ཕྱི་ལོ་ ༢༠༢༡ ཟླ་ ༡ ཚེས་ ༡༧ རེས་གཟའ་ཉི་མ།
༄༅། །ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་ (Congressional Executive Commission on China) གིས་ཕྱི་ལོ་ ༢༠༡༩ ཟླ་ ༧ ཚེས་ ༡ ནས་ཕྱི་ལོ་ ༢༠༢༠ ཟླ་ ༧ ཚེས་ ༡ བར་གྱི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་ཁྲིམས་ལུགས་དབང་འཛིན་ཡར་རྒྱས་སྐོར་གྱི་ལོ་འཁོར་སྙན་ཐོ་བཏོན་ཏེ་ཨ་རིའི་གྲོས་ཚོགས་དང་སྲིད་འཛིན་མཆོག་ལ་ཕུལ་ཡོད།
དེ་ཡང་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས། རྒྱ་ནག་དམར་ཤོག་གཞུང་གིས་སྡིགས་ར་བསྐུལ་ཏེ་དྲག་གནོན་ཆེ་རུ་བཏང་བ་དང་། དེ་བཞིན་དྲ་རྒྱ་དང་། ཤེས་ཡོན་གྱི་སྡེ། གསར་འགོད་པ་བཅས་ཀྱི་ཐོག་ཞིབ་བཤེར་ཤུགས་ཆེ་བྱས་ཡོད་པ་མ་ཟད། ཕྱི་རྒྱལ་ཁག་གི་གཞུང་དང་མི་སེར་རྣམས་ལ་ཐེ་བྱུས་བྱས་ཡོད། བོད་དང་། ཧོང་ཀོང་། ཤར་ཏུར་ཀི་སི་ཐན། ཐེ་ཝན་བཅས་ཀྱི་མི་མང་གི་སྨྲ་བརྗོད་རང་དབང་ཐོག་སྟངས་འཛིན་ཤུགས་ཆེ་བྱས་ཡོད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་གཞུང་འབྲེལ་གྲོས་མོལ་གྱི་གནས་སྟངས་ཡར་རྒྱས་ཕྱིན་མེད་པ་དང་། རྒྱ་ནག་དམར་ཤོག་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཡང་སྲིད་དང་བླ་སྤྲུལ་གཞན་ཁག་གི་ཡང་སྲིད་ཀྱི་བདག་དབང་རྩོད་བཞིན་ཡོད་སྟབས། བོད་ནང་གི་ཆོས་དད་རང་དབང་མུ་མཐུད་ཇེ་སྡུག་ཏུ་འགྲོ་བཞིན་པའི་སྐོར་བཀོད་ཡོད་པ་དང་། གཞན་ཡང་བོད་རང་སྐྱོང་ལྗོངས་ཟེར་བའི་ནང་རྒྱ་ནག་གཞུང་གིས་མི་རིགས་མཐུན་སྒྲིལ་ཞེས་པའི་སྒྲིག་ཁྲིམས་གཏན་འབེབས་བྱས་ཏེ་གསར་འགྱུར་བརྒྱུད་ལམ་ཁག་བརྒྱུད་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་ཐབས་དང་། ཆབ་སྲིད་སློབ་གསོའི་དྲིལ་བསྒྲགས་ལས་འགུལ་ཤུགས་ཆེ་སྤེལ་ཡོད་པ་དང་། བོད་མི་རྣམས་ཆབ་སྲིད་སློབ་གསོའི་དྲིལ་བསྒྲགས་ཀྱི་ལས་འགུལ་ཁག་ནང་མཉམ་ཞུགས་མ་བྱས་ཚེ་རྒྱལ་ཁབ་ཁ་བྲལ་གྱི་ཉེས་མིང་འོག་འཛིན་བཟུང་དང་བཀག་ཉར་བྱས་ཡོད།
དེ་བཞིན་རྒྱ་ནག་གི་བཙོན་འོག་ཏུ་ཡོད་པའི་བོད་མི་ཆབ་སྲིད་བཙོན་པ་དབང་འདུས་ལགས་དང་ཨ་ཉག་སེང་སྒྲ་ལགས་ཀྱི་གནད་དོན་སྐོར་གཙོ་འདོན་གནང་ཡོད་པ་མ་ཟད། ཨ་རིའི་གྲོས་ཚོགས་དང་འཛིན་སྐྱོང་ལས་བྱེད་རྣམས་ལ་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་དངོས་སུ་ལག་བསྟར་གནང་དགོས་པ་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་ད་ལྟའི་གནས་རིམ་གཅིག་མཚུངས་སམ་དྲུང་ལས་གནས་རིམ་ལས་མཐོ་བ་ཞིག་བསྐོ་བཞག་གནང་དགོས་པ། རྒྱ་ནག་དམར་ཤོག་གཞུང་ལ་བོད་མིའི་ཆོས་དད་རང་དབང་ལ་བརྩི་བཀུར་དང་བོད་མིིའི་བླ་སྤྲུལ་ངོས་འཛིན་ལ་ཐེ་བྱུས་བྱེད་རྒྱུ་མཚམས་འཇོག་བྱེད་དགོས་པའི་སྐུ་འདེད་གནང་དགོས་པ། རྒྱ་ནག་གཞུང་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་བོད་རྒྱ་གྲོས་མོལ་བསྐྱར་གསོ་བྱེད་དགོས་པའི་འབོད་སྐུལ་གནང་དགོས་པ། རྒྱ་ནག་གཞུང་ལ་བོད་མི་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས་པའི་འབོད་སྐུལ་གནང་དགོས་པ། རྒྱ་ནག་གཞུང་ལ་རྒྱལ་སྤྱིའི་ཚོགས་པ་ཞིག་གི་སྐུ་ཚབ་ཅིག་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ལ་མཇལ་འཕྲད་ཞུ་འཇུག་དགོས་པའི་འབོད་སྐུལ་གནང་རོགས། ཞེས་དགོངས་ཚུལ་ཕུལ་ཡོད།།
