ཕྱི་ལོ་ ༢༠༢༡ ཟླ་ ༡ ཚེས་ ༡༥ རེས་གཟའ་པ་སངས།
༄༅། །ཕྱི་ལོ་ ༢༠༢༡ ཟླ་ ༡ ཚེས་ ༡༤ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༢ དེ་སྤེལ་ཡོད་པ་དང་། གསལ་བསྒྲགས་ཞུ་མཁན་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་དང་། བོད་ལུགས་སྨན་པ་ཚེ་རིང་མཚམས་གཅོད་ལགས། ཕྱི་ལུགས་སྨན་པ་བསྟན་འཛིན་རྣམ་གྲོན་ལགས་བཅས་ཡིན།
དང་པོ། འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས་འཛིན་སྐྱོང་དང་འབྲེལ་བའི་ལམ་སྟོན་གནང་དོན། ད་ཆ་རྒྱ་གར་ནང་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་བརྒྱག་རྒྱུའི་གྲ་སྒྲིག་ཆ་ཚང་ཟིན་ནས་འདི་ཟླའི་ཚེས་ ༡༦ ཉིན་དངོས་སུ་རྒྱག་སྒོ་ཚུགས་ཀྱི་ཡོད་པ་རེད། ཉིན་ཤས་སྔོན་འཕྲོད་བསྟེན་དྲུང་ཆེས་གསུང་དོན་བཞིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ས་གནས་ཛ་དྲག་ཚོགས་ཆུང་གི་ཚོགས་གཙོ་ས་གནས་འགོ་འཛིན་དང་། དེ་བཞིན་ས་གནས་འཕྲོད་བསྟེན་སྨན་ཁང་བཅས་ལ་ལམ་སྟོན་ཕུལ་བ་ལྟར་ས་གནས་མང་ཆེ་བས་ད་ཆ་སོ་སོའི་རྫོང་གི་འབྲེལ་ཡོད་སྨན་ཁང་དང་ཆེད་ལས་མི་སྣ་བཅས་དངོས་སུ་ཐུགས་འཕྲད་ཀྱིས་རང་ཅག་བོད་མི་རྣམས་ལའང་ཡུལ་མི་གཅིག་མཚུངས་སྔོན་འགོག་སྨན་ཁབ་ཐོབ་རྒྱུའི་རེ་འདུན་ཞུས་ཡོད།
རྩ་བའི་ད་ཆ་བོད་མིའི་སྤྱི་ཚོགས་ནང་འོས་བསྡུའི་ལས་རིམ་འགྲོ་མུས་སྟེང་ས་གནས་འགོ་འཛིན་དང་ས་གནས་འཕྲོད་བསྟེན་སྨན་ཁང་འགན་འཛིན་ནས་ས་གནས་གནས་སྡོད་བོད་མི་རྣམས་ལ་སྔོན་འགོག་སྨན་ཁབ་ཐོབ་ཐབས་འབད་བརྩོན་ཧ་ལས་པ་ཡག་པོ་གནང་དང་གནང་བཞིན་ཡོད། ད་ཆ་རྒྱ་གར་ནང་སྔོན་འགོག་སྨན་ཁབ་གཉིས་ཏེ་ (Covishield) དང་ (Covaxin) གཉིས་ཆོག་མཆན་ཐོབ་ནས་དངོས་སུ་བརྒྱུག་རྒྱུ་ཡིན་འདུག་ཅིང་སྔོན་འགོག་སྨན་ཁབ་དེ་དང་ཐོག་སྨན་པ་དང་སྨན་ཞབས་ཀྱིས་གཙོས་མདུན་བསྐྱོད་ཕྱག་ལས་གནང་མཁན་དང་། དེ་ནས་མི་ལོ་ན་ ༥༠ ཡན། དེ་རྗེས་བླ་གཉན་གྱི་ནད་གཞི་ཡོད་པ་རྣམས་ལ་རིན་མེད་ཐོག་གནང་རྒྱུ་རེད་འདུག དེ་རྗེས་མི་མང་དཀྱུས་མར་སྔོན་འགོག་སྨན་ཁབ་རིན་བབ་ཐོག་བརྒྱག་རྒྱུ་ཡིན་པ་རེད། འོན་ཀྱང་ད་ལྟའི་ཆར་སྔོན་འགོག་སྨན་ཁབ་གཉིས་ནས་སུ་ལ་གང་ཐོབ་རྒྱུ་ཡིན་པ་གསལ་ཁ་གང་ཡང་མི་འདུག་པ་དེ་དོན་མཁྱེན་རྟོགས་སླད་ཞུ། དོན་གནད་གཅིག་དེ་ས་གནས་འགོ་འཛིན་གྱིས་གཙོས་འཕྲོད་བསྟེན་ལས་བྱེད་དང་། དེ་བཞིན་ས་གནས་ས་ཐོག་ལ་འགན་འཁྱེར་མཁན་རྣམས་ལ་རེ་འདུན་ཞུ་རྒྱུར། ས་གནས་མང་ཆེ་བས་སོ་སོའི་ས་གནས་སུ་ཡོད་པའི་སྨན་པ་དང་སྨན་ཞབས་པས་གཙོས་མདུན་བསྐྱོད་ཕྱག་ལས་གནང་མཁན་རྣམས་ཀྱི་མཚན་གཞུང་ཆ་ཚང་ས་གནས་རྫོང་གི་སྨན་ཁང་ལ་ཕུལ་ཟིན་པ་རེད། རྒྱ་གར་གཞུང་གི་འཆར་གཞི་ལྟར་ན་མདུན་བསྐྱོད་ཕྱག་ལས་གནང་མཁན་གྱི་རྗེས་སུ་ལོ་ན་ ༥༠ ཡན་གྱི་མི་རྣམས་ལ་སྔོན་འགོག་སྨན་ཁབ་དེ་བརྒྱག་རྒྱུ་ཡིན་འདུག་ན། ས་གནས་འགོ་འཛིན་དང་འབྲེལ་ཡོད་རྣམས་ཀྱིས་ད་ལྟ་ནས་ས་གནས་སུ་ལོ་ན་ ༥༠ ཡན་གྱི་མི་རྣམས་ཀྱི་ཐོ་གཞུང་ཡོད་པ་དེ་ས་གནས་སོ་སོ་ནས་ཆད་ལྷག་མེད་པ་གཟབ་གཟབ་ཀྱིས་མཁོ་སྒྲུབ་གནང་རོགས་ཅེས་ཞུ།
དེས་ས་གནས་བོད་མི་སྐུ་ན་བགྲེས་པ་རྣམས་ལ་སྔོན་འགོག་སྨན་ཁབ་དུས་ཐོག་དཀའ་ངལ་མེད་པར་ཐོབ་རྒྱུར་ཕན་ཐོགས་ཡོད་པ་ཡིན། དེ་ནས་གལ་ཆེའི་གནད་དོན་གཅིག་ནི་སྔོན་འགོག་སྨན་ཁབ་ཐོབ་རྒྱུར་བོད་མིའི་སྒྲིག་འཛུགས་ནས་ཐབས་ཤེས་གང་ཐུབ་ཞུས་པ་རེད། འོན་ཀྱང་སྔོན་འགོག་སྨན་ཁབ་རྒྱག་དང་མ་རྒྱག་དོ་བདག་སོ་སོའི་ཐུགས་འདོད་ཡིན། ང་ཚོས་འདི་ནས་ལམ་སྟོན་ཞུ་རྒྱུར་སྔོན་འགོག་སྨན་ཁབ་རྒྱག་པ་ཡིན་ན་ཕན་ཐོགས་དང་ཁྱད་ཕན་ཡོད་རེད་ཅེས་ཞུ། འོན་ཀྱང་ངེས་པར་དུ་རྒྱག་དགོས་ཀྱི་ཡོད་པ་འདི་ནས་ཞུ་ཡི་མེད།
