ཕྱི་ལོ་ ༢༠༢༡ ཟླ་ ༡ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་འཛམ་གླིང་ཡོངས་སུ་ཁྱབ་བརྡལ་ཕྱིན་པའི་རྐྱེན་གྱིས་འགྲོ་བ་མི་རྣམས་ཀྱི་ལུས་སེམས་དང་དཔལ་འབྱོར། དེ་བཞིན་འཕྲོད་བསྟེན་སྒྲིག་འཛུགས་མ་ལག་དང་བཅས་པར་སྔར་བྱུང་མྱོང་མེད་པའི་དཀའ་ངལ་ཚད་ལས་བརྒལ་བ་ཞིག་བྱུང་ཡོད། རྒྱ་བལ་གཉིས་ཀྱི་བཙན་བྱོལ་བོད་མིའི་གཞིས་ཆགས་ཁག་ལ་མཚོན་ན་ཕྱི་ལོ་ ༢༠༢༠ ཟླ་ ༡ ནས་བཟུང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་ཏོག་དབྱིབས་གཉན་རིམས་སྔོན་འགོག་དང་སྨན་བཅོས། གོ་རྟོགས་སོགས་ཀྱི་སྐོར་ལས་གཞི་རྒྱ་ཆེ་སྤེལ་དང་སྤེལ་བཞིན་ཡོད། བོད་མིའི་སྒྲིག་འཛུགས་ནས་སྨན་རྩིས་ཁང་དང་བདེ་ལེགས་སྨན་ཁང་། དེ་བཞིན་སྨན་པ་དང་སྨན་ཞབས་པ། ས་གནས་ཁག་གི་གཞིས་འགོ་སོགས་དང་མཉམ་འབྲེལ་ཐོག་ཏོག་དབྱིབས་གཉན་རིམས་སྔོན་འགོག་དང་སྨན་བཅོས་ཀྱི་ལས་གཞི་ཁག་ཚགས་ཚུད་ངང་ལག་བསྟར་གནང་ཐུབ་ཡོད།
བཙན་བྱོལ་བོད་མིའི་གཞིས་ཆགས་ཁག་གི་ནང་མདུན་དུ་ཐོན་ནས་ཐད་ཀར་ཏོག་དབྱིབས་གཉན་རིམས་སྨན་བཅོས་དང་སྔོན་འགོག་གནང་མཁན་དག་ནི། སྨན་ཁང་དང་འགོག་དབྱེ་ཟུར་འཇོག་ཁང་གི་སྨན་པ། སྨན་ཞབས་པ། དྭང་བླངས་ལས་བྱེད། ཁ་ལོ་བ། ཆོད་གན་ལས་བྱེད། ས་གནས་འགོ་འཛིན་དང་ལས་བྱེད་རྣམ་པ་ཚུད་ཡོད། ཏོག་དབྱིབས་གཉན་རིམས་སྔོན་འགོག་དང་སྨན་བཅོས་ཆེད་ཐད་ཀར་ཕྱག་ལས་གནང་མཁན་རྣམས་ལ་ལུས་སེམས་གཉིས་ཀར་དཀའ་ངལ་འཕྲད་བཞིན་ཡོད་པ་མ་ཟད། ལྷག་པར་སེམས་ཀྱི་འཕྲོད་བསྟེན་ལ་དཀའ་ངལ་འཕྲད་བཞིན་ཡོད། དེར་བརྟེན་འཕྲོད་བསྟེན་ལས་ཁུངས་ནས་ཁོང་ཚོའི་དཀའ་ངལ་དང་ཉེན་ཁ་ཤེས་རྟོགས་ཡོད་པའི་ཐོག་ཕྱི་ལོ་ ༢༠༢༠ ཟླ་ ༧ ནང་མདུན་དུ་ཐོན་ནས་ཕྱག་ལས་གནང་མཁན་རྣམས་ཀྱི་ཆེད་རོགས་རམ་ཞབས་ཞུའི་ལས་གཞི་ཞིག་དབུ་འབྱེད་གནང་ཡོད།
