ཕྱི་ལོ་ ༢༠༢༠ ཟླ་ ༡༢ ཚེས་ ༢༢ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༡༢ ཚེས་ ༡༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༨ དེ་སྤེལ་ཡོད་པ་དང་། གསལ་བསྒྲགས་ཞུ་མཁན་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། བོད་ལུགས་སྨན་པ་ཚེ་རིང་མཚམས་གཅོད་ལགས་དང་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་བཅས་ཡིན།
དང་པོ། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་མི་མང་ལ་ལམ་སྟོན་གནང་དོན། ཕྱི་ལོ་ ༢༠༢༠ ཟླ་ ༣ ནས་ད་བར་ཟླ་བ་བདུན་ཙམ་རིང་བོད་མིའི་སྒྲིག་འཛུགས་དང་སྒེར་གྱི་ཚོགས་པ་སྒྲིག་འཛུགས་ནས་ནད་ཡམས་ཁྱབ་གདལ་བཀག་འགོག་སླད་ཐུགས་འགན་ཆེ་བཞེས་གནང་ཡོད། བར་ལམ་བོད་མིའི་གཞིས་ཆགས་ཁ་ཤས་ནང་དཀའ་ངལ་ཆེན་པོ་འཕྲད་ཡོད་ཀྱང་ད་ཆ་ནད་པ་གཅིག་ཀྱང་མེད་པའི་གནས་སྟངས་ཡག་པོ་ཆགས་ཡོད། ད་ཆ་རྡ་ས་ཁུལ་དུ་འདས་པའི་བདུན་ཕྲག་གཉིས་གསུམ་ནང་ནད་པ་བཞི་བཅུ་ཞེ་གྲངས་ཐོན་ཡོད། ཡང་གཞིས་ཆགས་ཁ་ཤས་ནང་དེ་སྔ་ནད་པ་མེད་ཀྱང་ད་ལྟ་ནད་པ་བྱུང་བ་དེ་འདྲ་བྱུང་ཡོད།
གང་ལྟར་བོད་མིའི་གཞིས་ཆགས་གྲངས་ ༣༦ ཙམ་ནང་ནད་པ་ཆིག་སྟོང་བཞི་བརྒྱ་ལྷག་བྱུང་ཡོད་ཀྱང་མང་པོ་ཞིག་དྲག་བསྐྱེད་སོང་བས་ནད་པ་དྲག་བསྐྱེད་ཀྱི་བརྒྱ་ཆ་ ༩༠ ཙམ་རེད་འདུག ད་དུང་ཡང་ཟླ་བ་བཞི་ལྔ་ཙམ་རིང་མང་ཚོགས་དང་མི་སྒེར་ངོས་ནས་སྔོན་འགོག་གི་ཐབས་ལམ་རྣམས་མུ་མཐུད་བསྟེན་རྒྱུ་གལ་ཆེ། ད་ལྟའི་སྤྱི་ཚོགས་ནང་མི་མང་པོ་གཅིག་གི་སེམས་ནང་ད་ན་ཚ་འདི་ན་བ་ཡིན་ཡང་དྲག་འགྲོ་ཡི་འདུག་བསམ་པ་དེ་འདྲ་ཡོང་གི་འདུག དེ་འདྲ་རྩ་བ་ནས་ཡིན་ས་མ་རེད། ནད་གཞི་འདི་ནད་གཞན་དང་མ་འདྲ་བར་དྲག་ཚར་བའི་རྗེས་སུ་མི་དེར་ཀླད་པ་དང་དབང་རྩ་སོགས་ལ་སྐྱོན་རྒྱག་གི་ཡོད་སྐོར་དེང་ཚན་རིག་པས་དཔྱད་ཞིབ་གནང་བའི་ཡིག་ཆའི་ནང་ཐོན་གྱི་འདུག་པས་ང་ཚོ་མི་ཚེ་རིང་པོ་དང་བདེ་པོ་ཐང་པོ་དགོས་ན