ཕྱི་ལོ་ ༢༠༢༠ ཟླ་ ༡༢ ཚེས་ ༡༧ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༡༥ ཉིན་ཨུ་རུ་སུའི་ཕྱི་སྲིད་ལྷན་ཁང་གི་ཤེས་ཡོན་སྡེ་ཚན་དང་ཤར་ཕྱོགས་ཡི་ཤུའི་ཆོས་ལུགས་སློབ་གཉེར་ཁང་སོགས་ཀྱི་གོ་སྒྲིག་འོག་དེང་གི་འཛམ་གླིང་ནང་ཆོས་ལུགས་ཕན་ཚུན་གྲོས་མོལ་(Dialogue of Religions in Modern World) ཞེས་པའི་བརྗོད་གཞིའི་ཐོག་དྲ་རྒྱ་བརྒྱུད་ཚོགས་འདུ་ཚོགས་ཡོད། ཚོགས་འདུའི་ཐོག་ནང་པ་དང་། ཡི་ཤུ་གསར་རྙིང་། ཁ་ཆེ། ཇིའུ་ཆོས་ལུགས་བཅས་ཀྱི་སྐུ་ཚབ་རྣམས་མཉམ་ཞུགས་ཀྱིས་གསུང་བཤད་གཟབ་རྒྱས་གནང་ཡོད།

དེ་ཡང་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ཀྱང་ནང་པའི་སྐུ་ཚབ་ཏུ་མགྲོན་འབོད་ཞུས་པ་ལྟར་རིན་པོ་ཆེ་མཆོག་གིས་དེང་གི་འཛམ་གླིང་ནང་རྒྱལ་སྤྱིའི་མཐུན་སྒྲིལ་ (International Harmony & Concord in Modern World) ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་པ་དང་། སྐབས་དེར་ཏེ་ལོ་རིན་པོ་ཆེ་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་གསུང་བཤད་གཟབ་རྒྱས་གནང་བ་མ་ཟད། རྒྱ་ནག་གི་དབང་སྒྱུར་འོག་འཐབ་རྩོད་བྱེད་བཞིན་པའི་བོད་མིའི་ཆེད་དུ་ཆོས་གྲོགས་ཚང་མས་སྨོན་ལམ་བརྒྱག་རོགས་གནང་ཞེས་འབོད་སྐུལ་གནང་ཡོད་པ་བཅས།།