ཕྱི་ལོ་ ༢༠༢༠ ཟླ་ ༡༢ ཚེས་ ༣ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ལོ་འདི་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད།

དེ་ཡང་བོད་མགོ་ནག་རྩམ་ཟན་པ་ཡོངས་ལ་བཀའ་དྲིན་མཚུངས་ཟླ་མ་མཆིས་པ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་གྱ་ལྔར་ཕེབས་པ་དང་བསྟུན། བོད་མིའི་སྒྲིག་འཛུགས་ནས་ཕྱི་ལོ་ ༢༠༢༠ ་་་་༢༠༢༡ ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད། 

བཀའ་དྲིན་རྗེས་དྲན་གྱི་ལོ་འདི་ནི་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་སྐུ་འཁྲུངས་པ་ནས་བཟུང་ད་བར་སྐྱེ་འགྲོ་སྤྱི་དང་། ལྷག་པར་བོད་མི་རྣམས་ལ་དུས་རྟག་ཏུ་བྱམས་བརྩེས་བསྐྱངས་དང་སྐྱོང་བཞིན་པར་བཀའ་དྲིན་རྗེས་དྲན་ཞུ་རྒྱུ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི།  འཛམ་གླིང་ཞི་བདེའི་དེད་དཔོན་དང་། འཛམ་གླིང་ཞི་བདེ་དང་བྱམས་བརྩེའི་མགྲིན་ཚབ་པ་ཡིན་པ་མ་ཟད། ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག  ལྷར་བཅས་སྲིད་ཞིའི་གཙུག་རྒྱན་འཕགས་མཆོག་ཕྱག་ན་པདྨོ་མི་ཡི་རྣམ་པར་རོལ་བ་འགྲོ་བ་ཀུན་ལ་མ་ལྟར་བརྩེ་བས་མ་འདྲིས་པའི་མཛའ་བཤེས་ཆེན་མོ་བྱམས་བརྩེའི་བདག་ཉིད་དང་། བོད་ཁ་བ་ཅན་གྱི་ལྷ་སྐལ་ཚེ་རབས་ཐམས་ཅད་ཀྱི་མགོན་སྐྱབས། བླ་ན་མེད་པའི་དབུ་ཁྲིད་བླང་དོར་སྟོན་པ་པོ་ཡིན། 

ཕྱི་ལོ་ ༡༩༥༠ ནས་ཕྱི་ལོ་ ༢༠༡༡ བར་ལོ་ངོ་ ༦༠ རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་ཀྱི་མཛད་འགན་བཞེས་ནས་བྱམས་བརྩེ་དང་འཚེ་བ་མེད་པའི་སྒོ་ནས་རྒྱལ་སྤྱིའི་སྟེང་རྒྱ་ནག་གཞུང་གིས་བོད་ལ་ཁྲིམས་འགལ་གྱིས་དབང་སྒྱུར་བྱས་པའི་སྐོར་རྒྱལ་སྤྱིའི་ཁྱོན་དུ་གོ་རྟོགས་རྒྱ་ཆེར་སྤེལ་གནང་མཛད་ཡོད། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ལོར་ཆབ་སྲིད་དང་འཛིན་སྐྱོང་གི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་ཡོད་ཀྱང་མགོན་པོ་གང་ཉིད་ཀྱིས་མུ་མཐུད་བོད་གངས་ཅན་པ་ཡོངས་ལ་ཐུགས་བརྩེ་བ་ཆེན་པོའི་སྒོ་ནས་བླང་དོར་གྱི་བཀའ་སློབ་ལམ་སྟོན་བསྩལ་དང་སྩལ་མུས་ཡིན།  དེ་ལྟར་ཐེངས་འདིར་བོད་མི་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་ ༡༤ ཆེན་པོ་མཆོག་གི་བླ་ན་མེད་པའི་མཛད་བཟང་དེ་དག་ཡིད་ལ་དྲན་པའི་སྒོ་ནས་བཀའ་དྲིན་རྗེས་དྲན་སྲུང་བརྩི་ཞུ་བཞིན་ཡོད།  འདི་ལོར་ཏོག་དབྱིབས་གཉན་རིམས་ཁྱབ་གདལ་འགྲོ་བཞིན་པའི་ཛ་དྲག་གི་གནས་སྟངས་ཡོད་མིན་ལ་མ་ལྟོས་པར།  ཕྱི་ལོ་ ༢༠༢༠ ལོ་འདི་བཞིན་༸རྒྱལ་བའི་བཀའ་དྲིན་རྗེས་དྲན་སླད་རྒྱལ་སྤྱིའི་སྟེང་ལས་འགུལ་འདྲ་མིན་སྤེལ་ཏེ་སྲུང་བརྩི་ཞུས་དང་ཞུ་བཞིན་མཆིས།