་ནད་གཞི་འདི་འདྲ་མ་ཕོག་ན་ལེགས། ལྷག་པར་གཞོན་སྐྱེས་རྣམས་ནས་དེའི་ཐོག་དགོངས་པ་བཞེས་དགོས། ད་ལྟ་ཞུས་པ་བཞིན་ད་དུང་ཟླ་བ་ཁ་ཤས་རིང་ཕྱིར་འགྲུལ་བཞུད་དང་ནང་དུ་ཕྱི་མི་གདན་ཞུ། དེ་བཞིན་སྤྱི་ཚོགས་དང་ཆོས་ཕྱོགས་འདུ་འཛོམས། སྐྱེས་སྐར་དང་ཐུགས་སྤྲོ་རིགས་རྩ་བ་ནས་མ་གནང་རོགས་ཞེས་འབོད་སྐུལ་ཞུ་རྒྱུ་ཡིན།
དེ་ཡང་མི་སྒེར་རང་ཉིད་ཀྱི་བདེ་འཇགས་དང་། ལྷག་པར་འདས་པའི་ཉམས་མྱོང་ལས་གོང་གི་འདུ་འཛོམས་དག་གི་འཇུག་འབྲས་ལས་ནད་གཞི་ཕོག་པ་དེ་འདྲ་མང་པོ་བྱུང་ཡོད་དུས་ད་ལྟའི་དུས་སུ་འདི་འདྲའི་རིགས་ལ་འཛེམ་ཟོན་གནང་རོགས་ཅེས་ཞུ་རྒྱུ་ཡིན། བོད་མིའི་སྒྲིག་འཛུགས་ནས་ཕྱི་ཟླ་ ༣ ཚེས་ ༢༨ ནས་ཡོངས་ཁྱབ་གསལ་བསྒྲགས་ཞུས་པ་གཞིར་བཟུང་བོད་མི་རྣམས་ལ་སྔོན་འགོག་གི་ཚུལ་དུ་གསོ་རིག་ལུས་སེམས་ནུས་གསོའི་སྨན་རིན་མེད་བགོ་འགྲེམས་ཞུ་བཞིན་ཡོད་པས་དེའི་འགྲོ་གྲོན་བོད་མིའི་སྒྲིག་འཛུགས་ནས་སུམ་ཆ་གཉིས་དང་། བོད་ཀྱི་སྨན་རྩིས་ཁང་ནས་སུམ་ཆ་གཅིག་བྱེད་ནས་བོད་མི་རྒན་བགྲེས་དང་ཟུར་འཇོག་ཁང་ནང་ཡོད་པ། དེ་བཞིན་མདུན་ལ་ཕྱག་ལས་གནང་མཁན་དང་བླ་གཉན་གྱི་ནད་ཡོད་པ་རྣམས་ལ་གསོ་རིག་ལུས་སེམས་ནུས་གསོའི་གསོལ་སྨན་ཕུལ་དང་འབུལ་བཞིན་ཡོད་པ་དེ་ནི་སྒྲིག་འཛུགས་ནས་འགན་བསྐུར་བ་བཞིན་འཕྲོད་བསྟེན་ལས་ཁུངས་ནས་གནང་བཞིན་ཡོད།
དེ་ལས་གཞན་ནད་གཞི་ཕོག་པའི་རྗེས་གསོ་བཅོས་ཀྱི་སྨན་དེ་བོད་ཀྱི་སྨན་རྩིས་ཁང་ནས་གསོལ་རས་གནང་གི་ཡོད་པས་དེའི་ཐོག་འཕྲོད་བསྟེན་ལས་ཁུངས་སུ་ས་གནས་གང་ས་ནས་བདེ་སྡུག་ཞུ་བཞིན་འདུག དེའི་ཐོག་སྨན་རྩིས་ཁང་གི་འགན་འཛིན་དང་འབྲེལ་ཡོད་སྨན་པ་མཉམ་གྲོས་བསྡུར་བྱས་རྗེས་ལམ་སྟོན་ལ་བསྐྱར་བཅོས་དགོས་རིགས་གནང་ནས་ཕྱིས་སུ་ཉིན་བཅུ་རིང་གསོལ་སྨན་ཕུལ་བཞིན་ཡོད་པ་རེད། གང་ལྟར་བོད་སྨན་དབུལ་རྒྱུ་ཐད་གནས་སྟངས་གཉིས་ཡོད་པས་གསོ་རིག་ལུས་སེམས་ནུས་གསོའི་སྨན་དེ་འཕྲོད་བསྟེན་ལས་ཁུངས་ནས་གནང་གི་ཡོད་པ་དང་། གསོ་བཅོས་ཀྱི་སྨན་དེ་བོད་ཀྱི་སྨན་རྩིས་ཁང་གི་ལས་གཞི་ཡིན་པས་བོད་ཀྱི་སྨན་རྩིས་ཁང་ནས་གནང་གི་ཡོད་པས་དེའི་ཐོག་དེ་སྔ་དཀའ་ངལ་ཡོད་པ་དེ་ད་ཆ་ཕལ་ཆེར་སེལ་ཡོད་བསམ་བསམ་དྲན་གྱི་འདུག
