ཕྱི་ལོ་ ༢༠༢༡ ཟླ་ ༡ ཚེས་ ༤ རེས་གཟའ་ཟླ་བ།

༄༅། །འཛམ་གླིང་གི་ཡང་རྩེ་རུ་ཆགས་པའི་བོད་རྒྱལ་ཁབ་ནི། བོད་རྒྱལ་ཐོག་མ་གཉའ་ཁྲི་བཙན་པོ་ནས་བོད་རྒྱལ་ཐ་མ་གླང་དར་མ་བར་བོད་རྒྱལ་བཙན་པོ་རིམ་བྱོན་རྣམས་ཀྱིས་བོད་ཁམས་ཡོངས་ལ་མངའ་དབང་བསྒྱུར་ནས་བོད་རྒྱལ་ཁབ་དེ་ཤར་གླིང་ཨེ་ཤི་ཡའི་ནང་སྟོབས་ལྡན་གྱི་རྒྱལ་ཁབ་ཅིག་ཆགས་མྱོང་ཡོད། ཕྱི་ལོ་ ༡༢༦༠ ཙམ་ནས་བཟུང་ས་སྐྱ་དང་། ཕག་གྲུ  རིན་སྤུངས། གཙང་པ་བཅས་ནས་བོད་ཀྱི་སྲིད་དབང་བཟུང་བའི་སྐབས་ཆབ་སྲིད་ཀྱི་དར་རྒུད་སྣ་ཚོགས་བྱུང་ཡོད་ལ། བོད་ཀྱི་ཆོས་དང་རིག་གཞུང་སོགས་ཀྱི་ཐད་རླབས་ཆེན་གྱི་མཛད་རྗེས་ཀྱང་བཞག་ཡོད། ཕྱི་ལོ་ ༡༦༤༢ ལོར་རྒྱལ་མཆོག་ལྔ་པ་ཆེན་པོས་དགའ་ལྡན་ཕོ་བྲང་གི་གཞུང་བཙུགས་ཤིང་། དེ་ནས་བཟུང་རྒྱལ་མཆོག་སྐུ་ཕྲེང་རིམ་བྱོན་རྣམས་ཀྱིས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་ཡོད། ཕྱི་ལོ་ ༡༩༥༡  ལོར་རྒྱ་ནག་དམར་ཤོག་གཞུང་གིས་བཙན་དབང་གིས་བོད་གཞུང་གི་སྐུ་ཚབ་རྣམས་ལ་གྲོས་མཐུན་དོན་ཚན་བཅུ་བདུན་ཟེར་བ་མོས་མཐུན་བྱས་བཅུག་ཡོད། དེ་རྗེས་ཕྱི་ལོ་ ༡༩༥༩ ལོར་རྒྱ་ནག་དམར་ཤོག་གཞུང་གིས་བོད་ས་ཡོངས་རྫོགས་དབང་སྒྱུར་བྱས། ཕྱི་ལོ་ ༡༩༥༠ ནས་བཟུང་བོད་ཁམས་ཡོངས་ཀྱི་གནས་སྟངས་ཛ་དྲག་ཏུ་གྱུར།  

