ཨ་རིའི་སྲིད་འཛིན་གཞོན་པ་ལྕམ་སྐུ་ཀ་མ་ལཱ་ཧཻ་རིས་མཆོག་གིས་ལས་ཁུར་དམ་འབུལ་ཞུས་པར་དཔལ་ལྡན་ཚོགས་གཙོ་མཆོག་གིས་འཚམས་འདྲི་ཞུས་པ།

གསར་ལས་ཁང་གི་གསར་འགོད་པས།

༢༠༢༡-༠༡-༢༢

ཕྱི་ལོ་ ༢༠༢༡ ཟླ་ ༡ ཚེས་ ༢༢ རེས་གཟའ་པ་སངས།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡ ཚེས་ ༢༠ ཉིན་ལྕམ་སྐུ་ཀ་མ་ལཱ་ཧཻ་རིས་ (Kamala Harris) མཆོག་གིས་ཨ་རིའི་སྲིད་འཛིན་གཞོན་པ་ཐེངས་ ༤༩ པའི་ལས་ཁུར་དམ་འབུལ་ཞུས་པར། དཔལ་ལྡན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གཞིས་བྱེས་བོད་མི་ཡོངས་དང་། སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་དགའ་བསུའི་འཚམས་འདྲི་ཞུས་གནང་འདུག

འཚམས་འཕྲིན་ནང་འཁོད་དོན། ལྕམ་སྐུ་མཆོག་ཨ་རིའི་བུད་མེད་སྲིད་འཛིན་གཞོན་པ་ཐེངས་དང་པོ་ཆགས་པ་དང་། དེ་བཞིན་རྒྱ་གར་གྱི་རིགས་རྒྱུད་ཅིག་ཨ་རིའི་སྲིད་འཛིན་གཞོན་པ་ཆགས་པ་དེས་ཨ་རིའི་ནང་ལོ་རྒྱུས་གསར་པ་ཞིག་བསྐྲུན་གནང་ཡོད། ལྕམ་སྐུ་ཁྱེད་ཨ་རིའི་སྲིད་འཛིན་གཞོན་པའི་དམ་འབུལ་བཞེས་སྐབས་འཛམ་གླིང་གང་སར་བཞུགས་པའི་རྒྱ་གར་བ་རྣམས་ནས་དགའ་བསུ་ཆེན་པོ་ཞུས་གནང་ཡོད། དེ་ནི་ཨེ་ཤི་ཡ་སྤྱི་དང་། ལྷག་པར་དུ་རྒྱ་གར་བ་རྣམས་དགའ་སྤོབས་བྱེད་འོས་པའི་དུས་ཚོད་ཅིག་ཡིན།

ཨ་རིའི་གཞུང་མང་གཉིས་ནས་བོད་མི་དང་། བོད་ཀྱི་འཚེ་མེད་ཞི་བའི་འཐབ་རྩོད་ཐོག་འགྱུར་བ་མེད་པར་རྒྱབ་སྐྱོར་གནང་དང་གནང་མུས་ཡིན་པར་སོང་། ཨ་རིའི་གཞུང་མང་གཉིས་ནི་འཛམ་གླིང་ཡུལ་གྲུ་གང་སར་གནས་པའི་བོད་མི་ཚོར་ཤིན་ཏུ་ནས་བཀའ་དྲིན་ཆེན་པོ་ཡིན། ཉེ་ཆར་གཏན་འབེབས་གནང་བའི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་གི་འབྲུ་དོན་རྣམས་སྐུ་ཉིད་ཀྱི་དབུ་འཁྲིད་འོག་ཕྱག་བསྟར་གནང་རྒྱུར་ང་ཚོས་ཡིད་ཆེས་ཆེན་པོ་བྱེད་ཀྱི་ཡོད།

སྐུ་ཉིད་ནས་ཨ་རིའི་གཞུང་ལ་ཞབས་འདེགས་ཞུ་རྒྱུའི་དམ་བཅའ་བཞག་པ་བཞིན་ཁྱེད་ཀྱི་ལས་ཡུན་དེ་བཞིན་གྲུབ་འབྲས་ལྡན་པ་ཡོང་བའི་རེ་བ་དང་ཡིད་ཆེས་ཆེན་པོ་ཡོད།

