་ནཱ་ལེནྡྲའི་ཆོས་བརྒྱུད་དངོས་ཡིན་པ་བརྗོད་ཀྱི་ཡོད་པ་མ་ཟད། དཔལ་ནཱ་ལེནྡྲའི་ཆོས་བརྒྱུད་ནི་གཙོ་བོ་ཚད་མ་རིག་པའི་ལམ་ནས་དཔྱད་པ་བྱས་ནས་གཞི་ལམ་འབྲས་གསུམ་གྱི་གནས་ཚུལ་གཏན་ལ་འབེབས་བཞིན་ཡོད་པ་བརྗོད་ཀྱི་ཡོད། དེར་བརྟེན་དེང་སང་ཚན་རིག་པ་མང་པོས་སངས་རྒྱས་པའི་ཆོས་ལ་དགའ་མོས་གནང་གི་ཡོད།
གནས་སྟངས་འདི་འདྲའི་སྐབས་སུ་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་ཨ་རི་བོད་ཁང་ཧ་ཅང་བེད་སྤྱོད་ཆེན་པོ་ཡོད། སྐུ་ཞབས་བྷོབ་ཐར་མན་ལགས་དང་ཁོང་གི་བཟའ་ཟླ་རྣམ་གཉིས་ནས་དོན་དང་ལྡན་པའི་ཕྱག་ལས་གནང་ཡོད། ངོས་ཀྱིས་སྐུ་ཞབས་བྷོབ་ཐར་མན་ལགས་དང་། ཁོང་ལ་རོགས་རམ་གནང་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། རིམ་པས་ནུབ་ཕྱོགས་སུ་གོ་རྟོགས་གསར་པ་ཞིག་སྤེལ་ཐུབ་ངེས་རེད། ངོས་ཀྱི་སྒེར་གྱི་ཡུན་རིང་གྲོགས་པོ་སྐུ་ཞབས་བྷོབ་ཐར་མན་ལགས་ལ་རྗེས་སུ་ཡི་རང་ཞུ་གི་ཡོད། དེ་བཞིན་འདས་པོ་སོག་པོ་དགེ་བཤེས་དབང་རྒྱལ་ལགས་ལ་ཐུགས་རྗེ་ཆེ་ཞུ་རྒྱུ་ཡིན། ཁོང་ཨ་རིའི་ནིའུ་འཇར་སི་གྲོང་ཁྱེར་གྱི་ལྷ་ཁང་ཆུང་ཆུང་ཞིག་གི་ནང་བཞུགས་མྱོང་ཡོད། དགེ་བཤེས་ལགས་ཀྱིས་ཨ་རིའི་གཞོན་སྐྱེས་རྣམས་ལ་བོད་ཀྱི་རིག་གཞུང་ངོ་སྤྲོད་གནང་ཡོད།
སྐུ་ཞབས་བྷོབ་ཐར་མན་ལགས་ཀྱིས་ཀྱང་ཚོགས་པ་བཙུགས་ཏེ་ཨ་རི་བ་དང་མི་རིགས་གཞན་རྣམས་ལ་བོད་ཀྱི་རིག་གཞུང་སྐོར་གོ་རྟོགས་སྤེལ་རྒྱུར་རོགས་རམ་གནང་ཡོད། ངོས་ཀྱིས་སྐུ་ཞབས་བྷོབ་ཐར་མན་ལགས་ཀྱི་ཕྱག་ལས་ཁག་ལ་རྗེས་སུ་ཡི་རང་ཞུ་གི་ཡོད། ངོས་ཀྱིས་སྐུ་ཞབས་བྷོབ་ཐར་མན་ལགས་དང་ལྷན་གནས་ཚུལ་དེ་དག་ཞུ་འདོད་བྱུང་། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སློབ་སྩལ།།
