ཕྱི་ལོ་ ༢༠༢༡ ཟླ་ ༢ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་༢༠༢༡ ཟླ་ ༢ ཚེས་ ༤ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༤༥ པ་དེ་སྤེལ་ཡོད་པ་དང་། གསལ་བསྒྲགས་གནང་མཁན་སྨན་པ་བསྟན་འཛིན་བརྩོན་འགྲུས་ལགས་དང་སྨན་པ་ཚེ་རིང་མཚམས་གཅོད་ལགས་རྣམ་གཉིས་ཡིན།
དེ་ཡང་དང་པོ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་རྒྱ་གར་ནང་གི་ས་གནས་གྲངས་༡༥ དང་བལ་ཡུལ་ས་གནས་གྲངས་༡ ནང་ཁྱོན་བོད་མི་གྲངས་ ༤༣༢ ༼རང་ཁྱིམ། ༢༥༣ ཚོགས་སྡེ་དང་སྒྲིག་འཛུགས་ཀྱིས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༡༧༩༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། གཉིས་པ་གསོ་རིག་ལུས་སེམས་ནུས་གསོའི་སྨན་དང་འབྲེལ་ད་བར་ཁྱོན་བོད་མི་གྲངས་ ༢༤༨༩༧ ཙམ་ལ་གསོ་རིག་ལུས་སེམས་ནུས་གསོའི་སྨན་རིན་མེད་ཐོག་འགྲེམས་སྤེལ་ཞུས་ཡོད།
སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་གཉིས་ལ་ཁ་པར་བརྒྱུད་ནས་སེམས་ཁམས་འཕྲོད་བསྟེན་སློབ་གསོ་གནང་བ་བྱུང་ཡོད་པ་དང་། དེ་ནས་ནད་ཡམས་ཁྱབ་གདལ་བཀག་འགོག་ཆེད་རྒྱ་གར་ནང་གི་ས་གནས་གྲངས་ ༡༨ དང་བལ་ཡུལ་ནང་གི་ས་གནས་གྲངས་ ༢ བཅས་ནང་ཁྱོན་རྒྱ་གར་ནང་མི་གྲངས་ ༦༣༢ དང་། བལ་ཡུལ་ནང་མི་གྲངས་ ༥ བཅས་ཁྱོན་མི་གྲངས་ ༦༣༧ ཙམ་ལ་ནད་གཞི་ཕོག་ཡོད་མེད་བརྟག་དཔྱད་གནང་ཡོད། རྒྱ་གར་ནང་སྔོན་འགོག་སྨན་ཁབ་རྒྱག་སྒོ་ཚུགས་ནས་ད་བར་བོད་མིའི་གཞིས་ཆགས་ནང་གི་སྨན་པ་དང་སྨན་ཞབས་གཙོས་མདུན་བསྐྱོད་ཞབས་ཞུ་བ་མི་གྲངས་༡༩༦ ཙམ་ལ་རྒྱ་གར་གཞུང་གི་མཐུན་འགྱུར་འོག་སྔོན་འགོག་སྨན་ཁབ་རྒྱག་ཐུབ་པ་བྱུང་ཡོད།