མཐའ་དོན་ད་བར་ནད་ཡམས་འདི་ཐོག་མར་འགོ་འཛུགས་ནས་ད་བར་འདི་ནས་ལམ་སྟོན་ཕུལ་བ་བཞིན་ས་གནས་ས་ཐོག་ཏུ་བོད་མི་ཚོགས་སྒེར་ཚང་མས་མཉམ་རུབ་དང་ཕྱར་གྲུ་མཉམ་འདེགས་ཀྱིས་སྔོན་འགོག་དང་ཁྱབ་གདལ་བཀག་འགོག་ཆེད་འབད་པ་དུ་མ་གནང་ནས་ལས་དོན་ཚགས་ཚུད་ཡག་པོ་བྱུང་ཡོད། འོན་ཀྱང་ནད་ཡམས་འདི་ད་དུང་གཙང་མ་ཆགས་མེད་པར་བརྟེན་ག་དུས་ཡིན་ནའང་མ་བརྗེད་པའི་ཐོག་ཁ་རས་གྱོན་རྒྱུ། ལག་པ་གཙང་མ་བཀྲུ་རྒྱུ། མིའི་དབར་རྒྱང་ཐག་འཇོག་རྒྱུ་བཅས་མུ་མཐུད་གནང་རོགས། ཚང་མས་མཁྱེན་གསལ་ལྟར་ས་གནས་ཕལ་མོ་ཆེའི་ནང་འགན་འཁྱེར་མཁན་རྣམས་ནས་དངོས་གནས་ནུས་པ་མཉམ་དཔུང་ཐོག་ཕྱག་ལས་གནང་ཡོད་ཀྱང་ས་གནས་རེ་གཉིས་ནང་དེ་ལྟའི་ནུས་པ་དཔུང་མ་ཐུབ་པའི་གནས་སྟངས་བྱུང་ཡོད། ད་ལན་སྔོན་འགོག་སྨན་ཁབ་འདི་ནད་ཡམས་འདིའི་གདོང་ལེན་ཁ་གཏད་གཅོག་ཆེད་ཐབས་ལམ་གལ་ཆེ་ཤོས་དང་མཐའ་མ་དེ་ཆགས་ཀྱི་ཡོད་ན། ས་གནས་སུ་འགན་འཁྱེར་མཁན་དང་དེ་བཞིན་མི་མང་ནས་ཐུགས་སྣང་དང་ཚང་མས་མཉམ་རུབ་གནང་རོགས་ཅེས་ཞུ། གང་ལྟར་སྔོན་འགོག་སྨན་ཁབ་རྒྱག་འདོད་མེད་ན་མ་གཏོགས་དེ་མིན་སྨན་ཁབ་རྒྱག་མཁན་རྣམས་ལ་ང་ཚོས་སྔོན་འགོག་དུས་ཐོག་ཐོབ་རྒྱུར་མུ་མཐུད་ནས་མཉམ་རུབ་འགན་བཞེས་གནང་རོགས། ད་བར་མི་མང་འཕྲོད་བསྟེན་ཆེད་ཕྱག་ལས་གནང་མཁན་ཚང་མར་ཐུགས་རྗེ་ཆེ་ཞེས་ཞུ་རྒྱུ་ཡིན་ཞེས་གསུངས།
གཉིས་པ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་རྒྱ་གར་ནང་གི་ས་གནས་གྲངས་ ༡༩ དང་། བལ་ཡུལ་ས་གནས་གྲངས་ ༣ ནང་ཁྱོན་བོད་མི་གྲངས་ ༤༠༥ ༼རང་ཁྱིམ། ༢༦༢ ཚོགས་སྡེ་དང་སྒྲིག་འཛུགས་ཀྱིས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༡༤༣༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། གཉིས་པ་གསོ་རིག་ལུས་སེམས་ནུས་གསོའི་སྨན་དང་འབྲེལ་ད་བར་ཁྱོན་བོད་མི་གྲངས་ ༢༤༧༩༠ ཙམ་ལ་གསོ་རིག་ལུས་སེམས་ནུས་གསོའི་སྨན་རིན་མེད་ཐོག་འགྲེམས་སྤེལ་ཞུས་ཟིན། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་གཅིག་ལ་ཁ་པར་བརྒྱུད་ནས་སེམས་ཁམས་འཕྲོད་བསྟེན་སློབ་གསོ་གནང་བ་བྱུང་འདུག གཞན་སེམས་ཁམས་འཕྲོད་བསྟེན་ཚན་པའི་ངོས་ནས་ས་གནས་སུ་དངོས་སུ་ཞབས་ཞུ་བསྒྲུབ་མཁན་སྨན་པ་དང་སྨན་ཞབས་པས་གཙོས་དྭང་བླངས་ཞབས་ཞུ་བ་རྣམ་པའི་ལུས་སེམས་བདེ་ཐང་དེ་གལ་ཆེ་བརྩིས་པའི་ཐོག་འབྲེལ་ཡོད་ལས་མི་རྣམས་ལ་བསམ་ཚུལ་འགེངས་ཤོག་ཤིག་བསྐང་ནས་དགོངས་ཚུལ་བསྡུས་བཞེས་གནང་བའི་ནང་འབྲེལ་ཡོད་མང་པོ་ཞིག་ལ་ལས་ཀའི་ངོ་བོ་དང་། དེ་བཞིན་དབྱེ་འབྱེད་ལ་སོགས་པའི་སེམས་ངལ་མི་ཉུང་བ་འཕྲད་པ་གསལ་སྟོན་གནང་ཡོད་པ་དང་། ཡང་འགེངས་ཤོག་ནང་དངོས་ཐོག་སེམས་ངལ་སེལ་ཐབས་སླད་སྒོམ་སྒྲུབ་ཉམས་ལེན་དང་། དེ་བཞིན་བློ་སྦྱོང་དང་དབུགས་སྦྱོང་སོགས་དངོས་སུ་གདོང་ཐབས་ལག་ལེན་རྣམས་དགོས་ངེས་ཀྱི་དགོངས་ཚུལ་སྟོན་པ་བཞིན་ཚན་པའི་ངོས་ནས་ནང་པ་སངས་རྒྱས་པའི་ཆོས་ཕྱོགས་ཐོག་ནས་དགེ་བཤེས་ཐབས་མཁས་བློ་གྲོས་ལགས་དྲ་ཐོག་ནས་གདན་ཞུ་གནང་ནས་འཕྲོད་ལས་པ་རྣམས་ལ་སྒོམ་ཉམས་ལེན་དང་བློ་སྦྱོང་སློབ་འཁྲིད་དང་བཀའ་སློབ་གནང་བཞིན་ཡོད།
དེ་ཡང་རྒྱ་གར་བྱང་ཕྱོགས་དང་ལྷོ་ཕྱོགས་ཞེས་སྡེ་ཚན་གཉིས་ལ་ཕྱེ་ནས་ད་ཆ་དྲ་ཐོག་ནས་མདུན་ལ་ཞབས་ཞུ་བསྒྲུབ་མཁན་རྣམས་ཀྱི་བདེ་ཐང་ཆེད་ལས་རིམ་ (Frontline worker’s wellbeing program) འགོ་འཛུགས་ཀྱིས་འགྲོ་བཞིན་པ་ཡིན། གཞན་ཡང་ལས་རིམ་འདི་དང་འབྲེལ་ནས་ད་ཆ་ས་གནས་སུ་མདུན་བསྐྱོད་ཞབས་ཞུ་བ་རྣམས་ནས་ནད་ཡམས་ཁྱབ་གདལ་བཀག་འགོག་གི་སྤྱོད་པ་ཚུལ་བཞིན་བསྟེན་པའི་ཐོག་ནས་ལས་མི་སོ་སོའི་དཀའ་ངལ་དང་མྱོང་ཚོར། དེ་བཞིན་གདོང་ལེན་བྱེད་ཕྱོགས་ཐོག་ཕན་ཚུན་གོ་བསྡུར་དང་སློབ་གསོ་ལམ་སྟོན་སྤེལ་རེས་ཀྱི་ལས་རིམ་ (Psychological support) ཞིག་ད་ཆ་འགྲོ་མུས་ཡིན། དེ་ནས་ནད་ཡམས་ཁྱབ་གདལ་བཀག་འགོག་ཆེད་རྒྱ་གར་ནང་གི་ས་གནས་གྲངས་ ༡༧ དང་། བལ་ཡུལ་ནང་གི་ས་གནས་གྲངས་ ༢ བཅས་ནང་ཁྱོན་རྒྱ་གར་ནང་མི་གྲངས་ ༦༠༨ དང་། བལ་ཡུལ་ནང་མི་གྲངས་ ༩ བཅས་ཁྱོན་མི་གྲངས་ ༦༡༧ ཙམ་ལ་ནད་གཞི་ཕོག་ཡོད་མེད་བརྟག་དཔྱད་ཟིན། དེ་མིན་ས་གནས་ཛ་དྲག་ཚོགས་ཆུང་ནས་དེ་སྔ་ཕྱི་ཟླ་ ༣ ནས་འགོ་འཛུགས་ཀྱིས་ད་བར་ས་གནས་སུ་རྒྱ་གར་དབུས་སའི་གཞུང་གི་ལམ་སྟོན་བཀོད་ཁྱབ་ལྟར་ས་གནས་སོ་སོར་བྱེད་སྒོ་ལམ་སྟོན་སྤེལ་དགོས་ཐོག་བདུན་རེར་ཚོགས་འདུ་དང་། དེ་བཞིན་ས་གནས་སུ་དུག་སེལ་གནང་རྒྱུའི་མཚོན་ལས་དོན་མུ་མཐུད་ནས་འགྲོ་བཞིན་ཡོད།
གསུམ་པ། བཙན་བྱོལ་བོད་མིའི་སྤྱི་ཚོགས་ཁྲོད་ནད་གཞི་ཕོག་པ་སྙན་གསང་ཞུ་རྒྱུར། འདས་པའི་བདུན་ཕྲག་གཅིག་གི་ནང་རྒྱ་གར་ནང་དུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༧ བྱུང་། ཞིབ་ཕྲ་ནི། རྡ་ས་ཁུལ་ནས་མི་གྲངས་ ༡ ལྡི་ལི་བསམ་ཡས་གླིང་ནས་མི་གྲངས། ༡ ལ་དྭགས་བསོད་ནམས་གླིང་ཁུལ་ནས་མི་གྲངས། ༣ དོན་ལྡན་གླིང་གཞིས་ཆགས་ནས་མི་གྲངས། ༡ མོན་གྷོ་འདོད་རྒུ་གླིང་ནས་མི་གྲངས། ༡ བཅས་ཁྱོན་མི་གྲངས་ ༧ བྱུང་ཡོད་པ་རྣམས་ལས་སྐྱེས་པ་གྲངས་ ༣ དང་། བུད་མེད་གྲངས་ ༤ དེའི་ནང་ནས་དགུང་ན་མཐོ་ཤོས་དེ་ ༤༤ དང་ཆུང་ཤོས་དེ་ལོ་ ༢༧ ཡིན། ནད་རྟགས་ཡོད་པ་མི་གྲངས། ༥ ནད་རྟགས་མེད་པ་མི་གྲངས། ༢ ཡིན་པ་རེད། སྟབས་ལེགས་པ་ཞིག་ལ་འདས་པའི་བདུན་ཕྲག་ནང་མི་འདས་གྲོངས་སོང་བ་གཅིག་ཀྱང་བྱུང་མིན་འདུག་པ་དང་བལ་ཡུལ་ནང་དུ་ནད་གཞི་ཕོག་པ་གཅིག་ཀྱང་བྱུང་མིན་འདུག མདོ་དོན་ད་བར་རྒྱ་གར་དང་བལ་ཡུལ་ནང་བོད་མི་ནད་གཞི་ཕོག་པ་གྲངས་༡༤༧༩། དྲག་སྐྱེད་བྱུང་བ་མི་གྲངས་ ༡༤༡༡། འདས་གྲོངས་སོང་བ་མི་གྲངས། ༣༧། ད་ལྟ་ནད་མནར་བཞིན་པ་མི་གྲངས། ༣༡ བཅས་བྱུང་འདུག ནད་གཞི་ཕོག་པ་དང་དེ་བཞིན་ནད་པ་དང་ཐད་ཀར་འབྲེལ་གཏུག་བྱུང་བ་རྣམས་རང་ཁྱིམ་དང་། ཚོགས་སྡེའི་ཟུར་བཀག་ཐོག་དོ་ནན་བཞུགས་བཞིན་གསོ་བཅོས་གནང་བཞིན་འདུག
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུའི་དོན་གནད་གཙོ་བོ་ད་བར་རྒྱལ་སྤྱི་ཁྱོན་ཡོངས་ནང་ནད་གཞི་ཕོག་པ་མི་གྲངས་ས་ཡ་ ༩༠ ལྷག་དང་། དེ་དག་ལས་འདས་གྲོངས་སོང་བ་མི་གྲངས་ས་ཡ་གཅིག་ལྷག་བརྒལ་ཡོད། ཨ་རི་ཁྱོན་ཡོངས་ནང་མི་ས་ཡ་ ༣༩ དང་། ཡུ་རོབ་ནང་ས་ཡ་ ༢༩། གནས་ཡུལ་རྒྱ་གར་ནང་དུ་ས་ཡ་ ༡༠ ལྷག་བརྒལ་ཡོད། རྒྱ་གར་ནང་ནད་གཞི་ཕོག་ནས་དྲག་བསྐྱེད་སོང་བའི་བརྒྱ་ཆ་དེ་ ༩༦།༥༢ དང་། འདས་གྲོངས་སོང་བའི་བརྒྱ་ཆ་༡།༤༤ འདས་པའི་ཆུ་ཚོད་ ༢༤ ནང་ནད་གཞི་གསར་པ་ཕོག་པའི་མི་གྲངས་ ༡༦༩༤༦ དང་། ཉེ་ཆར་ཨིན་ཡུལ་ནས་གཉན་སྲིན་རྣམ་པ་འགྱུར་བའི་ཏོག་དབྱིབས་ནད་གཞི་ཕོག་པ་མི་གྲངས་ ༡༠༩ ཆགས་པའི་གནས་ཚུལ་ཞུ། གོང་དུ་འཕྲོད་བསྟེན་དྲུང་འཕར་གྱིས་གསུངས་པ་བཞིན་རྒྱ་གར་ནང་ད་ཆ་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་བརྒྱག་རྒྱུའི་ཚོད་ལྟའི་དང་གྲ་སྒྲིག་ཆ་ཚང་ཟིན་ཞིང་ཉེ་བའི་ཆར་གཞུང་འབྲེལ་གསལ་བསྒྲགས་སྤེལ་དོན་ལྟར་ན་ འདི་ཟླའི་ཚེས་ ༡༦ ཉིན་མོ་རྒྱ་གར་གྱི་སྲིད་བློན་མོ་དྷི་མཆོག་གིས་དྲ་རྒྱའི་ཐོག་ནས་འཕྲོད་ལས་པ་ཁག་གཅིག་དང་བཀའ་མོལ་གནང་ཐོག་རྒྱ་གར་རྒྱལ་ཡོངས་སྔོན་འགོག་སྨན་ཁབ་བརྒྱག་རྒྱུའི་ལས་རིམ་འགོ་འཛུགས་ཞུ་འཆར་ཡོད་པ་དང་། སྔོན་འགོག་སྨན་ཁབ་རྒྱག་སའི་ས་ཚིགས་གྲངས་ ༢༩༣༤ ཙམ་ནང་ཉིན་རེར་འཕྲོད་ལས་པ་བསྡོམས་གྲངས་ ༡༠༠ ཙམ་ལ་སྨན་ཁབ་བརྒྱབ་ནས་ཉིན་དང་པོར་རྒྱ་གར་རྒྱལ་ཡོངས་ནང་འཕྲོད་ལས་པས་གཙོས་མདུན་བསྐྱོད་ཆེད་ལས་མི་གྲངས་འབུམ་གསུམ་ལ་སྔོན་འགོག་སྨན་ཁབ་བརྒྱག་རྒྱུའི་འཆར་གཞི་རེད་འདུག་པ་འདི་ནི་འཛམ་གླིང་ནང་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་ཀྱི་ལས་རིམ་གཞི་རྒྱ་ཆེ་ཤོས་ཤིག་ཆགས་ཀྱི་ཡོད།
