ཕྱི་ལོ་ ༢༠༢༡ ཟླ་ ༡ ཚེས་ ༡༨ རེས་གཟའ་ཟླ་བ།
༄༅། །སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཧུ་ཡེ་ (Huy) ཞེས་པའི་གྲོང་སྡེ་ནང་རྟེན་གཞི་བྱས་པའི་ཡོན་ཏན་གླིང་ནང་པའི་ཆོས་ཚོགས་སུ་སྦེལ་ཇམ་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་ (Samuel Cogolati) མཆོག་ཕེབས་སྐབས་ཁོང་ལ་ཕྱི་ལོ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་ལ་ཨ་རིའི་སྲིད་འཛིན་སྐུ་ཞབས་ཌོ་ནལ་ཌི་ཊི་རམ་ཕི་མཆོག་གིས་མཚན་རྟགས་བཀོད་དེ་ཁྲིམས་སུ་གཏན་འབེབས་གནང་སྟེ་ད་ཆ་བོད་ཀྱི་གནད་དོན་སྔར་ལྷག་ཤུགས་ཆེན་པོ་ཆགས་ཡོད་སྐོར་སོགས་ངོ་སྤྲོད་ཞུས་ཡོད།
དེ་ཡང་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་མཆོག་ལ་ཕྱི་ལོ་ ༢༠༢༡ ཟླ་ ༡ ཚེས་ ༡༢ ཉིན་གྱི་དགོང་དྲོར་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷེར་ཊི་ཌེ་སི་ཊི་རོ་མཆོག་གིས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་དྲ་ཐོག་ཚོགས་འདུ་ཚོགས་ཡོད་པ་མ་ཟད། ཕྱི་ཚེས་ ༡༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་དྲ་ལམ་བརྒྱུད་མཇལ་མོལ་ཞུས་ཡོད་སྐོར། ཨ་རིའི་གྲོས་ཚོགས་གོང་འོག་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་དང་། དེ་བཞིན་ཉེ་ཆར་ཨ་རིའི་གཞུང་ནས་ཕྱི་ལོ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་གཏན་འབེབས་གནང་བ། ཁྲིམས་ཡིག་དེའི་ནང་དོན་གཙོ་བོ་ཁག་ངོ་སྤྲོད་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྲགས་ཆེན་གཞོན་ནུ་མ་གྷེ་རེ་ཊ་ཐན་བྷག་ (Greta Thunberg) ལགས་དང་། དེ་བཞིན་དེང་དུས་ཚན་རིག་པ་ཁག་གཅིག་དང་ལྷན་དུ་གོ་ལའི་ཚ་དྲོད་ཀྱི་ཛ་དྲག་གནས་སྟངས་སྐོར་བགྲོ་གླེང་མཛད་ཡོད་སྐོར། རྒྱ་ནག་གཞུང་གིས་བོད་མིར་བཙན་དབང་གིས་ངལ་རྩོལ་ལས་རིགས་སྦྱོང་བརྡར་སྤྲད་བཞིན་པའི་སྐོར་སོགས་གསུངས།
གཞན་ཡང་དེ་སྔ་ཕྱི་ལོ་ ༢༠༢༠ ཟླ་ ༤ ཚེས་ ༨ ཉིན་གྲོས་ཚོགས་འཐུས་མི་ཁོང་གིས་གྲོས་ཚོགས་ནང་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གི་བཙན་འོག་ནས་ད་བར་གར་སོང་ཆ་མེད་དུ་གྱུར་བའི་གནས་སྟངས་ཐད་སེམས་འཚབ་ཀྱི་རྣམ་པ་ཤུགས་ཆེ་བཏོན་པ་དང་། སྦེལ་ཇམ་གཞུང་གིས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ཀྱིས་མཚོན་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་རྩད་གཅོད་ཞུ་རྒྱུའི་ལམ་ལུགས་ཐོག་ལངས་ཕྱོགས་ཁ་གསལ་དགོས་པའི་རེ་འདུན་བཏོན་གནང་ཡོད་པའི་དྲན་སྐུལ་དང་སྦྲགས། སླར་ཡང་གྲོས་ཚོགས་ནང་རྒྱ་ནག་གཞུང་གིས་བོད་མིར་བཙན་དབང་གིས་ངལ་རྩོལ་ལས་རིགས་སྦྱོང་བརྡར་སྤྲད་བཞིན་པའི་གནས་དོན་ཐད་གླེང་སློང་ཡོང་བའི་འབོད་སྐུལ་ཞུས་པར་ཞལ་བཞེས་གནང་ཡོད། གྲོས་ཚོགས་འཐུས་མི་ཁོང་ནི་ལྗང་ཁུ་ཆབ་སྲིད་ཚོགས་པའི་འཐུས་མི་ཡིན་པ་མ་ཟད། རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་ཚོགས་གཞོན་ཡང་ཡིན་འདུག
ཚོགས་འདུའི་ཐོག་ཡོན་ཏན་གླིང་གི་བླ་མ་བཟོད་པ་ལགས་ཀྱང་མཉམ་ཞུགས་གནང་ཡོད། ཚོགས་འདུ་གྲོལ་རྗེས་ཁོང་རྣམས་ཆོས་ཚོགས་ཀྱི་གཡས་གཡོན་དུ་གཟིགས་སྐོར་དུ་ཕེབས་ཡོད།
ཡོན་ཏན་གླིང་གི་བླ་མ་བཟོད་པ་ལགས་ཀྱིས་མགྲོན་འབོད་གནང་དོན་ལྟར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཡོན་ཏན་གླིང་ནང་པའི་ཆོས་ཚོགས་སུ་ཕེབས་གནང་བ་དང་། ཕྱོགས་མཚུངས་སྔ་ལོ་ཐུག་འཕྲད་སྐབས་བླ་མ་བཟོད་པ་ལགས་ཀྱིས་རྒྱ་གར་རྡོ་རྗེ་གླིང་ཉེ་འགྲམ་དུ་ཡོད་པའི་སོ་ན་ཌའི་དགོན་པའི་དགེ་འདུན་པའི་སློབ་སྦྱོང་ཐོག་སེམས་འཚབ་གནང་བར་བརྟེན་ཕྱི་ལོ་ ༢༠༡༩ ལོར་ས་གནས་འགོ་འཛིན་བསྟན་འཛིན་དབྱངས་འཛོམས་ལགས་དང་སློབ་གྲྭའི་མཐུན་འགྱུར་འོག་དགོན་པའི་དགེ་འདུན་པ་གྲངས་ ༢༤ ཙམ་སོ་ན་ཌ་སཾ་བྷོ་ཊའི་སློབ་གྲྭར་འཛུལ་ཞུགས་བྱེད་ཐུབ་པ་བྱུང་ཡོད། སློབ་གྲྭ་འཛུལ་ཞུགས་བྱེད་པའི་སྐབས་སྦར་སིལ་དུ་ཡོད་པའི་ནཱ་ལེནྡྲའི་ལྟེ་གནས་ཁང་གི་ (Ms Phillippine Van Zuyle) ལགས་ཀྱང་ཡོད་པ་བཅས། །
