ཕྱི་ལོ་ ༢༠༢༡ ཟླ་ ༢ ཚེས་ ༢༧ རེས་གཟའ་སྤེན་པ།༄༅། །ཕྱི་ལོ་ ༢༠༢༡ ཟླ་ ༢ ཚེས་ ༢༦ རེས་གཟའ་པ་སངས་ཉིན་གྱི་ཕྱི་དྲོ་ཆུ་ཚོད ༤ ཐོག་ཧི་མ་ལ་ཡ་ནང་པའི་དགོན་པའི་ཚོགས་ཁང་ནང་ས་གནས་བོད་དོན་རྒྱབ་སྐྱོར་ཚོགས་པའི་ལྷན་ཚོགས་གནང་ཡོད།

དེ་ཡང་ཀུ་ལུ་མ་ན་ལི་ས་གནས་ཧིན་བོད་མཛའ་འབྲེལ་ཚོགས་པའི་ལྷན་ཚོགས་ཐོག་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་ས་གནས་སུ་ཕེབས་ཞོར་བོད་དོན་རྒྱབ་སྐྱོར་བ་རྣམས་ལ་ད་ལྟའི་བོད་ནང་གི་གནས་སྟངས་དང་རྒྱལ་སྤྱིའི་ཐོག་བོད་དོན་གནས་བབ། དེ་བཞིན་བོད་དོན་རྒྱབ་སྐྱོར་ཚོགས་པ་གལ་ཆེན་པོ་ཡིན་སྟབས། ས་གནས་བོད་དོན་རྒྱབ་སྐྱོར་བ་རྣམས་ནས་མུ་མཐུད་རྒྱབ་སྐྱོར་ནུས་པ་ཆེ་རུ་གནང་ཐབས་ཡོང་བའི་འབོད་སྐུལ་ཡང་ཞུས་གནང་བར་ཁོང་རྣམས་ནས་ཀྱང་གང་ཐུབ་ཚགས་ཚུད་གནང་རྒྱུའི་ཞལ་བཞེས་གནང་ཡོད།དེ་བཞིན་མ་འོངས་པར་ས་གནས་བོད་དོན་རྒྱབ་སྐྱོར་ཚོགས་པའི་ལས་དོན་གནང་ཕྱོགས་དང་ཚགས་ཚུད་ཡོང་བའི་ལམ་སྟོན་གནང་བ་དང་། ལྷག་པར་སྐབས་དེར་སྐུ་ཞབས་ར་ཝི་ཋ་ཀུར་མཆོག་ཚོགས་པའི་སློབ་སྟོན་པ་དང་། སྐུ་ཞབས་པདྨ་རྣམ་རྒྱལ་མཆོག་ཚོགས་གཞོན་དུ་འབོད་སྐུལ་ཞུས་དོན་བཞིན་ཁོང་རྣམ་གཉིས་ནས་ཞལ་བཞེས་གནང་སོང་། ཚོགས་འདུའི་ཐོག་ཀུ་ལུ་མ་ན་ལིའི་ས་གནས་བོད་མིའི་ལས་ཀྱི་སྣེ་མོ་བ་ཡོངས་ནས་ཚོགས་བཅར་ཞུས་ཡོད།  མཐར་ས་གནས་འགོ་འཛིན་གྱིས་ཚོགས་བཅར་བ་ཡོངས་ལ་ཐུགས་རྗེ་ཆེ་ཞུས་ཡོད།