ཕྱི་ལོ་ ༢༠༢༡ ཟླ་ ༡ ཚེས་ ༢༦ རེས་གཟའ་མིག་དམར།

༄༅། །ཕྱི་ལོ་ ༢༠༢༡ ཟླ་ ༡ ཚེས་ ༢༦ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་།  བཀའ་བློན་རྣམ་པ། དེ་བཞིན་ལྷན་ཁང་ཁག་གི་དྲུང་ཆེ་དང་དྲུང་འཕར་རྣམ་པ། བཀའ་དྲུང་ཡིག་ཚང་གི་སྲི་ཞུའི་ལས་བྱེད། རྡ་ས་ས་གནས་འགོ་འཛིན་བཅས་བོད་མིའི་སྒྲིག་འཛུགས་བཀའ་ཤག་མདུན་དུ་ལྷན་འཛོམས་ཀྱིས། རྒྱ་གར་གྱི་རྒྱལ་གླུ་འབུལ་མུར་སྲིད་ཚབ་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྟེ་རྒྱ་གར་གྱི་མང་གཙོའི་དུས་དྲན་ཐེངས་ ༧༢ སྲུང་བརྩི་ཞུས་ཡོད།

དེ་ཡང་དུས་དྲན་གྱི་མཛད་སྒོའི་ཐོག་སྲིད་ཚབ་མཆོག་གིས་གསར་འགོད་པར་གསུང་དོན། དེ་རིང་རྒྱ་གར་རྒྱལ་ཁབ་ཆེན་པོའི་མང་གཙོའམ་མི་སེར་རྒྱལ་ཁབ་ཀྱི་ལམ་ལུགས་ལ་ཕེབས་ནས་མི་ལོ་ ༧༢  ཧྲིལ་པོ་འཁོར་བའི་དུས་སྟོན་ཆེན་མོ་སྲུང་བརྩི་ཞུ་བཞིན་ཡོད་པར་བརྟེན་ངས་བོད་མི་ཡོངས་དང་། བོད་མིའི་སྒྲིག་འཛུགས་ཀྱི་ངོས་ནས་རྒྱ་གར་གཞུང་མང་གཉིས་ལ་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།  ལྷག་པར་རྒྱ་གར་གཞུང་མང་གཉིས་ནས་བཙན་བྱོལ་བོད་མི་རྣམས་ལ་བསམ་ཡུལ་ལས་འདས་པའི་བཀའ་དྲིན་བསྐྱངས་དང་སྐྱོང་བཞིན་པར་བཀའ་དྲིན་སྙིང་བཅངས་ཞུ་རྒྱུ་དང་། ད་ལྟ་ཡིན་ནའང་མང་གཙོ་རིང་ལུགས་འདིའི་ཐོག་ནས་རྒྱ་གར་ནང་གང་ས་ཅི་ཐད་ནས་སྔར་་ལྷག་ཡར་རྒྱས་ཡོང་བ་དང་། རིང་པོ་མ་ཐོག་པར་འཛམ་གླིང་ནང་མིག་ལྟོས་འོས་པའི་རྒྱལ་ཁབ་ཆེན་པོ་ཞིག་ཆགས་ཐུབ་པའི་ཡིད་ཆེས་དང་སྨོན་འདུན་ཞུ་རྒྱུ་ཡིན། ཞེས་གསུངས།

དེ་ནས་གསར་འགོད་པས་དེ་རིང་གི་ཉིན་མོ་དང་སྟབས་བསྟུན་བཀའ་ཤག་ནས་བོད་ནང་གི་གཞིས་ལུས་བོད་མི་དང་བཙན་བྱོལ་བོད་མི་རྣམས་ལ་དམིགས་བསལ་བརྡ་ལན་གང་ཡོད་ཅེས་བཀའ་འདྲི་ཞུས་པར་སྲིད་ཚབ་མཆོག་གིས། དེ་རིང་གི་དུས་ཚོད་ཁྱད་པར་ཅན་འདི་ལ་ཨིན་ཇིའི་ཚིག་ནང་ (Republic) ཞེས་དང་ (Democracy) ཞེས་པ་འདི་གཉིས་འདྲ་བོ་ཡོད་ནའང་རྩ་བའི་ཆ་ནས་ལོགས་དགར་ཆགས་ཡོད།  རྒྱ་གར་ནི་དེ་སྔ་རྒྱལ་པོའི་རིང་ལུགས་ཡུན་རིང་གནས་པ་དང་། དེ་རྗེས་ཨིན་ཇི་ཡིས་དབང་སྒྱུར་བྱས་རྗེས་རྒྱ་གར་རྒྱལ་ཁབ་འདི་ཉིད་མི་སེར་རྒྱལ་ཁབ་མཚན་ཉིད་ཚང་བའི་ངོ་བོར་རྩ་ཁྲིམས་བཟོས་ནས་ཕེབས་བཞིན་ཡོད།

