ཕྱི་ལོ་ ༢༠༢༡ ཟླ་ ༢ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༢༡ ཟླ་ ༢ ཚེས་ ༢༣ རེས་གཟའ་མིག་དམར་ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ཀམ་པུ་ཊར་སྡེ་ཚན་གྱི་ཚོགས་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བོད་མདུན་ངོས་སུ་འཇོག་པའི་གལ་གནད་ཀྱི་བགྲོ་གླེང་ཞིག་བསྐོང་ཚོགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་ཀྱིས་གཙོས་སྲིད་བྱུས་ཉམས་ཞིབ་ཁང་གི་ལས་བྱེད། ཕྱི་དྲིལ་རྒྱ་ཡིག་ཚན་པའི་འགན་འཛིན་བསྟན་འཛིན་བདེ་ལྡན་ལགས་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་བསྟན་སྐྱིད་ལགས། བདེ་སྲུང་ལས་ཁུངས་ཀྱི་འབྲེལ་ཡོད་ལས་བྱེད། སཱ་ར་མཐོ་སློབ་ཀྱི་སྐུ་ཚབ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་སོགས་ཁྱོན་མི་གྲངས་ ༢༧ ལྷག་ཙམ་ལྷན་འཛོམས་ཐོག་བོད་ཀྱི་སྲིད་བྱུས་ཉམས་ཁང་གི་འགན་འཛིན་བསྟན་འཛིན་ལེགས་བཤད་ལགས་དང་ཉམས་ཞིབ་པ་བསྟན་འཛིན་བདེ་གསལ་ལགས་གཉིས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་བགྲོ་གླེང་གི་ལས་རིམ་འགོ་འཛུགས་གནང་ཡོད།
སྐབས་དེར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་ཀྱིས་གསུང་དོན། བོད་ཀྱི་སྲིད་བྱུས་ཉམས་ཞིབ་ཁང་གིས་བོད་མདུན་ངོས་འཇོག་པའི་གལ་གནད་ཀྱི་བགྲོ་གླེང་ཞིག་གོ་སྒྲིག་གནང་ཡོད། བགྲོ་གླེང་འདི་བཞིན་བསྐོང་ཚོགས་གནང་དགོས་པའི་དམིགས་གཙོ་བོ་ནི། ཕྱི་ལོ་ ༢༠༢༠ ལོར་བོད་ཀྱི་སྲིད་བྱུས་ཉམས་ཞིབ་ཁང་གི་ཨིན་ཇིའི་དུས་དེབ་ཅིག་འདོན་སྤེལ་གནང་ཡོད་པའི་ནང་བོད་མདུན་ངོས་སུ་འཇོག་དགོས་པའི་བརྗོད་གཞིའི་ཐོག་རྩོམ་བསྡུ་རུབ་བྱས་ཏེ་དཔེ་དེབ་ཅིག་འདོན་སྤེལ་གནང་ཡོད། ཐེངས་འདིའི་བགྲོ་གླེང་གཙོ་བོར་དཔེ་དེབ་ནང་ཡོད་པའི་རྩོམ་ཡིག་ཁག་གིརྩོམ་པ་པོ་དགུས་སོ་སོའི་རྩོམ་ཡིག་འགྲེལ་བརྗོད་གནང་རྒྱུ་མ་ཟད། དེའི་ཐོག་བགྲོ་གླེང་གནང་རྒྱུའི་རེ་བ་བྱེད་ཀྱི་ཡོད།
