ཕྱི་ལོ་ ༢༠༢༡ ཟླ་ ༡ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༢༡ ཟླ་ ༡ ཚེས་ ༢༡ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༣ དེ་སྤེལ་ཡོད་པ་དང་། གསལ་བསྒྲགས་ཞུ་མཁན་འཕྲོད་བསྟེན་ལས་ཁུངས་ཀྱི་ཟུང་དྲུང་ཚེ་རིང་གཡུ་སྒྲོན་ལགས་དང་། བོད་ལུགས་སྨན་པ་ཚེ་རིང་མཚམས་གཅོད་ལགས། ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་བཅས་ཡིན།
དང་པོ། འཕྲོད་བསྟེན་ཟུང་དྲུང་ཚེ་རིང་གཡུ་སྒྲོན་ལགས་ཀྱིས་མི་མང་ལ་ལམ་སྟོན་གནང་དོན། ཕྱི་ཚེས་ ༡༦ ཉིན་རྒྱ་གར་རྒྱལ་ཡོངས་ནང་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་བརྒྱག་རྒྱུའི་གཞི་རྒྱ་ཆེ་བའི་ལས་གཞི་འགོ་བཙུགས་དང་འབྲེལ་བོད་མིའི་སྤྱི་ཚོགས་ཁྲོད་ནས་རྡ་ས་བདེ་ལེགས་སྨན་ཁང་གི་སྨན་པ་དང་སྨན་ཞབས། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སྨན་ཞབས་གཅིག་བཅས་མི་གྲངས་བཅུ་དང་། དེ་བཞིན་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་འཕྲོད་བསྟེན་སྨན་ཁང་གི་སྨན་པ་དང་འཕྲོད་ལས་པ། དེ་བཞིན་དགའ་བྱང་དང་བློ་གསལ་གླིང་གི་སྨན་པ་དང་སྨན་ཞབས་སོགས་འཕྲོད་ལས་པ་བསྡོམས་ ༨༡། མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་སྨན་པ་སོགས་འཕྲོད་ལས་པ་གྲངས་ ༡༠ བཅས་ལ་སྔོན་འགོག་སྨན་ཁབ་དེ་བརྒྱབ་ཡོད་པས་ཁོང་རྣམ་པར་ད་བར་ཚབས་ཆེའི་ཟུར་ཕོག་བྱུང་བ་དེ་འདྲ་གང་ཡང་བྱུང་མི་འདུག་ཅེས་ཞུ།
དེ་ནས་འཕྲོད་བསྟེན་ལས་ཁུངས་ནས་ས་གནས་འགོ་འཛིན་གྱིས་གཙོས་ཛ་དྲག་ཚོགས་ཆུང་གི་ཚོགས་མི་མཉམ་འཛོམས་ས་གནས་ཀྱི་གནས་བབ་དང་། དབུས་ནས་མཐུན་འགྱུར་སྦྱར་དགོས་ཐད་དྲ་ཐོག་ཚོགས་འདུ་བསྐོང་ཚོགས་གནང་བཞིན་ཡོད་པས་ཉེ་བའི་ཆར་རྒྱ་གར་ལྷོ་ཕྱོགས་དང་ཤར་དཀྱིལ་ནང་ཡོད་པའི་བོད་མིའི་གཞིས་ཆགས་ཀྱི་ས་གནས་འགོ་འཛིན་དང་འཕྲོད་བསྟེན་སྨན་ཁང་གི་འགན་འཛིན་བཅས་མཉམ་དྲ་ཐོག་ཚོགས་འདུ་བསྐོང་ཚོགས་གནང་ཡོད།
བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ས་གནས་མི་མང་རྣམས་ལ་ཡུལ་མི་གཅིག་མཚུངས་སྔོན་འགོག་ཁབ་ཐོབ་ཐབས་སླད་ས་གནས་འགོ་འཛིན་དང་འབྲེལ་ཡོད་ལ་ལམ་སྟོན་གནང་ནས་ད་ཆ་སྔོན་འགོག་སྨན་ཁབ་ཀྱི་མཐུན་འགྱུར་སྦྱར་དགོས་རིགས་སྦྱར་ཡོད་ལ་རྒྱ་གར་གཞུང་གི་ལམ་སྟོན་གཞིར་བཟུང་མང་ཚོགས་ལ་སྔོན་ཁབ་བརྒྱག་རྒྱུའི་བང་རིམ་སླེབ་རྒྱུ་རེད། སྔོན་འགོག་སྨན་ཁབ་རྒྱག་དང་མི་རྒྱག་དོ་བདག་སོ་སོའི་སྐུ་དབང་ཐག་གཅོད་གནང་རྒྱུ་རེད་ཅེས་གསུངས།
དེ་ནས་བོད་ཀྱི་ལོ་གསར་སླེབ་ལ་ཉེ་བས་ལོ་གསར་ཆེད་བོད་མི་མང་པོ་འགྲུལ་བཞུད་བྱ་རྩིས་ཡོད་ཀྱི་རེད། སྤྱིར་འཕྲོད་བསྟེན་དང་སྔོན་འགོག་ཆ་ནས་ཞུ་ན། ད་ལྟའི་ཆར་གལ་ཆེ་དོན་ཆེན་ཡིན་ན་མ་གཏོགས་འགྲུལ་བཞུད་གནང་མི་དགོས་གཙོ་འདོན་གནང་རོགས་ཞུ། ཅི་སྟེ་མ་ཕེབས་ཐབས་མེད་འབྱུང་ཚེ་འགྲུལ་ལམ་དུ་སྔོན་འགོག་ཐབས་ལམ་རྣམས་བསྟེན་རྒྱུ་དང་། ས་གནས་སུ་སྔོན་ཚུད་འབྲེལ་བ་གནང་ནས་ས་གནས་ཀྱི་ཁྲིམས་སྒྲིག་ལ་བརྩི་སྲུང་ལག་བསྟར་གནང་རོགས་ཅེས་ཞུས།
མཐའ་དོན་འདི་ལོ་ནད་ཡམས་རྐྱེན་གྱིས་མི་རྒྱུ་ཟོག་གསུམ་ལ་དཀའ་ངལ་དོ་ཕོག་ཆེན་པོ་བྱུང་ཡོད་ཀྱང་བཟང་ཕྱོགས་ནས་བསམ་བློ་ཞིག་གཏོང་བ་ཡིན་ན་ཁོར་ཡུག་ལ་ཉམས་གསོ་དང་། ལྷག་པར་མིིའི་འཕྲོད་བསྟེན་དང་འབྲེལ་ཏོག་དབྱིབས་གཉན་རིམས་ཀྱི་སྔོན་འགོག་ཐབས་ལམ་བསྟེན་པ་ལས་ཆམས་རིམས་དང་གློ་གཅོང་གི་ནད་གཞིའི་གྲངས་འདི་ལོ་ཉུང་དུ་ཐོན་པའི་གནས་ཚུལ་སྙན་ཐོ་ཐོན་ཡོད་པ་དང་། དེ་བཞིན་རྒྱལ་ཁབ་ཀྱི་འཛིན་སྐྱོང་ལས་དོན་དང་འབྲེལ་ཚོགས་འདུ་དང་ཟབ་སྦྱོང་རིགས་མང་པོ་ཞིག་དྲ་ཐོག་ནས་བསྐོང་ཚོགས་ཀྱིས་རྒྱུན་གྲོན་ལ་ཕན་པ་དང་ལས་མི་རྣམས་ལ་འགྲིམ་འགྲུལ་གྱི་དཀའ་ཚེགས་མྱོང་མི་དགོས་པ་དང་། བུད་མེད་སྦྲུམ་མ་རྣམས་ཀྱང་ཟབ་སྦྱོང་དང་ཚོགས་འདུ་སོགས་ལ་ཚོགས་བཅར་མཉམ་ཞུགས་ཐུབ་པ་སོགས་དགེ་ཚན་མང་པོ་བྱུང་ཡོད་ན། བཟང་ཕྱོགས་འདི་ཚོའི་ཐད་ང་ཚོའི་ངོས་ནས་བསམ་བློ་གཏོང་རྒྱུ་གལ་ཆེན་པོ་ཡིན།
