ཕྱི་ལོ་ ༢༠༢༠ ཟླ་ ༡༢ ཚེས་ ༩ རེས་གཟའ་ལྷག་པ།

༄༅། ། ཕྱི་ལོ་ ༢༠༢༠ ཟླ་ ༡༡ ཚེས་ ༣༠ ནས་ཕྱི་ཟླ་ ༡༢ ཚེས་ ༡༨ བར་སུད་སིའི་དགུན་ཁའི་གྲོས་ཚོགས་ལས་རིམ་འཚོགས་བཞིན་པ་དང་སྟབས་བསྟུན་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་ཕེ་བྷི་ཡེན་མོ་ལི་ནཱ་ (Fabian Molina) མཆོག་གིས་གཙོ་སྐྱོང་འོག་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཟུར་དུ་ལྷན་ཚོགས་ཤིག་ཚོགས་འདུག

དེ་ཡང་ལྷན་ཚོགས་དེ་ཉིད་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་གྲོས་ཚོགས་འཐུས་མི་ཕེ་བྷི་ཡེན་མོ་ལི་ནཱ་ (Fabian Molina) མཆོག་གིས་གཙོ་སྐྱོང་འོག་གྲོས་ཚོགས་འཐུས་མི་མར་ཊི་ན་མུན་ཛི་ (Martina Munz) མཆོག་དང་། སྐུ་ཞབས་ནི་ཀོ་ལ་སི་ (Nicolas Walder) མཆོག  སྐུ་ཞབས་པྲི་སི་ཀ་བྷི་ཡ་རེ་ཧེ་མོ་ (Prisca Birrer-Heimo) མཆོག  མར་ཌི་ན་ (Martina Geissbühler) མཆོག  སྐུ་ཚབ་དོན་གཅོད་འཆི་མེད་རིག་འཛིན་ལགས་དང་ཡུ་རོབ་སྤྱི་འཐུས་ཟམ་མདོ་བྱམས་པ་ཚེ་རིང་ལགས། དོན་ཁང་གི་ལས་བྱེད་འཕྲིན་ལས་ཆོས་སྐྱིད་ལགས།  སུད་བོད་མཛའ་འབྲེལ་ཚོགས་པའི་ཚོགས་གཙོ་ཐོ་མ་སི་ (Thomas Buchli) ལགས་བཅས་ཕེབས་ཡོད།

ཚོགས་འདུའི་སྟེང་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས། སུད་སིས་རྒྱ་ནག་ཐོག་འཛིན་བཞིན་པའི་ཕྱིའི་འཐབ་བྱུས་དང་། སུད་སིའི་ནང་གི་བཙན་བྱོལ་བོད་མི་ཚོར་སྐྱབས་བཅོལ་གྱི་ཡིག་ཆ་མེད་པའི་དཀའ་ངལ་གནས་སྟངས། བོད་ནང་གི་ཆོས་དད་རང་དབང་སོགས་ཀྱི་གནད་དོན་སྐོར་གྲོས་བསྡུར་གནང་ཡོད།

སུད་སིའི་གྲོས་ཚོགས་འཐུས་མི་རྣམ་པས་མུ་མཐུད་བོད་མི་རྣམས་ལ་རྒྱབ་སྐྱོར་གནང་རྒྱུ་ཡིན་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་གླེང་སློང་གནང་རྒྱུ་ཡིན་པའི་ཆོད་སེམས་བརྟན་པོ་ཡོད། ཅེས་གསུངས། 

ཕྱི་ལོ་ ༢༠༢༡ ལོའི་སུད་སིའི་དབྱར་ཁའི་གྲོས་ཚོགས་འཚོགས་སྐབས་སུའང་སུད་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་འཚོགས་རྒྱུ་ཡིན་པའི་གཏན་འཁེལ་གནང་ཡོད་པ་བཅས།།