ཕྱི་ལོ་ ༢༠༢༡ ཟླ་ ༢ ཚེས་ ༡༢ རེས་གཟའ་པ་སངས།༄༅། །བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོ་གསར་དུ་བཞད་པའི་གཞུང་འབྲེལ་དགའ་སྟོན་མཛད་སྒོ་བོད་མིའི་སྒྲིག་འཛུགས་ཀྱི་བསྟི་གནས་གངས་སྐྱིད་སྲིད་སྐྱོང་ཚོགས་ཁང་དུ་ཚོགས་ཡོད།

དེ་ཡང་ལོ་གསར་ཚེས་གཅིག་ཉིན་གྱི་སྔ་དྲོ་ཆུ་ཚོད་ ༩ ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་སྲི་ཞུ་བའི་ལས་བྱེད་དྲུང་ཆེ་ཡན་གངས་སྐྱིད་སྲིད་སྐྱོང་ཚོགས་ཁང་དུ་བཞུགས་གྲལ་དུ་འཁོད་བསྟུན། ཆོས་རིགས་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་དབུ་མཛད་གནང་སྟེ་མཛད་གཙོ་རྣམ་པས་གསོལ་འདེབས་དང་ཤིས་བརྗོད་གསུང་འདོན་གནང་།དེ་རྗེས་གསོལ་ཇ་འབྲས་སིལ་འདེགས་འབུལ་ཞུས་གྲུབ་མཚམས་བོད་མིིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་དང་མཇལ་དར་ཕུལ་ཡོད། དེ་ནས་མཛད་གཙོ་རྣམ་པས་རིམ་བཞིན་༧རྒྱལ་བའི་བཞུགས་ཁྲི་རིན་པོ་ཆེར་མཇལ་དར་ཕུལ་ཏེ་གྲོ་སོ་ཕྱེ་མར་དང་ཆང་ཕུད་མཆོད་གནང་ཡོད།

མཐར་དཔལ་ལྡན་སྲིད་སྐྱོང་མཆོག་གིས་ལོ་གསར་གྱི་འཚམས་འདྲིའི་གསུང་བཤད་གནང་དོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། བོད་ཀྱི་བརྙན་འཕྲིན་བརྒྱུད་ཐད་ཀར་གསན་གཟིགས་གནང་མཁན་ཡོངས་དང་། ལྷག་པར་བོད་ནང་གི་གཞིས་ལུས་བོད་མི་རྣམ་པ། དེ་བཞིན་བོད་དོན་ལ་རྒྱབ་སྐྱོར་གནང་མཁན་རྒྱ་གར་བ་རྣམས་ཀྱིས་གཙོས་ཕྱི་རྒྱལ་ཡུལ་གྲུ་ཁག་གི་བོད་དོན་རྒྱབ་སྐྱོར་བ་རྣམས་ལ་ངས་བོད་མིའི་སྒྲིག་འཛུགས་བཀའ་ཤག་གི་ཚབ་ཞུས་ཏེ་བོད་ཀྱི་ལོ་གསར་ཉིན་མོར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།ཏོག་དབྱིབས་གཉན་རིམས་ཀྱི་རྐྱེན་པས་འཛམ་གླིང་ཡོངས་ལ་འགྱུར་བ་ཆེན་པོ་ཞིག་འགྲོ་བཞིན་ཡོད། ནམ་རྒྱུན་ཡིན་ན་ལོ་གསར་ཚེས་གཅིག་ཉིན་མོ་གཙུག་ལག་ཁང་དུ་མཛད་སྒོ་ཚོགས་ཏེ་མཆོད་མཇལ་འགྲོ་རྒྱུ་དང་། ཚེས་བཅུ་ཉིན་གཟིམ་ཆུང་མཇལ་ཁ་བཅར་རྒྱུ། ཚེས་ ༡༥ ཉིན་བཀའ་ཆོས་ཞུ་རྒྱུ་མཚོན་པའི་མཛད་རིམ་མང་པོ་ཞིག་ཡོད་པ་དེ་དག་ཚང་མ་འགྱུར་བ་ཕྱིན་ཡོད། དེ་རིང་ང་ཚོ་འདིར་འཛོམས་དགོས་པའི་རྒྱུ་མཚན་གཙོ་བོ་ནི། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པའི་ཆེད་དུ་ང་ཚོ་ཚང་མས་སྨོན་ལམ་འདེབས་རྒྱུ་དང་། བོད་ནང་གི་བོད་མི་ཚོར་གདུང་སེམས་མཉམ་སྐྱེ་སླད་ཡིན།