གཞན་ཡང་ས་གནས་ཛ་དྲག་ཚོགས་ཆུང་ནས་ས་གནས་གཞུང་གི་སྨན་ཁང་དང་དེ་བཞིན་རྫོང་གི་སྤྱི་ཁྱབ་སྨན་པ་འགན་འཛིན་བཅས་ངོ་བཅར་ཐུགས་ཕྲད་དང་བདུན་རེའི་ཚོགས་འདུ། དེ་བཞིན་མང་ཚོགས་ལ་ལམ་སྟོན་གནང་རྒྱུའི་གཙོས་ལས་དོན་རྣམས་མུ་མཐུད་ནས་འགྲོ་བཞིན་ཡོད།
གཉིས་པ། བཙན་བྱོལ་བོད་མིའི་སྤྱི་ཚོགས་ཁྲོད་ནད་གཞི་ཕོག་པ་སྙན་གསང་ཞུ་རྒྱུར། འདས་པའི་བདུན་ཕྲག་ཅིག་གི་ནང་རྒྱ་གར་ནང་དུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༢༤ བྱུང་། ཞིབ་ཕྲ་ནི། ཀེལ་མོན་ཊིན་གཞིས་ཆགས་ཁུལ་ནས་མི་གྲངས་ ༢ དང་། རྡ་ས་ཁུལ་ནས་མི་གྲངས་ ༡༥། བདེ་སྐྱིད་གླིང་ནས་མི་གྲངས་ ༤ ། མེན་པཊ་ཕན་བདེ་གླིང་ནས་མི་གྲངས་ ༡ ། མོན་གྷོ་འདོད་རྒུ་གླིང་གཞིས་ཆགས་ནས་མི་གྲངས་ ༢ བཅས་ཁྱོན་མི་གྲངས་ ༢༤ བྱུང་ཡོད་པ་རྣམས་ལས་སྐྱེས་པ་གྲངས་ ༡༥ དང་བུད་མེད་གྲངས་ ༩ བྱུང་ཡོད། དེའི་ནང་ནས་དགུང་ན་མཐོ་ཤོས་དེ་ ༩༦ དང་ཆུང་ཤོས་དེ་ལོ་ ༡༦ ནད་རྟགས་ཡོད་པ་མི་གྲངས་ ༩ ནད་རྟགས་མེད་པ་མི་གྲངས་ ༡༥ བཅས་ཡིན་པ་རེད། སྟབས་མ་ལེགས་པ་གཅིག་ལ་འདས་པའི་བདུན་ཕྲག་ནང་མི་གྲངས་ ༣ སྟེ་རྡ་ས་ཁུལ་ནས་སྐྱེས་པ་རང་ལོ་ ༨༣ དང་རང་ལོ་ ༧༨ བཅས་གཉིས་དང་། བདེ་སྐྱིད་གླིང་ཁུལ་ནས་སྐྱེས་པ་རང་ལོ་ ༧༩ བཅས་མི་གྲངས་གསུམ་འདས་གྲོངས་སུ་ཕྱིན་ཡོད། མི་གྲངས་གསུམ་ཀར་ཁྲག་ཤེད་ཀྱི་ནད་བསྡོངས་ཡོད་པ་རེད་འདུག ཁྱོན་རྒྱ་གར་དང་བལ་ཡུལ་ནང་ད་བར་བོད་མི་ནད་གཞི་ཕོག་པ་གྲངས་ ༡༥༡༩ དང་། དྲག་སྐྱེད་བྱུང་བ་མི་གྲངས་ ༡༤༤༩ འདས་གྲོངས་སོང་བ་མི་གྲངས་ ༤༡ ད་ལྟ་ནད་མནར་བཞིན་པ་མི་གྲངས་ ༢༩ བཅས་བྱུང་ཡོད། ནད་གཞི་ཕོག་པ་དང་དེ་བཞིན་ནད་པ་དང་ཐད་ཀར་འབྲེལ་གཏུག་བྱུང་བ་རྣམས་རང་ཁྱིམ་དང་། ཚོགས་སྡེའི་ཟུར་བཀག་ཐོག་གསོ་བཅོས་གནང་བཞིན་ཡོད།