དེ་བཞིན་མི་སེར་རྒྱལ་ཁབ་དང་མང་གཙོའི་རྒྱལ་ཁབ་དབར་ཁྱད་པར་གྱི་ཆ་ནས་མུ་བཞི་ཙམ་ཡོད་པའི་བཟོ་འདྲ་ཞིག་ཡོད་པ་རེད། མི་སེར་རྒྱལ་ཁབ་ཡིན་ལ་མང་གཙོའི་རྒྱལ་ཁབ་མིན་པ། མང་གཙོའི་རིང་ལུགས་ཡིན་ལ་མི་སེར་གྱི་རྒྱལ་ཁབ་མིན་པ་ཨིན་ཡུལ་ལྟ་བུ། རྒྱ་གར་ནི་གཉིས་ཀར་རེད། དེ་མིན་མི་སེར་གྱི་རྒྱལ་ཁབ་ (Republic) མིང་ཙམ་ཡིན་མཁན་རྒྱ་ནག་རྒྱལ་ཁབ་ལྟ་བུ་ (Republic) ཞེས་པའི་མིང་འཁྱེར་བཞིན་ཡོད་ནའང་མི་སེར་རྒྱལ་ཁབ་དང་མང་གཙོའི་མིང་དོན་ཚང་གི་མེད། རིག་པའི་གཞུང་ལུགས་ཐོག་ནས་ཀྱང་མཚན་ཉིད་ཚང་གི་མེད། ཐོག་མར་མི་སེར་རྒྱལ་ཁབ་ཡིན་ཁུལ་དང་། རིམ་པས་མང་གཙོའི་རྒྱལ་ཁབ་ཡིན་ཁུལ་བྱེད་རྒྱུ་དེ་ལུགས་སྲོལ་ཞིག་ཆགས་ཡོད།

དེང་སྐབས་གཞིས་བཞུགས་བོད་མི་རྣམས་དང་བཙན་བྱོལ་བོད་མི་རྣམས་མི་སེར་རིང་ལུགས་དང་མང་གཙོའི་རིང་ལུགས་ཡིན་ནའང་འདྲ་གང་ཐུབ་མཚན་ཉིད་ཚང་བ་དང་དོན་དང་ལྡན་པ་བྱུང་ན། གཉིས་ཀར་སྙིང་པོའི་རང་བཞིན་ལྡན་པ་ཡོད་པ་རེད། མཚན་ཉིད་མ་ཚང་བར་མིང་ཙམ་དང་ཐ་སྙད་ཙམ་ལ་ཕྱིན་པ་ཡིན་ན། ད་ཆ་སྙན་གྲགས་ཆེ་བའི་མང་གཙོའི་རིང་ལུགས་འདི་ཕྱིས་སུ་ཇི་ལྟར་ཆགས་གྲབས་ཡོད་མེད་བཤད་ཚོད་དཀའ་བ་རེད། དཔེར་ན། དེ་སྔ་སྤྱི་ཚོགས་རིང་ལུགས་ཐོག་མར་དར་བའི་སྐབས་གཞི་རྩ་བ་འཛིན་ས་མ་ཁེ་སིའི་རིང་ལུགས་ལ་བཟུང་ནས་ཁོང་ཚོའི་གྲུབ་མཐའི་རྣམ་གཞག་དང་ཡིག་ཆ་ཁག་ལ་བལྟས་པ་ཡིན་ན། ཆོས་ཕྱོགས་ནས་བཤད་པ་ཡིན་ན་གང་ཙམ་ཚད་མཐོ་བོ་ཡིན་པའི་བཟོ་ལྟ་ཡོད་ནའང་དོན་དངོས་སུ་མི་མང་དང་རྒྱལ་ཁབ་དབང་འཛིན་པའི་ཐོག་ལ་ལག་ལེན་བསྟར་དུས་ད་ལྟའི་གནས་སྟངས་དེ་དག་ཆགས་པ་རེད།