ད་ཆ་ཏོག་དབྱིབས་སྔོན་འགོག་གི་སྨན་ཁབ་ཐོན་ནས་རྒྱག་སྒོ་ཚུགས་པ་འདི་ནི་རྒྱལ་ཁབ་ནང་ནད་གཞི་འདི་རྩ་མེད་བཟོ་རྒྱུའི་ཐབས་ལམ་འགོ་འཛུགས་གནང་བ་ཙམ་ལས་ནད་གཞི་འདི་རྩ་མེད་གཏོང་སླད་ད་དུང་ཡིན་ནའང་མང་ཚོགས་ནས་ཁ་རས་གྱོས་རྒྱུ་དང་། རྒྱང་ཐག་འཇོག་རྒྱུ། ལག་པ་གཙང་མ་ཡང་སེ་འཁྲུ་དགོས་པ་སོགས་སྔོན་འགོག་གི་ཐབས་ལམ་རྣམས་མུ་མཐུད་ནས་བསྟེན་གལ་ཆེ་བ་དྲན་སྐུལ་ཞུ་རྒྱུ་ཡིན།
གཉིས་པ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་རྒྱ་གར་ནང་གི་ས་གནས་གྲངས་ ༢༠ དང་། བལ་ཡུལ་ནང་གི་ས་གནས་གྲངས་ ༡ བཅས་ཁྱོན་བོད་མི་གྲངས་ ༣༩༥ ༼རང་ཁྱིམ། ༢༣༩ ཚོགས་སྡེ་དང་སྒྲིག་འཛུགས་ཀྱིས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༡༥༦༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། གཉིས་པ་གསོ་རིག་ལུས་སེམས་ནུས་གསོའི་སྨན་དང་འབྲེལ་ད་བར་ཁྱོན་བོད་མི་གྲངས་ ༢༤༨༤༡ ཙམ་ལ་གསོ་རིག་ལུས་སེམས་ནུས་གསོའི་སྨན་རིན་མེད་ཐོག་འགྲེམས་སྤེལ་ཞུས་ཡོད།
སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་གཅིག་ལ་ཁ་པར་བརྒྱུད་སེམས་ཁམས་འཕྲོད་བསྟེན་སློབ་གསོ་གནང་བ་བྱུང་ཡོད་པ་དང་། དེ་ནས་ནད་ཡམས་ཁྱབ་གདལ་བཀག་འགོག་ཆེད་རྒྱ་གར་ནང་གི་ས་གནས་གྲངས་ ༡༧ དང་། བལ་ཡུལ་ནང་གི་ས་གནས་གྲངས་ ༢ བཅས་ནང་ཁྱོན་རྒྱ་གར་ནང་མི་གྲངས་ ༦༥༦ དང་། བལ་ཡུལ་ནང་མི་གྲངས་ ༥ བཅས་ཁྱོན་མི་གྲངས་ ༦༦༡ ཙམ་ལ་ནད་གཞི་ཕོག་ཡོད་མེད་བརྟག་དཔྱད་གནང་ཡོད་པའི་གནས་ཚུལ་ཞུ།
