ཕྱི་ལོ་ ༢༠༢༠ ཟླ་ ༡༢ ཚེས་ ༡༡ རེས་གཟའ་པ་སངས།

༄༅།  །ཕྱི་ལོ་ ༢༠༢༠ ཟླ་ ༡༢ ཚེས་ ༡༠ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ངོ་ ༣༡ འཁོར་བའི་དུས་ཆེན་གྱི་མཛད་སྒོ་ལྡི་ལི་བསམ་ཡས་གླིང་དགོན་པའི་མདུན་ཐང་དུ་སྲུང་བརྩི་གཟབ་རྒྱས་ཞུས་ཡོད།

དེ་ཡང་ལྡི་ལི་ས་གནས་འགོ་འཛིན་ལས་ཚབ་ལས་དྲུང་ཕུན་ཚོགས་འབྱོར་རྒྱས་ལགས་དང་ལས་བྱེད་རྣམ་པ། དེ་བཞིན་བརྒྱ་འཐུས་གཙོས་པའི་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་གཙོས་པའི་ཚོགས་མི་རྣམ་པ། མི་མང་བཅས་ལྡི་ལི་བསམ་ཡས་གླིང་དགོན་པའི་མདུན་ཐང་དུ་ལྷན་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་དབུ་འཕང་དགུང་དུ་འདེགས་པའི་བསང་གསོལ་ཟབ་རྒྱས་ཕུལ་གྲུབ་མཚམས་ས་གནས་འགོ་འཛིན་ལས་ཚབ་ལས་དྲུང་ཕུན་ཚོགས་འབྱོར་རྒྱས་ལགས་ཀྱིས་སྐུ་མགྲོན་དང་མི་མང་ཡོངས་ལ་འཚམས་འདྲི་དང་འབྲེལ་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་ཞུས།

དེ་རྗེས་ས་གནས་རང་བདེན་ཚོགས་ཆུང་གི་ཚོགས་གཞོན་གྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་ཞུས་རྗེས་བོད་སྒར་བསམ་ཡས་གླིང་གི་བརྒྱ་དཔོན་གྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་གཞུང་འབྲེལ་མཛད་སྒོ་གྲོལ་ཡོད།

དེ་ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་འཁེལ་གྱི་ཡོད་སྟབས། ཉིན་རྒྱབ་ཆུ་ཚོད་ ༡ ཐོག་འཕགས་བོད་འབྲེལ་མཐུད་ཚོགས་པའི་ (Bharat Tibbat Sahyog Manch) གོ་སྒྲིག་འོག་རཱཇ་གྷཌ་ནས་བསམ་ཡས་གླིང་  (Rajghat To Majnu Ka Tilla) བར་སྦག་སྦག་སྐོར་བསྐྱོད་ཀྱི་ལས་འགུལ་ཞིག་གོ་སྒྲིག་ཞུས་ཡོད་པ་དང་། བསམ་ཡས་གླིང་དགོན་པའི་མདུན་ཐང་དུ་མཛད་སྒོ་སྟབས་བདེ་ཞིག་གོ་སྒྲིག་ཞུས་ཏེ་ལྡི་ལི་བསམ་ཡས་གླིང་ས་གནས་འགོ་འཛིན་ལས་ཚབ་ལས་དྲུང་ཕུན་ཚོགས་འབྱོར་རྒྱས་ལགས་ཀྱིས་སྐུ་མགྲོན་གཙོ་བོ་འཕགས་བོད་འབྲེལ་མཐུད་ཚོགས་པ་ཐོག་མར་གསར་འཛུགས་གནང་མཁན་སྐུ་ཞབས་ཨིན་དི་རེ་ཤི་ཀུ་མར་ (Shri Indresh Kumar) མཆོག་མཛད་སྒོའི་ཐོག་ཆེད་ཕེབས་གནང་བར་འཚམས་འདྲིའི་གསུང་བཤད་གནང་། 

དེ་ནས་སྐུ་ཞབས་ཨིན་དི་རེ་ཤི་ཀུ་མར་མཆོག་གིས་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༡ འཁོར་བའི་དུས་ཚིགས་ཁྱད་པར་ཅན་གྱི་ཉིན་འདིར་འཚམས་འདྲི་དང་སྦྲགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཡུན་རིང་བརྟན་པ་དང༌།  ྋགོང་ས་མཆོག་དང་བོད་མི་རྣམས་ནི་ཞི་བདེའི་མཚོན་རྟགས་ཡིན་པ་རྒྱ་ནག་ནི་དྲག་པོའི་མཚོན་རྟགས་ཡིན་ཞེས་དང་། 

གཞན་ཡང་དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་ཡིན་སྟབས། བོད་ནང་གི་བོད་མི་རྣམས་ལ་རྒྱ་ནག་གཞུང་གི་དྲག་གནོན་དང་སྡུག་རྩུབ་ཅན་གྱི་སྲིད་བྱུས་འོག་དཀའ་སྡུག་ཚད་མེད་མྱངས་དང་མྱོང་བཞིན་པ་དུས་ནམ་ཡང་མ་བརྗེས་པར་དུས་དང་རྣམ་པ་ཀུན་ཏུ་བོད་མི་རང་དབང་ཆེད་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན། ད་ཆ་རྒྱ་ནག་་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་ཀྱི་རྐྱེན་པས་འཛམ་གླིང་ཡོངས་དཀའ་ངལ་འཕྲད་དང་འཕྲད་མུས་ལ་སོང༌། རྒྱ་གར་གྱིས་གཙོས་འཛམ་གླིང་ཡོངས་ནས་རྒྱ་ནག་གི་ཅ་དངོས་རིགས་ཉོ་ཚོང་མཚམས་འཇོག་དགོས་པའི་དུས་ཀྱི་དགོས་མཁོའི་ཡང་ཡིན། ཞེས་སོགས་ཀྱི་གསུང་བཤད་གནང་། །