དཔེར་ན། ཐོག་མར་ཡོངས་གྲགས་དང་སྙན་གྲགས་ཆེན་པོ་ཧ་ཅང་བྱུང་བའི་རྟགས་མཚན་གང་རེད་ཅེ་ན། འཛམ་གླིང་ཕྱེད་ཀ་མིན་ཙམ་སྤྱི་ཚོགས་རིང་ལུགས་ལ་ཕྱིན་པ་རེད། ཨེ་ཤི་ཡ་ཁུལ་ཡིན་ནའང་རྒྱལ་ཁབ་ཕལ་ཆེ་བ་ཕྱེད་ཀ་ཕྱེད་ཀ་དེ་འདྲ་ཕྱིན་པ་རེད། སྐབས་དེར་གྲུབ་མཐའ་ཡིད་དུ་འོང་བ་ཧ་ཅང་བཤད་རྒྱུ་ཡོད་པ་རེད། འོན་ཀྱང་ལག་ལེན་ཐོག་གོ་ལྡོག་ནས་ཕྱིན་པ་ཡིན་སྟབས། མིང་དང་དོན་གཉིས་ཀའི་ཐོག་ཚང་མས་མོས་མཐུན་རྒྱབ་སྐྱོར་དཀའ་ལས་ཁག་པོ་ཆགས་ཡོད། ད་ཆ་ངོ་ཚོ་ཚང་མས་ཡག་པོ་རྩི་བཞིན་པའི་མང་གཙོའི་ལམ་ལུགས་འདི་ཡང་མིང་དོན་མ་མཚུངས་པ་དང་འདྲ་མིན་ཁོ་ན་བྱས་པ་ཡིན་ན། དེ་སྔ་མ་ཁེ་སིའི་རིང་ལུགས་ལ་གང་བྱུང་བ་དེ་དག་བྱུང་ཉེ་བ་དང་འབྱུང་མ་སྲིད་པ་མེད། དེར་བརྟེན་ལག་ཏུ་རྩ་ཆེན་པོ་བྱས་ནས་ཡོད་པའི་སྐབས་འདིར་ངོ་ཤེས་པ་བྱས་ནས་ལག་ལེན་ཐོག་མ་ནོར་བ་བྱེད་རྒྱུ་རེད།

ལྷག་པར་ང་ཚོ་བོད་མི་ལ་མཚོན་ན་མི་འབོར་སོགས་གང་ས་ཅི་ཐད་ནས་ཆུང་ངུ་དང་། དེའི་ནང་ནས་གནས་སྟངས་ཧ་ཅང་ཛ་དྲག་ཅན་ཞིག་ཆགས་ཡོད་སྟབས། གང་ཡོད་པ་དེ་དོན་དང་ལྡན་པ་མཚན་ཉིད་ཚང་བ་ཞིག་ལ་འབད་བརྩོན་གནང་རྒྱུ་ཧ་ཅང་གལ་ཆེན་པོ་རེད། བོད་ནང་ཡོད་པའི་བོད་མི་རྣམས་རིམ་བཞིན་མང་གཙོའི་རིང་ལུགས་ཡར་རྒྱས་ཕྱིན་ནས་ཕྱིའི་རྒྱལ་ཁབ་ཁག་དང་གཅིག་གྱུར་ཡོང་བའི་སྨོན་ལམ་ཞུ་རྒྱུ་དང་ཡིད་ཆེས་ཡོད།

ང་ཚོས་དེ་ལྟར་ཡོང་བར་འབད་བརྩོན་ཞུས་དང་ཞུ་མུས་རེད། ད་དུང་ཡིན་ནའང་མི་ཐོག་རྗེས་མ་ཚོས་སྔར་ལྷག་ཏན་ཏན་གནང་གི་རེད་སྙམ་པའི་ཐུགས་བློ་བདེ་པོ་གནང་སྟེ་བཞུགས་རྒྱུར་འབོད་སྐུལ་ཞུ་རྒྱུ་ཡིན། ཞེས་ལན་འདེབས་གནང་གྲུབ་བསྟུན། བཀའ་ཤག་གི་ཚོགས་ཁང་ནང་རྟེན་འབྲེལ་གསོལ་ཇ་དང་མངར་ཟས་བཤམས་ནས་བོད་མིའི་སྒྲིག་འཛུགས་ཀྱི་འཚམས་འདྲིའི་མཛད་སྒོ་གྲོལ།

དེ་བཞིན་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ཀངྒ་ར་རྫོང་ལས་ཁུངས་ཀྱི་གོ་སྒྲིག་འོག རྡ་སའི་ཉེན་རྟོག་ཐང་ཆེན་དུ་རྒྱ་གར་མང་གཙོའི་དུས་དྲན་མཛད་སྒོར་ཀངྒ་ར་རྫོང་ལས་ཁུངས་ཀྱིས་མགྲོན་འབོད་ལྟར་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་དང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག  རྡ་ས་ས་གནས་འགོ་འཛིན་སོགས་ཆེད་ཕེབས་གནང་ཡོད།

མཛད་སྒོའི་ཐོག་མར་སྐུ་མགྲོན་གཙོ་བོ་ཧི་མ་ཅཱལ་མངའ་སྡེའི་གྲོས་ཚོགས་ཚོགས་གཙོ་སྐུ་ཞབས་ཝི་པིན་པར་མར་ (Shri Vipin Parmar)  མཆོག་གིས་རྒྱ་གར་གྱི་རྒྱལ་དར་སྒྲེང་འཛུགས་གནང་བསྟུན། ཉེན་རྟོག་རུ་ཁག་གིས་རུ་སྒྲིག་ཀྱི་ལམ་ནས་ཆེ་མཐོང་ཞུས། དེ་རྗེས་སྐུ་མགྲོན་གཙོ་བོ་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་རྗེས་རིག་གཞུང་འཁྲབ་སྟོན་གཟིགས་འབུལ་ཞུས་ཡོད་པ་བཅས། །