ཕྱི་ལོ་ ༢༠༢༡ ཟླ་ ༡ ཚེས་ ༡༨ རེས་གཟའ་ཟླ་བ།
༄༅། །ཨ་རིའི་སྐུ་ཚབ་དོན་གཅོད་ཁང་གི་གོ་སྒྲིག་འོག་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷེར་ཊི་ཌེ་སི་ཊི་རོ་མཆོག་གིས་དྲ་ལམ་བརྒྱུད་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་མཛད་གཙོ་རྣམ་པར་གསུང་བཤད་གནང་རྗེས། བཞུགས་སྒར་རྡ་རམ་ས་ལར་གནས་སྡོད་བོད་ཀྱི་བུད་མེད་གསར་འགོད་པ་ཁག་གཅིག་དང་ལྷན་གླེང་མོལ་གནང་ཡོད།
དེ་ཡང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་ལས་བྱེད་ཚེ་རིང་སྐྱིད་ལགས་ཀྱིས་ཐོག་མར་ཕོ་མོའི་ནུས་སྟོབས་གོང་འཕེལ་གྱི་གྲངས་ཐོ་དང་། བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་གྱི་སྲིད་བྱུས། དེ་བཞིན་བུད་མེད་ནུས་སྟོབས་གོང་སྤེལ་ཚན་པའི་ལས་དོན་སྤྱིའི་སྐོར་ངོ་སྤྲོད་གནང་ཡོད།
ཐེངས་འདིའི་དྲ་ལམ་བརྒྱུད་གླེང་མོལ་ཐོག་ནོར་ཝེ་བོད་ཀྱི་རླུང་འཕྲིན་ཁང་གི་གསར་འགོད་པ་བཀྲ་ཤིས་ལྷ་མོ་ལགས་དང་བསྟན་འཛིན་དཔལ་སྒྲོན་ལགས། ཨ་རིའི་རླུང་འཕྲིན་ཁང་གི་གསར་འགོད་པ་བསྟན་འཛིན་བཟང་མོ་ལགས། ཨེ་ཤི་ཡ་རང་དབང་རླུང་འཕྲིན་ཁང་གི་གསར་འགོད་པ་འཕགས་སྒྲོན་ལགས། ཕ་ཡུལ་གསར་ཁང་གི་གསར་འགོད་པ་ཆོས་སྐྱིད་ལྷ་མོ་ལགས། རང་དབང་གསར་འགོད་པ་བསྟན་འཛིན་བཟང་མོ་ལགས་བཅས་མཉམ་ཞུགས་གནང་སྟེ་གནད་དོན་འདྲ་མིན་ཐོག་སྐུ་ཞབས་རོ་བྷེར་ཌི་ཌེ་སི་ཌི་རོ་མཆོག་དང་ལྷན་གླེང་མོལ་གནང་ཡོད། སྐུ་ཞབས་རོ་བྷེར་ཊི་ཌེ་སི་ཊི་རོ་མཆོག་གིས་རང་ཉིད་ཀྱི་ལས་ཡུན་རྫོགས་རྗེས་རང་གི་རྒྱུན་འཛིན་པར་བོད་ཀྱི་གསར་འགོད་པ་དང་། བོད་པའི་སྐད་ཡིག རིག་གཞུང་། ཆོས་དད་ཡོད་པའི་བོད་པའི་སྤྱི་ཚོགས་ལ་ཉན་དགོས་པའི་རེ་སྐུལ་ཞུ་རྒྱུ་ཡིན་སྐོར་དང་། གལ་ཏེ་དེ་ལྟར་བྱེད་རྒྱུའི་གྲ་སྒྲིག་མེད་ཚེ་ལས་དོན་རྣམས་ཕན་ནུས་ཐོན་མི་ཐུབ་བཅས་གསུངས།