གཞན་ཡང་ས་གནས་ཛ་དྲག་ཚོགས་ཆུང་ནས་ས་གནས་སྲིད་གཞུང་དང་། དེ་བཞིན་རྫོང་གི་སྤྱི་ཁྱབ་སྨན་པ་འགན་འཛིན་བཅས་ངོ་བཅར་ཐུགས་འཕྲད་ཀྱིས་ས་གནས་བོད་མི་རྣམས་ལ་ཡུལ་མི་གཅིག་མཚུངས་སྔོན་འགོག་སྨན་ཁབ་ཐོབ་ཐབས་སླད་འབད་བརྩོན་གནང་བ་དང་། དུས་དུས་སུ་དུག་སེལ་གནང་རྒྱུ་དང་ཚོགས་འདུ་བསྐོང་ཚོགས། དེ་བཞིན་མང་ཚོགས་ལ་ལམ་སྟོན་གནང་རྒྱུ་སོགས་ལས་དོན་རྣམས་མུ་མཐུད་ནས་འགྲོ་བཞིན་པའི་གནས་སྟངས་ཞུ།
གསུམ་པ། བཙན་བྱོལ་བོད་མིའི་སྤྱི་ཚོགས་ཁྲོད་ནད་གཞི་ཕོག་པ་སྙན་གསང་ཞུ་རྒྱུར། འདས་པའི་བདུན་ཕྲག་གཅིག་གི་ནང་རྒྱ་གར་ནང་དུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༡༡ བྱུང་། ཞིབ་ཕྲ་ནི། རྡ་ས་ཁུལ་ནས་མི་གྲངས། ༢ བདེ་སྐྱིད་གླིང་ནས་མི་གྲངས། ༤ མེན་པཊ་ཕན་བདེ་གླིང་ནས་མི་གྲངས། ༡ པན་ཌོ་གཞིས་ཆགས་ནས་མི་གྲངས། ༣ ཤི་ལོང་ཁུལ་ནས་མི་གྲངས། ༡ བཅས་ཁྱོན་མི་གྲངས་ ༡༡ བྱུང་ཡོད་པའི་ཁོངས་སྐྱེས་པ་གྲངས་ ༥ དང་བུད་མེད་གྲངས་ ༦ དེའི་ནང་ནས་དགུང་ན་མཐོ་ཤོས་དེ་ ༨༦ དང་ཆུང་ཤོས་དེ་ལོ་ ༣༨ ནད་རྟགས་ཡོད་པ་མི་གྲངས། ༧ ནད་རྟགས་མེད་པ་མི་གྲངས། ༤ ཡིན་པ་རེད། སྟབས་ལེགས་པ་ཅིག་ལ་འདས་པའི་བདུན་ཕྲག་ནང་མི་འདས་གྲོངས་སོང་བ་གཅིག་ཀྱང་བྱུང་མེད་པ་དང་། བལ་ཡུལ་ནང་དུ་ནད་གཞི་ཕོག་པ་གཅིག་ཀྱང་བྱུང་མིན་འདུག
མདོ་དོན་ད་བར་རྒྱ་གར་དང་བལ་ཡུལ་ནང་བོད་མི་ནད་གཞི་ཕོག་པ་གྲངས་ ༡༤༩༠ དང་། དྲག་སྐྱེད་བྱུང་བ་མི་གྲངས་ ༡༤༣༠ འདས་གྲོངས་སོང་བ་མི་གྲངས། ༣༧ ད་ལྟ་ནད་མནར་བཞིན་པ་མི་གྲངས། ༢༣ བཅས་བྱུང་བའི་གནས་ཚུལ་ཞུ། ནད་གཞི་ཕོག་པ་དང་དེ་བཞིན་ནད་པ་དང་ཐད་ཀར་འབྲེལ་གཏུག་བྱུང་བ་རྣམས་རང་ཁྱིམ་དང་། ཚོགས་སྡེའི་ཟུར་བཀག་ཐོག་དོ་ནན་བཞུགས་བཞིན་གསོ་བཅོས་གནང་བཞིན་པའི་གནས་སྟངས་ཞུ།
