ཕྱི་ལོ་ ༢༠༢༡ ཟླ་ ༡ ཚེས་ ༥ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༡༡ ཚེས་ ༢༤ ཉིན་བོད་རང་སྐྱོང་ལྗོངས་ཁུལ་དུ་རྒྱ་ནག་གཞུང་གིས་དྲ་རྒྱའི་སྲིད་བྱུས་ཤིག་སྤེལ་འགོ་བཙུགས་ཏེ། སྤྱི་ཚོགས་དྲ་རྒྱའི་སྟེང་རྒྱལ་ཁབ་ཁ་བྲལ་དང་རྒྱལ་ཁབ་གཅིག་གྱུར་ལ་གཏོར་བརླག་གཏོང་བའི་ཁྲིམས་འགལ་ཉེས་གསོག་གི་བྱེད་སྒོ་སྤེལ་མཁན་མི་སྒེར་ལ་རྡུང་རྡེག་ཚ་ནན་གཏོང་རྒྱུ་ཡིན། ཞེས་བཤད་ཡོད། བརྡ་ཁྱབ་དེ་ནི་འདི་ལོའི་ཕྱི་ཟླ་ ༡༢ ཚེས་ ༢༤ ཉིན་ཡོངས་བསྒྲགས་བྱས་འདུག མཉེན་ཆས་ཝེ་པི་ཨན་ (VPN) སྤྱོད་པ་དང་སྤྱོ་ཚོགས་བརྒྱུད་ལམ་གྱི་གྲོགས་ཚོམས་ནང་བགྲོ་གླེང་བྱེད་པ་སོགས་ཚང་མ་ཁྲིམས་འགལ་ཉེས་གསོག་གི་ངོ་བོར་བསྒྱུར་ཡོད། རྒྱ་ནག་གཞུང་གིས་སྤྱི་ཚོགས་དྲ་རྒྱ་བཀག་སྡོམ་གྱི་ལས་འགུལ་བོད་རང་སྐྱོང་ལྗོངས་ཀྱིས་གཙོས་བོད་ཀྱི་ས་ཁུལ་ཡོངས་རྫོགས་སུ་ལག་བསྟར་བྱས་ཡོད་པ་མ་ཟད། མཚོ་སྔོན་ཞིང་ཆེན་གྱི་ས་གནས་སྲིད་གཞུང་གིས་དྲ་ལམ་དུ་ཁྲིམས་འགལ་ཉེས་གསོག་གི་ཆ་འཕྲིན་སྤེལ་མཁན་ལ་མི་ལོ་ ༨ ཁྲིམས་ཐག་གཅོད་རྒྱུ་ཡིན། ཞེས་ཁྱབ་བསྒྲགས་སྤེལ་ཡོད།
དེ་ཡང་རྒྱ་ནག་གཞུང་གིས་བརྡ་ཁྱབ་སྤེལ་དོན། བོད་རང་སྐྱོང་ལྗོངས་ཀྱི་ཆ་འཕྲིན་དང་དྲ་རྒྱ་སྤྱད་དེ་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་སྤེལ་མི་ཆོག་པའི་སྐོར་གྱི་བརྡ་ཁྱབ།
ཁྲིམས་བཞིན་དྲ་རྒྱ་བཅོས་སྐྱོང་བྱེད་རྒྱུར་སྐུལ་འདེད་གཏིང་ཟབ་བཏང་སྟེ། ཆ་འཕྲིན་དང་དྲ་རྒྱར་བརྟེན་ནས་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་ཀྱི་གཅིག་གྱུར་ལ་གཏོར་བཤིག་གཏོང་བའི་ཁྲིམས་འགལ་ཉེས་གསོག་གི་བྱེད་སྒོར་རྡུང་རྡེག་ཚ་ནན་གཏོང་ཆེད། ༼ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་བཅའ་ཁྲིམས། ༽ དང་། ༼ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་བཅོས་སྐྱོང་དོ་དམ་ཆད་གཅོད་ཀྱི་བཅའ་ཁྲིམས། ༽ ༼ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས། ༽ ༼ རྩིས་འཁོར་གྱི་ཆ་འཕྲིན་དང་དྲ་རྒྱའི་རྒྱལ་སྤྱིའི་དྲ་སྦྲེལ་གྱི་བདེ་འཇགས་སྲུང་སྐྱོང་དོ་དམ་བྱ་ཐབས། ༽ སོགས་བཅའ་ཁྲིམས་དང་ཁྲིམས་སྲོལ་ལ་གཞིགས་པ་དང་། ༼ བོད་རང་སྐྱོང་ལྗོངས་དྲ་རྒྱའི་འཕྲིན་གཏོང་བྱེད་སྒོའི་ “བེད་སྤྱོད་མི་ཆོག་པ་ཉི་ཤུ།” སྐོར་གྱི་བརྡ་ཁྱབ། ༽ ཀྱི་གཏན་འབེབས་ལྟར་ཆ་འཕྲིན་དང་དྲ་རྒྱར་བརྟེན་ནས་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་སྤེལ་མི་ཆོག་པའི་བཀག་སྡོམ་རང་བཞིན་གྱི་བྱེད་སྤྱོད་གཅིག་སྡུད་ཐོག་བརྡ་ཁྱབ་གཏོང་རྒྱུ་གཤམ་གསལ།
གཅིག ལོ་རྒྱུས་ལ་འཁྱོག་བཤད་བྱེད་པ་དང་། རྒྱལ་ཁབ་ཀྱི་འདུ་ཤེས་ཞན་དུ་གཏོང་བ། ཆོས་ལུགས་ཀྱི་ནང་དོན་དང་ཆོས་ལུགས་ཀྱི་བྱེད་སྒོ་སོགས་ལ་ཁ་གཡར་ནས་ཏང་དང་རྒྱལ་ཁབ་ཀྱི་སྲིད་བྱུས་ལ་འགོག་རྒོལ་བྱེད་པ། སྤྱི་ཚོགས་རིང་ལུགས་ཀྱི་ལམ་ལུགས་ལ་ངན་སྨད་བྱེད་པ་བཅས་ཀྱི་ཆ་འཕྲིན་གཏོང་བ་དང་བརྒྱུད་སྤེལ་བྱས་མི་ཆོག