བོད་ཁ་བ་ཅན་གྱི་བསྟན་སྲིད་འཆི་གསོན་གྱི་མཚམས་ལ་སླེབ་སྐབས་གངས་ལྗོངས་ལྷ་མི་ཡོངས་ནས་གསོལ་བ་ཕུར་ཚུགས་སུ་བཏབ་པ་ལྟར། ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་མགོན་པོ་གང་ཉིད་མཆོག་གིས་དགུང་ལོ་བཅུ་དྲུག་ལས་སོན་མེད་ཀྱང་ཐུགས་བརྩེ་བ་ཆེན་པོའི་སྒོ་ནས་མ་འོངས་བོད་ཀྱི་བདེ་སྡུག་ལ་ཐུགས་དགོངས་བཞེས་ཏེ་བོད་གངས་ལྗོངས་ཆོས་ལྡན་ཞིང་གི་ཆོས་སྲིད་གཉིས་ཀྱི་ཐུགས་འགན་གཙང་བཞེས་མཛད། མགོན་པོ་གང་ཉིད་མཆོག་གིས་བོད་ཀྱི་སྤྱི་ཚོགས་ཁྲོད་རྒྱུ་ནོར་གྱི་དབུལ་ཕྱུག་ཁྱད་པར་ཆེན་པོ་ཡོད་པར་གཟིགས་ཏེ། ཕྱི་ལོ་ ༡༩༥༢ ལོར་ལེགས་བཅོས་ལས་ཁུངས་ཆེད་བཙུགས་ཀྱིས་སོ་ནམ་པ་ཚོར་བུ་ལོན་སྐྱེད་འབབ་ཆག་ཡངས་དང་ས་ཞིང་བགོ་འགྲེམས་མཛད་པ་མ་ཟད། རྫོང་དཔོན་རྣམས་ཀྱིས་སོ་སོ་སྒེར་གྱི་འགྲོ་གྲོན་སླད་མང་ཚོགས་ནས་ཁྲལ་འཕར་གང་མང་བསྡུ་ལེན་བྱེད་བཞིན་པར་བསྒྱུར་བཅོས་བཏང་གནང་མཛད་པ་དང་། དེ་བཞིན་བཙོན་པ་རྣམས་གློད་བཀྲོལ་བཏང་གནང་མཛད་པ་སོགས་བོད་ཁ་བ་ཅན་གྱི་སྤྱི་ཚོགས་དེའང་དེང་རབས་ནུབ་ཕྱོགས་པའི་མང་གཙོའི་ལམ་ལུགས་སུ་བསྒྱུར་རྒྱུའི་གོམ་པ་དང་པོ་དབུ་བཙུགས་མཛད། བསྒྱུར་བཅོས་དེ་དག་ལ་མང་ཚོགས་ནས་དགའ་བསུ་ཚད་མེད་ཞུས་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་གཞོན་ནུའི་དུས་ནས་མང་གཙོའི་ལམ་ལུགས་ལ་ཐུགས་སྣང་དང་གུས་བརྩི་ཆེན་པོ་མཛད་མཁན་ཞིག་ཡིན་པ་དང་།  བོད་ནང་དུ་བཞུགས་སྐབས་མགོན་པོ་གང་ཉིད་མཆོག་གིས་དེ་སྔ་སྤྱི་ཚོགས་རྙིང་པའི་ལམ་ལུགས་ལ་སྐྱོན་ཆ་མང་པོར་ཐུགས་ཞིབ་མཛད་པར་བརྟེན་ལེགས་བཅོས་ལས་ཁུངས་བཙུགས་གནང་མཛད་ཡོད་ཀྱང་རྒྱ་ནག་གཞུང་གིས་སྐབས་དེར་མོས་མཐུན་མ་བྱས་པར་ཁོ་པ་ཚོའི་ལངས་ཕྱོགས་ལྟར་བཅོས་བསྒྱུར་གཏོང་དགོས་པའི་རྣམ་འགྱུར་བསྟན་པར་བརྟེན་ཐུགས་འདུན་ཇི་བཞིན་བོད་ནང་དུ་བཅོས་བསྒྱུར་བཏང་ཐུབ་མེད།

ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་ས་ནས་བོད་མི་རྣམས་ཨུ་ཐུག་ཐབས་ཟད་ཀྱིས་རྒྱ་ནག་གི་དབང་སྒྱུར་ལ་ཞི་བའི་ངོ་རྒོལ་གནང་ཡོད། ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་མཚན་མོ་ལྷ་ལྡན་ནོར་གླིང་བསྐལ་བཟང་ཕོ་བྲང་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དབུས་སྐུ་འཁོར་ལྷན་རྒྱས་རྒྱ་གར་འཕགས་པའི་ཡུལ་ལ་བཙན་བྱོལ་དུ་ཆིབས་སྒྱུར་བསྐྱངས་གནང་མཛད་པ་དང་། ཕྱི་ལོ་ ༡༩༥༩ ཟླ་ ༤ ཚེས་ ༡༨ ཉིན་མགོན་པོ་གང་ཉིད་མཆོག་གིས་རྒྱ་གར་གྱི་ཏེཛ་པུར་ནས་རྒྱལ་སྤྱིའི་གསར་འགོད་ལྷན་ཚོགས་ཐོག་རྒྱ་ནག་གིས་བཙན་འོག་ཏུ་བཞག་པའི་ཆིངས་ཡིག་དོན་ཚན་བཅུ་བདུན་ངོས་ལེན་མེད་པའི་གཞུང་འབྲེལ་གསལ་བསྒྲགས་བསྐྱངས། ཕྱི་ལོ་ ༡༩༦༠ ཟླ་ ༢ ནང་ (༡༩༥༩ བོད་ཟླ་༡༢ ཚེས་༧ ཉིན།) བཙན་བྱོལ་བོད་མི་རྣམས་ཐེངས་དང་པོར་རྡོ་རྗེ་གདན་དུ་ཚོགས་འཛོམས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་དང་འབྲེལ་བླང་དོར་ཞུ་བྱའི་མནའ་གན་མཐུ་མོ་ཆེ་འབུལ་སྐབས། ༸གོང་ས་མཆོག་གིས། བོད་ནང་རང་རེ་སྔ་མའི་གནས་སྟངས་དེ་དག་དང་མ་འདྲ་བའི་ཆོས་སྲིད་གཉིས་ལྡན་གྱི་མང་གཙོའི་གཞུང་ཞིག་འཛུགས་རྒྱུ་དེ་ཧ་ཅང་གལ་ཆེན་པོ་ཡིན་པར་བརྟེན། མི་དམངས་ཀྱི་ཚབ་བྱེད་ཐུབ་མཁན་དང༌། རྒྱ་ཆེའི་མང་ཚོགས་ཀྱིས་འོས་བསྡུའི་ལམ་ནས་བསྐོ་གཞག་བྱས་པའི་མི་དམངས་འཐུས་མིའི་ཚོགས་འདུ་ཞིག་དགོས་ཀྱི་རེད། ཁྱེད་རང་ཚོ་ཕར་ལོག་རྗེས་མང་ཚོགས་ཁྲོད་ནས་ཤེས་ཡོན་ཡོད་པ་དང༌། འཇོན་ཐང་ཡོད་པ། རྒྱལ་ཞེན་ལྷག་བསམ་ལྡན་པ། མང་ཚོགས་ཀྱིས་ཡིད་ཆེས་འཕེར་བའི་མི་འགྲོ་མིང་འདོན་བྱེད་དགོས། གནས་སྐབས་རིང་ཆོས་བརྒྱུད་ཆེན་པོ་བཞི་ནས་འཐུས་མི་རེ་དང༌། ཆོལ་ཁ་གསུམ་ནས་འཐུས་མི་གསུམ་རེ་འདེམས་དགོས། ཞེས་བཀའ་སློབ་བསྩལ་དོན་ལྟར། རང་ཁུངས་སོ་སོ་ནས་སྤྱི་འཐུས་སེར་སྐྱ་མི་གྲངས་བཅུ་གསུམ་འོས་འདེམས་ཞུས་ཏེ། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་སྐབས་དང་པོའི་བོད་མི་མང་སྤྱི་འཐུས་གྲངས་བཅུ་གསུམ་ནས་༸གོང་ས་མཆོག་ལ་མཇལ་ཕྱག་དམ་འབུལ་ཞུས་པ་དང་འབྲེལ་བོད་ཀྱི་ལོ་རྒྱུས་ནང་ཐེངས་དང་པོ་བོད་མིའི་མང་གཙོའི་ལམ་ལུགས་དེ་ཐོག་མར་དབུ་བརྙེས་པ་ཞིག་ཡིན། 

སྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས། ཕྱི་ལོ་ ༡༩༦༣ ཟླ་ ༣ ཚེས་ ༡༠ ཉིན་གསུམ་བཅུའི་དུས་དྲན་ཐེངས་བཞི་པའི་ཐོག་མ་འོངས་བོད་ཀྱི་རྩ་ཁྲིམས་ཟིན་བྲིས་ཡོངས་ཁྱབ་གསལ་བསྒྲགས་བསྐྱངས་ཏེ། བཙན་བྱོལ་བོད་མི་རྣམས་ནས་གཞིས་བྱེས་བོད་མི་ཡོངས་ཀྱི་ངོ་ཚབ་མཚོན་པའི་སྤྱི་འཐུས་འོས་འདེམས་ཞུ་རྒྱུས་མཚོན་བོད་མིའི་སྒྲིག་འཛུགས་ཀྱི་ངོ་བོ་མང་གཙོའི་ལམ་སྲོལ་ཐོག་དངོས་སུ་བསྒྱུར་གནང་མཛད་པ་དང་། ཕྱི་ལོ་ ༡༩༧༥ ཟླ་ ༩ ཚེས་ ༢ ཉིན་ནས་བཟུང་མང་གཙོའི་དུས་ཆེན་གཞུང་འབྲེལ་གྱིས་སྲུང་བརྩི་ཞུ་འགོ་ཚུགས་པ་ནས་བཟུང་ད་བར་སྲུང་བརྩི་ཞུ་མུས་ཡིན།

