ཕྱི་ལོ་ ༢༠༢༠ ཟླ་ ༡༢ ཚེས་ ༡༣ རེས་གཟའ་ཉི་མ།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་གྱ་ལྔར་ཕེབས་པ་དང་བསྟུན། བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། ལས་རིམ་འདིའི་ཆ་ཤས་སུ་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༠ ཟླ་ ༡༢ ཚེས་ ༤ ནས་ ༡༡ བར་བདུན་ཕྲག་གཅིག་རིང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་སྟེ། འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་སྒྲིལ་གོང་སྤེལ།  བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་བཅས་ཀྱི་སྐོར་འཛམ་གླིང་རྒྱལ་ཁབ་འདྲ་མིན་བཅུ་དགུའི་མཁས་དབང་དང་ཤེས་ཡོན་ཅན། གནད་ཡོད་མི་སྣ་སོགས་ཁྱོན་མི་གྲངས་ ༡༢༠ ནས་བརྙན་འཕྲིན་བརྒྱུད་བོད་སྐད་དང་ཨིན་སྐད། ཧིན་དི། ཕེ་རེན་ཆི། སི་པེན། ཨི་ཊ་ལི། འཇར་མན། རྒྱ་སྐད། སོག་པོ། ཨུ་རུ་སུ།  བལ་པོ། ཀོ་རི་ཡ། པུར་ཏུ་གྷལ། ཝི་ཏི་ནམ། ཉི་ཧོང་བཅས་སྐད་རིགས་བཅོ་ལྔའི་ཐོག་གསུང་བཤད་ཀྱི་ལས་རིམ་ཞིག་གོ་སྒྲིག་ཞུས་པ་དེ་ཉིད་ལེགས་པར་གྲུབ་ཡོད།

ཕྱི་ཚེས་ ༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྐྱིད་སྐྱོང་བློ་བཟང་སེངྒེ་མཆོག་གིས་དབུ་འབྱེད་གསུང་བཤད་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གསུང་བཤད་གནང་རྗེས་ཆོས་བརྒྱུད་དབུ་ཁྲིད་བླ་ཆེན་རྣམ་པས་དབུས་མཁས་དབང་དང་ཤེས་ཡོན་ཅན་སོགས་ནས་༸རྒྱལ་བའི་ཐུགས་བསྐྱེད་དམ་བཅའ་བཞིའི་སྐོར་གསུང་བཤད་ཟབ་རྒྱས་གནང་ཡོད། 

དེ་ཡང་བསྟན་བདག་བླ་ཆེན་རྣམ་པས་ཞལ་གཅིག་གྲག་ཐོག་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་ང་ཚོས་རྟག་ཏུ་བཀའ་དྲིན་རྗེས་དྲན་ཞུ་དགོས་པ་དང་། བཀའ་དྲིན་རྗེས་དྲན་ཞུ་སྟངས་དེ་ཡང་ང་ཚོ་ཚང་མས་དུས་དང་རྣམ་པ་ཀུན་ཏུ་༸གོང་ས་མཆོག་གི་བཀའ་སློབ་ལམ་སྟོན་གྱི་ནང་དོན་ལ་སློབ་སྦྱོང་བྱ་རྒྱུ་དང་། སློབ་སྦྱོང་བྱས་ནས་བཀའ་སློབ་ལམ་སྟོན་རྣམས་ཀྱི་ནང་དོན་ལག་བསྟར་འདེབས་རྒྱུ་ནི་༸གོང་ས་མཆོག་ལ་བཀའ་དྲིན་རྗེས་དྲན་ཞུ་སྟངས་ཡག་ཤོས་ཡིན་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རླབས་ཆེན་གྱི་ཐུགས་བསྐྱེད་དམ་བཅའ་བཞིའི་ཐོག་བཀའ་སློབ་རབ་དང་རིམ་པ་སྩལ་བ་རྣམས་ང་ཚོ་ཚང་མས་འགན་བཞེས་པའི་ཐོག་ནས་ལག་བསྟར་གནང་ཐུབ་པ་ཡིན་ན། ༸རྒྱལ་བའི་བཀའ་བསྒྲུབས་པ་དང་། བཀའ་དྲིན་རྗེས་དྲན་ཡང་དག་པ་ཞིག་ཆགས་ཀྱི་ཡོད་པའི་བཀའ་སློབ་ཟབ་ཅིང་རྒྱས་པ་གནང་ཡོད།

ཕྱི་ཚེས་ ༡༡ ཉིན་སྐུ་བཅར་རྣམ་རྒྱལ་ཕན་བདེ་ལེགས་བཤད་གླིང་གྲྭ་ཚང་གི་མཁན་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་མཐའ་སྡོམ་བཀའ་སློབ་དང་། ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་དང་། དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས་རྣམ་གཉིས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ལས་རིམ་ལེགས་པར་མཇུག་སྒྲིལ་ཡོད། །