ཕྱི་ལོ་ ༢༠༢༠ ཟླ་ ༡༢ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་༢༠༢༠ ཟླ་ ༡༢ ཚེས་ ༡༠ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་སོ་བདུན་པ་དེ་སྤེལ་ཡོད། དེ་ཡང་གསལ་བསྒྲགས་ཞུ་མཁན་བོད་ལུགས་སྨན་པ་ཚེ་རིང་མཚམས་གཅོད་ལགས་དང་ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་ཡིན།
དང་པོ། ལས་དོན་ཚོགས་ཆུང་གི་གསར་འགོད་འབྲེལ་མཐུད་སྨན་པ་ཚེ་རིང་མཚམས་གཅོད་ཀྱིས་འདས་པའི་བདུན་ཕྲག་ཅིག་ནང་ཚོགས་ཆུང་གི་གྲུབ་ཐོན་མདོར་བསྡུས་ཞུས་དོན། འདས་པའི་བདུན་ཕྲག་ནང་ཁྱོན་བོད་མི་གྲངས་༦༦༦ ༼རང་ཁྱིམ། ༤༤༦ སྒྲིག་འཛུགས་ནས་མཐུན་འགྱུར་སྦྱར་བའི་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༢༢༠༽ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། སེམས་ཁམས་འཕྲོད་བསྟེན་དང་འབྲེལ་འདས་པའི་བདུན་ཕྲག་ནང་ནད་གཞི་ཕོག་པའི་མི་གྲངས་༣༤ ལ་ཁ་པར་ཐོག་འབྲེལ་བ་གནང་བ་བརྒྱུད་སེམས་ཁམས་འཕྲོད་བསྟེན་ཐོག་སློབ་གསོ་ལམ་སྟོན་གནང་བ་དང་། ནད་ཡམས་ཁྱབ་གདལ་བཀག་འགོག་ཆེད་ས་གནས་སུ་ནད་གཞི་ཕོག་ཡོད་མེད་བརྟག་དཔྱད་བྱེད་བཞིན་ཡོད་པས་འདས་པའི་བདུན་ཕྲག་ཅིག་ནང་རྒྱ་གར་ནང་གི་ས་གནས་གྲངས་༢༠ ནང་ཁྱོན་མི་གྲངས་༩༨༨ ལ་བརྟག་དཔྱད་གནང་ཡོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ལམ་སྟོན་གནང་བ་བཞིན་བོད་མིའི་འདུ་སྡོད་ས་གནས་གཞིས་ཆགས་ཁག་ལ་ནད་ཡམས་ཁྱབ་གདལ་བཀག་འགོག་ཆེད་ས་གནས་སྨན་ཁང་གཙོས་མི་མང་འདུ་འཛོམས་ཆེ་སར་དུག་སེལ་གནང་ཡས་དང་དེ་བཞིན་ནད་གཞི་ཕོག་པའི་ས་འཁོར་དུ་དུག་སེལ་གནང་ཡས་མཚོན་ཛ་དྲག་ཚོགས་ཆུང་གི་ཚོགས་འདུ་དུས་ཐོག་བསྐོང་ཚོགས་ཐོག་ལས་དོན་མུ་མཐུད་འགྲོ་བཞིན་པའི་གནས་ཚུལ་ཞུ།