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུའི་དོན་གནད་གཙོ་བོ་ད་བར་རྒྱལ་སྤྱི་ཁྱོན་ཡོངས་ནང་ནད་གཞི་ཕོག་པ་མི་གྲངས་ས་ཡ་ ༡༠༣ ལྷག་དང་དེ་ལས་འདས་གྲོངས་སོང་བ་མི་གྲངས་ས་ཡ་གཉིས་བརྒལ་བ་བྱུང་ཡོད། གནས་ཡུལ་རྒྱ་གར་ནང་ད་བར་ནད་གཞི་ཕོག་པ་མི་གྲངས་ས་ཡ་ ༡༠ དང་། ད་ལྟ་ནད་མནར་བཞིན་པ་མི་གྲངས་འབུམ་གཅིག་དང་ཕྱེད་ཙམ་ཡོད། རྒྱ་གར་ནང་ཉིན་རེར་མི་གྲངས་འབུམ་གསུམ་ཙམ་ལ་སྔོན་འགོག་སྨན་ཁབ་རྒྱབ་བཞིན་ད་བར་མི་གྲངས་འབུམ་ ༤༤ ལྷག་ལ་སྔོན་འགོག་སྨན་ཁབ་རྒྱག་ཟིན་ཞིང་ད་བར་སྔོན་འགོག་སྨན་ཁབ་ཀྱིས་རྐྱེན་བྱས་ནས་མི་འདས་གྲོངས་ཕྱིན་པ་དང་ཛ་དྲག་དཀའ་ངལ་བྱུང་བ་ཤིན་ཏུ་གྲངས་ཉུང་ཉུང་བྱུང་ཡོད།
ད་ཉིན་ཟླ་ ༢ ཚེས་ ༤ ནི་འཛམ་གླིང་འབྲས་ནད་ཉིན་མོ་ཅེས་ཉིན་མོ་འདིར་འབྲས་ནད་ཀྱི་རྒྱུ་རྐྱེན་སོགས་ངོ་སྤྲོད་བྱེད་པ་བརྒྱུད་མང་ཚོགས་ནང་ནད་གཞི་འདི་གོ་རྟོགས་སྤེལ་རྒྱུ་དང། ནད་གཞི་འདིར་དམིགས་བཀར་ཉམས་ཞིབ་ཀྱིས་ནད་གཞི་འདིར་སྨན་བཅོས་དང་སྔོན་འགོག སྔོན་ཚུད་ནས་བརྟག་དཔྱད་སྨན་བཅོས་ཀྱི་ཁྱད་ཕན་སོགས་མང་ཚོགས་ལ་ངོ་སྤྲོད་ཐུབ་རྒྱུ་དེ་རེད། འབྲས་ནད་ལ་རིགས་དབྱེ་མང་པོ་ཡོད་པ་ལས་སྐྱེས་པར་མཚོན་ན་གློ་བ་དང་མཆིན་པ། ཕོ་བ། ལྒང་པའི་རྨེན་འབྲས་དང་ལོང་གའི་འབྲས་ནད་མང་ཤོས་དང་བུད་མེད་ལ་མཚོན་ན་ནུ་མ་དང་མངལ་སྐྱེའི་འབྲས་ནད། དེ་བཞིན་གྲེ་བའི་རྨེན་བུའི་འབྲས་ནད་དང་གློ་བ་སོགས་འབྲས་ནད་མང་ཆེ་ཤོས་ཡོང་གི་ཡོད།