གཉིས། ཕྱི་རྒྱལ་དྲིལ་བསྒྲགས་ཀྱི་གནས་ཚུལ་དང་། རྒྱལ་ཁབ་ཁ་བྲལ་གཏོང་བའི་ངན་སྐུལ་བྱེད་པ། རྒྱལ་ཁབ་གཅིག་གྱུར་ལ་གཏོར་བཤིག་གཏོང་བ་བཅས་ཀྱི་དྲ་ཚིགས་ལྟ་བ་དང་བཅར་འདྲི་བྱེད་མཁན་ལ་ (VPN) དྲ་རྒྱའི་ལག་རྩལ་ཐོག་ནས་རྒྱབ་སྐྱོར་རམ་ཡང་ན་རོགས་རམ་བྱས་མི་ཆོག
གསུམ། རྒྱལ་ཁབ་ཁ་བྲལ་གཏོང་བ་དང་། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་ལ་གཏོར་བཤིག་གཏོང་བ་སོགས་ཀྱི་ཁྲིམས་འགལ་ཉེས་གསོག་གི་བྱེད་སྒོ་སྒྲིག་འཛུགས་དང་། ཇུས་འགོད། ལག་བསྟར་བཅས་བྱེད་པའི་དྲ་རྒྱའི་ཚོགས་པའི་ནང་ཞུགས་མི་ཆོག་པ་དང་། རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ཡོང་བར་གཏོར་བཤིག་གཏོང་བའི་ངན་སྐུལ་གྱི་ཆ་འཕྲིན་བཟོ་བ་དང་། འདྲ་བཤུ། ཀློག་བཤེར། བརྒྱུད་སྤེལ་བཅས་བྱས་མི་ཆོག
བཞི། འཕྲིན་གཏོང་ཡོ་ཆས་དང་སྤྱི་ཚོགས་འབྲེལ་བའི་གླེང་སྟེགས་ཀྱི་མཉེན་ཆས་སོགས་ལ་བརྟེན་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་མཁན་རྩ་འཛུགས་སམ་ཡང་ན་མི་སྣར་འབྲེལ་བ་བྱས་ནས་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་སྤེལ་མི་ཆོག
ལྔ། མ་དངུལ་དང་། རྒྱལ་ཁབ་ཀྱི་གསང་བ། གསང་འཕྲིན་སོགས་མཁོ་འདོན་བྱས་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་བྱེད་སྒོ་སྤེལ་མི་ཆོག
དྲུག རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་མཁན་རྩ་འཛུགས་སམ་ཡང་ན་མི་སྣའི་ལས་འགན་དང་དུ་བླངས་ནས་ཁ་བྲལ་གཏོར་བཤིག་གི་བྱེད་སྒོ་སྤེལ་མི་ཆོག
བདུན། རྣམ་པ་སྣ་ཚོགས་ཀྱི་ཐོག་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་རྩ་འཛུགས་སམ་ཡང་ན་མི་སྣར་དྲིལ་བསྒྲགས་དང་དེར་རྒྱབ་སྐྱོར་བྱས་མི་ཆོག
བརྒྱད། དོན་དངོས་ལ་འཁྱོག་བཤད་དང་། དཀྲོག་གཏམ་སྤེལ་བ། ཆ་འཕྲིན་རྫུན་མ་གཏོང་བ་བཅས་བྱས་ནས་མི་རིགས་དབར་གྱི་འབྲེལ་བར་དཀྲུག་ཤིང་རྒྱག་པ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བ་བཅས་བྱས་མི་ཆོག
དགུ སྤྱི་ཚོགས་ཀྱི་འགལ་བ་སྣ་ཚོགས་བཟོ་པའམ་ཡང་ན་གླེང་མང་བ་དང་ཚོར་སྣང་རྐྱེན་པས་དོན་རྐྱེན་སྤྱད་དེ་འཁྱོག་བཤད་འུད་སྒྲོག་དང་ཚིག་མཚོན་བཏབ་ནས། ཏང་དང་སྲིད་གཞུང་ལ་དམའ་འབེབས་གཏོང་བ་དང་སྤྱི་ཚོགས་ཀྱི་སྤྱི་བའི་སྒྲིག་ལམ་ཟང་ཟིང་བཟོ་བའི་ངན་སྐུལ་བྱས་མི་ཆོག
བཅུ། བཅའ་ཁྲིམས་དང་ཁྲིམས་སྲོལ་ནང་འཁོད་པའི་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་གཞན་དག་སྤེལ་མི་ཆོག་པ་བཅས་ཡིན།
གོང་གསལ་དྲ་རྒྱའི་ཁྲིམས་འགལ་ཉེས་གསོག་གི་བྱེད་སྒོ་སྤེལ་རིགས་ལ་ཁྲིམས་ལྟར་བཅའ་ཁྲིམས་ཀྱི་འགན་འཁྲི་བདའ་འདེད་གཏོང་རྒྱུ་ཡིན། ཕྱི་ལོ་ ༢༠༢༠ ཟླ་ ༡༡ ཚེས་ ༢༤ ཉིན། ཞེས་སྤེལ་འདུག་པ་བཅས།།