གཉིས་པ། བཙན་བྱོལ་བོད་མིའི་སྤྱི་ཚོགས་ཁྲོད་གནས་སྟངས་ཇི་ཆགས་ཐད་འདས་པའི་བདུན་ཕྲག་ཅིག་གི་ནང་རྒྱ་གར་དང་བལ་ཡུལ་ནང་གི་བོད་མིའི་གཞིས་ཆགས་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་༥༥ བྱུང་། ཞིབ་ཕྲ་ནི། ལ་དྭགས་ཁུལ་ནས་མི་གྲངས།༡༥ ལྡི་ལི་ཁུལ་ནས་མི་གྲངས།༥ བདེ་སྐྱིད་གླིང་གཞིས་ཆགས་ནས་མི་གྲངས། ༡༡ སྦིར་གཞིས་ཆགས་ནས་མི་གྲངས། ༡ རཱ་ཇི་པུར་གཞིས་ཆགས་ནས་མི་གྲངས། ༢ སྦེལ་ཀོབ་གཞིས་ཆགས་ནས་མི་གྲངས། ༢ ཀེལ་མན་ཊོན་གཞིས་ཆགས་ནས་མི་གྲངས། ༡ མན་སྤར་གཞིས་ཆགས་ནས་མི་གྲངས། ༡ རྡ་ས་ཁུལ་ནས་མི་གྲངས་ ༡༥ ཀོ་ལེ་གལ་གཞིས་ཆགས་ནས་མི་གྲངས། ༡ མཚོ་པདྨ་ནས་མི་གྲངས། ༡ བཅས་རྒྱ་གར་ནང་མི་གྲངས་ ༥༥ བྱུང་ཡོད། མི་གྲངས་ ༥༥ བྱུང་བ་ལས་དགུང་ན་མཐོ་ཤོས་དེ་ ༨༩ དང་ཆུང་ཤོས་དེ་ལོ་ ༤ ཡིན་པ་རེད། དེའི་ནང་ནས་སྐྱེས་པ་གྲངས་ ༣༣ དང་བུད་མེད་གྲངས་ ༢༢ ནད་རྟགས་ཅུང་མངོན་པ་མི་གྲངས་ ༣༨ དང་ནད་རྟགས་མེད་པ་མི་གྲངས། ༡༧ ཡིད་སྐྱོའི་གནས་ཚུལ་ཞིག་ལ་འདས་པའི་བདུན་ཕྲག་ནང་མཚོ་པདྨ་ཁུལ་ནས་སྐྱེས་པ་རང་ལོ་ ༥༦ སོན་པ་བླ་གཉན་ནད་ཅན་ཞིག་འདས་གྲོངས་སོང་ཡོད། ད་བར་རྒྱ་གར་དང་བལ་ཡུལ་ནང་ཁྱོན་བོད་མི་ནད་གཞི་ཕོག་པ་གྲངས་༡༣༧༦ དྲག་སྐྱེད་བྱུང་བ་མི་གྲངས། ༡༡༩༧ འདས་གྲོངས་སོང་བ་མི་གྲངས། ༣༥ ད་ལྟ་ནད་མནར་བཞིན་པ་མི་གྲངས། ༡༤༤ བཅས་བྱུང་བའི་གནས་ཚུལ་ཞུ། ནད་གཞི་ཕོག་པ་རྣམས་ས་གནས་ཛ་དྲག་ཚོགས་ཆུང་གི་ལམ་སྟོན་འོག་ཟུར་བཀག་ཐོག་བཞུགས་ཡོད་པའི་གནས་ཚུལ་ཞུ།
གསུམ་པ། མི་མང་ལ་ཐུགས་སྣང་ལམ་སྟོན་ཞུ་རྒྱུའི་དོན་གནད་གཙོ་བོ་དེ་ད་ཆ་རྒྱལ་ཁབ་ནང་སྒོ་རྒྱ་ཆ་ཚང་ཕྱེ་ནས་ལས་ཁུངས་དང་། ཚོང་ལས། ཨར་ལས། དེ་བཞིན་ཡུལ་འཁོར་སྤྲོ་འཆམ་པ་སོགས་མི་མང་འགྲུལ་བཞུད་སྒོ་བཙུགས་ཡོད་པས་ད་ཆ་མི་མང་སོ་སོ་རང་ཉིད་ནས་སྤྱང་གྲུང་དོད་པས་ནད་འགོག་སྲུང་སྐྱོབ་གནང་རྒྱུ། དེའང་རང་ཉིད་ཙམ་མིན་པར་རང་གི་ཁྱིམ་ཚང་། དེ་ནས་གྲོང་གསེབ་སོ་སོ་བརྒྱུད་སྤྱི་ཚོགས་ཁྱོན་ཡོངས་ནང་ཁྱབ་གདལ་མ་འགྲོའི་ཆེད་འགན་འཁུར་གནང་དགོས་གལ་ཆེ།