མདོར་བསྡུས་ནས་ཞུ་ན་བོད་མིའི་སྒྲིག་འཛུགས་ནས་བོད་མི་ཚང་མ་མི་ཚེ་རིང་པོ་ཡོང་རྒྱུ། འཕྲོད་བསྟེན་ཡག་པོ་ཡོང་བ། ལུས་སེམས་བདེ་སྐྱིད་ཡོང་བ་དེ་ཚང་མས་འདོད་པ་དེ་ཡོང་རྒྱུར་སྔོན་འགོག་ཡག་པོ་བྱེད་རོགས། མང་པོ་གཅིག་གིས་སོ་སོ་དང་ངོ་ཤེས་ཀྱི་མི་རྣམས་ལ་ན་ཚ་མེད་རེད་བསམ་ནས་ཡིད་ཆེས་བྱེད་ནས་ཁ་རས་མ་གྱོན་པ་དེ་འདྲ་ཡོང་དུས་ནད་གཞི་འདི་འགོས་ཁྱབ་འགྲོ་རྒྱུའི་ཉེན་ཚབས་ཆེན་པོ་ཡོད། ད་ལྟའི་ཆར་གཉན་སྲིན་ནད་འབུ་དེ་སུ་ལ་ཡོད་པ་དང་ག་བར་ཡོད་པ་དོགས་པའི་སྒང་ཡིན་དུས་སོ་སོའི་ནང་མི་གཅིག་པ་ཡིན་ནའང་རེད། དེ་བཞིན་གྲོགས་པོ་ནང་ཁུལ་འདུ་འཛོམས་གནང་ཡོད་ནའང་གང་ལྟར་ཁ་རས་གྱོན་རྒྱུར་དམ་དོན་གནང་རོགས་ཅེས་ནན་སྐུལ་ཞུ་རྒྱུ་ཡིན། ཞེས་གསུངས།
དོན་ཚན་གཉིས་པ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་རྒྱ་གར་ནང་གི་ས་གནས་གྲངས་ ༢༣ དང་། བལ་ཡུལ་ས་གནས་གྲངས་ ༣ ནང་ཁྱོན་བོད་མི་གྲངས་ ༥༧༢ ༼རང་ཁྱིམ། ༢༨༠ སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༢༩༢༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། གཉིས་པ་གསོ་རིག་ལུས་སེམས་ནུས་གསོའི་སྨན་དང་འབྲེལ་ད་བར་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༥༡༥༥ དེ་ནས་རྒྱ་བལ་འབྲུག་གསུམ་ནང་བཞུགས་མཁན་བོད་མི་ལོ་ན་ ༦༥ ཡན་བསྡོམས་མི་གྲངས་ ༨༧༢༥ དེ་ནས་སྨན་པ་དང་སྨན་ཞབས་སོགས་ཕྱག་ལས་ཞབས་ཞུ་སྒྲུབ་མཁན་མི་གྲངས་བསྡོམས་ ༡༤༨༡ ཁྲག་ཤེད་དང་གཅིན་སྙི་སོགས་བླ་གཉན་གྱི་ནད་གཞི་ཡོད་པ་མི་གྲངས་ ༤༠༤༠ དེ་ནས་ཕྱི་རྒྱལ་ཁག་ཏུ་བོད་མི་གྲངས་ ༣༡༤༣ ཁྱོན་མི་གྲངས་ ༢༢༥༤༤ ཐམ་པར་རིན་མེད་འགྲེམས་སྤེལ་ཞུས་ཟིན།
སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་ ༢༣ ལ་ཁ་པར་ཐོག་འབྲེལ་བ་གནང་བ་བརྒྱུད་སེམས་ཁམས་འཕྲོད་བསྟེན་ཐོག་སློབ་གསོ་ལམ་སྟོན་གནང་བ་དང་། ནད་ཡམས་ཁྱབ་གདལ་བཀག་འགོག་ཆེད་ས་གནས་སུ་ནད་གཞི་ཕོག་ཡོད་མེད་བརྟག་དཔྱད་བྱེད་བཞིན་ཡོད་པས་འདས་པའི་བདུན་ཕྲག་གཅིག་ནང་རྒྱ་གར་ནང་གི་ས་གནས་གྲངས་ ༡༦ དང་། བལ་ཡུལ་ནང་གི་ས་གནས་གྲངས་ ༡ བཅས་ཁྱོན་མི་གྲངས་ ༧༠༠ བརྟག་དཔྱད་གནང་ཡོད་པའི་གནས་ཚུལ་ཞུ།
གསུམ་པ། བཙན་བྱོལ་བོད་མིའི་སྤྱི་ཚོགས་ཁྲོད་ནད་གཞི་ཕོག་པ་སྙན་གསང་ཞུ་རྒྱུར། འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མིའི་གཞིས་ཆགས་སུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་ ༤༥ བྱུང་། ཞིབ་ཕྲ་ནི། ཀེལ་མན་ཊོན་ནས་མི་གྲངས། ༥ རྡ་ས་ཁུལ་ནས་མི་གྲངས། ༡༡ སྦེལ་ཀོབ་ནས་མི་གྲངས། ༡ བདེ་སྐྱིད་གླིང་ནས་མི་གྲངས། ༣ ལ་དྭགས་ཁུལ་ནས་མི་གྲངས། ༢ མེའོ་གཞིས་ཆགས་ནས་མི་གྲངས། ༡༨ སིམ་ལ་ཁུལ་ནས་མི་གྲངས། ༡ མཚོ་པདྨ་ཁུལ་ནས་མི་གྲངས། ༤ བཅས་བསྡོམས་པས་རྒྱ་གར་ནང་མི་གྲངས་ ༤༥ བྱུང་ཡོད།
མི་གྲངས་ ༤༥ བྱུང་བ་ལས་སྐྱེས་པ་གྲངས་ ༢༧ དང་བུད་མེད་གྲངས་ ༡༨ དེའི་ནང་ནས་དགུང་ན་མཐོ་ཤོས་དེ་ ༩༧ དང་ཆུང་ཤོས་དེ་ལོ་ ༡༢ ཡིན་པ་རེད། ད་བར་ཁྱོན་བསྡོམས་རྒྱ་གར་དང་བལ་ཡུལ་ནང་བོད་མི་ནད་གཞི་ཕོག་པ་གྲངས་ ༡༤༢༡ དྲག་སྐྱེད་བྱུང་བ་མི་གྲངས། ༡༢༧༦ འདས་གྲོངས་སོང་བ་མི་གྲངས། ༣༥ ད་ལྟ་ནད་མནར་བཞིན་པ་མི་གྲངས། ༡༡༠ བཅས་བྱུང་བའི་གནས་ཚུལ་ཞུ། ནད་གཞི་ཕོག་པ་རྣམས་ས་གནས་ཛ་དྲག་ཚོགས་ཆུང་གི་ལམ་སྟོན་འོག་ཁ་ཤས་ས་གནས་རྫོང་གི་སྨན་ཁང་དང་ཁ་ཤས་ཚོགས་སྡེའི་ཟུར་བཀག་ཐོག་དོ་ནན་བཞུགས་ཏེ་གསོ་བཅོས་གནང་བཞིན་པའི་གནས་སྟངས་ཞུ།
