ཕྱི་ལོ་ ༢༠༢༡ ཟླ་ ༢ ཚེས་ ༡ རེས་གཟའ་ཟླ་བ།
༄༅། །བོད་ཀྱི་སྐད་ཡིག་སློབ་གསོའི་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་རྒྱ་ནག་གཞུང་གིས་བཙན་དབང་ཐོག་ལོ་ལྔའི་རིང་བཙོན་འཇུག་གི་ཁྲིམས་ཐག་བཅད་དེ་ཕྱི་ལོ་ ༢༠༢༡ ཟླ་ ༡ ཚེས་ ༢༨ ཉིན་དུས་ཡུན་གཙང་སྟེ་གློད་བཀྲོལ་ཐོབ་པར་ཡོ་རོབ་སྤྱི་མཐུན་ཚོགས་པས་བསྒྲགས་གཏམ་ཞིག་སྤེལ་བའི་ནང་འཁོད་དོན། རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ལ་ཆ་རྐྱེན་གང་ཡང་མེད་པའི་ཐོག་ནས་རང་ཉིད་ཀྱི་གཞི་རྩའི་འགྲོ་འདུག་སྤྱོད་གསུམ་སོགས་ཀྱི་ཐོབ་ཐང་ལོངས་སུ་སྤྱོད་བཅུག་དགོས་པ་མ་ཟད། དེ་སྔ་བཀྲ་ཤིས་དབང་ཕྱུག་ལགས་བཀའ་སྐྱིལ་བྱེད་པའི་དུས་ཡུན་སྐབས་རྒྱ་ནག་གཞུང་གིས་སྡུག་སྦྱོང་མནར་གཅོད་གཏོང་མཁན་འབྲེལ་ཡོད་དཔོན་རིགས་ཚོར་རྟོག་ཞིབ་བྱེད་དགོས་པའི་ནན་སྐུལ་གནང་ཡོད།
གཞན་ཡང་ཡོ་རོབ་སྤྱི་མཐུན་ཚོགས་པས་ད་ཆ་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་རྩོད་ལེན་པ་བཙོན་འཇུག་བྱས་པ་རྣམས་ཆ་རྐྱེན་གང་ཡང་མེད་པའི་ཐོག་ཕྲལ་དུ་གྲོད་བཀྲོལ་བཏང་དགོས་པ་དང་འབྲེལ། ཁོང་རྣམ་པར་བཀའ་སྐྱིལ་གྱི་དུས་ཡུན་སྐབས་ཁྲིམས་དང་མཐུན་པའི་ཐོག་ནས་ཁྲིམས་གཏུག་ཆོག་པའི་ཐོབ་ཐང་སྤྲོད་དགོས། བཙོན་ཁང་དུ་སྡུག་སྦྱོང་མནར་གཅོད་ཀྱི་བྱ་སྤྱོད་ངན་པ་སོགས་སྤེལ་མཚམས་འཇོག་དགོས། ཞེས་ནན་སྐུལ་གནང་།
ཡོ་རབ་སྤྱི་མཐུན་ཚོགས་པས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལག་བསྟར་གནང་ཕྱོགས་ཐད་མུ་མཐུད་གཟིགས་ཞིབ་གནང་རྒྱུ་ཡིན་སྐོར་སོགས་གསུངས་ཡོད་པ་བཅས། །