བོད་མིའི་སྒྲིག་འཛུགས་དང་ཨ་རིའི་གཞུང་དབར་འབྲེལ་ལམ་གོང་འཕེལ་གཏོང་ཕྱོགས་ཀྱི་ཐད་སྐུ་ཞབས་ཌེ་སི་ཌི་རོ་མཆོག་གིས་རང་གི་ལས་རོགས་དང་ལྷན་ཕྱག་ལས་གནང་སྟེ། ཨ་རིའིི་སྲིད་འཛིན་གསར་པ་ཇོ་བྷཡེ་ཌན་ (Joe Biden) མཆོག་གི་སྲིད་གཞུང་འོག་བོད་དོན་གོང་འཕེལ་གཏོང་རྒྱུའི་ཁས་ལེན་དང་། རྒྱ་ནག་གཞུང་གིས་བོད་ནང་གི་དངོས་ཡོད་གནས་ཚུལ་ལ་དམ་བསྒྲགས་བྱས་ཏེ་གནས་ཚུལ་རྣམས་འཁྱོག་བཤད་བྱེད་ཀྱི་ཡོད་པར་སྐྱོན་བརྗོད་གནང་ཡོད།
དེ་བཞིན་སྐུ་ཞབས་ཌེ་སི་ཌི་རོ་མཆོག་གིས་བོད་རྒྱ་གྲོས་མོལ་སླར་གསོ་དང་བོད་ཀྱི་གནད་དོན་གསལ་ཆེད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་ལྟར་དབུ་མའི་ལམ་གྱི་སྲིད་བྱུས་ནི་ཁ་ཡོད་ལག་ཡོད་ཀྱི་ཐབས་ལམ་ཞིག་ཡིན་སྐོར་དང་། ཕན་ཚུན་བསམ་ཚུལ་མི་མཐུན་པ་རྣམས་གཅིག་གིས་གཅིག་ལ་ཡིད་ཆེས་བྱས་ཚེ་གསལ་འགྲོ་ངེས་ཡིན་སྐོར་སོགས་གསུངས།
གཞན་ཡང་སྐུ་ཞབས་ཌེ་སི་ཌི་རོ་མཆོག་གིས་ཨ་རིའི་གཞུང་གིས་མུ་མཐུད་བོད་མིའི་ཆོས་དང་རིག་གཞུང་། སྐད་ཡིག་བཅས་ལ་སྲུང་སྐྱོབ་དང་། བོད་དོན་ལ་རྒྱབ་སྐྱོར་ཆེད་རྒྱལ་ཁབ་གཞན་དང་མཉམ་འབྲེལ་ཐོག་ཕྱག་ལས་གནང་རྒྱུའི་ཁས་ལེན་གནང་ཡོད།
དྲ་ཐོག་གི་ཚོགས་འདུ་ལེགས་པར་གྲུབ་རྗེས་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་ཌེ་སི་ཌི་རོ་མཆོག་གིས་ཊི་ཝི་ཊར་ (Twitter) སྟེང་བོད་ཀྱི་བུད་མེད་གསར་འགོད་པ་རྣམས་དང་ལྷན་གླེང་མོལ་བྱེད་སྐབས་ཁོང་ཚོས་བོད་དང་བོད་མིའི་ཐོག་གསར་འགོད་བྱེད་བཞིན་པའི་ཉམས་མྱོང་སྐོར་ཤེས་རྟོགས་བྱུང་། བོད་ཀྱི་བུད་མེད་གསར་འགོད་པ་ཚོས་དཀའ་ངལ་ཆེ་བའི་གནས་སྟངས་འོག་བློས་བཏང་གིས་གལ་ཆེའི་གནས་ཚུལ་རྣམས་མཁོ་སྤྲོད་གནང་བ་དེས་འཛམ་གླིང་ཡོངས་ཀྱི་བུད་མེད་རྣམས་ལ་མིག་དཔེ་བཟང་པོ་ཞིག་བསྟན་ཡོད། ཅེས་བཀོད་ཡོད། །
