ཕྱི་ལོ་ ༢༠༢༠ ཟླ་ ༡༢ ཚེས་ ༢༨ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ འདི་བཞིན་༸རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། ལས་རིམ་འདིའི་ཆ་ཤས་སུ་ཨོ་སི་ཀྲི་ལི་ཡ་སྐུ་ཚབ་དོན་གཅོད་ལས་ཁུངས་ཀྱིས་དགའ་ལྡན་ཕོ་བྲང་གི་དྲུང་ཆེ་ཟུར་པ་བློ་བཟང་སྦྱིན་པ་ལགས་དང་ལྷན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དྲིན་རྗེ་དྲན་ཞུ་བ་ཞེས་པའི་བརྗོད་གཞིའི་ཐོག་བགྲོ་གླེང་གོ་སྒྲིག་གནང་གཏན་འཁེལ་ཡོད།
དེ་ཡང་བློ་བཟང་སྦྱིན་པ་ལགས་ཀྱིས་ཕྱི་ལོ་ ༡༩༩༣ ནས་ཕྱི་ལོ་ ༢༠༠༥ བར་དགའ་ལྡན་ཕོ་བྲང་གི་དྲུང་ཆེ་གནང་མྱོང་ཡོད། དེ་རྗེས་རྒས་ཡོལ་འཁྱུག་ཙམ་རིང་ཞུས་རྗེས་སླར་ཡང་ལོ་ཤས་རིང་དྲུང་ཆེའི་ཕྱག་ལས་གནང་མྱོང་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་དང་། ཀོ་ལི་ཀ་ཊ་དགེ་རྩ་ཚོགས་པའི་ཚོགས་མི། ཕྱི་ལོ་ ༡༩༨༠ ལོར་བདེ་སྲུང་ལས་ཁུངས་ཀྱི་དྲུང་ཆེ་སོགས་ཁྱོན་ལོ་ངོ་ ༣༤ རིང་ཞབས་འདེགས་ཞུས་ཡོད།
གཞན་ཡང་བློ་བཟང་སྦྱིན་པ་ལགས་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་ཚོགས་ཆུང་ཐེངས་གཉིས་པ་རྒྱ་ནག་དང་བོད་ཀྱི་ས་ཁུལ་ཁ་ཤས་སུ་ཆེད་ཕེབས་སྐབས་ཚོགས་མིའི་ཁོངས་ཡོད། བློ་བཟང་སྦྱིན་པ་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་རྗེས་སྐོར་གསུང་བཤད་གནང་རྒྱུ་དང་། ཨོ་སི་ཀྲི་ལི་ཡའི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་གཙོ་སྐྱོང་གནང་གཏན་འཁེལ་ཡོད།
བགྲོ་གླེང་དེ་བཞིན་ཕྱི་ལོ་ ༢༠༢༠ ཟླ་ ༡༢ ཚེས་ ༢༩ ཉིན་ཨ་རིའི་ནང་གི་སྔ་དྲོ་ཆུ་ཚོད་ ༨ དང་རྒྱ་གར་ནང་གི་དགོང་དྲོ་ཆུ་ཚོད་ ༦།༣༠ ཐོག་འཚོགས་གཏན་འཁེལ་ཡོད་པ་དང་། ཕྱི་དྲིལ་བོད་ཀྱི་བརྙན་འཕྲིན་ཚན་པས་ཐད་གཏོང་གནང་རྒྱུ་ཡིན་པ་བཅས།།