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུའི་དོན་གནད་གཙོ་བོ་ད་བར་རྒྱལ་སྤྱི་ཁྱོན་ཡོངས་ནང་ནད་གཞི་ཕོག་པ་མི་གྲངས་ས་ཡ་ ༩༤ ལྷག་དང་། དེ་དག་ལས་འདས་གྲོངས་སོང་བ་མི་གྲངས་ས་ཡ་གཉིས་བརྒལ་བ་བྱུང་ཡོད། ཨ་རི་ཁྱོན་ཡོངས་ནང་མི་ས་ཡ་ ༤༣ དང་། ཡུ་རོབ་ནང་ས་ཡ་ ༣༡ དང་གནས་ཡུལ་རྒྱ་གར་ནང་དུ་ས་ཡ་ ༡༠ ལྷག་བྱུང་ཡོད། རྒྱ་གར་ནང་ནད་གཞི་ཕོག་ནས་དྲག་སྐྱེད་བྱུང་བའི་བརྒྱ་ཆ་དེ་༩༦།༧༥ དང་འདས་གྲོངས་སོང་བའི་བརྒྱ་ཆ་ ༡།༤༤ ཆགས་ཡོད། ཕྱི་ཚེས་ ༡༦ ནས་རྒྱལ་ཡོངས་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་རྒྱག་འགོ་ཚུགས་ནས་ད་ཉིན་བར་རྒྱ་གར་ནང་ཁྱོན་མི་གྲངས་འབུམ་བརྒྱད་ལྷག་ལ་སྔོན་འགོག་ཁབ་བརྒྱབ་ཟིན་པའི་གནས་ཚུལ་ཐོན་ཡོད།
གཞི་རྩའི་རྒྱ་གར་དབུས་གཞུང་ནས་ཏོག་དབྱིབས་གཉན་རིམས་སྔོན་འགོག་སྨན་ཁབ་རྒྱག་ཕྱོགས་ཐད་ལམ་སྟོན་གནང་ཡོད་པས་རྒྱལ་ཁབ་ཀྱི་ཛ་དྲག་གནས་སྟངས་ཐོག་སྔོན་ཁབ་ཁག་གཉིས་ལ་ཆོག་མཆན་གནང་བ་བཞིན་ད་ཆ་དངོས་སུ་རྒྱག་འགོ་ཚུགས་ཤིང་བོད་མིའི་སྤྱི་ཚོགས་ནང་དུའང་མདུན་ལ་ཕྱག་ལས་གནང་མཁན་སྨན་པ་གཙོས་པའི་འཕྲོད་ལས་པ་ཁག་ལ་རིམ་པས་རྒྱག་འགོ་ཚུགས་ཡོད། སྔོན་འགོག་སྨན་ཁབ་དེ་བོད་མི་རྣམས་ལའང་གཅིག་མཚུངས་ཐོབ་ཆེད་བོད་མིའི་སྒྲིག་འཛུགས་ནས་མཐུན་རྐྱེན་སྦྱོར་སྤྲོད་གང་མཚམས་ཞུས་ཡོད་ཀྱང་སྔོན་འགོག་སྨན་ཁབ་དངོས་སུ་རྒྱག་དང་མི་རྒྱག་དོ་བདག་སོ་སོའི་རང་དབང་ངང་ཐག་གཅོད་གནང་དགོས་ཆགས་ཡོད།
སྔོན་འགོག་སྨན་ཁབ་བརྒྱབ་པའི་རྗེས་གཟུགས་པོ་ཅུང་མི་བདེ་བ་སོགས་འབྱུང་རྒྱུ་ནི་རང་བཞིན་རེད། སྔོན་འགོག་སྨན་ཁབ་རྒྱག་པའི་སྐབས་གྲོད་པ་སྟོང་པ་དང་། མཚན་ལ་གཉིད་མེད་པ་སོགས་ཟས་སྤྱོད་སྤང་བླང་གི་ལམ་སྟོན་ཞིབ་ཕྲ་ས་གནས་སོ་སོར་འབུལ་རྒྱུ་ཡིན། གཙོ་ཆེ་ཤོས་རྒྱ་གར་དབུས་གཞུང་ནས་ལམ་སྟོན་གང་གནང་བ་དེ་མཁྱེན་དགོས་པ་དང་། ཡང་དེ་ཚོའི་ཐད་དོགས་འདྲི་ཡོད་ཚེ་ས་གནས་སྨན་ཁང་གི་སྨན་པ་དང་། སྨན་ཞབས་རྣམས་ལས་དོགས་སེལ་གནང་དགོས་རྒྱུ་ཤིན་ཏུ་གལ་ཆེ།