དོན་ཚན་གཉིས་པ་དེ་ད་ལྟའི་ཏོག་དབྱིབས་གཉན་རིམས་༡༩ འདི་འགོས་ནད་ཤིག་ཡིན་པ་ཡང་བསྐྱར་དྲན་སྐུལ་ཞུ་རྒྱུ་ཡིན། འགོས་ནད་ཅེས་པ་དེ་མི་གཅིག་ནས་གཅིག་བརྒྱུད་འགོས་ཁྱབ་འགྲོ་ཡི་ཡོད་པས་ཏོག་དབྱིབས་གཉན་རིམས་༡༩ པ་འདི་མིའི་ཁ་དང་སྣ་ནས་བྱུང་བའི་མཆིལ་མའི་རྡུལ་ཕྲན་བརྒྱུད་ཁྱབ་གདལ་འགྲོ་ཡི་ཡོད་ན་ནད་གཞི་འདི་མ་འགོས་སླད་ཁ་དང་སྣ་མིག་བཅས་བརྒྱུད་ལམ་གསུམ་དེ་སྲུང་སྐྱོབ་སླད་ཁ་རས་གྱོན་པ་དང་། མིའི་དབར་རྒྱང་ཐག་འཇོག་པ། ལག་པ་ཡང་སེ་འཁྲུ་བ་གསུམ་དེ་ནད་འགོག་ཐབས་ལམ་གཙོ་བོ་དེ་ཆགས་ཀྱི་ཡོད། ཡང་ཁྱིམ་ཚང་ཅིག་ནང་ཉུང་ཐར་མི་བཞི་ཙམ་ཡོད་དུས་ནང་མི་ནང་ཁུལ་ཁ་རས་མཉམ་སྤྱོད་དང། དེ་བཞིན་ལྟོ་ཕོར་དང་འཁྲུ་ཆས་རིགས་སོགས་མཉམ་སྤྱོད་རྩ་ནས་གནང་མི་དགོས་པའི་ལམ་སྟོན་ཞུ་བ་དང། ཡང་མི་ཁག་ཅིག་ལ་རང་ཉིད་ནད་འགོག་སྲུང་སྐྱོབ་ཀྱི་ནུས་པ་ཞན་པས་ནད་འགོས་སླ་བ་ཡོད་ན་རང་ཉིད་ཀྱི་ལུས་སེམས་ནུས་པ་གསོ་བའི་ཕྱིར་ཟས་བཅུད་ཅན་དང་ཟས་དུས་ཐོག་བསྟེན་དགོས་པ་དང་། གཉིད་དུས་ཐོག་ཁུག་པ། སེམས་གུ་ཡེངས་གནང་དགོས་པ་ཤིན་ཏུ་གལ་ཆེ། མཐའ་དོན་དེ་སྔོན་འགོག་སྨན་ཁབ་དང་འབྲེལ་འདི་ཟླའི་ཚེས་༨ ཉིན་ཨིན་ཡུལ་ནང་བུད་མེད་རང་ལོ་ ༩༠ སོན་པ་ཞིག་ལ་ནད་འགོག་སྨན་ཁབ་ (Pfizer) ཐོག་མ་རྒྱག་མཁན་དེ་ཆགས་ཡོད་པ་དེ་གནས་ཚུལ་བཟང་བ་ཞིག་ཡིན་ཡང་ནད་འགོག་སྨན་ཁབ་དེས་བརྒྱ་ཆ་ ༡༠༠ སྲུང་སྐྱོབ་ཐུབ་ཀྱི་མེད། སྔོན་འགོག་སྨན་ཁབ་ཐོན་པ་དེས་ནད་ཡམས་ཁྱབ་གདལ་བཀག་འགོག་གི་སྒོ་ཚུགས་ཅིང་ནད་ཡམས་མཇུག་སྒྲིལ་ཡས་སྒོ་ཚུགས་པ་མ་གཏོགས་ནད་ཡམས་མཇུག་སྒྲིལ་མེད། དེར་རྟེན་མ་ཚོགས་ནས་ད་བར་ཟླ་བ་བཅུ་གཅིག་ཙམ་རིང་བཟོད་སྲན་ཆེན་པོས་སྔོན་འགོག་ཐབས་ལམ་རྣམས་བསྟེན་ཡོད། ད་དུང་ཡིན་ནས་སྔོན་འགོག་སྨན་ཁབ་མ་ཐོབ་བར་མུ་མཐུད་ནས་ཐབས་ལམ་རྣམས་བསྟེན་དགོས་པའི་རེ་སྐུལ་ཞུ་རྒྱུ་ཡིན།
