ཕྱི་ལོ་ ༢༠༢༡ ཟླ་ ༡ ཚེས་ ༡༤ རེས་གཟའ་ཕུར་བུ།
༄༅། །སུད་སིར་གནས་སྡོད་བོད་རིགས་ཁྱིམ་ཚང་ལྔ་ཡིས་ཕྱི་ལོ་ ༢༠༢༡ ཟླ་ ༡ ཚེས་ ༡༣ ཉིན་སུད་སིའི་ཇི་ནི་ཝ་གྲོང་ཁྱེར་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་ནང་གི་བོད་མི་ཚོར་སྐྱིད་སྡུག་མཉམ་མྱོང་གི་ལས་འགུལ་ཐེངས་ ༡༠༨ དེ་སྤེལ་ཡོད། བོད་ནང་གི་བོད་མི་ཚོར་སྐྱིད་སྡུག་མཉམ་མྱོང་གི་ལས་འགུལ་དེ་བཞིན་ཕྱི་ལོ་ ༢༠༡༢ ལོའི་ཟླ་རེའི་རེས་གཟའ་ལྷག་པ་གཉིས་པ་ཉིན་ནས་བཟུང་དབུ་འཛུགས་ཞུས་ཡོད།
དེ་ཡང་བོད་རིགས་ཁྱིམ་ཚང་ལྔ་ཡིས་ཟླ་རེའི་རེས་གཟའ་ལྷག་པ་གཉིས་པ་ནམ་ཡིན་ལ་སུད་སིའི་ས་ཁུལ་འདྲ་མིན་ལ་ཕེབས་ཏེ་རྒྱ་ནག་གི་དྲག་གནོན་འོག་མུ་མཐུད་དཀའ་སྡུག་མྱོང་བཞིན་པའི་གཞིས་ལུས་བོད་རིགས་སྤུན་ཟླ་རྣམས་ལ་སྐྱིད་སྡུག་མཉམ་མྱོང་མཚོན་ཆེད་དང་། བོད་རྒྱའི་གནད་དོན་གྲོས་མོལ་གྱི་ལམ་ནས་གསལ་ཐབས་སུ་རྒྱལ་སྤྱིའི་ཚོགས་སྡེ་ཁག་ནས་རྒྱབ་སྐྱོར་ཐོབ་ཐབས་ཀྱི་ལས་འགུལ་སྤེལ་བཞིན་ཡོད། ཁོང་ཚོས་སུད་སིའི་མང་ཚོགས་འཛོམས་སའི་ས་ཁུལ་ཁག་ཏུ་བོད་དོན་སྐོར་འགྲེམས་ཤོག་བཀྲམ་ནས་གོ་རྟོགས་སྤེལ་བཞིན་ཡོད་པ་མ་ཟད། ཕྱི་ལོ་ ༢༠༡༧ ལོར་ཡུ་རོབ་སྤྱི་མཐུན་ཚོགས་པའི་མདུན་དུའང་བོད་ནང་གི་བོད་མི་ཚོར་སྐྱིད་སྡུག་མཉམ་མྱོང་མཚོན་ཆེད་དུ་ཞི་བའི་ངོ་རྒོལ་གནང་ཡོད།
སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་གཙོས་དོན་ཁང་གི་ལས་བྱེད་རྣམ་པས་གཞིས་ལུས་བོད་མིའི་སླད་སྐྱིད་སྡུག་མཉམ་མྱོང་གི་ལས་འགུལ་སྤེལ་གནང་མཁན་ཁྱིམ་ཚང་ལྔ་ལ་རྗེས་སུ་ཡི་རང་ཞུས་པ་དང་སྦྲགས། སྐྱིད་སྡུག་མཉམ་མྱོང་གི་ལས་འགུལ་ནང་མཉམ་ཞུགས་ཀྱིས་གདུང་སེམས་མཉམ་སྐྱེ་ཞུས་ཡོད།
བོད་དོན་རྒྱབ་སྐྱོར་བ་ལི་ཛི་ (Liz) ལགས་ཀྱང་སྐྱིད་སྡུག་མཉམ་མྱོང་གི་ལས་འགུལ་ནང་མཉམ་ཞུགས་གནང་ཡོད། དེ་ཡང་ལི་ཛི་ལགས་ཀྱིས་གསུང་དོན། བོད་ཀྱི་རིག་གཞུང་བརྒྱུད་རང་ཉིད་ལ་ཕན་ཐོགས་ཧ་ཅང་ཆེན་པོ་བྱུང་། རང་ཉིད་སྐྱིད་སྡུག་མཉམ་མྱོང་གི་ལས་འགུལ་ནང་མཉམ་ཞུགས་བྱས་པ་དེས་བོད་མི་རྣམས་ནས་རང་གི་རྩ་དོན་དང་རིག་གཞུང་མི་ཉམས་རྒྱུན་འཛིན་བྱེད་བཞིན་པར་རྒྱབ་སྐྱོར་ཆུང་ངུ་ཞིག་ཞུས་ཡོད། རྒྱ་ནག་ནི་འགྲོ་བ་མི་ཡོངས་རྫོགས་ཀྱི་ཞི་བདེའི་འཚོ་གནས་དང་འཆམ་མཐུན་ལ་ཉེན་ཁ་ཞིག་ཆགས་ཡོད་ཅེས་གསུངས་པ་མ་ཟད། རྒྱ་ནག་གིས་བོད་དུམ་བུར་གཏོང་བའི་སྲིད་བྱུས་ལག་བསྟར་བྱེད་བཞིན་པའི་སྐབས་འདིར་བོད་མི་རྣམས་རྡོག་རྩ་གཅིག་སྒྲིལ་གནང་རོགས་ཞེས་འབོད་སྐུལ་ཡང་གནང་ཡོད། །
