ཕྱི་ལོ་ ༢༠༢༡ ཟླ་ ༢ ཚེས་ ༡ རེས་གཟའ་ཟླ་བ། 

༄༅། །ཕྱི་ལོ་ ༢༠༢༡ ཟླ་ ༡ ཚེས་ ༢༨ དང་ ༢༩ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཕོ་མོའི་རྩུབ་སྤྱོད་སྔོན་འགོག་ཚོགས་ཆུང་ (Internal Committee) དང་། དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པ་གཉིས་ཟུང་འབྲེལ་ཐོག་ཕྱི་དྲིལ་ལས་ཁུངས་ཀྱི་དྲུང་ཆེ་དང་། འཛིན་སྐྱོང་འགན་འཛིན། སྲི་ཞུའི་ལས་བྱེད་རྣམ་པ། དེ་བཞིན་དྭང་ཞབས་པ་བཅས་ལ་ཕྱག་ལས་གནང་སར་བུད་མེད་ལ་རྩུབ་སྤྱོད་དང་བརྙས་བཅོས་རིགས་སྔོན་འགོག་གོ་རྟོགས་སྤེལ་གནང་ཡོད།

དེ་ཡང་ལས་རིམ་ཀྱི་ཐོག་མར་ཕྱི་དྲིལ་ལས་ཁུངས་ནས་ཆེད་བཙུགས་གནང་བའིི་ཕོ་མོའི་རྩུབ་སྤྱོད་སྔོན་འགོག་ཚོགས་ཆུང་གི་ཚོགས་མི་འབྲུག་བསྟན་སྐྱིད་ལགས་ཀྱིས་ཚོགས་མི་རྣམས་དང་། ཚོགས་ཆུང་གི་ལས་འགན་དང་འགན་འཁྲི། དེ་བཞིན་ཞུ་གཏུག་བྱེད་ཕྱོགས་ཀྱི་འགྲོ་ལུགས་རྣམས་ངོ་སྤྲོད་གནང་ཡོད། དེ་རྗེས་བུད་མེད་ནུས་སྟོབས་གོང་འཕེལ་ཚན་པའི་ལས་བྱེད་ཚེ་རིང་སྐྱིད་ལགས་དང་། བསྟན་འཛིན་ཚེ་བརྟན་ལགས་ཀྱིས་ཉེ་ཆར་བོད་མིའི་སྒྲིག་འཛུགས་བཀའ་ཤག་གི་ལམ་སྟོན་གཞིར་བཟུང་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པས་དབུ་འབྱེད་གནང་བའི་བཙན་བྱོལ་ནང་གི་བུད་མེད་གཙོ་བོར་གྱུར་པའི་བོད་མི་ཡོངས་ལ་རྩུབ་སྤྱོད་རིགས་སྔོན་འགོག་ལམ་སྟོན་ཁག་གསལ་འདོན་གནང་ཡོད།

རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་མར་ཐ་ཧྥར་རེལ་ཐེབས་རྩ་ཁང་ (Martha Farrell Foundation) གི་སློབ་སྟོན་པ་ལྕམ་སྐུ་ནན་དྷི་ཏ་བྷཌ་ (Nandita Bhatt) ལགས་དང་། ལྕམ་སྐུ་ནི་ཏྱི་སི་རམ་སེ་རི་ནི་ཝ་སན་ (Nitya Sriram Srinivasan) ལགས་རྣམ་གཉིས་ཀྱིས་དྲ་ལམ་བརྒྱུད་ཉིན་གྲངས་གཉིས་རིང་གོ་རྟོགས་དང་གྲོས་བསྡུར། དེ་བཞིན་མཉམ་ཞུགས་པ་རྣམས་ཕན་ཚུན་དབར་བསམ་ཚུལ་བརྗེ་ལེན་གནང་བཅུག་ཡོད།

ཕྱི་ལོ་ ༢༠༡༣ ལོའི་རྒྱ་གར་གྱི་ལས་ཀ་བྱེད་ཡུལ་དུ་བུད་མེད་ལ་རྩུབ་སྤྱོད་སྔོན་འགོག་གི་ཁྲིམས་གཞིར་བཞག་ཐོག་ཕྱི་ལོ་ ༢༠༡༩ ལོར་བོད་མིའི་སྒྲིག་འཛུགས་བཀའ་ཤག་གིས་ལས་ཁུངས་ཁག་ལ་བཀོད་ཁྱབ་གནང་བ་ལྟར། ལས་ཁུངས་ཁག་ནང་ལས་བྱེད་གྲངས་བཅུ་ལས་མང་བའི་ནང་ཚོགས་མི་བཞི་ལས་མི་ཉུང་བའི་ནང་ཁུལ་ཚོགས་ཆུང་རེ་གསར་འཛུགས་གནང་ཡོད། ཚོགས་མི་བཞི་ལས་གཉིས་ངེས་པར་དུ་བུད་མེད་ཡིན་དགོས་པ་དང་། ཚོགས་ཆུང་གི་གཙོ་སྐྱོང་བ་དེ་བུད་མེད་རྒན་བགྲེས་ལས་བྱེད་ཅིག་ཡིན་དགོས།  ཕྱི་དྲིལ་ལས་ཁུངས་ཀྱི་ཕོ་མོའི་རྩུབ་སྤྱོད་སྔོན་འགོག་ཚོགས་ཆུང་གི་གཙོ་སྐྱོང་བ་འབྲུག་བསྟན་སྐྱིད་ལགས་དང་། ཚོགས་མི་རྣམ་རྒྱལ་ཚེ་དབང་ལགས།  བསྟན་འཛིན་གསལ་སྒྲོན་ལགས། ཟླ་བ་ལགས་བཅས་ཡིན།།