མགོན་པོ་གང་ཉིད་མཆོག་གིས་ཕྱི་ལོ་ ༡༩༧༩ ཟླ་ ༧ ཚེས་ ༢༣ ཉིན་བཀའ་བློན་གྱི་དམ་བཅའ་ཕུལ་བའི་ཉིན་མོ་ནས་ལོ་ལྔའི་ལས་ཁུར་གཏན་འབེབས་བཟོས་གནང་མཛད།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྩ་ཁྲིམས་ཟིན་བྲིས་བསྐྱར་ཞིབ་ཚོགས་ཆུང་ཐད་བསྐོས་བསྐྱངས་ཏེ། ཕྱི་ལོ་ ༡༩༩༡ ཟླ་ ༦ ཚེས་ ༡༤ ཉིན་སྐབས་ ༡༡ པའི་བོད་མི་མང་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་ཞིང་། ཕྱི་ཟླ་ ༦ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོག་མཆན་བསྩལ་གནང་བ་བཅས་ལ་བརྟེན་ནས་བོད་མིའི་སྒྲིག་འཛུགས་འདི་བཞིན་གཞི་རྩའི་ཁྲིམས་ཡིག་ཡོད་པའི་དེང་རབས་ཅན་གྱི་མང་གཙོའི་འགྲོ་ལུགས་དང་མཐུན་པ་ཞིག་ཏུ་བསྒྱུར་གནང་མཛད།

ཕྱི་ལོ་ ༢༠༠༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་འགོ་ཁྲིད་བཀའ་བློན་ཁྲི་པ་མང་ཚོགས་ནས་ཐད་ཀར་འོས་འདེམས་བྱ་རྒྱུའི་ལམ་ལུགས་གཏན་འབེབས་མཛད་ནས་མགོན་པོ་གང་ཉིད་མཆོག་བོད་མིའི་ཆབ་སྲིད་ནས་ཕྱེད་བགྲེས་ཡོལ་དུ་ཕེབས་པ་དང་། ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་འཕྲལ་ཕུགས་ཀྱི་བདེ་རྩ་ཁོ་ནར་དགོངས་བཞེས་བླ་མེད་ཀྱིས་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་སུ་རྫོགས་པ་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་རྣམས་ལ་རྩིས་སྤྲོད་མཛད་དེ་བཙན་བྱོལ་བོད་མིའི་སྒྲིག་འཛུགས་འདི་ཉིད་ཁྲིམས་ལུགས་དབང་འཛིན་ལྡན་པའི་དེང་རབས་མང་གཙོའི་ལམ་ལུགས་ཡང་དག་སྲ་བརྟན་ཅན་ཞིག་ཏུ་བསྒྱུར་གནང་མཛད་ཡོད། 

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸ཞལ་སྔ་ནས་བཀའ་སློབ་འདི་ལྟར་སྩལ་དོན།  ཕྱི་ལོ་ ༢༠༠༡ ལོ་ནས་བཟུང་ངོས་རང་བོད་མིའི་ཆབ་སྲིད་འགོ་ཁྲིད་ནས་ཕྱེད་རྒས་ཡོལ་དང་། དེ་རྗེས་ཕྱི་ལོ་ ༢༠༡༡ ལོ་ནས་བཟུང་ངོས་ཀྱིས་བོད་མིའི་ཆབ་སྲིད་ཀྱི་ལས་འགན་ནས་རྒས་ཡོལ་ཆ་ཚང་ཞུས་པ་མ་ཟད། ཏཱ་ལའི་བླ་མས་གཞུང་འཛིན་ལམ་ལུགས་དེ་མཇུག་སྒྲིལ་བ་ཡིན།  ཞེས་བཀའ་སློབ་སྩལ། །