དེ་ནས་རིམ་པས་ལོ་ན་ ༥༠ ཡན་སོགས་ཉེན་ཚབས་ཆེ་བའི་མི་རྣམས་ལ་བརྒྱག་རྒྱུའི་འཆར་ཡོད་པས་ཁྱོན་མི་གྲངས་ས་ཡ་ ༣༠༠ ཙམ་ལ་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་དེ་རྒྱག་འཆར་ཡོད་པ་རེད་འདུག དེ་སྔ་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་བཟོ་ཚོང་དང་ཚོད་ལྟའི་བརྟག་ཞིབ་གནང་རྗེས་སྔོན་འགོག་སྨན་ཁབ་དེ་དག་གིས་ནད་གཞི་འདི་བརྒྱ་ཆ་ ༩༠་་༩༥ བར་སྔོན་འགོག་བྱེད་ཐུབ་ཀྱི་ཡོད་པ་བརྗོད་ཡོད་ན། ད་ལྟའི་སྔོན་འགོག་ཐོན་པ་དེས་བརྒྱ་ཆ་ ༡༠༠ སྔོན་འགོག་ཐུབ་པའི་ངེས་པ་མེད་པས་མང་ཚོགས་ནས་མུ་མཐུད་ནས་ཏོག་དབྱིབས་གཉན་རིམས་ ༡༩ སྔོན་འགོག་དང་ཁྱབ་གདལ་བཀག་འགོག་གྱི་བྱ་སྤྱོད་རྣམས་ཚུལ་བཞིན་བསྟེན་སྲུང་དགོས་པའི་ལམ་སྟོན་དང་སླར་དྲན་སྐུལ་ཞུ་རྒྱུ་ཡིན།
དེ་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོན་ལགས་ཀྱིས་ལམ་སྟོན་གནང་གསལ།ད་ཆ་རྒྱ་གར་ནང་ཏོག་དབྱིབས་གཉན་རིམས་ ༡༩ སྔོན་འགོག་སྨན་ཁབ་ཀྱི་གྲ་སྒྲིག་ཆ་ཚང་ཟིན་ནས་འདི་ཟླའི་ཚེས་ ༡༦ ཉིན་དངོས་སུ་རྒྱག་སྒོ་ཚུགས་ཀྱི་ཡོད་ན། རྒྱ་གར་འདི་བཞིན་མི་འབོར་ཆེ་ཤོས་ཀྱི་རྒྱལ་ཁབ་ཡིན་པས་མི་མང་ཚང་མར་དུས་གཅིག་ལ་རྒྱག་ཐུབ་དཀའ་བས་དང་ཐོག་སྨན་ཁང་ནང་ཕྱག་ལས་གནང་མཁན་སྨན་པ་དང་སྨན་ཞབས་སོགས་མདུན་བསྐྱོད་ཞབས་ཞུ་བ་རྣམས་ལ་རྒྱག་འཆར་ཡོད་པ་རེད། དེ་རྗེས་རིམ་པ་གཉིས་པ་དེ་ཉེན་ཚབས་ཆེ་བའི་མི་སྣ་དང་དེ་ནས་མང་ཚོགས་ལ་བརྒྱག་རྒྱུ་ཡིན་པ་རེད། ད་ལྟའི་འཆར་གཞི་འདི་ལྟར་ཡིན་པ་རེད། གལ་ཏེ་རྗེས་སུ་