ཕྱི་ལོ་ ༢༠༢༡ ཟླ་ ༡ ཚེས་ ༢༩ རེས་གཟའ་པ་སངས།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཕྱོགས་སྒྲིག་དཔེ་དེབ་གསར་པ་བློ་སྟོབས་འཕེལ་བའི་དེབ་ཆུང་ (The Little Book of Encouragement) ཞེས་པ་རྒྱ་གར་གྱི་པན་གྷུན་དཔེ་སྐྲུན་ཁང་(Penguin India) ནས་པར་སྐྲུན་གནང་འདུག

དེ་ཡང་ལྕམ་རེ་ནུ་ཀ་སིངྒ་ (Renuka Singh) ལགས་ཀྱིས་བློ་སྟོབས་འཕེལ་བའི་དེབ་ཆུང་ཞེས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཕྱོགས་སྒྲིག་ཞུས་ཡོད་པ་དང་།  དཔེ་དེབ་དེར་ཤོག་གྲངས་ ༡༥༢ ལྷག་ཙམ་ཡོད། དཔེ་དེབ་ཀྱི་སྔོན་གླེང་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བསྩལ་བའི་བཀའ་སློབ་དང་བཀའ་ཆོས་ཀྱི་སྙིང་པོ་དང་། དེ་བཞིན་ཁོར་ཡུག་དང་།  གནམ་གཤིས་འགྱུར་ལྡོག ཏོག་དབྱིབས་གཉན་རིམས་སོགས་ཕྱི་ནང་གི་དཀའ་ངལ་ཁག་ལ་འགྲོ་བ་མི་ཐུན་མོང་གིས་འགན་འཁུར་དང་གདོང་ལེན་གནང་དགོས་པའི་བཀའ་སློབ་བསྩལ་བ་སོགས་བཀོད་ཡོད་པ་མ་ཟད། དཀའ་ངལ་རིགས་འཕྲད་པའི་སྐབས་སུའང་འཚེ་བ་མེད་པའི་ཐབས་ལམ་དང་། གཞན་ཕན། བྱམས་པ། སྙིང་རྗེ། བཟོད་བསྲན་སོགས་དགོས་གལ་སྐོར་དང་། འཛམ་གླིང་ཡོངས་ལ་ཏོག་དབྱིབས་གཉན་རིམས་ཁྱབ་བརྡལ་གྱི་རྐྱེན་པས་དཀའ་སྡུག་མྱངས་དང་མྱོང་བཞིན་པའི་སྐབས་སྨན་པ་དང་སྨན་ཞབས་པ་ཚོས་ནང་སེམས་ཀྱི་འཕྲོད་བསྟེན་ལ་ཐུགས་ཁུར་གནང་དགོས་པའི་གལ་གནད་སོགས་ཀྱི་སྐོར་བཀའ་སློབ་ལམ་སྟོན་བསྩལ་ཡོད་པ་བཅས།། །