ཕྱི་ལོ་ ༢༠༢༡ ཟླ་ ༢ ཚེས་ ༢༢ རེས་གཟའ་ཟླ་བ།

༄༅། །ཕྱི་ལོ་ ༢༠༢༡ ཟླ་ ༢ ཚེས་ ༩ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་སྦིར་ཅོན་ཏ་ར་བོད་མིའི་གཞིས་ཆགས་སུ་ལུས་སྦྱོང་ར་བ་ཞིག་དབུ་འབྱེད་གནང་ཡོད།

དེ་ཡང་འཕྲོད་བསྟེན་བཀའ་བློན་མཆོག་སྦིར་ཅོན་ཏ་ར་བོད་མིའི་གཞིས་ཆགས་སུ་ཕེབས་འབྱོར་སྐབས་ཅོན་ཏ་ར་བོད་མིའི་ས་གནས་འགོ་འཛིན་པདྨ་གཡུ་སྒྲོན་ལགས་དང་། སྦིར་སྡེ་དགེའི་ས་གནས་འགོ་འཛིན་བྱ་རྒོད་ཚང་འཆི་མེད་རྡོ་རྗེ་ལགས། སྦིར་སྡེ་དགེའི་ས་གནས་འཐུས་ཚོགས་ཀྱི་ཚོགས་གཙོ་ཚེ་རིང་རྡོ་རྗེ་ལགས། ནང་ཆེན་ས་གནས་འཐུས་ཚོགས་ཀྱི་ཚོགས་གཞོན་པདྨ་འཇིགས་མེད་ལགས། བྷེ་ཇི་ན་ཐིའི་ (Baijnath) ཉེ་འགྲམ་ན་ཡོད་པའི་སྦིར་བོད་མིའི་གཞི་རིམ་འཕྲོད་བསྟེན་སྨན་ཁང་གི་དྲུང་ཆེ་ཀརྨ་སྒྲོལ་མ་ལགས་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། ཕྱི་ལོགས་ཀྱི་ལུས་སྦྱོང་ར་བ་དབུ་འབྱེད་མཛད་སྒོའི་ཐོག་མར་དཔལ་བུམ་མང་བྱམས་པ་གླིང་གི་དགེ་འདུན་པ་ཁག་གཅིག་གིས་སྨོན་ལམ་གསུང་འདོན་གནང་རྗེས་འཕྲོད་བསྟེན་བཀའ་བློན་མཆོག་གིས་དར་ཚོན་གཅོད་འབྲེག་གནང་གྲུབ་མཚམས་ཅོན་ཏ་ར་ས་གནས་འགོ་འཛིན་པདྨ་གཡུ་སྒྲོན་ལགས་ཀྱིས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་ཕྱི་ལོགས་ཀྱི་ལུས་སྦྱོང་གི་ཡོ་ཆས་དང་། སིལ་པོལ་རྩེད་ཐང་། ཏོག་དབྱིབས་གཉན་རིམས་སྔོན་འགོག་གི་ཡོ་ཆས་སོགས་མཐུན་འགྱུར་གནང་བར་ཐུགས་རྗེ་ཞུས་ཡོད།

སྦིར་ཅོན་ཏ་ར་བཟོ་གཞིས་འགན་འཛིན་འཇམ་དབྱངས་རྒྱལ་མཚན་ལགས་ཀྱིས། འཕྲོད་བསྟེན་བཀའ་བློན་བརྒྱུད་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུ་ཁྲིད་པའི་བཀའ་ཤག་ལྷན་རྒྱས་ལ་ཁ་བཏགས་ཕུལ་ཏེ་ཐུགས་རྗེ་ཞུས་ཡོད།འཕྲོད་བསྟེན་བཀའ་བློན་མཆོག་གིས། ས་གནས་མང་ཚོགས་རྣམས་ལ་ཏོག་དབྱིབས་གཉན་རིམས་སྔོན་འགོག་གི་གལ་གནད་དང་། ཕྱི་ལོགས་ཀྱི་ལུས་སྦྱོང་མཐུན་རྐྱེན་བསྐྲུན་དགོས་པའི་དམིགས་ཡུལ། འཕྲོད་བསྟེན་བདེ་ཐང་ཆེད་དུས་རྟག་ཏུ་ལུས་སྦྱོང་གནང་དགོས་པ་སོགས་ཀྱི་སྐོར་གསུང་བཤད་གནང་ཡོད།

དབུ་འབྱེད་མཛད་སྒོ་གྲོལ་རྗེས་འཕྲོད་བསྟེན་བཀའ་བློན་མཆོག་གིས་སིལ་པོལ་རྩེད་ཐང་དང་འཐུང་ཆུའི་སྦུབས་དོང་འཛུགས་སྐྲུན་གནང་བཞིན་པ་ཁག་ལ་གཟིགས་ཞིབ་གནང་ཡོད། དེ་ནས་འཕྲོད་བསྟེན་བཀའ་བློན་མཆོག་སྦིར་བོད་མིའི་གཞི་རིམ་འཕྲོད་བསྟེན་སྨན་ཁང་དུ་ཆེད་ཕེབས་ཀྱིས་རྟོག་ཞིབ་གནང་རྗེས་སྨན་རྩིས་ཁང་གི་སྨན་པ་དང་། སྨན་ཞབས་པ། ལས་བྱེད་བཅས་ནས་ཏོག་དབྱིབས་གཉན་རིམས་སྔོན་འགོག་སླད་ཕྱག་ལས་ཧུར་ཐག་གནང་བཞིན་པར་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།