ཕྱི་ལོ་ ༢༠༢༠ ཟླ་ ༡༢ ཚེས་ ༡༡ རེས་གཟའ་པ་སངས།
༄༅། །འདི་གར་ཤེས་ལོངས་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༡༢ ཚེས་ ༡༠ ཉིན་ཤེས་ལོངས་ས་གནས་སྤྱི་ཁང་དུ་ལས་ཀྱི་སྣེ་མོ་འགའ་ཤས་ཚང་འཛོམས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་སྦེལ་ཞི་བདེ་གཟེངས་རྟགས་ཕུལ་ནས་མི་ལོ་ ༣༡ འཁོར་བའི་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཚོུད་ ༧།༣༠ ཐོག་ས་གནས་ལས་ཀྱི་སྣེ་མོ་བ་རྣམས་སྤྱི་ཁང་ནང་འདུ་འཛོམས་ཐོག་བོད་ལྗོངས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་དང་བསངས་གསོལ་བཏང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེར་ས་གནས་འགོ་འཛིན་པདྨ་དོན་གྲུབ་ལགས་དང༌། ཕྱོགས་བཞུགས་སྤྱི་འཐུས་དབྱངས་ཅན་སྒྲོལ་དཀར་ལགས། དགོན་པའི་མཁན་རིན་པོ་བཅས་ནས་དཀར་གཙང་མཇལ་དར་སྒྲོན་འབུལ་གྱིས་མཎྡལ་རྟེན་གསུམ་འདེགས་འབུལ་རྗེས་ལས་བྱེད་ཡོངས་ནས་རིམ་པས་དཀར་གཙང་མཇལ་དར་སྒྲོན།
ཤེས་ལོངས་སཾ་བྷོ་སློབ་གྲྭའི་དགེ་རྒན་དང་སློབ་ཕྲུག་ནས་འཕགས་བོད་གཉིས་ཀྱི་རྒྱལ་གླུ་དང་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་གྲུབ་མཚམས་ཤེས་ལོངས་ས་གནས་འགོ་འཛིན་དང་ཕྱོགས་བཞུགས་བོད་མི་མང་སྤྱི་འཐུས་རྣམ་གཉིས་ཀྱིས་བཀའ་སྤྱི་གཉིས་ཀྱི་གསུང་འཕྲིན་ཁག་སྒྲོགས་སྦྱང་གནང༌། དགོན་པའི་མཁན་རིན་པོ་ཆེ་མཆོག་གིས་དུས་ཆེན་དང་འབྲེལ་བའི་གསུང་བཤད་གནང༌། ཤེས་ལོངས་སཾ་བྷོ་ཌ་སློབ་གྲྭའི་སློབ་མ་ཁག་གཅིག་ལ་བྱིས་པའི་ཕ་སྐད་འགྲན་བསྡུར་ནང་ཨང་ཐོབ་སོན་པར་བྱ་དགའ་གནང་ཡོད༌།
མཛད་སྒོའི་མཇུག་བསྡོམས་ཀྱི་ལས་རིམ་སྐབས་ས་གནས་འཐུས་ཚོགས་ཀྱི་ཚོགས་གཙོ་ནས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །
