ཕྱི་ལོ་ ༢༠༢༡ ཟླ་ ༢ ཚེས་ ༢༥ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་དཔལ་ལྡན་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༢ ཚེས་ ༢༤ རེས་གཟའ་ལྷག་པ་ཉིན་གྱི་སྔ་དྲོ་བོད་མིིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྡོར་གླིང་མི་མང་ཚོགས་ཁང་གསར་རྒྱག་གི་རྨང་གཞི་འདིང་གནང་རྗེས། རྡོར་གླིང་འཇམ་དབྱངས་རིག་གཞུང་གཅེས་འཛིན་ཁང་དུ་ཕེབས་ཏེ་འཇམ་དབྱངས་རིག་གཞུང་གཅེས་འཛིན་ཁང་གི་དཔར་རིས་འགྲེམས་སྟོན་ཚན་པ་དབུ་འབྱེད་གནང་ཡོད།
དེ་རྗེས་ཉིན་རྒྱབ་ཚོུད་ ༢།༣༠ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་བྱང་ཤར་སོ་ནཱ་དཱ་བཀྲ་ཤིས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་གྱིས་གཙོས་སེར་སྐྱ་མི་མང་ཡོངས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ་ས་གནས་འགོ་འཛིན་བསྟན་འཛིན་དབྱངས་འཛོམས་ལགས་ཀྱིས་ལས་བསྡོམས་སྙིང་བསྡུས་ཤིག་སྒྲོགས་སྦྱང་གནང་རྗེས། སྐྱབས་རྗེ་ཀ་ལུ་རིན་པོ་ཆེ་མཆོག་གི་སྐུ་ཚབ་བླ་མ་བསོད་ནམས་ཚེ་རིང་ལགས་ཀྱིས་རིན་པོ་ཆེ་མཆོག་གི་གསུང་འཕྲིན་སྒྲོགས་སྦྱང་གནང་ཡོད།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དེ་སྔ་སྲིད་སྐྱོང་མཆོག་ཆུང་དུས་སྐབས་སོ་ནཱ་དཱ་སཾ་བྷོ་ཌ་ཉིན་སློབ་ནང་སློབ་གྲྭ་འགྲིམས་པའི་སྐབས་ཀྱི་མྱོང་ཚོར་དང་། སོ་ནཱ་དཱ་སཾ་བྷོ་ཌ་ཉིན་སློབ་ནང་ལོ་གཉིས་སློབ་སྦྱོང་བྱས་པའི་སྐབས་སོ་ནཱ་དཱ་མི་མང་དང་། སཾ་བྷོ་ཌའི་དགེ་རྒན་རྣམས་ཀྱི་བྱམས་སྐྱོང་དང་བཀའ་དྲིན་ལ་བརྟེན་ནས་རང་ཉིད་རྐང་པའི་སྒང་ལངས་ཐུབ་པ་དང་སྲིད་སྐྱོང་ཆགས་ཐུབ་པར་སོ་ནཱ་དཱ་མི་མང་དང་དགེ་རྒན་རྣམས་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་དེ་སྔ་ཡིན་ན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཁོངས་འཛུལ་ཞུགས་བྱས་པར་སྐྱབས་བཅོལ་ལག་དེབ་ངེས་པར་དུ་དགོས་ཀྱི་ཡོད་སྟབས། ཀ་རྡོར་སྒང་གསུམ་ཁུལ་གྱི་བོད་མི་མང་པོ་ཞིག་ལ་སྐྱབས་བཅོལ་ལག་དེབ་མེད་པའི་དབང་གིས་བོད་མིའི་སྒྲིག་འཛུགས་ནང་ལས་ཀ་བྱེད་ཐུབ་ཀྱི་མེད་པར་བརྟེན། ད་ཆ་དགོས་མཁོའི་ཆ་རྐྱེན་ལ་བསྒྱུར་བ་བཏང་སྟེ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཁོངས་འཛུལ་ཞུགས་བྱས་པར་སྐྱབས་བཅོལ་ལག་དེབ་མི་དགོས་པ་བཟོས་ཡོད་སྐོར་དང་། དེ་བཞིན་བོད་མིའི་སྒྲིག་འཛུགས་ནང་སྲིད་ཞུའི་ལས་བྱེད་བྱ་འདོད་ཡོད་པ་རྣམས་ལ་དུས་ཡུན་རིང་ཐུང་འདྲ་མིན་ཐོག་ས་རཱ་བོད་ཀྱི་མཐོ་སློབ་ཏུ་རིན་མེད་ཐོག་ལས་བྱེད་འོས་སྦྱོང་དང་ཟབ་སྦྱོང་ཕུལ་ཀྱི་ཡོད་སྐོར་གསུངས་ཡོད།
མཛད་རིམ་གྱི་མཐའ་མར་ས་གནས་འགོ་འཛིན་ལས་ཁུངས་ནས་ས་གནས་མི་མང་ཡོངས་ཀྱི་ཚབ་ཞུས་ཏེ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་བཀའ་དྲིན་མཚོན་ཆེད་སྐུ་ཐང་ཞིག་ཕུལ་ཡོད།
གསུང་བཤད་ཀྱི་ལས་རིམ་གྲུབ་རྗེས་དཔལ་ལྡན་སྲིད་མཆོག་སོ་ནཱ་དཱ་སཾ་བྷོ་ཌ་ཉིན་སློབ་དང་མཉམ་འབྲེལ་དུ་འཚམས་གཟིགས་ཕེབས་ཡོད་པ་བཅས། །