ཉེ་ཆར་བོད་ནང་རྒྱ་ནག་གཞུང་གིས་ཏོག་དབྱིནས་གཉན་རིམས་ལ་ཁ་གཡར་ནས་ལོ་གསར་གྱིས་གཙོས་ཆོས་ཕྱོགས་ཀྱི་བྱེད་སྒོ་ཁག་མང་པོ་ཞིག་ལ་དམ་བསྒྲགས་བྱས་དང་བྱེད་བཞིན་ཡོད་པ་གོ་ཐོས་བྱུང་། ཕྱོགས་གཅིག་ནས་ང་ཚོས་ལོ་གསར་ཉིན་དགའ་དགའ་སྤྲོ་སྤྲོ་གནང་དགོས་པ་རེད། ཕྱོགས་གཞན་ཞིག་ནས་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་ཡོད་སྟབས། སེམས་ནང་ལྗིད་ཁོག་ཆེན་པོ་ཞིག་འདུག བོད་ནང་གི་བོད་རིགས་སྤུན་ཟླ་ཚོས་དམ་བསྒྲགས་འོག་ཧ་ལས་པའི་དཀའ་སྡུག་མྱོང་བཞིན་ཡོད་བསམ་ནས་སེམས་འཚབ་ཆེན་པོ་ཡོང་གི་འདུག  བོད་མིའི་སྒྲིག་འཛུགས་ཀྱི་ངོས་ནས་གཞིས་ལུས་བོད་རིགས་སྤུན་ཟླ་ཡོངས་ཀྱི་གནས་སྟངས་མཁྱེན་པའི་ཐོག་རྣམ་པ་ཚོར་གདུང་སེམས་མཉམ་སྐྱེ་དང་སྦྲགས། རྣམ་པ་ཚོའི་མངོན་འདོད་མ་བསྒྲུབ་པར་དུ་འབད་བརྩོན་བྱ་རྒྱུ་ཡིན་ཞེས་ཁས་ལེན་དམ་བཅའ་ཡོད།

བོད་ཀྱི་སྐད་ཡིག་སློབ་གསོ་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་གློད་བཀྲོལ་བཏང་བ་དེ་གནས་ཚུལ་བཟང་བ་ཞིག་རེད། བསྟན་འཛིན་ཉི་མ་ལགས་ཉེན་རྟོག་པས་རྡུང་རྡེག་བཏང་སྟེ་འདས་གྲོངས་སུ་གྱུར་ཡོད། དེར་བརྟེན་བོད་ནང་གི་གནས་སྟངས་ཛ་དྲག་ཏུ་གྱུར་ཡོད་པ་ཧ་ཅང་གསལ་པོ་རེད།

ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ཁྲིམས་སུ་གཏན་འབེབས་གནང་བ་ནས་བཟུང་བོད་ནང་དམག་ཁྲིམས་ལྟ་བུའི་དམ་བསྒྲགས་བྱས་དང་བྱེད་བཞིན་ཡོད་པ་གསར་འགྱུར་བརྒྱུད་ལམ་ཁག་ནས་གོ་རྒྱུ་འདུག རྒྱ་གཞུང་གིས་བོད་ནང་བླ་སྤྲུལ་རྣམ་པ་དང་། མཁས་པ། དེ་བཞིན་ལས་བྱེད་ཟུར་པ་སོགས་བསྐོངས་ནས་ཨ་རིའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ལ་དགག་པ་རྒྱག་དགོས་པའི་བཙན་བཀའ་གཏོང་གི་ཡོད་པ་གོ་རྒྱུ་འདུག ཕྱོགས་གཅིག་ནས་ཨ་རིའི་གཞུང་གིས་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཏན་འབེབས་གནང་བ་དེ་བོད་ཀྱི་ལོ་རྒྱུས་ཐོག་ནས་རྒྱལ་ཁ་ཆེན་པོ་ཞིག་ཡིན་པ་མ་ཟད། རྒྱ་ནག་གཞུང་ལའང་བརྡ་ལན་གསལ་པོ་ཞིག་བཏང་ཡོད།

བོད་ནང་གི་བོད་མིའི་མངོན་འདོད་བསྒྲུབ་སླད་བོད་རིགས་ནང་ཁུལ་རྡོག་རྩ་གཅིག་སྒྲིལ་གནང་རྒྱུ་དང་། དེ་བཞིན་བཙན་བྱོལ་བོད་མི་ཚོས་ཆོས་ལུགས་དང་ཆོལ་ཁ་དབྱེ་བ་མེད་པར་འབྱུང་འགྱུར་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་ནང་ཆ་ཤས་ལེན་རོགས་གནང་ཞེས་ཞུ་རྒྱུ་ཡིན།

མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱའི་བར་དུ་བརྟན་ཅིང་ཐུགས་དགོངས་མཐའ་དག་འགྲུབ་པ་དང་། གཞིས་བྱེས་བོད་མི་མཉམ་འཛོམས་ཡོང་བའི་སྨོན་འདུན་ཞུ་རྒྱུ་ཡིན།  ཞེས་གསུངས་པ་དང་འབྲེལ། ལོ་གསར་ཚེས་གཅིག་གི་གཞུང་འབྲེལ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།