ཐེངས་འདིར་ཏོག་དབྱིབས་གཉན་རིམས་ཀྱི་རྐྱེན་པས་བོད་ཀྱི་སྲིད་བྱུས་ཉམས་ཞིབ་ཁང་གི་མགྲོན་ཤོག་བཏང་ཕྱོགས་ཐད་ཆབ་སྲིད་དང་འབྲེལ་ཡོད་ལས་ཁུངས་ཁག་དང་། ཚོགས་སྡེ། ཉམས་ཞིབ་དང་འབྲེལ་ཡོད་ཁག་བཅས་ཁྱོན་མི་གྲངས་ ༥༠ ལས་མི་ཉུང་བར་མགྲོན་ཤོག་ཕུལ་ཡོད། བོད་མདུན་ངོས་འཇོག་དགོས་དོན་ནི་བོད་པའི་གནས་ཚུལ་རྣམས་གང་མང་མདུན་ལ་བཀོད་ཐུབ་པ་དང་། བོད་པའི་ངོས་ནས་བོད་དོན་ཐད་ནུས་པ་ཇི་ལྟར་སྤུང་དགོས་པ། བོད་དང་རྒྱལ་སྤྱིའི་གནས་ཚུལ་ཐོག་ཕར་ཚུར་སྦྱང་བཤད་བྱས་ནས་ཤར་བསྐྱོད་བྱེད་ཕྱོགས་ཀྱི་ཆེད་ཡིན།
དུས་དེབ་དེའི་ནང་རྩོམ་སྣ་མང་ཡོད། གཉིས་ནས་འབོད་སྐུལ་དང་སྦྲགས། ཕྱོགས་མཐའ་ཁག་འདྲ་མིན་ནང་ཡོད་པའི་བོད་ཀྱི་ཉམས་ཞིབ་པ་རྣམས་ལ་བོད་ཀྱི་གནས་ཚུལ་དང་འབྲེལ་བའི་ཆོས་དང་རིག་གཞུང་། སྐད་ཡིག གོམས་གཤིས། ལོ་རྒྱུས་སོགས་ཀྱི་རྩོམ་རྣམས་བོད་ཀྱི་སྲིད་བྱུས་ཉམས་ཞིབ་ཁང་ལ་བསྐུར་གནང་ཚེ་ང་ཚོའི་ངོས་ནས་རྩོམ་འདོན་སྤེལ་ཞུ་རྒྱུའི་འབད་བརྩོད་བྱེད་ཀྱི་ཡིན། གཙོ་བོ་རྩོམ་གྱི་སྤུས་ཀ་ལ་རག་ལས་ཀྱི་ཡོད། ད་ཆ་ང་ཚོའི་དུས་དེབ་རྣམས་སློབ་གྲྭ་དང་མཐོ་སློབ་ཀྱི་དཔེ་མཛོད། རྒྱ་གར་དང་ཕྱི་རྒྱལ་གྱི་བསྟི་གནས་ཁང་ནང་འགྲེམས་སྤེལ་བྱེད་རྒྱུའི་འབོད་བརྩོན་གནང་དང་གནང་བཞིན་ཡོད།
སྤྱིར་བོད་ཀྱི་སྲིད་བྱུས་ཉམས་ཞིབ་ཁང་ནས་ལོ་གཅིག་ནང་བོད་ཡིག་དང་ཨིན་ཡིག་ཐོག་དུས་དེབ་རེར་བཅས་དུས་དེབ་གཉིས་འདོན་སྤེལ་བྱེད་ཀྱི་ཡོད། བོད་ཡིག་ཐོག་རྩོམ་གང་ཙམ་ཡོད། འོན་ཀྱང་སྤུས་ཀའི་ཆ་ནས་བཏོན་མི་ཐུབ་པ་ཡང་ཡོད། རྩོམ་ཡིག་འབྱོར་བ་ལྟར་འདོན་སྤེལ་གནང་རྒྱུ་ཁག་པོ་རེད། བོད་ཨིན་གཉིས་ཀྱི་རྩོམ་སྒྲིག་པ་ཡོད། རྩོམ་སྒྲིག་པ་རང་གི་འགན་འཁྱེར་གྱི་ཡོད། དེའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱིས་གནོན་ཤུགས་བྱེད་ཀྱི་མེད། བོད་ཀྱི་དུས་དེབ་མང་དུ་གཏོང་རྒྱུའི་འབད་བརྩོན་གནང་གི་ཡོད། བོད་ཀྱི་གནས་ཚུལ་རྣམས་བོད་མི་ཞིག་གིས་གདེང་སྤོབས་ཐོག་ནས་འབྲི་ཐུབ་ཚེ་འཐབ་རྩོད་དང་མི་རིགས་ཀྱི་ལ་རྒྱ་སོགས་ཀྱི་ཐོག་ནས་མ་འོངས་པར་མི་ཐོག་རྗེས་མ་རྣམས་ལ་ལེགས་སྐྱེས་འབུལ་ཐུབ། བོད་ཀྱི་སྲིད་བྱུས་ཉམས་ཞིབ་ཁང་ནས་བོད་མིའི་གཞོན་སྐྱེས་ཁྲོད་བོད་ཀྱི་གནས་ཚུལ་དང་འབྲེལ་བའི་རྩོམ་གང་མང་མང་འབྲི་རོགས་ཞེས་གསུངས། །
