ཕྱི་ལོ་ ༢༠༢༡ ཟླ་ ༢ ཚེས་ ༢༣ རེས་གཟའ་མིག་དམར།

༄༅། །བཙན་དབང་བཏང་བའི་ཡུ་གུར་ངལ་རྩོལ་པ་སྔོན་འགོག་ཁྲིམས་འཆར་(The Uyghur Forced Labor Prevention Act) ཞེས་པ་ཞིག་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་དང་སྐུ་ཞབས་ཁི་རི་སི་སི་མི་ཐི་ (Chris Smith) མཆོག་སོགས་ནས་ཨ་རིའི་གྲོས་ཚོགས་འོག་མའི་ནང་ངོ་སྤྲོད་གནང་ཡོད་པ་དང་། ཁྲིམས་འཆར་དེའི་ནང་རྒྱ་ནག་གཞུང་གི་བཙན་དབང་འོག་ཡུར་གུར་ངལ་རྩོལ་པས་བཟོ་སྐྲུན་བྱས་པའི་ཚོང་ཟོག་རྣམས་ཨ་རིར་ནང་འདྲེན་བྱ་མི་ཆོག་པ་འཁོད་ཡོད།

བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཁྲིམས་འཆར་དེར་དགའ་བསུ་གནང་བ་དང་སྦྲགས་ཁྲིམས་འཆར་ངོ་སྤྲོད་གནང་མཁན་སྐུ་ཞབས་ཇིམ་མེག་གྷོ་ཝན་མཆོག་གིས་དབུས་ཨ་རིའི་གྲོས་ཚོགས་འཐུས་མི་ཁག་གཅིག་ལ་ཐུགས་རྗེ་ཆེ་ཞུས་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་མུ་མཐུད་གསུང་དོན། ཁྲིམས་འཆར་དེ་བརྒྱུད་ཨ་རིའི་གཞུང་གིས་ཤར་ཏུར་ཀི་སི་ཐན་ནས་ཚོང་ཟོག་ནང་འདྲེན་བཀག་འགོག་བྱ་རྒྱུ་ཙམ་མ་ཡིན་པར་རྒྱ་ནག་གཞུང་གིས་ཡུན་རིང་ཡུ་གུར་དང་བོད་མི་རྣམས་ལ་དྲག་གནོན་བྱས་པ་མ་ཟད། ཕོན་ཆེན་ཞིག་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པས་དེའི་འགན་རྒྱ་ནག་གཞུང་ལ་འཁུར་འཇུག་དགོས། ཞེས་གསུངས།

ཁྲིམས་འཆར་དེས་རྒྱ་ནག་གཞུང་གིས་ཁྲིམས་འགལ་ཐོག་ཡུ་གུར་ཕོན་ཆེ་ངལ་རྩོལ་བསྒྱུར་བཀོད་ཁང་དུ་བཅུག་ཡོད་པ་ངོས་འཛིན་བྱས་ཡོད་པ་དང་། དེ་བཞིན་ཁྲིམས་འཆར་དེས་རྒྱ་ནག་གཞུང་གིས་དབུལ་ཕོངས་ངལ་སེལ་ལ་ཁ་གཡར་ནས་བོད་རང་སྐྱོང་ལྗོངས་ཟེར་བའི་ཁུལ་དུ་བོད་མི་ཕོན་ཆེན་ཞིག་ངལ་རྩོལ་བསྒྱུར་བཀོད་ཁང་དུ་བཅུག་སྟེ་དམག་མི་ལྟ་བུའི་སློབ་གསོ་དང་ལས་རིགས་སྦྱོང་བརྡར་སྤྲད་ནས་ལས་བགོས་རྒྱག་གི་ཡོད་པར་ངོས་འཛིན་བྱས་ཡོད།།