ཕྱི་ལོ་ ༢༠༢༡ ཟླ་ ༡ ཚེས་ ༢༥ རེས་གཟའ་ཟླ་བ།

༄༅། །ཕྱི་ལོ་ ༢༠༢༡ ཟླ་ ༡ ཚེས་ ༢༥ ཉིན་ཧི་མཱ་ཅལ་མངའ་སྡེ་དབུ་བརྙེས་ནས་ལོ་ངོ་ལྔ་བཅུ་འཁོར་གྱི་ཡོད་པ་དང་སྟབས་བསྟུན་སིམ་ལ་སྤྱི་ཁྱབ་པ་བསྟན་འཛིན་སྣང་བ་ལགས་དང་། ས་གནས་རང་བདེན་ཚོགས་གཙོ་ཚེ་རིང་ཆོས་སྒྲོན་ལགས། ས་གནས་འཐུས་ཚོགས་ཀྱི་དྲུང་ཆེ་དཔལ་ལྡན་དོན་གྲུབ་ལགས། སྨན་ཞབས་པ་བསྟན་འཛིན་འཛོམས་སྐྱིད་ལགས་བཅས་ཀྱིས་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་སྦན་ཌ་རུ་དཏྟ་ཏྲེས་ཡ་  (Bandaru Dattatreya) མཆོག་དང་མཇལ་འཕྲད་ཞུས་ཡོད།

སྐབས་དེར་ཧི་མཱ་ཅལ་མངའ་སྡེའི་སྲིད་སྐྱོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༧སྐུའི་འཕྲོད་བཞེས་སྐོར་བཀའ་འདྲི་གནང་བ་དང་སྦྲགས་གཞིས་བྱེས་བོད་མི་སྤྱིའི་གནས་སྟངས་དང་། ལྷག་པར་ཧི་མཱ་ཅལ་མངའ་སྡེའི་ནང་ད་ལྟ་གནས་སྡོད་བྱེད་བཞིན་པའི་བཙན་བྱོལ་བོད་མིའི་གནས་སྟངས་སྐོར་བཀའ་བསྡུར་གནང་ཡོད། 

སིམ་ལ་སྤྱི་ཁྱབ་པ་དང་། སིམ་ལ་ས་གནས་༸རྒྱལ་བའི་བཀའ་དྲིན་རྗེས་དྲན་ཚོགས་ཆུང་ནས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་པའི་ལས་རིམ་གྱི་ཆ་ཤས་སུ། མངའ་སྡེའི་སྐྱིད་སྐྱོང་མཆོག་དང་། ཁོང་གི་དྲུང་ཆེ་རཱ་ཀེཤ་ཀལ་ཝར་ (Rakesh Kanwar) ལགས། པི་སི་རཱ་ནཱ་ (P.S. Rana) ལགས། གསར་འགོད་དྲུང་ཆེ་ཇ་ཡནྟ་ཤར་མཱ་ (Jayant Sharma) ལགས་བཅས་ལ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་རྣམ་པར་རིས་ཅན་གྱི་ཕྱག་དེབ་འཚམས་འདྲི་དང་སྦྲགས་ཕྱག་རྟགས་སུ་ཕུལ་ཡོད་པ་བཅས། །