ཕྱི་ལོ་ ༢༠༢༡ ཟླ་ ༡ ནང་འཕྲོད་བསྟེན་ལས་ཁུངས་ནས་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གི་ནང་མདུན་དུ་ཐོན་ནས་ཕྱག་ལས་གནང་མཁན་མི་གྲངས་བརྒྱད་ཅུ་གྱ་དགུའི་སེམས་ཀྱི་འཕྲོད་བསྟེན་སྐོར་རྟོག་ཞིབ་གནང་བའི་ཁྲོད་ཏོག་དབྱིབས་གཉན་རིམས་ཁྱབ་བརྡལ་ཕྱིན་པ་ནས་བཟུང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་གི་ནང་མདུན་དུ་ཐོན་ནས་ཕྱག་ལས་གནང་མཁན་ཁག་གཅིག་གི་སེམས་ཀྱི་འཕྲོད་བསྟེན་ཉམས་རྒུད་དུ་ཕྱིན་ཡོད་པའི་སྐོར་སྙན་ཐོ་བཏོན་གནང་ཡོད། དེར་བརྟེན་འཕྲོད་བསྟེན་ལས་ཁུངས་ནས་ཏོག་དབྱིབས་གཉན་རིམས་སྔོན་འགོག་དང་སྨན་བཅོས་སླད་མདུན་དུ་ཐོན་ནས་ཕྱག་ལས་གནང་མཁན་རྣམ་པ་ཚོའི་བདེ་ཐང་གལ་ཆེར་བརྩིས་ཏེ་ལས་འཆར་ཞིག་དབུ་འཛུགས་གནང་ཡོད།
ལས་འཆར་དེ་ནི། བདུན་ཕྲག་གཉིས་རེའི་མཚམས་སུ་སོ་སོའི་འབྲེལ་ཡོད་ལས་ཁུངས་དང་སྨན་ཁང་གི་ལས་བྱེད་ནང་ཁུལ་དབར་གཅིག་ཕན་གཅིག་གྲོགས་ཀྱི་ཚོགས་འདུ་འཚོགས་རྒྱུ་དང་། དེ་བཞིན་ཆེད་མཁས་པ་ཚོས་སྒོམ་དང་། སེམས་ངལ་སྟངས་འཛིན། ཟས་སྤྱོད་བསྟེན་སྟངས་སོགས་ཀྱི་སྐོར་གཏམ་བཤད་གནང་རྒྱུ་བཅས་ཡིན།
རྒྱ་གར་ལྷོ་ཕྱོགས་སེ་ར་དགོན་པ་ནས་ཡིན་པའི་དགེ་བཤེས་ཐབས་མཁས་བློ་གྲོས་ལགས་ཀྱིས་ཐེངས་དང་པོ་རྒྱ་གར་ལྷོ་བྱང་དང་དབུས་ཁུལ་གྱི་འབྲེལ་ཡོད་ལས་བྱེད་རྣམས་ལ་སེམས་ངལ་བཅོས་ཐབས་སྐོར་ནང་ཆོས་ཀྱི་གཞུང་ནས་གསུངས་པའི་སྒོམ་ཉམས་ལེན་གྱི་གལ་གནད་སྐོར་གསུངས་ཡོད།
མདུན་དུ་ཐོན་ནས་ཕྱག་ལས་གནང་མཁན་རྣམ་པ་ཚོའི་བདེ་ཐང་གི་ལས་གཞི་འདི་ནི། སེམས་ཀྱི་འཕྲོད་བསྟེན་ཚོགས་ཆུང་གི་ཚོགས་མི་དགེ་བཤེས་ལྷག་རྡོར་ལགས་དང་། སྨན་པ་ཚེ་བརྟན་ལགས། སྨན་པ་ཁ་རོལ་ཝིན་གར་ཊན་ (Carol Weingarten) ལགས། ལྕམ་སྐུ་ཊ་ཀ་ཀོ་སུ་ཛུ་ཀི་ (Takako Suzuki) ལགས་བཅས་ཀྱི་ལམ་སྟོན་དང་། དེ་བཞིན་མདུན་དུ་ཐོན་ནས་ཕྱག་ལས་གནང་མཁན་རྣམ་པའི་དགོངས་ཚུལ་གཞིར་བཞག་ཐོག་ལས་གཞི་སྤེལ་བ་ཞིག་ཡིན།།
