ཕྱི་ལོ་ ༢༠༢༠ ཟླ་ ༡༢ ཚེས་ ༧ རེས་གཟའ་ཟླ་བ།
༄༅། །༸སྐྱབས་རྗེ་ཞི་ཆེན་རབ་འབྱམས་རིན་པོ་ཆེ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་གནང་བའི་སྙིང་དོན། དུས་རབས་ཉི་ཤུ་པའི་ནང་འཁྲུག་རྩོད་སོགས་རྐྱེན་ངན་མང་དག་ཅིག་བྱུང་བ་རྣམས་འགྲོ་བ་མི་ཡིས་བཟོས་པར་བརྟེན་དེ་དག་ཟློག་ཐབས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་དང་པོ་དེ་ནི་མི་རྣམས་ཀྱི་བརྒྱུད་ལ་ཡ་རབས་བཟང་སྤྱོད་སྤེལ་རྒྱུ་དང་། དེའི་ཐོག་ལ་ཐུགས་འཁུར་ཆེན་པོ་བཞེས་ཀྱི་ཡོད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཚོགས་འདྲ་མིན་ནང་ཡ་རབས་སྤྱོད་བཟང་དང་། བྱམས་སྙིང་རྗེ་བྱེད་དགོས་རྒྱུ་སོགས་བཀའ་སློབ་རབ་དང་རིམ་པ་སྩལ་ཡོད།
གཉིེས་པ་དེར་དེང་སང་འཛམ་གླེང་ནང་ཆོས་ལུགས་ཀྱི་རྐྱེན་པས་སྤྱི་ཚོགས་ནང་ཕན་ཚུན་མི་མཐུན་པ་དང་། མི་གསོད་ཁྲག་སྦྱོར་སོགས་བྱུང་དང་འབྱུང་བཞིན་ཡོད་པར་བརྟེན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་འཁུར་ཆེ་བཞེས་ཀྱིས་ཆོས་ལུགས་མཐུན་སྒྲིལ་ལ་འབད་བརྩོན་གནང་གི་ཡོད་པ་དང་། དེ་ལ་བརྟེན་ནས་ད་ཆ་འཛམ་གླིང་ནང་ཆོས་ལུགས་ཕན་ཚུན་དབར་མཐུན་སྒྲིལ་ཡག་ཏུ་འགྲོ་བཞིན་པ་ནི་ང་ཚོས་དངོས་སུ་མཐོང་རྒྱུ་ཡོད།
དོན་ཚན་གསུམ་པ་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་སྐད་ཡིག་དང་། རིག་གཞུང་། ཁོར་ཡུག་སོགས་སྲུང་སྐྱོབ་ཐོག་ཐུགས་འཁུར་ཆེན་པོ་བཞེས་ཀྱི་ཡོད་པ་མ་ཟད། མགོན་པོ་གང་ཉིད་མཆོག་གིས་བཙན་བྱོལ་ནང་སློབ་གྲྭ་དང་། དཔེ་མཛོད། བོད་ལུགས་གསོ་རིག་སྨན་ཁང་སོགས་གསར་འཛུགས་མཛད་དེ་བོད་ཀྱི་སྐད་ཡིག་དང་རིག་གཞུང་སོགས་ཉམས་པ་སླར་གསོ་དང་མི་ཉམས་རྒྱུན་འཛིན་གནང་ཡོད།
དེ་སྔ་ཕྱི་ལོ་ ༡༩༧༥ ལོར་རང་ཉིད་ཕྱི་རྒྱལ་ཡུལ་གྲུ་ཁག་ནང་བསྐྱོད་པའི་སྐབས་མི་རྣམས་ཀྱིས་བོད་དང་བོད་བརྒྱུད་ནང་བསྟན་སྐོར་ཤེས་མཁན་ཧ་ཅང་ཉུང་ཉུང་ཡིན། ཕྱིས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་སྙན་འཛམ་གླིང་ཡོངས་ལ་ཁྱབ་པར་བརྟེན་བོད་དང་བོད་མིའི་སྐོར་ཤེས་མཁན་མང་དུ་ཕྱིན་ཡོད་པ་དང་། ལྷག་པར་བོད་བརྒྱུད་ནང་བསྟན་ལ་མཐོང་ཆེན་པོ་སླེབས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་དཔལ་ནཱ་ལེནྡྲའི་རྗེས་འབྲང་པ་ཞིག་ཡིན་པར་བརྟེན་མགོན་པ་གང་ཉིད་མཆོག་གི་ཐུགས་བསྐྱེད་དམ་བཅའ་མཐའ་མ་དེ་ནཱ་ལེནྡྲའི་ལྟ་གྲུབ་བོད་ལ་དར་བ་ནས་ད་ལྟ་བར་མི་ཉམས་པར་བོད་པས་རྒྱུན་འཛིན་བྱས་ཡོད་པ་དང་། མི་ཉམས་རྒྱུ་འཛིན་བྱེད་རྒྱུ་ནི་བོད་པའི་སྤྱི་ཚོགས་གཅིག་པུའི་ཆེད་དུ་མ་ཡིན་པར་འཛམ་གླིང་གི་སྤྱི་ནོར་ལྟ་བུ་ཆགས་ཡོད་པ་སོགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་ཀྱི་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་བཀའ་སློབ་སྩལ་བ་དེ་དག་བོད་མི་ཙམ་གྱི་ཆེད་དུ་མ་ཡིན་པར་འཛམ་གླིང་སྤྱི་ལ་ཕན་ཐོགས་ཡོང་ཐུབ་པའི་ཆེད་དུ་ཡིན། ཞེས་སོགས་ཀྱི་བཀའ་སློབ་སྩལ། །
