ཕྱི་ལོ་ ༢༠༢༡ ཟླ་ ༢ ཚེས་ ༢༣ རེས་གཟའ་མིག་དམར།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་དཔལ་ལྡན་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༢ ཚེས་ ༢༢ ཉིན་གྱི་སྔ་དྲོའི་ཚོུད་ ༨།༣༠ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མང་ (Shri Prem Singh Tamang) མཆོག་དང་མཇལ་འཕྲད་གནང་རྗེས། རྒྱ་གར་བྱང་ཤར་ཕྱོགས་སུ་ཡོད་པའི་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་སུ་འཚམས་གཟིགས་གནང་ཡོད།
དེ་ཡང་ཉིན་རྒྱབ་ཚོུད་ ༡ ཙམ་ལ་དཔལ་ལྡན་སྲིད་སྐྱོང་མཆོག་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་ཀྱི་ལས་ཀྱི་སྣེ་མོ་བ་དང་། སེར་སྐྱ་མི་མང་ཡོངས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས་བརྒྱ་ཤོག་དྲུག་པའི་སྤྱི་ཁང་དང་། མཉམ་འབྲེལ་མགྲོན་ཁང་། ས་འཐུས་ཚོགས་ཁང་། དེ་བཞིན་གསར་བསྐྲུན་ཟིན་པའི་གཞིས་ཆགས་ཀྱི་ཆུ་མཛོད་བཅས་དབུ་འབྱེད་གནང་། ཕྱོགས་མཚུངས་བརྒྱ་ཤོག་དང་པོའི་སྤྱི་ཁང་དང་། གཞིས་ཆགས་ཀྱི་རྒྱལ་སྒོ། བཀའ་དྲིན་རྗེས་དྲན་གྱི་སུམ་མདོ་ལམ་བཅས་ཀྱི་ལས་འཆར་གྲུབ་ཟིན་པ་ཁག་ཀྱང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུ་འབྱེད་གནང་རྒྱུ་བཀོད་ཟིན་ཡང་དུས་ཚོད་ཀྱི་རྐྱེན་པས་དངོས་སུ་དབུ་འབྱེད་གནང་ཐུབ་མེད།
ཉིན་གུང་ཞལ་ལག་གྲུབ་རྗེས་རྒྱལ་ཡུམ་ཆེན་མོའི་སྤྱི་ཁང་དུ་དཔལ་ལྡན་སྲིད་སྐྱོང་མཆོག་གིས་གསུང་བཤད་ལས་རིམ་ཞིག་གོ་སྒྲིག་ཞུས་ཡོད་པ་དང་། ལས་རིམ་གྱི་ཐོག་མར་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་རྡོ་རྗེ་ཚེ་རིང་ལགས་ཀྱིས་ལས་བསྡོམས་སྙིང་བསྡུས་ཤིག་སྒྲོགས་སྦྱང་དང་། ཉེ་ཆར་གྲུབ་ཟིན་པའི་ལས་འཆར་ཁག་ངོ་སྤྲོད་གནང་གྲུབ་མཚམས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་མི་མང་ལ་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས། ད་ལན་རྒྱ་གར་བྱང་ཤར་ཁུལ་ལ་ཡོང་དགོས་དོན་གཙོ་བོ་ནི། སྐབས་བཅོ་ལྔ་པའི་བཀའ་ཤག་གི་ལས་དུས་གཙང་ལ་ཉེ་བའི་སྐབས་འདིར་མི་མང་རྣམས་ལ་ཐུགས་རྗེ་ཆེ་ཞུ་རྒྱུའི་ཆེད་བཅར་བ་ཡིན་སྐོར་དང་། རྒྱ་གར་བྱང་ཤར་ཁུལ་ནས་ཐུགས་རྗེ་ཆེ་འགོ་འཛུགས་དགོས་དོན་ནི། ཕ་མ་བཀའ་དྲིན་ཆེན་པོ་ཡིན་དུས་རང་ཉིད་ཀྱི་ཕ་མ་ཐོག་མར་བཙན་བྱོལ་དུ་བཞུགས་ས་དང་། རང་ཉིད་སྐྱེ་ས་དང་འཚར་ལོངས་བྱུང་ས་ཡང་རྒྱ་གར་བྱང་ཤར་ཁུལ་ནས་ཡིན་སྟབས། ས་ཆ་འདི་ནས་འགོ་བཙུགས་ན་རྟེན་འབྲེལ་ཡོད་སྐོར་སོགས་ཀྱི་གསུང་བཤད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཟེར་དུས་ཚང་མས་སྤོབས་པ་བསྐྱེད་དགོས་པ་ཞིག་དང་། དེ་ཡང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཡིན་སྐོར་དང་། བོད་མིའི་སྒྲིག་འཛུགས་ནས་བོད་མི་སུད་ཚོང་བ་དང་ཚོང་ལས་གཉེར་མཁན་རྣམས་ལ་སྐྱེད་ཀ་ཧ་ཅང་དམའ་བོའི་ཐོག་ནས་བུན་གཡར་གཏོང་གི་ཡོད་སྐོར་སོགས་འགྲེལ་བརྗོད་གནང་སྟེ་མི་མང་ཚོས་དེ་དག་མཁྱེན་དགོས་ཀྱི་ཡོད་སྐོར་ནན་བརྗོད་གནང་ཡོད།
མཐར་དཔལ་ལྡན་སྲིད་སྐྱོང་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གནང་ཡོད་པ་མ་ཟད། བོད་ཀྱི་བརྙན་འཕྲིན་ཚན་པས་སྐད་རིགས་མི་འདྲ་བ་བཅོ་ལྔའི་ནང་༸རྒྱལ་བའི་ཐུགས་བསྐྱེད་དམ་བཅའ་བཞིའི་སྐོར་རྒྱང་སྲིང་ཞུས་ཡོད་སྐོར་སོགས་གསུངས།
མཛད་སྒོའི་མཐའ་མར་ར་ཝང་ལ་ས་གནས་འགོ་འཛིན་ལས་ཁུངས་དང་། གཞིས་ཆགས་སྤྱི་ཡོངས་ཀྱི་ཚབ་ཞུས་ཏེ་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཐུགས་རྗེ་ཆེ་མཚོན་བྱེད་དངུལ་གྱི་མཆོད་ཀོང་ཞིག་ཕུལ་ཡོད་པ་བཅས། །
