ཕྱི་ལོ་ ༢༠༢༡ ཟླ་ ༡ ཚེས་ ༢༦ རེས་གཟའ་མིག་དམར།
༄༅། །འདི་གར་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་དཔལ་འབྱོར་ལས་ཁུངས་ནས་བཀའ་ཡིག་ཕེབས་དོན་ལྟར། བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་དང་དཔལ་འབྱོར་ལས་ཁུངས་ཟུང་འབྲེལ་ཐོག་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གི་དཔྱ་ཁྲལ་ལག་དེབ་འགན་འཛིན་དང་ཚོགས་གཙོ་རྒྱུན་ལས་རྣམས་ལ་དྲ་ཐོག་དཔྱ་ཁྲལ (EChatrel) འབུལ་ཕྱོགས་སྐོར་ཟབ་སྦྱོང་ངོ་སྤྲོད་དང་། དྲི་བ་དྲིས་ལན་གནང་ཡོད།
ཕྱི་ལོ་ ༢༠༢༡ ཟླ་ ༡ ཚེས་ ༢༤ རེས་གཟའ་ཉི་མའི་སྔ་དྲོ་ཆུ་ཚོད་ ༡༡ ཐོག་བྱང་ཨ་རིའི་བོད་རིགས་སྤྱི་མཐུན་ཚོགས་པ་ ༣༢ དང་། སྤྱི་མཐུན་ཚོགས་པ་མེད་པའི་ས་གནས་ ༤ བཅས་ཀྱི་དཔྱ་དེབ་འགན་འཛིན་དང་། བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་བཅས་བསྡོམས་མི་གྲངས ༥༣ དྲ་ཐོག་མཉམ་ཞུགས་ཀྱིས་ཆུ་ཚོད་གསུམ་ལྷག་དཔྱ་དངུལ་དྲ་ཐོག་འབུལ་ཕྱོགས་སྐོར་ངོ་སྤྲོད་དང་དྲི་བ་དྲིས་ལན་གནང་ཡོད།
དེ་ཡང་ལས་རིམ་གྱི་ཐོག་མར་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཚོགས་བཅར་བ་རྣམས་ལ་ལས་འཆར་འདི་དེང་དུས་དང་འཚམས་པ་ཞིག་ཡིན་པ་དང་། དཔྱ་ཁྲལ་གྱི་ལས་འཆར་འདི་ནི་གཞུང་དང་མི་མང་བར་འབྲེལ་ལམ་གྱི་མཐུད་ཐག་ལྟར་ཡིན་པ་མ་ཟད། གཞུང་སྒེར་གཉིས་ཀར་ཕྱག་ལས་སྟབས་བདེར་ཆགས་ཀྱི་ཡོད་པ་དང་། ད་ལྟའི་སྐབས་བྱང་ཨ་རིའི་ནང་བོད་མི་ཁྲི་གསུམ་ལྷག་ཡོད་ཀྱང་དངོས་སུ་དཔྱ་དངུལ་འབུལ་མཁན་ཁྲི་གཅིག་ལྷག་ཙམ་ལས་མེད་པས་མ་འོངས་པར་ཉུང་མཐར་བརྒྱ་ཆ་ལྔ་བཅུ་བར་འཕར་ཐབས་གནང་དགོས་གལ་དང་། ད་བར་ལས་འཆར་འདིའི་ཐོག་ཚང་མས་ཕྱག་ལས་ཧུར་ཐག་གནང་བར་ཐུགས་རྗེ་ཆེ་ཞེས་ཞུས་པ་དང་འབྲེལ། མ་འོངས་པར་མུ་མཐུད་སྔར་ལྷག་ཤུགས་སྣོན་འཕར་མ་བརྒྱག་དགོས་པའི་བསྐུལ་མ་ཡང་གནང་ཡོད་པ་རེད།
