ཕྱི་ལོ་ ༢༠༢༠ ཟླ་ ༡༢ ཚེས་ ༩ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨེ་མོ་རི་གཙུག་ལག་སློབ་གཉེར་ཁང་ (Emory University) གི་ནང་ཚན་རྟོག་དཔྱོད་རིག་པ་དང་བྱམས་བརྩེ་ལ་བརྟེན་པའི་བཟང་སྤྱོད་ཀྱི་བསྟི་གནས་ཞེས་པའི་ཚོགས་པས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༢༠ ཟླ་ ༡༢ ཚེས་ ༩ ཉིན་གྱི་སྔ་དྲོར་མགོན་པོ་གང་ཉིད་མཆོག་རོབ་དང་མེ་ལ་ནི་ཝལ་ཊོན་དགེ་རྩ་ཚོགས་པའི་ (Rob and Melani Walton Foundation) ལྕམ་མེ་ལ་ནི་ཝ་ཌོན་ (Melani Walton) ལགས་དང་། ཨ་རིའི་གསར་ཁང་གྲགས་ཅན་སི་ཨེན་ཨེན་གྱི་སྨན་རྫས་སྐོར་གྱི་གསར་འགོད་པ་གཙོ་གྲས་སཱན་ཇེ་གྷུབ་ཏཱ་ (Sanjay Gupta) ལགས་རྣམ་གཉིས་དང་ལྷན་དུ་འགྲོ་བ་མིའི་འཚོ་རྟེན་དུ་བྱམས་བརྩེའི་དགོས་མཁོ་ (The Necessity of Compassion for the Survival of Humanity) ཞེས་པའི་བགྲོ་གླེང་ཐོག་མཉམ་ཞུགས་མཛད་ཡོད།
དེ་ཡང་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཨེ་མོ་རི་གཙུག་ལག་སློབ་གཉེར་ཁང་དང་ང་ཚོ་འབྲེལ་བ་བྱུང་ནས་དུས་ཡུན་རིང་པོ་འགྲོ་བཞིན་ཡོད། ཨེ་མོ་རི་གཙུག་ལག་སློབ་གཉེར་ཁང་གིས་ཡུན་རིང་གོང་ནས་བོད་པའི་མཁས་པ་ཚོ་དང་ལྷན་ལས་འཆར་སྣ་མང་སྤེལ་ཡོད། དེ་ནི་ཧ་ཅང་ཡག་པོ་རེད། དེང་སྐབས་མི་མང་པོ་ཞིག་གིས་ནང་སེམས་ཀྱི་ཞི་བདེའི་སྐོར་དོ་སྣང་མང་ཙམ་གནང་བཞིན་ཡོད། སྔོན་མ་ཡིན་ན་མི་མང་པོས་ནང་སེམས་ཀྱི་ཞི་བདེའི་གལ་གནད་སྐོར་དེ་ཙམ་གསུང་གི་མེད། དེང་སྐབས་འཛམ་གླིང་ནང་ཕྱི་དངོས་པོ་དང་བཟོ་རིག་པ་ཡར་རྒྱས་ཕྱིན་ཡོད་ནའང་དཀའ་ངལ་མང་དག་ཅིག་འཕྲད་བཞིན་ཡོད། འགྲོ་བ་མི་ལ་འཕྲད་བཞིན་པའི་དཀའ་ངལ་དེ་དག་ནང་སེམས་ཀྱི་ཞི་བདེ་ལ་ཧ་ཅང་འབྲེལ་བ་ཡོད། ད་ལྟ་ང་ཚོས་ནང་སེམས་ཀྱི་ཞི་བདེ་ཇི་ལྟར་ཡར་རྒྱས་གཏོང་དགོས་པའི་ཐོག་དོ་སྣང་མང་ཙམ་བྱེད་དགོས་པའི་དུས་ལ་སླེབས་ཡོད། ནང་སེམས་ལ་ཞི་བདེ་ཡོད་ན་མི་རེ་ངོ་རེའི་ཀུན་སྤྱོད་ཞི་བདེ་དང་ལྡན་པ་ཞིག་ཡོང་གི་རེད།