བཞི་པ། མི་མང་ལ་ཐུགས་སྣང་ལམ་སྟོན་ཞུ་རྒྱུའི་དོན་གནད་གཙོ་བོ་དེ་ད་བར་ཟླ་བ་བཅུ་གཉིས་ཏེ་ལོ་གཅིག་འཁོར་འགྲོ་བའི་ནང་རྒྱལ་སྤྱི་ཁྱོན་ཡོངས་ནང་མི་ས་ཡ་ ༧༢ ཙམ་ལ་ཏོག་དབྱིབས་གཉན་རིམས་ ༡༩ ནད་གཞི་ཕོག་ཡོད་པ་དང་། གནས་ཡུལ་རྒྱ་གར་ནང་དུ་ཁྱོན་ནད་གཞི་ཕོག་པ་མི་གྲངས་ས་ཡ་ ༩ དང་། ད་ལྟ་ནད་མནར་བཞིན་པ་མི་འབུམ་གསུམ་ལྷག་ཆགས་ཀྱི་ཡོད།
དེ་ཡང་འདས་པའི་ཆུ་ཚོད་ ༢༤ ནང་རྒྱ་གར་ནང་ནད་གཞི་གསར་པ་ཕོག་པའི་མི་གྲངས་དེ་ ༢༤༠༡༠ སྟེ་རྒྱ་གར་མངའ་སྡེ་ཀེ་ར་ལ། ནུབ་སྦེང་གཱལ། ཀར་ཎ་ཊ་ཀ། ལྡི་ལི་ཆགས་ཀྱི་ཡོད། བོད་མིའི་གཞིས་ཆགས་ཁག་གི་ནང་དུའང་ཐོག་མར་ཕྱི་ཟླ་ ༥ པའི་ནང་མི་གྲངས་ ༥ དང་། ཟླ་དྲུག་པའི་ནང་མི་གྲངས་ ༢༥ བདུན་པའི་ནང་མི་གྲངས་ ༢༠ བརྒྱད་པའི་ནང་ ༦༩ དགུ་པའི་ནང་མི་གྲངས་ ༢༠༨ བཅུ་པའི་ནང་མི་གྲངས་ ༦༥༧ བཅུ་གཅིག་པའི་ནང་ ༣༡༠ བཅུ་གཉིས་པ་ད་ཉིན་གྱི་བར་མི་གྲངས་ ༧༥ རིམ་པས་རྒྱ་གར་ནང་སྒོ་རྒྱ་རིམ་པ་ཕྱེ་བ་ལས་མི་རྣམས་འགྲུལ་བཞུད་སྒོ་ཚུགས་པ་དང་། ལས་ཁུངས་སོགས་སུ་ལས་དོན་དང་མི་ཐུག་འཕྲད་བྱུང་བ་ལས་རིམ་པས་ནད་པ་ཇེ་མང་དུ་འཕར་བ་གསལ་པོ་ཆགས་ཀྱི་ཡོད།
དེར་བརྟེན་ད་ལྟའི་དུས་ཚོད་འདིར་གཙོ་ཆེ་ཤོས་དེ་མི་མང་འདུ་འཛོམས་དང་། ལྷག་པར་གལ་ཆེ་དོན་ཆེན་ཡིན་ན་མ་གཏོགས་ཕྱིར་འགྲུལ་བཞུད་དང་མི་ཐུག་འཕྲད་བྱ་རྒྱུར་འཛེམ་ཟོན་གནང་དགོས། ཅི་སྟེ་ཕྱིར་འགྲུལ་བཞུད་གནང་དགོས་འབྱུང་ཚེ་ཁ་རས་གྱོན་པ་སོགས་སྔོན་འགོག་གི་ཐབས་ལམ་རྣམས་ངེས་པར་བསྟེན་དགོས་གལ་ཆེ་བ་དེ་དོན་དྲན་སྐུལ་ཞུ་རྒྱུ་ཡིན། ཁ་རས་གྱོན་ཕྱོགས་ཐད་ཁ་རས་ཐག་པ་ལྷུག་ལྷུག་དང་ཁ་རས་བཙོག་པ། ཁ་རས་ཨི་ཁུང་ཡོད་པ། ཁ་རས་སྣའི་སྟེང་དང་མལ་ལེའི་འོག་ཏུ་བཞག་པ་སོགས་ཚུལ་བཞིན་མ་གྱོན་པ་ལས་ནད་འགོས་ཉེན་ཆེ་བ་ཡོད། ཡང་མི་ཁག་གཅིག་ལ་ཁ་རས་རྒྱུ་ཆ་མ་འཕྲོད་པའི་དཀའ་ངལ་འཕྲད་སྲིད་པས་ཁ་རས་ཀྱི་རྒྱུ་ཆར་ཐུགས་སྣང་ཡིད་གཟབ་གནང་དགོས་གལ་ཆེ། ཡང་ཕྲུག་གུ་ལོ་གཉིས་མན་དང་། དེ་བཞིན་དམིགས་བསལ་དགོས་མཁོ་ཅན་གྱི་མི་རྣམས་ལ་ཁ་རས་བཀོན་སྐབས་ཡིད་གཟབ་གནང་དགོས་པ་ཡིན།
