ཕྱི་ལོ་ ༢༠༢༠ ཟླ་ ༡༢ ཚེས་ ༥ རེས་གཟའ་སྤེན་པ།
༄༅། །འདི་གར་སྦེལ་ཀོབ་བདེ་སླར་ས་གནས་འགོ་འཛིན་ལས་ཁུངས་ནས་བཏང་གནང་ནང་འཁོད་དོན། སྦེལ་ཀོབ་བདེ་སྐྱིད་སླར་གསོ་གཞིས་ཆགས་སུ་གྲོང་སྡེ་དང་པོ་ནས་གྲོང་སྡེ་བཅུ་གསུམ་བར་གྱི་གཞུང་ལམ་ཡོངས་རྫོགས་དང་། གཞུང་ལམ་ནས་གྲོང་སྡེ་སོ་སོའི་སྤྱི་ཁང་བར་གྱི་འགྲོ་ལམ་དང་། ཁྱབ་ཁོངས་བཀྲིས་ལྷུན་པོ་དགོན་པའི་གླིང་སྐོར་ཡོངས་རྫོགས་ཀྱི་འགྲོ་ལམ་དང་འབྲི་གུང་བཀའ་བརྒྱུད་དགོན་པའི་འགྲོ་ལམ་བཅས་གཞིས་ཆགས་ཀྱི་གཞུང་ལམ་གསར་རྒྱག་དང་བཟོ་བཅོས་ཀྱི་གཞི་རྒྱ་ཆེ་བའི་ལས་དོན་ཕྱི་ལོ་ ༢༠༢༠ ཟླ་ ༡༡ ཚེས་ ༣༠ ཉིན་འཐུས་གཙང་མཇུག་སྒྲིལ་བྱུང་ཡོད།
དེ་ཡང་ལས་གཞི་དེ་བཞིན་ལས་ཐོག་ས་གནས་འགོ་འཛིན་གྱིས་སྣེ་ཁྲིད་དེ་བདེ་སླར་འཁོར་ལམ་ཚོགས་ཆུང་ནས་འགན་འཁུར་བརྐང་བཞེས་ཐོག་སྦེང་ལོར་ལྷོ་སྤྱི་ཆོས་འཕེལ་ཐུབ་བསྟན་ལགས་ཀྱིས་རམ་འདེགས་ལམ་སྟོན་འོག་ཕྱི་ལོ་ ༢༠༡༩ ལོའི་ནང་ལན་མང་ཀར་ན་ཀྲ་ཀ་མངའ་སྡེའི་གཞུང་དང་འབྲེལ་ཡོད་རྫོང་གི་གྲོང་གསེབ་ཡར་རྒྱས་ལས་ཁུངས་བཅས་སུ་རིམ་བཅར་ཞུས་རྗེས་ཕྱི་ལོ་ ༢༠༢༠ ནང་བདེ་སླར་གཞིས་ཆགས་ཀྱི་གཞུང་ལམ་ཆེད་ཀར་ན་ཀྲ་ཀ་མངའ་གཞུང་ནས་ཧིན་སྒོར་འབུམ་ཉིས་བརྒྱ་ཉི་ཤུ་ཐམ་པ་རོགས་རམ་བསྩལ་སྨིན་བྱུང་འབྲས་གསར་རྒྱག་གནང་ཐུབ་པ་བྱུང་ཡོད།
ཕྱི་ལོ་ ༢༠༢༠ ཟླ་ ༡༢ ཚེས་ ༠༤ ཉིན་གྲོང་སྡེ་དང་པོ་དགའ་ལྡན་གླིང་དུ་གཞིས་ཆགས་ཀྱི་སྣེ་ཡོད་མི་སྣ་ཚང་འཛོམས་ཐོག་གཞུང་ལམ་གསར་རྒྱག་དང་བཟོ་བཅོས་ཀྱི་ལས་དོན་ཚགས་ཚུད་ངང་མཇུག་སྒྲིལ་བྱུང་བའི་མཇུག་བསྡོམས་མཛད་སྒོ་ཞིག་བསྐྱངས་ཡོད། བདེ་སྐྱིད་སླར་གསོ་གཞིས་ཆགས་འདི་བཞིན་ཕྱི་ལོ་ ༡༩༦༩ ལོར་གསར་འཛུགས་བྱུང་ཞིང་། ཕྱི་ལོ་ ༢༠༠༢ ལོར་འབྲི་གུང་ཉམས་སྐྱོང་ཚོགས་པ་དང་སྐྱབས་རྗེ་ཨ་དབྱངས་རིན་པོ་ཆེ་དགེ་རྩ་ཐུན་མོང་ནས་འགྲོ་གྲོན་རྒྱ་ཆ་ ༩༠ དང་ཀར་ན་ཀྲ་ཀ་མངའ་གཞུང་ནས་འགྲོ་གྲོན་རྒྱ་ཆ་ ༡༠ ཐོག་གཞིས་ཁོངས་གྲོང་སྡེ་ཁག་ ༡༦ གི་གཞུང་ལམ་ཡོངས་དང་བཀྲིས་ལྷུན་པོ་དགོན་པ་བཅས་སུ་འགྲོ་ལམ་གསར་རྒྱག་གནང་ཡོད་ཅིང་།
ཕྱི་ལོ་ ༢༠༡༠ ལོར་བདེ་སླར་རྒྱལ་སྒོ་ནས་༸རྒྱལ་བའི་ཕོ་བྲང་བར་གཞུང་ལམ་བཟོ་བཅོས་དང་། ཕྱི་ལོ་ ༢༠༡༤ ལོར་སྦེལ་ཀོབ་ནས་བཀྲིས་ལྷུན་པོ་དགོན་པའི་བར་གཞུང་ལམ་བཟོ་བཅོས། ཕྱི་ལོ་ ༢༠༡༥ ལོར་ལུགས་བསམ་གྲོང་སྡེ་གསུམ་པ་ནས་བཀྲིས་ལྷུན་པོ་དགོན་པའི་བར་གྱི་གཞུང་ལམ་གསར་རྒྱག་བཅས་དེ་སྔ་མངའ་སྡེའི་གཞུང་གི་རོགས་རམ་གནང་པ་དེ་ལྟར་ཡང་། ད་ལྟའི་བདེ་སླར་གྲོང་སྡེ་ཁག་བཅུ་གསུམ་དང་དགོན་ཁག་གཉིས་ཀྱི་གཞུང་ལམ་གསར་རྒྱག་དང་བཟོ་བཅོས་ལས་འཆར་དེར་ཀར་ན་ཀྲ་ཀ་མངའ་གཞུང་ནས་རོགས་རམ་ཆ་ཚང་བསྩལ་ཐོབ་བྱུང་པ་ཐོག་མ་ཆགས་ཡོད་པ་བཅས། །