རྒྱ་གར་ནང་རྡོ་ཐ་ལས་གྲུབ་པའི་ཐ་མ་ཁ་སོགས་སྤྱོད་མཁན་མང་བས་ཁ་ནང་གི་འབྲས་ནད་དང་དེ་བཞིན་གློ་བ་དང་མཆིན་པ། ཕོ་བའི་འབྲས་ནད་སོགས་མང་བ་ཡོང་གི་ཡོད། འབྲས་ནད་ནི་གཙོ་བོ་ཟས་དང་སྤྱོད་ལམ་ཉེས་པ་ལས་བྱུང་བཞིན་ཡོད་པས་ཟས་སུ་སྟབས་བདེའི་ཟས། དུས་མ་ཡིན་པའི་ཟས། ཤ་རིགས་དང་ཞག་ཚིལ་སོགས་བསྟེན་དྲགས་ཅིང་ཤིང་ཏོག་དང་སྔོ་ཚལ་རིགས་མ་བསྟེན་པ། དེ་བཞིན་སྤྱོད་ལམ་དུ་གཉིད་དུས་ཐོག་དང་འདང་ངེས་མེད་པ། སེམས་ངལ། ལུས་ལ་རྩོལ་བཅག་ཉུང་བ། ཤ་འཚོ་ཆེ་དྲགས་པ། ཐ་མ་ག་དང་ཉེས་ཐ་སོགས་མྱོས་རྫས་རིགས་མང་པོ་བསྟེན་དྲག་པ་ལས་བྱུང།
གཞན་ཡང་བཟོ་གྲྭ་དང་རླང་འཁོར་སོགས་རྐྱེན་གྱིས་ཁོར་ཡུག་སྦག་བཙོག་སོང་བ་ལས་བྱུང་བ་དང་། ཡང་མཆིན་པའི་གཉན་ཚད་ལ་སོགས་པའི་གཉན་སྲིན་རིགས་ཀྱིས་འབྲས་ནད་བྱུང་བའང་ཡོད། འབྲས་ནད་རིགས་གང་ཡང་སྔོན་ཚུད་ནས་བརྟག་དཔྱད་ཀྱིས་སྨན་བཅོས་བྱེད་ཐུབ་ན་ནད་གཞི་འདི་རིགས་བཅོས་ཐུབ་པ་དང་སྲོག་ལ་ཉེན་ཁ་མེད་པས་ང་ཚོས་ཟླ་བ་དྲུག་རེའི་མཚམས་དང་དེ་མིན་ནའང་ལོ་རེར་གཟུགས་གཞི་བརྟག་དཔྱད་རེ་བྱ་རྒྱུ་དེ་ཤིན་ཏུ་གལ་ཆེ། ལྷག་པར་ཁྲག་ཤེད་དང་གཅིན་སྙི། འབྲས་ནད་སོགས་འགོས་ནད་མ་ཡིན་པའི་ནད་གཞི་འདི་རིགས་ཕལ་ཆེ་བ་ཟས་དང་སྤྱོད་ལམ་ཉེས་པ་ལས་བྱུང་བས་མང་ཚོགས་ནས་རྒྱུན་དུ་ཟས་སྤྱོད་ཚུལ་བཞིན་བསྟེན་རྒྱུ་ཧ་ཅང་གལ་ཆེ་བ་ཡིན་པ་ད་རིང་འབྲས་ནད་ཉིན་མོ་སྲུང་རྩི་དང་འབྲེལ་ལམ་སྟོན་འདི་ལྟར་ཞུ་རྒྱུ་ཡིན།
དེ་རྗེས་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ནས་ལམ་སྟོན་གནང་གསལ། འདི་ག་རྡ་ས་བདེ་ལེགས་སྨན་ཁང་དུ་ཕྱི་ལོ་ ༢༠༢༡ ཟླ་ ༢ ཚེས་ ༡ ཉིན་དངོས་སུ་ཏོག་དབྱིབས་གཉན་རིམས་༡༩ སྔོན་འགོག་སྨན་ཁབ་རྒྱག་སྒོ་ཚུགས་ཅིང་དེ་ཉིན་བོད་མི་གྲངས་ ༣༡ དང་། རྒྱ་གར་བ་ ༤༤ བསྡོམས་སྨན་པ་སྨན་ཞབས་སོགས་མདུན་ལ་ཕྱག་ལས་གནང་མཁན་གྲངས་ ༧༥ ལ་སྔོན་ཁབ་བརྒྱབ་ཐུབ་པ་བྱུང་ཡོད། ད་ཉིན་ཕྱི་ཚེས་ ༤ ཉིན་ས་གནས་འབྲེལ་ཡོད་རྒྱ་གར་བ་གྲངས་ ༣༠ དང་བོད་མི་གྲངས་ ༤ བཅས་མི་གྲངས་ ༣༤ ལ་སྔོན་འགོག་སྨན་ཁབ་བརྒྱབ་པས་ཁྱོན་ཡོངས་རྒྱ་གར་ནང་ད་ཆ་རིམ་པ་དང་པོའི་ནང་མདུན་ལ་ཕྱག་ལས་གནང་མཁན་བསྡོམས་མི་གྲངས་ས་ཡ་བཞི་དང་ཕྱེད་ཀ་ཙམ་ལ་སྔོན་འགོག་རྒྱག་ཟིན་འདུག་ཅིང་ད་བར་ཛ་དྲག་དཀའ་ངལ་འཕྲད་པ་དེ་འདྲ་གང་ཡང་བྱུང་མེད།
ད་རེའི་བདུན་ཕྲག་ནང་རྡ་ས་ཁུལ་དུ་མི་གྲངས་ ༡༥ ཙམ་ལ་ནད་གཞི་འདི་ཕོག་ནས་བོད་མི་སྐུ་ན་བགྲེས་པ་ ༢ ནད་གཞི་འདིའི་རྐྱེན་གྱིས་འདས་གྲོངས་སུ་ཕྱིན་ཡོད། ལྷག་མ་མི་གྲངས་ ༡༣ ལས་མི་གཅིག་ཅུང་ཛ་དྲག་ཡོད་པ་ལས་ད་མིན་མི་གྲངས་ ༡༢ རྣམས་ལ་ཛ་དྲག་དཀའ་ངལ་ཆེ་བ་མེད་པས་ཁོང་རྣམ་པས་འབྲེལ་ཡོད་ཚང་མར་ཐུགས་རྗེ་ཆེ་ཞེས་ཞུས་གནང་བ་དང་སྦྲགས་ད་ལན་ནད་ཡམས་འདིར་དངོས་སུ་མདུན་བསྐྱོད་ཕྱག་ལས་གནང་མཁན་ཚང་མར་ང་ཚོས་ཐུགས་རྗེ་ཆེ་ཞེས་ཞུ་རྒྱུ་ཡིན།
དོན་གནད་གཉིས་པ་དེ་ད་ཆ་སྤྱི་ཚོགས་དྲ་ལམ་ནང་ཏོག་དབྱིབས་གཉན་རིམས་༡༩ སྔོན་འགོག་སྨན་ཁབ་དང་འབྲེལ་ནས་གནས་ཚུལ་མང་པོ་ཞིག་ཡར་མར་གཏོང་བཞིན་འདུག་པས་གནས་ཚུལ་གང་ཡིན་ཡང་ཁུངས་ལྡན་ཡིན་ན་མ་གཏོགས་གཞན་སྤྱི་ཚོགས་ནང་ཕན་པ་ལས་གནོད་པ་ཆེ་བ་ཡོད་ན་མང་ཚོགས་ནས་ཁུངས་ལྡན་གནས་ཚུལ་ལས་གཞན་གང་བྱུང་ལ་ཡིད་ཆེས་མ་གནང་ན་ལེགས། ད་ལྟའི་ཆར་སྨན་པ་སོགས་མདུན་ལ་ཕྱག་ལས་གནང་མཁན་མ་གཏོགས་མི་མང་ལ་སྔོན་འགོག་སྨན་ཁབ་རྒྱག་གི་མེད་ཀྱང་འདི་ག་སྨན་ཁང་ལ་མི་མང་ནས་སྔོན་འགོག་སྨན་ཁབ་རྒྱག་དགོས་རེད་དང་མ་རེད་ཁ་པར་མང་པོ་འབྱོར་གྱི་འདུག་ན་རྗེས་སུ་མང་ཚོགས་ནང་རྒྱག་འགོ་ཚུགས་སྐབས་འདི་ནས་ལམ་སྟོན་ཁ་གསལ་ཞུ་རྒྱུ་ཡིན།