དོན་ཚན་གཉིས་པ་དེ་ནད་རྟགས་དང་གསོ་བཅོས་དང་འབྲེལ་ཞུ་རྒྱུར། མི་གང་ཞིག་ལ་གཉན་རིམས་འདིའི་ནད་རྟགས་མངོན་ཚེ་ངེས་པར་དུ་བརྟག་དཔྱད་གནང་དགོས་གལ་ཆེ། ཁག་གཅིག་གིས་བརྟག་དཔྱད་ལ་ཞེད་སྣང་དང་དངངས་སྐྲག ནད་གཞི་ཕོག་པ་འབྱུང་ཚེ་སོ་སོར་མིང་ཆད་ཡོང་རྒྱུའི་དོན་རྐྱེན་གྱིས་བརྟག་དཔྱད་མ་བྱེད་པ་དེ་འདྲ་ཡོང་གི་ཡོད་འདུག དེ་ཚོ་ཡིན་ན་ནད་རྟགས་མངོན་ཚེ་ངེས་པར་བརྟག་དཔྱད་གནང་གལ་ཆེ། ཅི་སྟེ་བརྟག་དཔྱད་མ་གནང་བ་ཡིན་ནའང་སོ་སོ་ཕྱིར་མ་ཕེབས་པར་རང་ཁྱིམ་དུ་ཉུང་མཐར་ཉིན་གྲངས་ ༡༤ ནས་ ༢༨ བར་བཞུགས་པ་ལས་ཕྱི་མིར་འབྲེལ་ཐུག་རྩ་བ་ནས་མ་བྱེད་ན་ལེགས་པའི་ལམ་སྟོན་ཞུ་རྒྱུ་ཡིན། ཡང་འདི་ནས་འབྲེལ་གཏུག་རྩད་གཅོད་སྐབས་མི་ཁག་གཅིག་གིས་ནད་རྟགས་ག་དུས་མངོན་མིན་གསལ་པོ་མ་དྲན་པའི་གནས་སྟངས་དེ་འདྲ་འདུག་པས་ད་ལྟའི་དུས་ཚོད་འདིར་སོ་སོའི་འཕྲོད་བསྟེན་གྱི་ཉིན་དེབ་ལྟ་བུ་གལ་ཏེ་སོ་སོར་ཆམས་ཚད་ལྟ་བུའི་ནད་རྟགས་མངོན་ཚེ་ཟླ་དུས་ཚེས་གྲངས་ཐོ་འགོད་གནང་རྒྱུ་དེ་གལ་ཆེན་པོ་འདུག་པ་དེ་དོན་ཐུགས་སྣང་ཡོང་བ་ཞུ་བ་དང་། དེ་རྗེས་གསོ་བཅོས་དང་འབྲེལ་ནད་པ་ཁག་གཅིག་གིས་སོ་སོ་སྨན་བཅོས་ཟིན་ནས་སྨན་ལྷག་མ་དེ་ནད་པ་གསར་པ་གཞན་ལ་སྤྲོད་པ་དེ་འདྲ་ཡོང་གི་ཡོད་བཟོ་འདུག་ན། དེ་རིགས་གནང་རྒྱུ་མེད།
ནད་པ་སོ་སོར་ནད་རྟགས་མི་འདྲ་བ་དང་གཟུགས་པའི་ཁམས་དང་སོ་སོར་བླ་གཉན་ནད་སོགས་གང་ཡང་མ་འདྲ་བ་ཡོད་སྲིད་པས་ངེས་པར་ས་གནས་སྨན་པར་འབྲེལ་གཏུག་གིས་གསོ་བཅོས་གནང་དགོས་ཤིན་ཏུ་གལ་ཆེ། གོང་དུ་འཕྲོད་བསྟེན་དྲུང་ཆེས་གསུངས་པ་བཞིན་གསོ་བཅོས་ཀྱི་གསོལ་སྨན་དེ་བོད་ཀྱི་སྨན་རྩིས་ཁང་ནས་སྨན་སྦྱིན་གནང་བཞིན་ཡོད་པ་དང་། ཡང་ས་གནས་ཁ་ཤས་སར་སྒེར་གྱི་སྨན་པ་དང་ཚོགས་པ་ཁག་གཅིག་ནས་ཀྱང་སྨན་སྦྱིན་དང་། ཕྱེད་ཆག་གནང་གི་ཡོད་འདུག་པས་གང་ལྟར་སོ་སོའི་ས་གནས་ཀྱི་ཛ་དྲག་ཚོགས་ཆུང་དང་ས་གནས་སྨན་པ་རྣམས་ལ་ངེས་པར་འབྲེལ་གཏུག་གིས་གསོ་བཅོས་དུས་ཐོག་གནང་རྒྱུ་ཤིན་ཏུ་གལ་ཆེ་བ་ཡིན།
