ཕྱི་ལོ་ ༢༠༢༡ ཟླ་ ༡ ཚེས་ ༡ རེས་གཟའ་པ་སངས།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལུགས་ལོ་གསར་ལ་བརྙན་འཕྲིན་བརྒྱུད་འཚམས་འདྲིའི་གསུང་འཕྲིན་སྩལ་དོན། ད་ལམ་ངོས་ཀྱིས་ཕྱི་ནང་མི་རིགས་ཀུན་ལ་ཕྱི་ལོ་གསར་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། ལྷག་པར་ད་ལན་གྱི་གོ་སྐབས་འདི་བཟུང་སྟེ་བོད་ནང་གི་གཞིས་ལུས་རྒྱ་ཆེའི་མི་མང་ལ་ཕྱི་ལོ་གསར་པར་འཚམས་འདྲི་དང་བདེ་སྐྱིད་འཛོམས་པའི་ལོ་གསར་ལ་བཀྲིས་བདེ་ལེགས་ཞུ་འདུན་བྱུང་། མི་སུ་ཞིག་ཡིན་རུང་ལུས་ཀྱི་གནས་སྟངས་ཇི་འདྲ་ཡོད་མིན་ལ་མ་ལྟོས་པར་དེ་རིང་ངོས་ཀྱིས་ཁྱེད་རྣམས་ལ་ལོ་གསར་གྱི་འཚམས་འདྲིའི་བཀྲ་ཤིས་བདེ་ལེགས་ཞུས་ནས་ཁྱེད་རྣམས་སེམས་སྤྲོ་པོ་ཡོང་བའི་རེ་བ་ཡོད།
དེ་ནས་གལ་ཆེ་བ་ཞིག་ནི། འདས་པའི་ལོ་དེ་སོ་སོས་བཟང་པོ་བྱས་ནས་སྐྱེལ་ཡོད་མིན་བསམ་བློ་གཏོང་དགོས། འདས་པའི་ལོའི་ནང་གཞན་ལ་ཕན་ཐོགས་བསྒྲུབས་པ་དང་། དེ་ལྟར་མ་བྱུང་ནའང་གཞན་ལ་གནོད་མ་སྐྱེལ་བའི་སྒོ་ནས་མི་ཚེ་བསྐྱལ་ཡོད་ན། འདས་པའི་ལོ་དེ་དོན་དང་ལྡན་པ་བྱུང་ཡོད། དེ་ལྟར་མིན་པར་ལོ་སྔ་མ་དེར་རང་དོན་ཁོག་བཅུག་བྱས་དྲགས་པ་དང་། གཞན་ལ་བཤུ་གཞོག་བཏང་བ་སོགས་བྱུང་ཡོད་ན་མི་ཚེ་དོན་ལྡན་ངང་བསྐྱལ་ཐུབ་པ་བྱུང་མེད།
གལ་ཏེ་མི་སུ་འདྲ་ཞིག་གིས་མི་ཚེ་དེ་ལྟར་བསྐྱལ་ཡོད་ན། ད་ཆ་ལོ་གསར་པ་འགོ་ཚུགས་པ་ཡིན་སྟབས། བསམ་བློ་འདི་ལྟར་གཏོང་དགོས། འདས་པ་ནི་འདས་པ་རེད། ལོ་གསར་པ་ནས་བཟུང་སྟེ་རང་གི་ལུས་འདི་དང་མིང་འདི་གཉིས་སྔར་ལྟར་ཡིན་རུང་། རང་གི་མི་ཚེ་འདི་སྐྱེལ་སྟངས་སྔར་ལས་བྱམས་བརྩེ་ཆེ་བ་ཞིག་དང་། དོན་སྙིང་ལྡན་པ་ཞིག་བྱ་སྙམ་པའི་བསམ་བློ་གཏོང་དགོས།
ཁྱེད་རྣམས་ལ་ཕྱི་ལོའི་ལོ་གསར་གྱི་འཚམས་འདྲི་ཞུ་རྒྱུ་དང་ཆབས་ཅིག་ཞུ་རྒྱུར། ལོ་གསར་སྐབས་མི་རྣམས་ལྷན་འཛོམས་ཀྱིས་སྟོན་མོ་བཤམས་ཏེ་ཆང་འཐུང་བ་སོགས་སྤྲོ་སྐྱིད་གཏོང་གི་ཡོད་མོད། ཆང་ཅུང་ཟད་རེ་འཐུང་བ་ལས་དེ་མིན་ཆང་འཐུང་རྒྱུ་མང་དྲགས་ན་གང་འཚམ་ནས་ཕན་ཚུན་འཁྲུག་རྩོད་ཤོར་ཏེ་ལོ་གསར་པའི་དགའ་སྟོན་དེ་སྡུག་བསྔལ་གྱི་རྐྱེན་དུ་འགྱུར་བའི་ཉེན་ཁ་ཆེན་པོ་ཡོད། དེར་བརྟེན་ལོ་གསར་གྱི་དགའ་སྟོན་དེ་ཞི་འཇམ་ངང་ནས་གཏོང་རོགས་ཞུ་རྒྱུ་ཡིན།
དེ་ཡང་ལོ་གསར་གྱི་ཉིན་མོ་ཙམ་དུ་མིན་པར་ལོ་ཧྲིལ་པོའི་རིང་དེ་ལྟར་གནང་དགོས་པ་བཅས། བཀྲ་ཤིས་བདེ་ལེགས། །