དེང་སྐབས་འཛམ་གླིང་ནང་དཀའ་ངལ་མང་དག་ཅིག་འཕྲད་བཞིན་ཡོད། དཀའ་ངལ་དེ་དག་ཕལ་ཆེ་བ་ང་ཚོ་རང་གིས་བཟོས་པ་ཤ་སྟག་ཡིན་པ་གསལ་པོ་རེད། འགྲོ་བ་མི་ཚང་མས་སྡུག་བསྔལ་འདོད་ཀྱི་མེད། སྤྱིར་བཏང་མི་རྣམས་ཀྱིས་དཀོན་མཆོག་ལ་སྨོན་ལམ་རྒྱག་གི་ཡོད། ང་ཚོར་འཕྲད་བཞིན་པའི་དཀའ་ངལ་དེ་དག་གི་འབྱུང་ཁུངས་སྐོར་བསམ་བློ་མང་ཙམ་གཏོང་དགོས། རྒྱ་གར་གྱི་རིག་གཞུང་ནང་བློའི་རྣམ་གཞག་དང་ཉོན་མོངས་འདུལ་ཐབས་སྐོར་འགྲེལ་བཤད་རྒྱས་པོ་གསུངས་ཡོད། ཉོན་མོངས་འདུལ་ཐབས་སྐོར་ཆོས་ལུགས་ཀྱི་དཔེ་ཆ་ཁག་གི་ནང་གསུངས་ཡོད་ཀྱང་ང་ཚོས་དེ་དག་ཤེས་ཡོན་གྱི་སྡེ་ཚན་ཁོངས་སུ་བརྩིས་དགོས། ཨེ་མོ་རི་གཙུག་ལག་སློབ་གཉེར་ཁང་གིས་ནང་སེམས་ཀྱི་ཞི་བདེ་སྐོར་དོ་སྣང་མང་ཙམ་གནང་བཞིན་པ་ནི་ཧ་ཅང་ཡག་པོ་རེད། ཅེས་དང་།
གཞན་ཡང་མགོན་པོ་གང་ཉིད་མཆོག་གིས་ཏོག་དབྱིབས་གཉན་རིམས་སྐོར་བཀའ་སློབ་སྩལ་དོན། དེང་སྐབས་ཏོག་དབྱིབས་གཉན་རིམས་ལ་བརྟེན་ནས་མི་མང་པོ་ཞིག་འདས་གྲོངས་སུ་གྱུར་ཡོད། དེ་ནི་ཧ་ཅང་སྟབས་མ་ལེགས་པ་རེད། ལྷག་པར་ཨ་རི་དང་། རྒྱ་གར། ཡུ་རོབ། རྒྱ་ནག་སོགས་ཀྱི་ནང་ནད་ཡམས་དེ་འབྱུང་བཞིན་ཡོད་པས་ཧ་ཅང་ཚབས་ཆེན་གྱི་གནད་དོན་ཞིག་ཆགས་ཡོད། ཏོག་དབྱིབས་གཉན་རིམས་སྐོར་ངོས་ཀྱིས་དེ་ཙམ་ཤེས་ཀྱི་མེད། ང་ཚོར་དེ་ལྟ་བུའི་དཀའ་ངལ་འཕྲད་བཞིན་པའི་སྐབས་སེམས་ཁྲལ་དང་དངངས་སྐྲག་ཤུགས་ཆེན་པོ་བྱས་ནས་བསྡད་ན་དེས་དཀའ་ངལ་འབྱུང་ཁུངས་ལྟ་བུ་བཟོ་ངེས་ཡིན། སེམས་ཁྲལ་དང་དངངས་སྐྲག་ཉུང་ཙམ་བྱས་ན་དེས་བསམ་བློ་གཏོང་སྟངས་ལ་ཕན་ཐོགས་ངེས་ཡིན། སེམས་ཁྲལ་དང་དངངས་སྐྲག་བྱས་ནས་བསྡད་ན་ནད་ཡམས་འགོ་སླ་བ་ཡོད། གཙོ་བོ་ནང་སེམས་ཀྱི་ཞི་བདེ་དགོས་རྒྱུ་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ།།
