ཕྱི་ལོ་ ༢༠༢༡ ཟླ་ ༡ ཚེས་ ༢༦ རེས་གཟའ་མིག་དམར། 

༄༅། །ཕྱི་ལོ་ ༢༠༢༡ ཟླ་ ༡ ཚེས་ ༡༨ ཉིན་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཚོགས་འདུ་ཐེངས་ ༣༧ འདི་བཞིན་བསྐོང་ཚོགས་གནང་ཡོད།

དེ་ཡང་ཕྱི་ཚེས་ ༢༡ རེས་གཟའ་ཕུར་བུའི་ཉིན་དྲ་ལམ་བརྒྱུད་བལ་ཡུལ་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཚོགས་འདུ་ཐེངས་གསུམ་པའི་ཐོག་རྒྱལ་ཚོགས་ཀྱི་ཨ་རིའི་ཚོགས་མིས་བལ་ཡུལ་དུ་གནས་པའི་བོད་མི་སྐྱབས་བཅོལ་བའི་གནས་སྟངས་སྐོར་གླེང་སློང་དང་འབྲེལ་བལ་པོའི་གཞུང་ལ་བལ་ཡུལ་དུ་ཡོད་པའི་བོད་མི་སྐྱབས་བཅོལ་བ་རྣམས་ཐོ་འགོད་བྱེད་པའི་ཐོག་ངོ་སྤྲོད་ལགའཁྱེར་དང་འབྲེལ་ཁྲིམས་མཐུན་གྱི་ལས་དོན་བྱེད་ཆོག་པའི་ཐོབ་ཐང་སྤྲད་དགོས་པ་མ་ཟད། བལ་ཡུལ་གཞུང་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་གཉིས་ཀྱི་དབར་ (Gentlemen’s Agreement) ཞེས་པའི་གྲོས་མཐུན་གཞིར་བཟུང་བལ་པོའི་གཞུང་ནས་བོད་ནས་བལ་ཡུལ་བརྒྱུད་སྐྱབས་བཅོལ་དུ་ཕེབས་མཁན་བོད་མིའི་བདེ་འཇགས་སྲུང་སྐྱོབ་གནང་དགོས་པ་ལས་དེའི་ཐོག་རྒྱ་ནག་དང་ལྷན་དུ་བཞག་པའི་གྲོས་མཐུན་ཁག་ལག་བསྟར་བྱེད་མི་ཆོག ཅེསས་གསུངས།

དེ་ནས་བལ་ཡུལ་སྐུ་ཚབ་ཤའན་ཀར་དྷ་སི་བྷེ་རཱ་གྷི་ (Shanker Das Bairagi) ལགས་ཀྱིས་བལ་ཡུལ་གྱི་ཉེས་ཅན་རྩིས་སྤྲོད་ཀྱི་ཁྲིམས་རྣམས་རྒྱལ་སྤྱིའི་ཁྲིམས་སྒྲིག་ལྟར་ལག་བསྟར་བྱེད་བཞིན་ཡོད་སྐོར་དང་། བལ་ཡུལ་དུ་ཡོད་པའི་སྐྱབས་བཅོལ་བ་རྣམས་ལ་བལ་གཞུང་ནས་འགྲོ་བ་མིའི་རིགས་ལ་སེམས་ཁུར་ཡོད་པའི་ཐོག་ལྟ་སྐྱོང་ཡག་པོ་བྱེད་བཞིན་ཡོད་པ་མ་ཟད་མུ་མཐུད་བྱེད་རྒྱུ་ཡིན་སྐོར་གསུངས།

མཐར་བལ་ཡུལ་ཕྱི་འབྲེལ་བློན་ཆེན་སྐུ་ཞབས་པྲ་དིབ་ཀུ་མཱར་གྷ་ཝ་ལི་ (Pradeep Kumar Gyawali) ལགས་ཀྱིས་བལ་པོའི་གཞུང་གིས་ངོས་ནས་ཁུལ་དེར་དངོས་ཡོད་དཀའ་ངལ་ཁག་གདོང་ལེན་བྱེད་ཕྱོགས་དང་དུས་བཀག་བསྐྱར་ཞིབ་ཐེངས་གསུམ་པའི་ཐོག་ལམ་སྟོན་གང་གནང་བ་རྣམས་ལག་བསྟར་གནང་རྒྱུ་ཡིན་སྐོར་གསུངས། །