ཕྱི་ལོ་ ༢༠༢༡ ཟླ་ ༡ ཚེས་ ༢༡ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ཟླ་ ༧ ཚེས་ ༡ ནས་ ༢༠༢༡ ཟླ་ ༦ ཚེས་ ༣༠ བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་པའི་ལས་རིམ་གྱི་ཆ་ཤས་སུ། ཕྱི་ལོ་ ༢༠༢༡ ཟླ་ ༡ ཚེས་ ༢༠ ཉིན་སྒང་ཏོག་ཁུལ་གྱི་༸རྒྱལ་བའི་བཀའ་དྲིན་རྗེས་དྲན་ཚོགས་ཆུང་ནས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་དྲིལ་བསྒྲགས་སྦྱར་པང་ཞིག་དབུ་འབྱེད་གནང་ཡོད།
དེ་ཡང་དབུ་འབྱེད་མཛད་སྒོའི་ཐོག་བོད་མི་མང་སྤྱི་འཐུས་གཡུ་སྒྲོན་དབུ་དཀར་ཚང་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མི། གཞུང་འབྲེལ་མིན་པའི་ཚོགས་པ་ཁག་དྲུག་གི་ཚོགས་གཙོ། དེ་བཞིན་ YOG committee བཅས་ཕེབས་ཡོད།
ཏོག་དབྱིབས་གཉན་རིམས་ཀྱི་རྐྱེན་པས་རྒྱ་གར་ནང་སྒོ་རྒྱ་བསྡམས་པ་དང་། མང་ཚོགས་འདུ་འཛོམས་ལ་དམ་བསྒྲགས་གནང་བར་བརྟེན་ལས་རིམ་དེ་བཞིན་རེ་ཞིག་མཚམས་འཇོག་བྱེད་དགོས་བྱུང་ཡོད། འོན་ཀྱང་ཕྱིས་སུ་མི་མང་འདུ་འཛོམས་ཐོག་ལྷོད་ཡངས་བྱུང་བ་དང་བསྟུན་ལས་གཞི་དེ་ལག་བསྟར་གནང་ཡོད།
དེ་ཡང་༸རྒྱལ་བའི་ཐུགས་བསྐྱེད་དམ་བཅའ་བཞིའི་སྐོར་འཁོད་པའི་དྲིལ་བསྒྲགས་སྦྱར་པང་རྣམས་རྣམ་རྒྱལ་བོད་ཀྱི་ཤེས་རིག་ཉམས་ཞིབ་ཁང་དང་། སེར་བྱེས་འགྲོ་ཕན་གླིང་དགོན། གླ་འཁོར་འབབ་ཚུགས། དེ་བཞིན་སྣ་འཛོམས་ཁྲོམ་ར་སོགས་སུ་བཙུགས་ཡོད། འཕྲེད་དར་དེ་དག་ཨིན་ཡིག་དང་བལ་པོའི་སྐད་ཡིག་ནང་པར་སྐྲུན་གནང་ཡོད་པ་བཅས། །