མཐའ་དོན་ཞུ་རྒྱུར། ད་བར་ཟླ་བ་བཅུ་གཅིག་ལྷག་ཙམ་རིང་ས་གནས་ཛ་དྲག་ཚོགས་ཆུང་དང་དེའི་ནང་གི་སྨན་པ་དང་འཕྲོད་ལས་པ། དྭངས་ཞབས་པ་གཙོས་པའི་མང་ཚོགས་ནས་ཐུགས་འགན་ཆེ་བཞེས་ཀྱིས་ནད་ཡམས་ཁྱབ་གདལ་བཀག་འགོག་སླད་གདོང་ལེན་དུ་སྔོན་འགོག་ཐབས་ལམ་རྣམས་བསྟེན་པ་རེད། ད་དུང་ཡིན་ནའང་ཟླ་བ་ཁ་ཤས་རིང་མུ་མཐུད་བསྟེན་རོགས་གནང་ཞེས་འབོད་སྐུལ་ཞུ་བ་དང་ཆབས་ཅིག ད་ལན་ཏོག་དབྱིབས་གཉན་རིམས་ ༡༩ ཁྱབ་གདལ་ཆེ་ཆེར་འགྲོ་བའི་དུས་འདིར་གཉན་རིམས་འདི་མིན་པ་རྒྱུན་དུ་ཁྲག་ཤེད་དང་ཟ་ཁུ་གཅིན་སྙིའི་ནད་གཞི། དེ་བཞིན་སྙིང་དང་གློ་གཅོང་མཁལ་གཅོང་གི་ནད་གཞི་ཡོད་པའི་ནད་པ་རྣམས་དང་། གཞན་ཡང་སྦྲུམ་མ་རྣམས་ཀྱི་ཟླ་རེའི་གཟུགས་གཞི་བརྟག་དཔྱད་དང་། བྱིས་པ་རྣམས་ལ་སྔོན་འགོག་སྨན་ཁབ་རྒྱག་རྒྱུའི་མཚོན་རྒྱུན་དུ་བརྟག་དཔྱད་གསོ་བཅོས་བྱེད་དགོས་པའི་ནད་པ་རྣམས་ནས་ཀྱང་སོ་སོའི་འཕྲོད་བསྟེན་དང་གསོ་བཅོས་ཐོག་འཐུས་ཤོར་མ་སོང་བར་དུས་ཐོག་སྨན་བཅོས་གནང་དགོས་པ་གལ་ཆེན་པོ་ཡིན་པ་དེ་དོན་སླར་དྲན་སྐུལ་ཞུ་རྒྱུ་ཡིན། ཞེས་གསུངས།
དེ་རྗེས་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། འདས་པའི་བདུན་ཕྲག་ནང་རྡ་ས་ཁུལ་དུ་མི་གྲངས་ ༢༨༡ བརྟག་དཔྱད་བྱས་པའི་ནང་བོད་མི་ ༡༡ ནད་གཞི་ཕོག་པ་ར་འཕྲོད་བྱུང་འདུག ད་ལྟའི་ཆར་རྡ་ས་ཁུལ་དུ་ནད་གཞི་ཕོག་པ་ཇེ་མང་དུ་འགྲོ་བཞིན་པའི་གནས་སྟངས་ལ་ཚོགས་སྒེར་ནང་གལ་ཏེ་ནད་རྟགས་མངོན་པ་བྱུང་ཚེ་ངེས་པར་དུ་ཟུར་བཀག་བཞུགས་དགོས། ཡང་ཚོགས་པ་ཁག་དང་སློབ་གྲྭའི་ནང་ཡིན་ནའང་མི་གང་ཞིག་སྨན་ཁང་ནང་སྨན་བཅོས་བྱེད་དགོས་སོགས་ཕྱིར་ཡང་སེ་ཕེབས་དགོས་རིགས་རྣམས་ཚོགས་པའི་ནང་བཞུགས་མི་དགོས་པར་དམིགས་བསལ་ཟུར་འཇོག་ཁང་དེ་འདྲ་ཡོད་ན་དེར་བཞུགས་ན་ནད་ཡམས་ཁྱབ་གདལ་མི་འགྲོ་བར་ཕན་ཐོགས་ཡོང་ངེས་རེད།