བོད་མིའི་སྒྲིག་འཛུགས་ཀྱི་ཀམ་པུའུ་ཊར་སྡེ་ཚན་གྱི་འགན་འཛིན་རྣམ་རྒྱལ་ལེགས་བཤད་ལགས་ཀྱིས་ཐོག་མར་ལས་འཆར་འདི་ཕྱི་ལོ་ ༢༠༠༣ ནས་ཀམ་པུའུ་ཊར་ནང་བཟོ་འཇོག་བྱེད་འགོ་ཚུགས་ཡོད་པ་དང་། མི་མང་ནས་དཔྱ་དངུལ་དྲ་ཐོག་འབུལ་ལམ་ཡོད་པ་བཟོ་དགོས་པའི་དགོངས་འཆར་འདོན་མཁན་མང་རུ་འགྲོ་བཞིན་ཡོད་སྟབས། དཔལ་འབྱོར་ལས་ཁུངས་དང་ཀམ་པུའུ་ཊར་སྡེ་ཚན་གཉིས་མཉམ་ལས་ཀྱིས་ལས་འཆར་འདི་དངོས་སུ་ཕྱི་ལོ་ ༢༠༢༠ ནང་བང་སྒྲིག་ནས་ད་ལམ་དངོས་སུ་ལག་བསྟར་གནང་ཐུབ་ཀྱི་ཡོད་པ་སོགས་ལས་འཆར་གྱི་རྒྱབ་ལྗོངས་སྐོར་ངོ་སྤྲོད་གནང་ཡོད་པ་རེད།
དེའི་རྗེས་དཔལ་འབྱོར་ཡིད་ཆེས་དགེ་རྩའི་འཆར་འགོད་ལས་བྱེད་བློ་བཟང་དབང་མོ་ལགས་ཀྱིས་ཐོག་མར་དྲ་ཐོག་དེབ་སྐྱེལ་གནང་ཕྱོགས་དང་འབྲེལ་བའི་སྐོར་བརྙན་འཕྲིན་བརྒྱུད་ངོ་སྤྲོད་གནང་རྗེས། དཔལ་འབྱོར་ལས་ཁུངས་ཀྱི་དཔྱ་ཁྲལ་ཚན་པའི་རྩིས་པ་བཟོད་པ་རྒྱ་མཚོ་ལགས་ཀྱིས་དཔྱ་དངུལ་རྩིས་ཁྲ་བཟོ་འགོད་གནང་ཕྱོགས་དང་བྱུང་འཛིན་འབུལ་འབྱོར་ཇི་ལྟར་ཡོང་གིན་ཡོད་མེད་སྐོར་ངོ་སྤྲོད་གནང་གྲུབ་རྗེས། ཚོགས་ཞུགས་པ་མི་གྲངས་ ༡༨ ཙམ་ནས་གསུང་བཤད་གནང་མཁན་རྣམས་ལ་སོ་སོའི་དོགས་འདྲི་གང་ཡོད་གསུངས་པ་དེ་དག་ལ་བཀའ་ལན་གནང་བ་སོགས་ཚོགས་ཞུགས་པ་སྤྱི་ཡོངས་ནས་ལས་འཆར་འདིར་དགའ་པོ་དང་དོ་སྣང་ཧ་ཅང་ཆེན་པོ་གནང་ཡོད།
ད་ལམ་བྱང་ཨ་རིའི་ཁུལ་བོད་རིགས་སྤྱི་མཐུན་ཚོགས་པའི་དཔྱ་ཁྲལ་འགན་འཛིན་དང་ཚོགས་གཙོ་རྒྱུན་ལས་རྣམས་ལ་བཙན་བྱོལ་བོད་མིའི་རང་དབང་གཅེས་འཛིན་དྭང་བླང་དཔྱ་དངུལ་དྲ་ཐོག་ནས་འབུལ་ཕྱོགས་ཀྱི་ཟབ་སྦྱོང་ལས་འཆར་འདིའི་གོ་སྒྲིག་འགན་ཁུར་དང་། ལས་རིམ་གཙོ་སྐྱོང་གནང་མཁན་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་དང་དཔྱ་དེབ་ལས་འཆར་འགན་ཁུར་བ་དྲུང་གཞོན་བསྟན་འཛིན་ཚེ་དཔག་ལགས་ཡིན་པ་བཅས། །