དེ་རྗེས་སྨན་པ་བསྟན་འཛིན་བརྩོན་འགྲུས་ལགས་ནས་ལམ་སྟོན་གནང་དོན། ཐོག་མར་ད་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་བཞེས་གནང་ནས་ལོ་ངོ་ ༣༡ འཁོར་བར་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབས་ཅིག ཁ་ཉིན་རྫོང་གི་སྨན་པ་གཙོ་བོ་ནས་ད་རིང་བདུན་ཕྲག་ནང་རྡ་ས་མེག་ལོཌ་ཁུལ་དུ་མི་གྲངས་ ༡༣ ཙམ་ཐོན་ཡོད་པ་ལས་མི་གྲངས་ ༧ བོད་མི་ཡིན་པ་གསུངས། འདི་དང་འབྲེལ་ནས་ད་ཉིན་མི་གྲངས་ ༤༩ ཙམ་བརྟག་དཔྱད་བྱས་པས་ད་ལྟ་གྲུབ་འབྲས་ཐོན་རྒྱུ་རེད། ནད་གཞི་ཕོག་པའི་མི་དང་ཐད་ཀར་འབྲེལ་གཏུག་བྱུང་བ་རྣམས་ད་ཆ་རྩད་གཅོད་བྱེད་བཞིན་ཡོད། མེག་ལོཌ་ཁུལ་དུ་ནད་པ་ཇེ་མང་ཐོན་བཞིན་པར་མེག་ལོཌ་ཁྲོམ་གཞུང་གི་ལམ་ཟུར་ཅིག་ཉེན་ཚབས་ཆེ་བ་ Containment zone ཞེས་མི་ཡར་མར་འགྲུལ་བཞུད་བཀག་འགོག་བྱེད་དགོས་པ་དང་། མེག་ལོར་གྱི་ས་ཁུལ་དེ་ Buffer Zone ཞེས་ཉེན་ཚབས་ཅན་གྱི་ས་ཁུལ་ཆགས་པའི་གསལ་བསྒྲགས་དང་བཀག་སྡོམ་གནང་ཡོད།
དེར་རྟེན་དེ་གའི་ས་ཁུལ་གྱི་བོད་མི་རྣམས་ལ་གལ་ཏེ་ཆམས་ཚད་ལ་སོགས་པའི་ནད་རྟགས་མངོན་ཚེ་ཐོག་མར་སྨན་ཁང་དུ་མ་བསྐྱོད་གོང་འདི་ནས་ས་གནས་འགོ་འཛིན་ལས་ཁུངས་ནང་གི་སྨན་ཞབས་ཀྱི་ཁ་པར་ཨང་གྲངས་འདིའི་ ༨༤༤༨༤༡༥༦༣༡ ཐོག་འབྲེལ་བ་གནང་རོགས་ཞུ། དེའང་སྨན་ཞབས་ཁོང་ལ་ Whatsapp ཐོག་རང་ཉིད་ཀྱི་དཀའ་ངལ་གང་ཡོད་འཕྲིན་ཐུང་འཇོག་རོགས། གལ་ཏེ་ལག་ཐོག་ཁ་པར་སྐད་འཕྲིན་ཐོག་འབྲེལ་བ་གནང་མ་ཐུབ་པ་དང་དགུང་ན་བགྲེས་པ་རྣམས་ནས་ཁ་པར་གཏོང་བའི་ཐོག་འབྲེལ་བ་གནང་དགོས་པའི་འབོད་སྐུལ་ཞུས།