རྒྱ་དམར་གཞུང་གིས་ག་དུས་ཡིན་ནའང་བོད་ལ་ཞི་བའི་བཅིངས་གྲོལ་དང་ཡར་རྒྱས་བཏང་ཡོད་པ་བརྗོད་བཞིན་ཡོད་ཀྱང་། དོན་དངོས་སུ་ཕྱི་ལོ་ ༡༩༥༩ ལོར་རྒྱ་དམར་གཞུང་གིས་བོད་ས་བཙན་བཟུང་བྱས་པ་ནས་བཟུང་ད་བར་བོད་ནང་གི་གནས་སྟངས་ནི་ཡ་ང་བ་ཞིག་དང་ཛ་དྲག་ཅན་ཞིག་ཡིན། ཕྱི་ལོ་ ༢༠༠༩ ནས་བཟུང་ད་བར་བོད་མི་གྲངས་ ༡༥༥ ཡིས་རྒྱ་ནག་དམར་གཞུང་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་བོད་དོན་ཆེད་རང་ལུས་མེར་བསྲེགས་བཏང་ཡོད་པ་དང་། ཁོང་རྣམ་པས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་སྒྲ་བསྒྲགས་ཡོད་པ་དེ་དག་གིས་རྒྱ་གཞུང་གིས་བོད་ནང་གཞི་རྩའི་འགྲོ་བ་མིའི་ཐོབ་ཐང་ཡོངས་རྫོགས་རྩིས་མེད་བཏང་དང་གཏོང་བཞིན་ཡོད་པ་མཚོན་ཐུབ།

ཨ་རི་ནི་བོད་ཀྱི་གནད་དོན་དང་། བོད་མིའི་ཐུན་མོང་མ་ཡིན་པའི་རིག་གཞུང་དང་ངོ་བོ་སྲུང་སྐྱོབ་ཡོང་རྒྱུར་རོགས་རམ་གནང་མཁན་གྱི་རྒྱལ་ཁབ་ཐོག་མའི་གྲས་ཤིག་ཡིན། ཨ་རིའི་གཞུང་ནས་བོད་རྒྱ་འབྲེལ་མོལ་བསྐྱར་གསོ་ཡོང་རྒྱུར་རྒྱ་དམར་གཞུང་ལ་རྟག་ཏུ་སྐུལ་མ་དང་གནོན་ཤུགས་སྤྲད་དང་སྤྲོད་བཞིན་ཡོད་ཀྱང་། རྒྱ་དམར་གཞུང་གི་ངོས་ནས་དེར་བཟང་ཕྱོགས་ཀྱི་ཡ་ལན་ཞིག་ང་ཚོར་རྩ་བ་ནས་སྤྲོད་ཀྱི་མེད། ཡིན་ནའང་། སྐུ་ཉིད་ཀྱི་དབུ་འཁྲིད་འོག་ཨ་རིའི་གཞུང་གིས་མུ་མཐུད་རྒྱབ་སྐྱོར་དང་། རྒྱལ་སྤྱིའི་ནུས་པ་མཉམ་སྤུངས་ཐོག་ནས་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་སྟེ་བོད་དོན་ཞི་བའི་ཐོག་ནས་གསལ་རྒྱུར་ཡིད་ཆེས་ཆེན་པོ་ཡོད། སྲིད་བྱུས་དེས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་བཞིན་ཡོད་པ་མ་ཟད། དེ་ནི་བོད་རྒྱ་གཉིས་ཀར་ཁེ་ཕན་ཡོད་པ་ཞིག་ཡིན།

སྐུ་ཉིད་ཀྱིས་ཨ་རིའི་མི་མང་གི་མངོན་འདོད་བསྒྲུབ་རྒྱུའི་ལས་དོན་མཐའ་དག་ལམ་ལྷོངས་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག་པ་བཅས། །

གསར་གནས།