དོན་ཚན་གཉིས་པ་ནི། ད་ཆ་བོད་ཀྱི་ལོ་གསར་སླེབ་ལ་ཉེ་བས་མི་མང་པོ་ཞིག་རང་གི་ཕ་མ་སྤུན་མཆེད་དང་ནང་མི་ཐུག་འཕྲད་ཆེད་གུང་གསེང་ལ་ཕེབས་འཆར་ཡོད་པ་དེ་དག་ནས་རྩ་བའི་ད་ལྟའི་ནད་ཡམས་ཁྱབ་གདལ་བཀག་འགོག་ལ་དམིགས་ནས་འགྲུལ་བཞུད་གནང་དགོས་མ་བྱུང་ན་གང་ལེགས་དང་། ཅི་སྟེ་འགྲུལ་བཞུད་གནང་དགོས་འབྱུང་ནའང་སྔོན་འགོག་ཐབས་ལམ་རྣམས་མུ་མཐུད་ནས་བསྟེན་རྒྱུ་དང་ས་གནས་ས་ཐོག་ཏུ་འབྱོར་སྐབས་ས་གནས་སུ་ཟུར་བཀག་བཞུགས་རྒྱུ་སོགས་གནང་ཐུབ་ན། རང་ཉིད་ཀྱི་ཁྱིམ་ཚང་དང་གནས་ཡུལ་གཞིས་གྲོང་གི་མི་རྣམས་ཀྱི་འཕྲོད་བསྟེན་བདེ་འཇགས་ལ་ཕན་ཐོགས་ཡོད་ན་ས་གནས་ཀྱི་ཁྲིམས་སྒྲིག་ལ་བརྩི་སྲུང་ལག་བསྟར་ངེས་པར་གནང་རོགས་ཞེས་གསུངས།
དེ་རྗེས་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཀྱིས་རྒྱ་གར་གཞུང་ནས་བོད་མི་འཕྲོད་ལས་པ་རྣམས་ལ་ཡུལ་མི་སྤྱི་མཚུངས་ལྟར་སྔོན་འགོག་སྨན་ཁབ་ཀྱི་མཐུན་འགྱུར་སྦྱོར་སྤྲོད་གནང་བར་ཐུགས་རྗེ་ཆེ་ཞེས་ཞུས་པ་འབྲེལ་ལམ་སྟོན་གནང་གསལ། སྔོན་འགོག་སྨན་ཁབ་དེ་ཉེ་བའི་ཆར་རྡ་ས་བདེ་ལེགས་སྨན་ཁང་གི་སྨན་པ་དང་སྨན་ཞབས་བསྡོམས་མི་གྲངས་ ༡༠ ལ་དངོས་སུ་བརྒྱབ་ཡོད་པ་ལས་མི་གྲངས་གཉིས་ལ་ཚ་བ་འཕར་བ་དང་གྲང་ཤུམ་བརྒྱབ་པ་བྱུང་ཡོད་ཀྱང་དེ་དག་ནི་གནས་སྐབས་ཉིན་གྲངས་གཅིག་གཉིས་ནང་རང་བཞིན་གྱིས་མེད་པ་ཆགས་རྒྱུ་ཡིན་པས་དེ་ཚོའི་ཐོག་སེམས་འཚབ་གནང་དགོས་མེད།
གཙོ་བོ་སྔོན་འགོག་སྨན་ཁབ་བརྒྱབ་པའི་དགོས་དམིགས་དེ་སྔོན་ཁབ་འདིས་ཏོག་དབྱིབས་གཉན་རིམས་ ༡༩ སྔོན་འགོག་ཐུབ་པ་དང་། གཞན་ཡང་ཉེ་བའི་འཆར་གཉན་སྲིན་ངོ་བོ་འགྱུར་ལྡོག་ཕྱིན་པ་ལས་བྱུང་བའི་རིགས་ལའང་སྔོན་འགོག་ཐུབ་ཀྱི་ཡོད་པ་ཉམས་ཞིབ་ཡིག་ཆ་ཐོན་གྱི་འདུག གང་ལྟར་ད་ལྟའི་ནད་གཞི་འདི་ལས་སྔོན་འགོག་ཐུབ་པའི་ཆེད་སྔོན་ཁབ་བརྒྱབ་པ་ཡིན་པའི་གསལ་འགྲེལ་གནང་། འོན་ཀྱང་མང་ཚོགས་ནས་སྔོན་འགོག་སྨན་ཁབ་རྒྱག་མིན་སོ་སོའི་འདོད་མོས་ཡིན། སྔོན་འགོག་སྨན་ཁབ་དང་འབྲེལ་རྒྱ་གར་དབུས་གཞུང་ནས་ལམ་སྟོན་གནང་གསལ། སྔོན་ཁབ་འདི་རྒྱུན་དུ་མི་འཕྲོད་པའི་ (Allergy) དཀའ་ངལ་ཡོད་པ། གཟུགས་པོ་ཚ་བ་འཕར་བའི་གནས་སྐབས། ཁྲག་གི་ནད་གཞི་སྟེ་ཁྲག་སླ་བོ་ཆགས་རྒྱུ་སྨན་བསྟེན་གྱི་ཡོད་པ་དང་། དེ་བཞིན་ཁྲག་བཀག་སྡོམ་མ་ཐུབ་པའི་ནད་གཞི་ཡོད་པ། དེ་བཞིན་བུད་མེད་སྦྲུམ་མ་དང་ཕྲུ་གུ་ཆུང་ཆུང་ལ་ནུ་ཞོ་བསྣུན་མཁན་རྣམས་ད་ལྟའི་ཆར་སྔོན་ཁབ་མ་བརྒྱབ་ན་ལེགས་པའི་ལམ་སྟོན་ཕེབས་ཡོད།
སྔོན་འགོག་ཁབ་ཀྱི་ཟུར་ཕོག་དང་འབྲེལ་ཚ་བ་འཕར་བ་སོགས་ཟུར་ཕོག་ཉུང་ཤས་ཤིག་མང་ཆེ་བར་ཡོང་གི་ཡོད། ཟུར་ཕོག་དེ་རིགས་འབྱུང་ནའང་སེམས་འཚབ་གནང་དགོས་མེད་ཅིང་སྔོན་འགོག་སྨན་ཁབ་རྒྱག་སའི་སྨན་ཁང་ནང་སྨན་པ་དང་སྨན་གྱི་ཆ་རྐྱེན། དེ་བཞིན་སྔོན་ཁབ་མ་རྒྱག་གོང་མི་སྒུག་སྡོད་བྱེད་ས། བརྒྱབ་ཚར་བའི་རྗེས་ཆུ་ཚོད་ཕྱེད་ཀ་ཙམ་ཚབས་ཆེའི་ཟུར་ཕོག་ཡོང་མིན་བརྟག་ཞིབ་སྒུག་སྡོད་ཁང་གི་ཆ་རྐྱེན་བཅས་གྲ་སྒྲིག་གང་ལེགས་འདུག་པས་དེའི་ཐོག་ཐུགས་འཚབ་གནང་དགོས་མེད། ཟུར་ཕོག་གཞན་ཆུང་ཙག་རིགས་ཚ་བ་འཕར་བ་གློ་བརྒྱབ་པ་སོགས་ཀྱང་འབྱུང་སྲིད་པ་ནི་སྲོག་འཕྲོག་བྱེད་ཀྱི་ཉེན་ཚབས་དེ་ཙམ་མིན་པས་ཉིན་གྲངས་གཅིག་གཉིས་ནས་དེ་ཚོ་རང་བཞིན་གྱིས་ཞི་འགྲོ་ཡི་ཡོད། ང་ཚོ་ཡིན་ནའང་རྒྱ་གར་གཞུང་གི་ལམ་སྟོན་གཞིར་བཟུང་དངོས་སུ་ཟུར་ཕོག་ཅུང་བྱུང་དུས་དེ་ཚོ་ལམ་སྟོན་ལྟར་བྱུང་སོང་བའི་ཚོར་སྣང་བྱུང་།
དེ་ནས་ལོ་གསར་སླེབ་ལ་ཉེ་བས་མི་མང་པོ་འདུ་འཛོམས་ཡོང་སྲིད་པས་མང་ཚོགས་ནས་དེ་སྐབས་དམིགས་བསལ་གཟབ་གཟབ་དང་། ལྷག་པར་དེ་སྔ་བོད་མིའི་གཞིས་ཆགས་ཁག་གཅིག་ལ་གནས་སྟངས་ཛ་དྲག་ཆགས་ཤིང་ད་ཆ་གནས་སྟངས་ཡག་པོ་ཡོད་པ་དེ་མུ་མཐུད་ནས་གནས་རྒྱུར་ཚང་མས་གཟབ་གཟབ་དང་ཐུགས་སྣང་གནང་རོགས་ཞེས་རེ་སྐུལ་ཞུས་ཏེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༣ པ་དེ་མཇུག་སྒྲིལ་གནང་ཡོད། །