བསྒྱུར་བ་ཕྱིན་ཚེ་འདི་ནས་ལན་གསལ་ཞུ་རྒྱུ་ཡིན། རྒྱ་གར་ནང་ས་ཆའི་རྩིས་དེ་ཐོག་མར་ལྷོ་ཕྱོགས་ཀེ་ར་ལ་དང་མཱ་ཧཱ་རསྟྲའི་མངའ་སྡེའི་ནང་ཛ་དྲག་ཆེ་བས་མངའ་སྡེ་དེ་ཚོའི་ནང་ཐོག་མར་བརྒྱག་རྒྱུ་ཡིན་པ་རེད། སྔོན་འགོག་སྨན་ཁབ་བརྒྱག་རྒྱུའི་ལས་གཞི་འགོ་མ་འཛུགས་གོང་གྲ་སྒྲིག་བྱ་རྒྱུ་ཤིན་ཏུ་གལ་ཆེ་བས་ཁ་ཉིན་རེས་གཟའ་པ་སངས་ཉིན་རྒྱ་གར་ནང་གི་རྫོང་ ༦༥ ནང་གི་ས་གནས་སྨན་ཁང་ནང་ཆ་རྐྱེན་དང་མི་ཆ། དེ་བཞིན་རྒྱག་སྟངས་རྒྱག་ལུགས་ཐོག་བལྟ་ཞིབ་ཚོད་ལྟ་ (Dry Run) དང་། དེ་བཞིན་ཁབ་རྒྱག་སྟངས་ཀྱི་སྦྱོང་བརྡར་བཅས་གནང་ཡོད། ཧི་མཱ་ཅལ་མངའ་སྡེ་ལ་ཆ་བཞག་ན་བདེ་ལེགས་སྨན་ཁང་འདི་སྔོན་འགོག་སྨན་ཁབ་རྒྱག་སའི་སྨན་ཁང་ཞིག་ཆགས་ཡོད་པས་བདུན་ཕྲག་སྔ་མའི་རེས་གཟའ་པ་སངས་ཉིན་བདེ་ལེགས་སྨན་ཁང་ནང་གོང་ཞུས་གྲ་སྒྲིག་ཚོད་ལྟའི་ལས་རིམ་ཆ་ཚང་ཟིན་ཡོད།
མཐའ་དོན་རྒྱ་གར་ནང་སྤྱི་བཏང་ནད་གཞི་ཕོག་པའི་གྲངས་ཇེ་ཉུང་དུ་འགྲོ་བཞིན་ཡོད་ཀྱང་ཀེ་ར་ལ་དང་མཱ་ཧཱ་ར་སྟྲའི་མངའ་སྡེའི་ནང་ད་དུང་ཡིན་ནའང་གནས་སྟངས་ཛ་དྲག་ཆགས་ཡོད། དེར་བརྟེན་ང་ཚོས་ད་ལྟ་གནས་སྟངས་ཡག་ཏུ་ཕྱིན་པས་ལྷོད་གཡེང་དང་རྣམ་གཡེང་དུ་མ་སོང་བར་མུ་མཐུད་ནས་ཁ་རས་གྱོན་རྒྱུ་དང་། མིའི་དབར་རྒྱང་ཐག་འཇོག་རྒྱུ་སོགས་སྔོན་འགོག་ཐབས་ལམ་རྣམས་བསྟེན་དགོས། གལ་ཏེ་མི་གང་ཞིག་ལ་ཆམས་ཚད་སོགས་ཀྱི་ནད་རྟགས་མངོན་ཚེ་སྣང་མེད་དུ་མ་འཇོག་པར་སྨན་པ་དང་སྨན་ཞབས་པར་འབྲེལ་གཏུག་གནང་དགོས་གལ་ཆེ། རང་ཉིད་ལ་ནད་གཞི་ཕོག་ཡོད་ཚེ་གང་མགྱོགས་སྨན་བཅོས་བྱེད་པ་དེས་དྲག་བསྐྱེད་ཀྱང་མྱུར་བ་ཡོད་པ་དང་གཞན་ལ་འགོས་ཁྱབ་ཀྱི་ཉེན་ཁ་ཆུང་བ་ཡོད་ན་ཚང་མས་ཐུགས་ལ་འཇགས་རོགས་གནང་། ཞེས་གསུང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༢ པ་དེ་མཇུག་སྒྲིལ་གནང་། །
