ཕྱི་ལོ་ ༢༠༢༡ ཟླ་ ༢ ཚེས་ ༡༩ རེས་གཟའ་པ་སངས། 

༄༅། །ཕྱི་ལོ་ ༢༠༢༡ ཟླ་ ༢ ཚེས་ ༨ ཉིན་འཕགས་བོད་འབྲེལ་མཐུད་ཚོགས་པས་རྒྱ་གར་གྱི་ར་ཇི་སི་ཐན་མངའ་སྡེའི་རྒྱལ་ས་ཇེ་སྤུར་ནང་དུས་ཡུན་ཉིན་གྲངས་གཅིག་རིང་བྱེད་སྒོ་སྤེལ་སྐབས་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་མཉམ་ཞུགས་གནང་ཡོད་པ་མ་ཟད། ཇེ་སྤུར་ཁུལ་དུ་ཡོད་པའི་འཕྲོད་བསྟེན་འཛིན་སྐྱོང་ཞིབ་འཇུག་ལྟེ་གནས་ཁང་ (Institute of Health Management Research)  ལ་ཕེབས་ཏེ། འཕྲོད་བསྟེན་འཛིན་སྐྱོང་ཞིབ་འཇུག་ལྟེ་གནས་ཁང་གི་འགན་འཛིན་གྱི་ལས་ཚབ་སྐུ་ཞབས་པྲ་ལ་ཏི་ (Dr. Prahlad Rai Sodani) ལགས་དང་མཇལ་འཕྲད་གནང་ཡོད། སྐབས་དེར་འཛིན་འཇིགས་མེད་ཚུལ་ཁྲིམས་ལགས་ཀྱིས་འཕགས་བོད་གཉིས་ཀྱི་འབྲེལ་བ་དང་། འཕགས་བོད་འབྲེལ་འཐུད་ཚོགས་པའི་ལས་འཆར་སོགས་ཀྱི་སྐོར། དེ་བཞིན་ལོ་ངོ་དྲུག་ཅུ་ལྷག་གི་རིང་བཙན་བྱོལ་བོད་མིའི་འཐབ་རྩོད་ཀྱི་གྲུབ་འབྲས་སོགས་ཀྱི་སྐོར་ངོ་སྤྲོད་གནང་ཡོད། སྐུ་ཞབས་པྲ་ལ་ཏི་ལགས་ཀྱིས་འཕྲོད་བསྟེན་འཛིན་སྐྱོང་ཞིབ་འཇུག་ལྟེ་གནས་ཁང་དུ་བོད་ཀྱི་ཉིན་མོ་ཞེས་པའི་དུས་ཆེན་སྲུང་བརྩི་གོ་སྒྲིག་ཞུ་རྒྱུ་ཡིན་སྐོར་གསུངས་ཡོད།

གཞན་ཡང་འཇིགས་མེད་ཚུལ་ཁྲིམས་ལགས་ཀྱིས་ར་ཇི་སི་ཐན་མངའ་སྡེའི་སྲིད་སྐྱོང་སྐུ་ཞབས་ཀལ་རཱཇ་མི་ཤྲ་ (Kalraj Mishra) མཆོག་དང་ལྷན་མཇལ་འཕྲད་ཞུས་ཏེ་ད་ལྟའི་བོད་ནང་གི་ཛ་དྲག་གནས་སྟངས་སྤྱི་དང་། བོད་མིའི་སྒྲིག་འཛུགས་ཀྱི་སྲིད་བྱུས། བཙན་བྱོལ་དུ་བོད་མི་ཚོས་སྲིད་སྤྱི་གཉིས་ཀྱི་སྔོན་འགྲོའི་འོས་ཤོག་འཕངས་པའི་སྐོར་དང་། གཞིས་བྱེས་བོད་མིའི་མངོན་འདོད་སོགས་ཀྱི་སྐོར་གསུངས་ཡོད། 

སྲིད་སྐྱོང་སྐུ་ཞབས་ཀལ་རཱཇ་མི་ཤྲ་མཆོག་གིས་བོད་མིའི་སྒྲིག་འཛུགས་ལ་འཚམས་འདྲི་གནང་བ་དང་འབྲེལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པའི་སྨོན་འདུན་ཞུས་ཡོད།

དེ་རྗེས་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་འཕགས་བོད་འབྲེལ་མཐུད་ཚོགས་པས་གོ་སྒྲིག་ཞུས་པའི་ཚོགས་འདུའི་སྟེང་ནང་མཉམ་ཞུགས་གནང་ཡོད།

སྐབས་དེར་ས་གམས་འཕགས་བོད་འབྲེལ་མཐུད་པ་སྐུ་ཞབས་ཨོམ་པར་ཀཱ་ཤི་ (Om Prakash Tripathi) ལགས་ཀྱིས་ངོ་སྤྲོད་ཀྱི་གསུང་བཤད་གནང་གྲུབ་མཚམས་བདེ་སྲུང་ཉམས་ཞིབ་པ་སྐུ་ཞབས་རི་ཆི་པལ་སིངྒ་ (Richhpal Singh Kaviya) ལགས་ཀྱིས། རྒྱ་ནག་དམར་ཤོག་གཞུང་གིས་བོད་ནང་སྲིད་བྱུས་ལག་བསྟར་བྱེད་བཞིན་པ་དེ་དག་རྒྱ་ནག་གཞུང་རང་ཉིད་ཀྱི་ཁེ་ཕན་ཁོ་ནར་དམིགས་པ་ཞིག་རེད་ཅེས་ངོ་རྒོལ་གྱིས་གསུང་བཤད་གནང་ཡོད། ཚོགས་འདུའི་ཐོག་འཕགས་བོད་འབྲེལ་མཐུད་ཚོགས་པའི་མཚོན་རྟགས་ (Logo) དབུ་འབྱེད་གནང་ཡོད་པ་བཅས། །