ལས་འགུལ་དེའི་ཆ་ཤས་སུ།  བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༠ ཟླ་ ༡༢ ཚེས་ ༤ ནས་ ༡༡ བར་བདུན་ཕྲག་གཅིག་རིང་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་སྟེ། འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་སྒྲིལ་གོང་སྤེལ།  བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ། རྒྱ་གར་གནའ་རབས་ཀྱི་རིག་གཞུང་བསྐྱར་གསོ་བཅས་ཀྱི་སྐོར་བགྲོ་གླེང་གོ་སྒྲིག་གནང་གཏན་འཁེལ་ཡོད།

གསུང་བཤད་གནང་མཁན་རྣམས་རྒྱལ་ཁབ་འདྲ་མིན་ནང་ཡོད་སྟབས་དུས་ཚོད་ཀྱི་ཁྱད་པར་ཡང་ཡོད་པ་དང་། དེ་བཞིན་ཏོག་དབྱིབས་གཉན་རིམས་ཀྱི་རྐྱེན་པས་གཞུང་དང་མངའ་སྡེ་ཁག་གིས་སྒོ་རྒྱ་བསྡམས་དགོས་བྱུང་བར་བརྟེན། གསུང་བཤད་གནང་མཁན་རྣམ་པའི་གསུང་བཤད་རྣམས་རང་གནས་སུ་བརྙན་འཕྲིན་བརྒྱུད་གནང་རྒྱུ་ཐག་གཅོད་བྱས་ཡོད། 

དེ་ཡང་བགྲོ་གླེང་ཐོག་རྒྱལ་ཁབ་འདྲ་མིན་བཅུ་དགུའི་མཁས་དབང་དང་ཤེས་ཡོན་ཅན་མི་གྲངས་ ༡༢༠ ནས་བརྙན་འཕྲིན་བརྒྱུད་སྐད་རིགས་བཅོ་ལྔའི་ཐོག་གསུང་བཤད་གནང་རྒྱུ་ཡིན་ཞིང་། 

བོད་མིའི་སྒྲིག་འཛུགས་ཀྱི་དཔལ་ལྡན་སྐྱིད་སྐྱོང་བློ་བཟང་སེངྒེ་མཆོག་གིས་དབུ་འབྱེད་གསུང་བཤད་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་གསུང་བཤད་གནང་རྗེས་ཕྱི་ནང་གི་མཁས་དབང་དང་ཤེས་ཡོན་ཅན་སོགས་ནས་གསུང་བཤད་གནང་རྒྱུ་དང་། དེ་བཞིན་དཔལ་ས་སྐྱ་༸གོང་མ་ཁྲི་འཛིན་རིན་པོ་ཆེ་དང་། ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ། དཔལ་རྒྱལ་བ་ཀརྨ་པ་རིན་པོ་ཆེ།  ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ། ཞེ་ཆེན་རབ་འབྱམས་རིན་པོ་ཆེ།  འབྲི་གུང་སྐྱབས་མགོན་ཆེ་ཚང་རིན་པོ་ཆེ། དཔལ་རྒྱལ་བ་ཇོ་ནང་པའི་རྒྱལ་ཚབ་རིན་པོ་ཆེ་བཅས་ཆོས་བརྒྱུད་དབུ་ཁྲིད་བླ་ཆེན་རྣམ་པས་བཀའ་སློབ་གནང་རྒྱུ་དང་། གཞན་ཡང་དགེ་བཤེས་ཐུབ་བསྟན་སྦྱིན་པ་ལགས་དང་། དགེ་བཤེས་ལྷག་རྡོར་ལགས། དགེ་བཤེས་ངག་དབང་བསམ་གཏན་ལགས། དགེ་བཤེས་རྡོ་རྗེ་དགྲ་འདུལ་ལགས། འབུམ་རམས་པ་བསྟན་འཛིན་རྡོ་རྗེ་ལགས་སོགས་ནས་གསུང་བཤད་གནང་གཏན་འཁེལ་ཡོད།

གསུང་བཤད་ལས་རིམ་ཡོངས་རྫོགས་ཕྱི་དྲིལ་བོད་ཀྱི་བརྙན་འཕྲིན་ཚན་པའི་ངོ་དེབ་ (https://www.facebook.com/CTATIBETTV/) དང་ཡུ་ཌུབ་ (https://www.youtube.com/c/ctaonlinetv) བརྒྱུད་རྒྱང་སྲིང་ཞུ་རྒྱུ་ཡིན། 

ལས་རིམ་གཟིགས་ཆེད་འདིར་གནོན།