ཕྱི་ལོ་ ༢༠༢༡ ཟླ་ ༡ ཚེས་ ༢༤ རེས་གཟའ་ཉི་མ།
༄༅། །ཕྱི་ལོ་ ༢༠༢༡ ཟླ་ ༡ ཚེས་ ༢༢ ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་ཌ་ཡ་ནནྟ་ས་གར་མཐོ་སློབ་ (Dayanand Sagar University) ཀྱི་བསླབ་པ་མཐར་སོན་པའི་མཛད་སྒོ་ཐེངས་ ༤ པའི་སྟེང་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་གཞོན་པ་ཨཤ་ཝ་ཐི་ནཱ་ར་ཡན་ (Dr. Ashwath Narayan C.N) ལགས་ཀྱིས་ཚོང་ལས་འཛིན་སྐྱོང་ཐོག་ཉེ་བའི་གཙུག་ལག་རབ་འབྱམས་གནང་མཁན་བསྟན་འཛིན་ཆོས་འཛོམས་ལགས་དང་ཚོང་རིག་ཐོག་ཉེ་བའི་གཙུག་ལག་རབ་འབྱམས་གནང་མཁན་བསོད་ནམས་ཆོས་སྐྱིད་ལགས་རྣམ་གཉིས་ལ་སློབ་སྦྱོང་གི་སྦྱངས་འབྲས་གཟེངས་སུ་ཐོན་པའི་གསེར་གྱི་རྟགས་མ་གནང་བར། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་ཁོང་རྣམ་གཉིས་ལ་དགའ་བསུའི་འཚམས་འདྲི་གནང་འདུག
དེ་ཡང་བསོད་ནམས་ཆོས་སྐྱིད་ལགས་ནི་རྒྱ་གར་ལྷོ་ཕྱོགས་སུ་སྐྱེས་ཤིང་། འཛིན་རིམ་བཅུ་པ་བར་རྡ་ཤོད་བོད་ཁྱིམ་དང་འཛིན་རིམ་བཅུ་གཉིས་མོན་གྷོ་གཏན་སློབ་ནས་གནང་ཡོད། ཏོག་དབྱིབས་གཉན་རིམས་ཀྱི་ཉེན་ཁ་ཆེན་པོ་ཡོད་ནའང་བསོད་ནམས་ཆོས་སྐྱིད་ལགས་ཀྱིས་འཛིན་གྲྭ་ཆད་མྱོང་མེད་པར་མུ་མཐུད་སློབ་སྦྱོང་གནང་ཡོད། ཁོང་གིས་ཤེས་རིག་གི་སློབ་ཡོན་མེད་ན་ངས་མུ་མཐུད་སློབ་སྦྱོང་བྱེད་ཐུབ་ཀྱི་མ་རེད་བསམ་གྱི་འདུག དེར་བརྟེན་ངས་གོ་སྐབས་འདི་བརྒྱུད་ཤེས་རིག་ལས་ཁུངས་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས།
བསྟན་འཛིན་ཆོས་འཛོམས་ལགས་ནི་རྒྱ་གར་ལྷོ་ཕྱོགས་སྦེལ་ཀོབ་ཏུ་སྐྱེས་ཤིང་། ལྡེ་ར་ལྡུན་པེ་སི་ཊོ་ལོ་ཛི་ (Pestalozzi Dehradun) ནས་སློབ་སྦྱོང་གནང་ཡོད་པ་དང་། ཚོང་ལས་འཛིན་སྐྱོང་ཐོག་ཉེ་བའི་གཙུག་ལག་རབ་འབྱམས་པའི་སློབ་སྦྱོང་ལེགས་པར་ཐོན་རྗེས་ད་ལྟའི་ཆར་ཁོང་གིས་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་ནང་ཚོང་ལས་འཛིན་སྐྱོང་ཐོག་གཙུག་ལག་རབ་འབྱམས་པའི་སློབ་སྦྱོང་གནང་བཞིན་ཡོད། བསྟན་འཛིན་ཆོས་འཛོམས་ལགས་ཀྱིས་སློབ་གྲོགས་རྣམས་ལ་འཛིན་གྲྭར་མ་ཆད་པར་འགྲོ་དགོས་པ་དང་། འཛིན་གྲྭའི་ནང་དགེ་རྒན་གྱི་སློབ་ཁྲིད་ལ་དོ་སྣང་བྱས་ནས་ཉན་དགོས་པའི་གལ་གནད་སྐོར་ལམ་སྟོན་གནང་ཡོད་པ་མ་ཟད། ཤེས་རིག་ལས་ཁུངས་ནས་སློབ་ཡོན་གནང་བ་དེས་ཕ་མའི་དཔལ་འབྱོར་གྱི་རྡོག་ཁྲེས་ཡང་དུ་བཏང་གནང་ཡོད་སྟབས་ཤེས་རིག་ལས་ཁུངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
ཤེས་རིག་ལས་ཁུངས་ཀྱི་སློབ་ཡོན་ཚན་པའི་འགན་འཛིན་བསོད་ནམས་བཟང་མོ་ལགས་ཀྱིས། བསོད་ནམས་ཆོས་སྐྱིད་ལགས་དང་བསྟན་འཛིན་ཆོས་འཛོམས་ལགས་ལ་ཝི་མ་ལ་ཐེབས་རྩ་ (Vimala Foundation) དང་། ཡེ་ཤེས་འཁོར་ལོ་ཐེབས་རྩ། (Yeshi Khorlo Foundation) གཉིས་ནས་རྒྱབ་སྐྱོར་གནང་བཞིན་པར་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།།
