ཕྱི་ལོ་ ༢༠༢༡ ཟླ་ ༢ ཚེས་ ༡༦ རེས་གཟའ་མིག་དམར། 

༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་ཕྱི་ལོ་ ༢༠༢༡ ཟླ་ ༢ ཚེས་ ༡༤ ནས་ ༡༦ བར་སྤོན་ཌོ་བཀྲིས་གླིང་དང་ཀུ་ལླུ་མ་ན་ལི་ཁུལ་དུ་གཞུང་འབྲེལ་འཚམས་གཟིགས་ཕེབས་གཏན་འཁེལ་བ་ལྟར། ཕྱི་ཚེས་ ༡༤ ཉིན་སྤོན་ཌོ་བཀྲིས་གླིང་ས་གནས་སུ་ཕེབས་འབྱོར་གྱིས་ས་གནས་འགོ་འཛིན་ལས་ཁུངས་ཀྱི་ལས་བྱེད་དང་། ས་གནས་འཐུས་ཚོགས། རང་བདེན་ཚོགས་ཆུང་གི་འཐུས་མི། སྤྱི་མི་བཅས་ནས་ཕེབས་བསུའི་སྣེ་ལེན་ཞུས།

དེ་ཡང་ཐོག་མར་འཕྲོད་བསྟེན་བཀའ་བློན་མཆོག་ས་གནས་སྨན་ཁང་དུ་གཟིགས་ཞིབ་གནང་གྲུབ་མཚམས་གོང་གསལ་འཐུས་མི་རྣམས་ལ་ལམ་སྟོན་གསུང་བཤད་དང་། དོགས་འདྲི་ཁག་ལ་གསལ་བཤད་གནང་།

མཐར་བཀའ་བློན་མཆོག་གིས་ཏོག་དབྱིབས་གཉན་རིམས་ཀྱི་ཛ་དྲག་དུས་སྐབས་ཐད་ཚང་མས་ཧུར་ཐག་གནང་བ་དང་། ལྷག་པར་དང་བླངས་གནང་མཁན་ཚོར་བསྔགས་བརྗོད་གནང་།  

ཕྱི་ཚེས་ ༡༣ ཉིན་ཕྱེད་ཡོལ་ཆུ་ཚོད་ ༤་༢༩ ཐོག་མ་ནཱ་ལླི་ས་གནས་སུ་ཕེབས་འབྱོར་གྱིས་ཀུ་ལུའི་ས་གནས་འགོ་འཛིན་ནས་ཕེབས་བསུའི་སྣེ་ལེན་ཞུས། དེ་ནས་མ་ནཱ་ལི་འཕྲོད་བསྟེན་སྨན་ཁང་ལ་འཚམས་གཟིགས་དང་ས་གནས་སུ་ཡོད་པའི་ལས་སྣེ་རྣམས་ལ་འཕྲོད་བསྟེན་དང་འབྲེལ་བའི་གསུང་བཤད་གནང་། 

ཚེས་ ༡༤ ཉིན་མེ་ལི་ ༡༥ རུ་ཡོད་པའི་འཕྲོད་བསྟེན་སྨན་ཁང་ལ་གཟིགས་ཞིབ་གནང་སྟེ་ས་གནས་ན་གཞོན་རང་བྱུང་ལགས་ནས་དེང་དུས་ཅན་གྱི་རྩམ་ཐག་ཁང་གསར་འཛུགས་བྱུང་ཡོད་པར་འཚམས་གཟིགས་གནང་། གཞན་ཡང་སྤང་སྒང་རི་ཁྲོད་བསམ་གཏན་ཆོས་གླིང་དགོན་དུ་མཆོད་མཇལ་ཕེབས། 

གོང་ཚེས་ཉིན་གྱི་ཕྱེད་ཡོལ་ཚོུད་ ༡༢་༣༠ ཐོག་དཔལ་རབ་གླིང་ས་གནས་སུ་ཕྱི་རོལ་ལུས་སྦྱོང་ཚལ་ (Open Gym) ཞིག་དབུ་བྱེད་གནང་གྲུབ་མཚམས་ས་གནས་ཚོགས་ཁང་དུ་ལས་སྣེ་རྣམས་ལ་འཕྲོད་བསྟེན་དང་འབྲེལ་བའི་ལམ་སྟོན་གསུང་བཤད་གནང་བ་མ་ཟད། དྲི་བར་ལེན་འདེབས་གནང་། 

མཐར་བཀའ་བློན་མཆོག་་མཚོ་པདྨར་ཕེབས་ཡོད་པ་བཅས། །