དེ་ནས་འབྲེལ་གཏུག་རྩད་གཅོད་དང་འབྲེལ་གལ་ཏེ་མི་གང་ཞིག་སོ་སོ་རང་ཉིད་ཀྱི་ཁྱིམ་ཚང་ནང་བཞུགས་ནས་བསྡད་པ་ཡིན་ན་འབྲེལ་གཏུག་རྩད་གཅོད་སྐབས་ཁྱིམ་ཚང་དེའི་མི་མ་གཏོགས་གཞན་ལ་ཉེན་ཁ་མེད་པ་རེད། དེ་མིན་དོན་མེད་ཕྱིར་འགྲུལ་བཞུད་བྱེད་ཅིང་མི་མང་པོ་ཐུགས་ཕྲད་བྱུང་ཡོད་ཚེ་འབྲེལ་གཏུག་རྩད་གཅོད་སྐབས་སུའང་མི་མང་པོ་དང་འབྲེལ་བ་ཆགས་ཡོང་དུས་དཀའ་ངལ་ཆེན་པོ་འཕྲད་ཀྱི་འདུག དེ་ཡིན་དུས་མི་མང་ནས་དོན་མེད་འགྲུལ་བཞུད་དང་མི་ཐུགས་ཕྲད། དེ་བཞིན་མི་མང་འདུ་འཛོམས་དང་། མཛད་སྒོ་དང་ཚོགས་འདུ། སྐྱེས་སྐར་སྲུང་རྩི་སོགས་འདུ་འཛོམས་མ་གནང་རོགས་ཅེས་ཞུ། ཆབས་ཅིག་འབྲེལ་གཏུག་རྩད་གཅོད་སྐབས་ནད་པ་རང་ཉིད་ནས་འགན་འཁྱེར་བའི་ཐོག་སུ་དང་སུར་འབྲེལ་བ་བྱུང་ཡོད་པ། ནད་རྟགས་ག་དུས་མངོན་པ་སོགས་སྦས་གསང་མེད་པ་གནང་ཐུབ་ན་དེས་སྤྱི་ཚོགས་ནང་ཁྱབ་གདལ་མ་འགྲོ་བར་ཕན་ཐོགས་ཆེན་པོ་ཡོད་ལ་དོགས་གཞི་ཡོད་པ་མང་པོ་ཅིག་ལ་བརྟག་དཔྱད་དང་སྨན་བཅོས་སོགས་དུས་ཐོག་བྱེད་ཐུབ་པར་ཕན་ཐོགས་ཡོད། དེ་མིན་ནད་རྟགས་མེད་ཟེར་ནས་མི་མང་པོར་ཐུགས་ཕྲད་བྱེད་ནས་མང་ཚོགས་ནང་ཁྱབ་གདལ་ཕྱིན་པ་ཡིན་ན་མེག་ལོཌ་ཁུལ་ཆ་ཚང་སྒོ་རྒྱག་དགོས་པའི་གནས་སྟངས་ཆགས་མ་སྲིད་པ་མིན་པས་ཚང་མས་གཟབ་གཟབ་གནང་རོགས། དེ་ནས་རྒྱ་གར་ལྷོ་ཕྱོགས་དང་འབྲེལ་ད་ཆ་གནས་སྟངས་ཡག་ཏུ་འགྲོ་བཞིན་ཡོད་ཀྱང་ཉམས་ཞིབ་པ་ཁག་ཅིག་གིས་ཀར་ཎ་ཊ་ཀ་ཁུལ་དུ་ཕྱི་ཟླ་ ༡་་༢ པའི་ནང་ནད་ཡམས་ཁྱབ་གདལ་ཆེ་རུ་འགྲོ་རྒྱུའི་ཉེན་ཁ་ཡོད་པས་ས་གནས་སུ་གནས་བཞུགས་བོད་མི་རྣམས་ནས་ལྷོད་གཡེང་ངམ་རྣམ་གཡེང་དུ་མ་ཤོར་བར་མུ་མཐུད་ནས་སྔོན་འགོག་ཐབས་ལམ་དང་གདོང་ལེན་མུ་མཐུད་ནས་གནང་རོགས་ཅེས་ཞུ།
མཐའ་དོན་མང་ཚོགས་ནས་ཁ་རས་གྱོན་ཡས། མིའི་དབར་རྒྱང་ཐག་འཇོག་ཡས། དེ་བཞིན་དོན་མེད་ཕྱིར་འགྲུལ་བཞུད་འཛེམ་ཡས་དེ་ཚོ་མུ་མཐུད་ནས་གནང་རོགས་ཅེས་དྲན་སྐུལ་ཞུ་བ་བཅས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་༣༧ པ་དེ་མཇུག་སྒྲིལ་གནང་། །