ད་ལན་ཏོག་ཙམ་མ་འདྲ་བར་ཕྲན་ལ་དགེ་བཤེས་ལགས་ཤིག་གིས་ནང་ཆོས་ཐོག་ནས་ཏོག་དབྱིབས་གཉན་རིམས་ ༡༩ དང་འབྲེལ་ནས་ལམ་སྟོན་གནང་བྱུང་བ་དེ་དུས་དང་མཚམས་པ་མཐོང་ཞིང་མི་མང་ལ་ཐུགས་ཕན་གསོ་ཆེད་འདིར་ཞུ་རྒྱུ་ཡིན། དེ་ཡང་ནང་པའི་ཆོས་ལས་བདེན་པ་བཞི་ཞེས་པའི་ནང་ནས་དང་པོ་སྡུག་བསྔལ་བདེན་པ་རེད། དེ་ནི་ད་ལྟའི་ཏོག་དབྱིབས་གཉན་རིམས་ ༡༩ འདི་ཡིན་པ་དང་། གཉིས་པ་ཀུན་འབྱུང་བདེན་པ་སྟེ་གཉན་རིམས་ ༡༩ འདི་ཀུན་འབྱུང་བའི་རྒྱུ་རྐྱེན་ཏོག་དབྱིབས་གཉན་སྲིན་དང་དེ་ལས་བྱུང་བའི་སེམས་ནང་གི་དངངས་སྐྲག་དེ་རེད། འགོག་བདེན་དང་ལམ་བདེན་གཉིས་དང་འབྲེལ་ནས་འཕགས་ལམ་ཡན་ལག་བརྒྱད་ལས་ཡང་དག་པའི་ལྟ་བ་ནི་ཁུངས་ལྡན་གྱི་གནས་ཚུལ་དེ་ཡིན་པ་དང་། ཡང་དག་པའི་རྟོགས་པ་ནི་ཁུངས་ལྡན་གྱི་གནས་ཚུལ་ལ་བརྟག་ཞིབ་ཀྱིས་གོ་རྟོགས་ཐུབ་པ་དེ་རེད། ཡང་དག་པའི་ངག་ནི་མི་གཞན་ལ་གནས་ཚུལ་གང་བཤད་ཀྱི་ཡོད་ན་དེ་རྫུན་གཏམ་མིན་པ་གནས་ཚུལ་བདེན་པ་གསུང་རྒྱུ་དང་། ཡང་དག་པའི་ལམ་ནི་སྨན་པ་དང་སྨན་ཞབས། དེ་བཞིན་ནད་པ་སོགས་ལ་དབྱེ་འབྱེད་དང་སྣང་ཆུང་མ་བཏང་བ་དེ་རེད།
ཡང་དག་པའི་འཚོ་བ་ནི་འདིར་དམིགས་བསལ་འབྲེལ་བ་མེད་ཀྱང་ད་ལྟའི་ཆར་ཚོང་པ་རྣམས་ནས་ཁ་རས་སོགས་སྔོན་འགོག་ཡོ་བྱད་ཚོང་སྐབས་གོང་ཚད་རན་པོའི་ཐོག་ཚོང་འགྲེམས་ཞུ་རྒྱུ་དེ་ཆགས་ཀྱི་འདུག ཡང་དག་པའི་རྩོལ་བ་ནི་དོན་མེད་ཕྱིར་འགྲུལ་བཞུད་མ་བྱེད་པ། ཁ་རས་གྱོན་པ་དང་མིའི་དབར་རྒྱང་ཐག་འཇོག་པ། ཡང་དག་པའི་དྲན་པ་ནི་ཡང་ཡང་སོ་སོའི་སེམས་ནང་སྔོན་འགོག་གི་ཐབས་ལམ་རྣམས་དྲན་ཤེས་ཐུབ་པ། ཡང་དག་པའི་ཏིང་ངེ་འཛིན་ནི་གོང་ཞུས་སྔོན་འགོག་ཐབས་ལམ་རྣམས་རྣམ་གཡེང་དུ་མ་སོང་བར་སེམས་ནང་ཡང་ཡང་དྲན་གསོ་བྱེད་པ་འདི་ལྟར་ནང་ཆོས་ཀྱི་ཐོག་ནས་སྔོན་འགོག་ཐབས་ལམ་དང་སྦྱར་ནས་ལམ་སྟོན་གྱི་ཚུལ་དུ་ཞུས་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༣༨ དེ་མཇུག་སྒྲིལ།།