མདོ་དོན་གསར་འགྱུར་བརྒྱུད་ལམ་དང་མི་སྒེར་སུ་ཡིན་ཡང་གནས་ཚུལ་ཁུངས་ལྡན་དང་མི་མང་ལ་ཕན་ཐོགས་ཡོང་ངེས་འདུག་ན་ལས་གཞན་གནས་ཚུལ་གང་བྱུང་སྤྱི་ཚོགས་དྲ་བའི་ཐོག་མ་སྤེལ་རོགས་ཅེས་རེ་སྐུལ་ཞུ་རྒྱུ་ཡིན། འདི་ག་འཕྲོད་བསྟེན་ལས་ཁུངས་ནས་བདུན་རེའི་གསར་འགོད་གསལ་བསྒྲགས་སྐབས་ལམ་སྟོན་ཞུ་བཞིན་ཡོད་པ་དང་། རྒྱ་གར་དབུས་གཞུང་དང་དེ་བཞིན་འཛམ་གླིང་འཕྲོད་བསྟེན་སྒྲིག་འཛུགས། ཨ་རི་ཡིན་ན་ (Centre for Disease Control) གཞུང་འབྲེལ་དྲ་རྒྱའི་ཐོག་ཁུངས་ལྡན་གྱི་གནས་ཚུལ་དང་ལམ་སྟོན་རིགས་སྤེལ་བ་རྣམས་གཟིགས་ཐུབ་ན་ལེགས། ད་ཆ་ནད་ཡམས་འདི་ནུབ་ཕྱོགས་རྒྱལ་ཁབ་ཁ་ཤས་ནང་ད་དུང་ཛ་དྲག་གནས་སྟངས་ཆགས་ཀྱི་ཡོད་ན་མི་མང་ནས་མུ་མཐུད་ཁ་རས་ཡག་པོ་གྱོན་རྒྱུ་དང་། ལག་པ་ཡང་ཡང་བཀྲུ་དགོས་པ། མིའི་དབར་རྒྱང་ཐག་འཇོག་དགོས་པ་སོགས་གནང་རྒྱུ་ཤིན་ཏུ་གལ་ཆེ། སྔོན་འགོག་ཐབས་ལམ་ཐོག་ལྷོད་གཡེང་ཕྱིན་ཚེ་རྗེས་སུ་དཀའ་ངལ་འཕྲད་རྒྱུ་དང་། དགུང་ན་བགྲེས་པ་ཚོར་དཀའ་ངལ་ཕྲད་ཀྱི་འདུག་ན་ང་ཚོའི་ངོས་ནས་སྔོན་འགོག་ཐབས་ལམ་བྱེད་ཐུབ་པ་རིགས་དེ་ཚོ་ལྷོད་གཡེང་དུ་མ་ཤོར་བར་མུ་མཐུད་གནང་གལ་ཆེ།
ད་ཆ་བོད་ཀྱི་ལོ་གསར་སླེབ་ལ་ཉེ་བས་རྣམ་རྒྱུན་ཡིན་ན་ལོ་གསར་སྐབས་མིའི་ནང་ཕྱེ་མར་མཆོད་དུ་ཕེབས་རྒྱུའི་ལུགས་སྲོལ་ཡོད་ཀྱང་འདི་ལོ་ནད་ཡམས་ཀྱི་རྐྱེན་གྱིས་རང་ཉིད་མི་གཞན་གྱི་ནང་དུ་ཕྱིན་པ་དང་ཡང་མི་གཞན་རང་ཁྱིམ་དུ་ཕེབས་པ་ཡིན་ན་ནད་གཞི་འགོས་རྒྱུ་ཉེན་ཁ་ཡོད་པས་ད་ལོའི་ལོ་གསར་དེ་སོ་སོ་ནང་མི་ནང་ཁུལ་སྤྲོ་སྐྱིད་གཏོང་བ་ལས་ཕྱིར་གང་བྱུང་མ་ཕེབས་ན་ལེགས་པའི་ལམ་སྟོན་ཞུ་རྒྱུ་ཡིན། ཞེས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་༤༥ པ་དེ་མཇུག་སྒྲིལ་གནང་ཡོད།།
